Еврейҙарға 5:1—14
5 Кешеләр араһынан һайланған һәр баш рухани, бүләктәр килтереү һәм гонаһтар өсөн ҡорбандар салыу өсөн, кешеләр файҙаһына Аллаға хеҙмәт итергә билдәләнә.
2 Ундай баш рухани белмәйенсә гонаһ ҡылғандарҙы* йәлләй ала*, сөнки үҙенең дә йомшаҡ яҡтары бар икәнен белә.
3 Шунлыҡтан уға халыҡтың гонаһтары өсөн генә түгел, ә үҙенең гонаһтары өсөн дә ҡорбандар килтерергә кәрәк.
4 Кеше үҙен үҙе был хөрмәтле хеҙмәткә билдәләй алмай. Уны, Һарун осрағындағы кеүек, Алла ғына билдәләй ала.
5 Мәсих тә баш рухани дәрәжәһенә тиклем үҙен үҙе күтәрмәгән. Уны уға: «Һин — минең улым, бөгөн мин һинең атайың булып киттем», — тип әйткән Зат юғары күтәргән.
6 Ул шулай уҡ: «Һин — мәңгегә рухани, Мәликсадиҡ шикелле рухани», — тигән.
7 Мәсих ерҙә йәшәгән сағында ҡысҡырып илап, күҙ йәштәре түгеп үҙен үлемдән ҡотҡара алған Аллаға ҡайнар доға ҡылған*, һәм Алланан ҡурҡҡаны өсөн* уның үтенесе ҡабул ителгән.
8 Ул, Алланың Улы булһа ла, ғазаптар аша тыңлаусанлыҡҡа өйрәнгән.
9 Тыңлаусанлыҡта камиллыҡҡа өлгәшкәс, ул үҙенә тыңлаусан бөтә кешеләрҙең мәңгелек ҡотолоуы өсөн яуаплы булып киткән,
10 сөнки Алла уны Мәликсадиҡҡа оҡшаш баш рухани итеп билдәләгән.
11 Беҙ уның тураһында күпте әйтә алыр инек, ләкин аңлатыуы ауыр, сөнки һеҙ ишеткәндәрегеҙҙе аңларға тырышмайһығыҙ.
12 Һеҙҙең үҙегеҙгә инде уҡытыусы булырға ваҡыт, әммә һеҙҙе яңынан Алланың изге һүҙендәге төп хәҡиҡәттәргә өйрәтергә кәрәк, һеҙгә ҡаты аҙыҡ түгел, ә йәнә һөт кәрәк.
13 Һөт менән туҡланыуын дауам иткән кеше Алла һүҙе* менән таныш түгел, сөнки ул сабый.
14 Ҡаты аҙыҡ иһә — рухи яҡтан өлгөргән кешеләр өсөн, улар ваҡыт уҙыу менән үҙҙәренең аҡылын* яҡшыны ямандан айырырға күнектергән.
