Яхъяға бирелгән асылыш 4:1—11
4 Шунан мин күктә асыҡ ишек күрҙем һәм борғо тауышына оҡшаш беренсе тауышты ишеттем. Ул тауыш миңә: «Күтәрел бында, һәм мин һиңә булырға тейешле нәмәләрҙе күрһәтермен», — тип әйтте.
2 Шул мәлдә миңә изге рух тәьҫир итә башланы, һәм мин күктә тәхет торғанын һәм унда кемдеңдер ултырғанын күрҙем.
3 Тәхеттә ултырған Зат йәшмә һәм аҡыҡ* кеүек балҡый, ә тәхетте зөбәржәт төҫөндәге йәйғор уратып алған.
4 Шул тәхет тирәләй тағы 24 тәхет тора, ә тәхеттәрҙә өҫтәренә — аҡ кейем, баштарына алтын таж кейгән 24 аҡһаҡал ултыра.
5 Тәхеттән йәшен ялтлай, ауаздар һәм күк күкрәгән тауыштар килә, ә тәхет алдында Алланың ете рухын аңлатҡан ете яҡтыртҡыс янып тора.
6 Тәхет алдында бәллүргә оҡшаш быяла диңгеҙҙе хәтерләткән бер нәмә бар.
Уртала, тәхет торған ерҙә, һәм тәхет тирәләй дүрт тере зат* тора, улар алдан да, арттан да күҙҙәр менән тулы.
7 Уларҙың беренсеһе — арыҫланға, икенсеһе үгеҙгә оҡшаш, өсөнсөһөнөң йөҙө кешенеке кеүек, ә дүртенсеһе осоп барған бөркөткә оҡшаған.
8 Шул дүрт тере заттың һәр береһенең алтышар ҡанаты бар. (Ҡанаттары эстән дә, тыштан да күҙҙәр менән тулы.) Улар бер туҡтауһыҙ, көнө-төнө: «Элек тә булған, хәҙер ҙә бар, киләсәктә лә буласаҡ Сикһеҙ ҡөҙрәт эйәһе Йәһүә изге, изге, изге!» — тиҙәр.
9 Шул дүрт тере зат тәхеттә ултырған һәм мәңге йәшәгән Затҡа дан, хөрмәт һәм рәхмәт белдергән һайын,
10 теге 24 аҡһаҡал тәхеттә ултырған мәңге йәшәүсе Зат алдында теҙләнеп, йөҙ түбән ҡаплана*. Улар таждарын тәхет алдына ырғытып, былай тиҙәр:
11 «Аллабыҙ Йәһүә, һин данға, хөрмәткә һәм ҡөҙрәткә эйә булырға* лайыҡһың, сөнки бөтә нәмәне һин барлыҡҡа килтерҙең һәм бөтә нәмә һинең ихтыярың буйынса бар ителде һәм булдырылды».
