Контентә кеч

Икинҹи дәрәҹәли менју

Јеһованын Шаһидләри

Aзәрбајҹан (кирил әлифбасы)

Ҝөзәтчи Гүлләсинин Мүгәддәс Китаб Мәктәби Ҝилеадын 136-ҹы синфинин бурахылышы

Ҝөзәтчи Гүлләсинин Мүгәддәс Китаб Мәктәби Ҝилеадын 136-ҹы синфинин бурахылышы

2014-ҹү ил мартын 8-и, шәнбә ҝүнү Ҝилеад мәктәбинин 136-ҹы синфинин бурахылышы олду. Бу мәктәб беш ај давам етмишди. Һәмин мәктәбдә Јеһованын Шаһидләринин арасындан сечилән тәҹрүбәли хидмәтчиләр тәблиғ хидмәтиндә даһа сәмәрәли олмағы вә баҹы-гардашларынын иманыны мөһкәмләндирмәји өјрәнирләр. Програмы һәм Јеһованын Шаһидләринин тәлим мәркәзи олан Патерсонда (Нју-Јорк), һәм дә видеотранслјасија васитәсилә Бирләшмиш Штатларда, Канадада, Пуерто–Рико вә Јамајкада 11 548 нәфәр динләмишди.

«Онун кими дүшүнүн». Јеһованын Шаһидләринин Рәһбәрлик Шурасынын үзвү вә програмын сәдри олан Девид Сплејн өз нитгини Филиппилиләрә 2:5—7 ајәләриндәки «Мәсиһ Иса кими дүшүнүн» сөзләри әсасында гурмушду. Иса Мәсиһ јер үзүндә оланда о, өз мөвгејинә ҝөрә нараһат олмурду, әксинә, тәвазөкарҹасына өзүнү Аллаһын ишинә һәср етмишди.

Мисал үчүн, Иса Муса пејғәмбәрин Исраил халгына дедији сөзләрә истинад едәрәк һәр дәфә «јазылыб» демәклә Шејтанын бүтүн ширникдириҹи тәклифләрини рәдд етди (Матта 4:4, 7, 10; Ганунун тәкрары 6:13, 16; 8:3). Иса Аллаһын мәсһ олунмуш Оғлу кими өз адындан данышмаг игтидарында олса да, о, тәвазөкарҹасына Мусанын сөзләринә дәјәр вердијини ҝөстәрди. Ејнилә, биз дә башгаларынын баҹарыг вә габилијјәтләрини гәбул етмәли вә тәрифләмәји баҹармалыјыг.

Һәмчинин Сплејн гардаш билдирди ки, Иса һәтта јер үзүндә тәлим вердији мүддәтин сонунда белә дүзҝүн әһвал-руһијјә тәзаһүр етдирмишди. Дуасында Иса демишди: «Мән Сәни јердә шөһрәтләндирдим вә мәнә тапшырдығын иши баша чатдырдым. Инди исә Ата, дүнја јаранмаздан әввәл Сәнин јанында оларкән саһиб олдуғум шөһрәтлә мәни шөһрәтләндир, мәни јанына ҝөтүр» (Јәһја 17:4, 5). Иса өзүнә әлавә рүтбә ахтармырды. Онун јеҝанә хаһиши әввәлки вәзијјәтинә гајытмаг, јәни ҝөјә галхдыгдан сонра «әввәлки ишини ҝөрмәк» иди. Ејнилә, Ҝилеад мәктәбинин мәзунлары да һансыса мөвгејә јох, онлара һәвалә олунан ишә диггәтләрини ҹәмләмәклә Исаны тәглид едә биләрләр. Әввәлки тәјинатларына гајыданда, әлавә шәрәфли мәсулијјәтләр алмасалар белә, мүсбәт әһвал-руһијјәләрини горуја биләрләр.

«Һејфсиләнмәдән гурбан ҝәтирин». Рәһбәрлик Шурасынын Тәлим комитәсинин көмәкчиси Уилјам Маленфант тәләбәләри һәвари Павелин фәдакарлыг нүмунәсини тәглид етмәјә тәшвиг етди. Павел Аллаһа хидмәт етмәк үчүн ҝеридә гојдуғу шејләрә ҝөрә тәәссүфләнмәк әвәзинә, белә демишди: «Архада галан шејләри унудуб, ирәлидәки шејләрә ҹан атырам вә һәдәфә доғру... гачырам» (Филипилиләрә 3:13, 14).

Ҝилеј-ҝүзар етмәдән фәдакарлыг ҝөстәрмәклә тәләбәләр кечмишдә јашамыш вә индики Аллаһын садиг хидмәтчиләрини тәглид етмиш олаҹаглар. Маленфант гардаш ушаглыгдан Јеһоваја хидмәт едән Клер Гербер Мојер баҹынын сөзләрини ҝәтирир. О јазмышды: «Неҹә дә бөјүк шәрәфдир ки, 80 ил Јеһова Аллаһа сәдагәтлә хидмәт едәсән вә өтән илләрә дөнүб баханда зәррә гәдәр дә пешманчылыг чәкмәјәсән. Дүнјаја бир даһа ҝәлсәјдим, јенә ејни сечими едәрдим».

«Падшаһлығы мәләкләрлә вә мәләкләр кими вәз един». Рәһбәрлик Шурасынын үзвү олан Герит Лөш гардаш тәблиғ едәнләрин ики хүсуси үстүнлүјүндән бәһс едәрәк тәләбәләри бу хидмәти дәјәрләндирмәјә көмәк етди. Илк нөвбәдә, онлар Падшаһлыг һагда хош хәбәри башгаларына чатдырмагла Аллаһын мәләкләри кими чыхыш едирләр, чүнки Мүгәддәс Китабда «мәләк» кими тәрҹүмә олунан ибрани вә јунан сөзләри һәмчинин «елчи» мәнасыны да верир. Икинҹиси, онлар руһани варлыгларын, јәни мәләкләрин рәһбәрлији алтында тәблиғ ишини һәјата кечирирләр, неҹә ки вахтилә Филип едирди (Һәвариләрин ишләри 8:26—35).

Лөш гардаш Јеһованын Шаһидләринин хош хәбәри тәблиғ едәркән башларына ҝәлән бир нечә мараглы һадисәни данышды. Мәсәлән, Мексикадан олан Габина адлы бир Шаһид, адәтән, хидмәт заманы гапыны бир вә ја ики дәфә дөјүрдү, анҹаг бир дәфә о, дөрд дәфә дөјдү. Гапыны ачан киши индиҹә өзүнә суи-гәсд етмәк истәдијини билдирди. Һәмин киши деди: «Сиз дөрдүнҹү дәфә гапыны дөјәндә кәндири артыг бојнума кечирмишдим. Анҹаг гапыны ачмаг үчүн ону бојнумдан чыхартдым. Тәкид ҝөстәрдиниз үчүн сағ олун, јохса инди һәјатда јох идим».

Һәрчәнд бу кими һаллар бәзән садәҹә тәсадүф ола биләр, анҹаг билирик ки, чох вахт бу белә олмур. Бу кими һадисәләр ҝөстәрир ки, үмумдүнја тәблиғ ишинә Аллаһын мәләкләри рәһбәрлик едир (Вәһј 14:6).

«Һөрмәтли олан хејир-дуаланаҹаг». Ҝилеад мәктәбинин тәлиматчысы Мајкл Бернетт Јәһуданын нәслиндән «гардашлары ичиндә ән һөрмәтлиси» олан Јабесин нүмунәсини нәзәрдән кечирәрәк бу мөвзуну ачыглады. Јабес Аллаһа дуа едирди: «Нә олар, мәнә хејир-дуа вер, торпағымы ҝенишләндир, мәнә дајаг ол» (1 Салнамәләр 4:9, 10).

Тәләбәләр Аллаһа конкрет дуалар етмәклә Јабесин лајигли нүмунәсини тәглид едә биләрләр, хүсусилә дә Ҝилеад мәктәбиндә алдыглары биликләри лајигинҹә тәтбиг етмәкдә Ондан көмәк истәмәлидирләр. Һәмчинин онлар Аллаһдан хаһиш едә биләрләр ки, онлары бәдбәхтликләрдән горусун. Онлар Аллаһдан бу бәдбәхтликләри тамамилә арадан галдырмасыны јох, онларын нәтиҹәләринә таб ҝәтирмәкдә вә мәјуслуға гапылмамагда көмәк етмәсини хаһиш едә биләрләр. Аллаһ Јабесин дуаларына ҹаваб вердији кими, Ҝилеад мәзунларынын да дуаларыны ҹавабландыраҹаг.

«Руһун аловуну сөндүрмәјин». Ҝилеад мәктәбинин тәлиматчысы, еләҹә дә Тәлим комитәсинин көмәкчиси Марк Нумар өз мәрузәсини 1 Салониклиләрә 5:16—19 ајәләринә әсасландырмышды. Аловун сөнмәмәси үчүн јанаҹаг, оксиҝен вә гығылҹым лазымдыр. Хидмәтдә дә даим шөвглү олмаг үчүн тәләбәләрә мәһз һәмин компонентләр ҝәрәкдир.

Биринҹиси, «һәмишә севинин» (1 Салониклиләрә 5:16). Севинҹ шөвг үчүн јанаҹагдыр. Буна Јеһованын рәғбәтини газанмағын неҹә бөјүк хејир-дуа олдуғу барәдә дүшүнмәклә наил олмаг олар. Икинҹиси, «даима дуа един» (1 Салониклиләрә 5:17). Дуа оксиҝен кимидир. Онсуз јанма просеси баш вермәз. Јахшы оларды ки, биз даима дуаларда үрәјимизи Аллаһа бошалдаг. Үчүнҹүсү, «һәр шејә ҝөрә тәшәккүр един» (1 Салониклиләрә 5:18). Гәдирбилән үрәк Јеһова вә баҹы-гардашларымызла сәмими мүнасибәтләр үчүн бир гығылҹым олаҹаг. Нумар гардаш сөзүнә давам едәрәк деди: «Сојуг тәнгид әвәзинә, сәмими миннәтдарлыг һиссләрини горујуб сахлајын».

«Ҝөјләрлә бирҝә Јеһоваја һәмд едирик». Теократик мәктәбләрин тәлиматчысы Сем Роберсон өз нитгинә ҝүнәшин, ајын вә улдузларын Јеһоваја һәмд етдијинә дәлаләт едән ајәләрин мүзакирәси илә башлады (Мәзмур 19:1; 89:37; 148:3). О, тәләбәләрин дә Јеһоваја һәмд етмәк имканлары олдуғуну деди вә онлардан хидмәтдә баш вермиш һадисәләри сәһнәләшдирмәји хаһиш етди. Тәләбәләрдән бири машыныны сахламышды ки, әлил арабасында отуран киши јолу кечә билсин. Һәмин киши әл едәрәк миннәтдарлығыны билдирмишди. Тәләбә дә нәзакәтинә ҝөрә она тәшәккүр етмишди. Нәтиҹәдә, сөһбәт јаранмышды вә киши Мүгәддәс Китабы өјрәнмәјә разылыг вермишди. Нөвбәти һәфтәләр әрзиндә Ҝилеад мәктәбинин тәләбәси һәмин кишинин јанына ҝәлән бир чох инсанларла да сөһбәт едә билмишди. Нәтиҹәдә, једди нәфәр дә Мүгәддәс Китабы өјрәнмәјә башламышды. Бүтүн бунлар исә тәсадүфи сөһбәтдән башламышды.

«Аллаһын тәлими сајәсиндә мөһкәмләнин». Нәшријјат комитәсинин көмәкчиси Доналд Гордон ики ҹүтлүкдән мүсаһибә ҝөтүрдү. Гардашлардан бири тәлим заманы Ефеслиләрә 3:16—20 ајәләринин дәфәләрлә арашдырылдығыны хатырлады. Бу, тәләбәләрә «дахили [варлыгларыны мөһкәмләндирмәјә]», ејни заманда да тәвазөкар, әлчатан олмаға вә Јеһованын һәр бир хидмәтчисинә һәвалә етмәк үчүн һәлә чох иши олдуғуну дәрк етмәјә көмәк етди. Баҹылардан биринин чох хошуна ҝәлмишди ки, мүәллим тәләбәләри инкишаф үчүн јер олмајан балаҹа банкада бөјүк балыг олмаға јох, уҹсуз-буҹагсыз океанда балаҹа балыг олмаға тәшвиг етмишди. Баҹы әлавә едиб деди: «Мән баша дүшдүм ки, Јеһованын тәшкилатында “кичик кими” даврансам, Аллаһ мәнә руһән инкишаф етмәјә көмәк едәҹәк».

«Гој Јеһова сизи јахшылыгла хатырласын». Рәһбәрлик Шурасынын үзвү Марк Сандерсон програмын әсас бәнди илә чыхыш етди. Онун мөвзусу Неһемјанын дуасындакы сөзләр олду: «Еј Аллаһым,.. мәни јахшылыгла хатырла!» (Неһемја 5:19; 13:31). Неһемја Јеһованын ону вә ја хидмәтдәки әмәјини унудаҹағындан горхмурду. Әксинә, о, Аллаһдан ону хатырламасыны вә хејир-дуаландырмасыны хаһиш едирди.

Ејнилә, тәләбәләр әмин ола биләрләр ки, әҝәр онлар Ҝилеад мәктәбиндә алдыглары әсас дәрсләри јадда сахласалар, Јеһова онлары јахшылыгла хатырлајаҹаг вә сәхавәтлә мүкафатландыраҹаг. Мисал үчүн, унутмаг лазым дејил ки, ибадәтдә әсас амил Јеһоваја мөһкәм вә сәмими мәһәббәт олмалыдыр (Марк 12:30). Ибраһим Јеһованы бүтүн үрәји илә севирди вә Аллаһ ону хејирхаһлыгла хатырлајырды. Ибраһимин өлүмүндән мин ил сонра да Аллаһ ону досту адландырмышды (Јешаја 41:8).

Даһа сонра Сандерсон тәләбәләрә јахынларыны, хүсусилә дә баҹы-гардашларыны севмәјин ваҹиблијини хатырлатды (Марк 12:31). «Гулдурларын әлинә дүшмүш адамын јахыны» олан хејирхаһ самаријалы кими, онлар да тәшәббүс ҝөстәрмәли вә еһтијаҹы оланлара биринҹи көмәк әли узатмалыдырлар (Лука 10:36). О, вилајәт нәзарәтчиси кими хидмәт едән Ҝилеад мәктәбинин мәзуну Николас Ковалакын нүмунәсини ҝәтирди. Ковалак гардаш өз мәһәббәти вә мүлајимлији илә танынырды. Бир дәфә о, сәјјар нәзарәтчини вә онун һәјат јолдашыны хидмәтдә даһа сәјли олмаға тәшвиг едәрәк демишди: «Хидмәтә ҝүнүн, һәфтәнин, ајын вә илин әввәлиндән башлајын». Анҹаг сонрадан бир нечә ҝүн ичиндә баҹыны мүшаһидә етдикдән сонра деди: «Дедикләримин һамысыны јадындан чыхарт. Сиз онсуз да һәддән артыг ҹанфәшанлыг едирсиниз. Сүрәтинизи азалдын ки, даһа чох хидмәт едә биләсиниз». Онун хејирхаһ вә анлајышла верилән мәсләһәти баҹыја нөвбәти онилликләр әрзиндә таммүддәтли хидмәтдә галмаға көмәк етди.

Сонда Сандерсон гардаш мәзунлары алдыглары тәлимә ујғун давранмаға, јәни башгаларыны өјрәдиб тәлим вермәјә тәшвиг етди (2 Тимотејә 2:2). Өз тәјинатларында хидмәт едәрәк онлар баҹы-гардашлары мөһкәмләндирә биләр вә әмин ола биләрләр ки, Јеһова онлары јахшылыгла хатырлајаҹаг (Мәзмур 20:1—5).

Јекун. Тәләбәләр дипломларыны алдыгдан сонра онлардан бири миннәтдарлыг мәктубу охуду. Даһа сонра он беш мәзун «Јеһованы нәғмәләрдә тәрәннүм един» китабындан «Чобанлар — “инсанлар тимсалында һәдијјәләр”» адлы 123 нөмрәли маһныны а-капелла охудулар.