Контентә кеч

Мүндәриҹаты ҝөстәр

 ФӘСИЛ 5

Дүнјадан ајры дур

Дүнјадан ајры дур

«Дүнјаја мәхсус дејилсиниз» (ЈӘҺЈА 15:19).

1. Иса өлүмүндән әввәлки ҝеҹә нә барәдә нараһат олмушду?

ИСА МӘСИҺИН өлүмүндән әввәлки ҝеҹә иди. О билирди ки, шаҝирдләриндән ајрылаҹаг. Амма шаҝирдләринин ҝәләҹәји ону нараһат едирди. Иса онлара деди: «Сиз дүнјаја мәхсус дејилсиниз» (Јәһја 15:19). Сонра о, Атасына онлар һаггында дуа едиб деди: «Онлар да мәним кими дүнјаја мәхсус дејилләр» (Јәһја 17:15, 16). Иса нәји нәзәрдә тутурду?

2. Иса Мәсиһ «дүнја» дејәндә нәји нәзәрдә тутурду?

2 Иса Мәсиһ «дүнја» дејәндә Аллаһы танымајан вә Шејтанын идарә етдији инсанлары нәзәрдә тутурду (Јәһја 14:30; Ефеслиләрә 2:2; Јагуб 4:4; 1 Јәһја 5:19). Биз дүнјаја мәхсус олмамаг үчүн нә етмәлијик? Бу фәсилдә нөвбәти саһәләри нәзәрдән кечирәҹәјик: биз Аллаһын Падшаһлығына садиг галмалыјыг вә сијасәтдә битәрәф олмалыјыг. Дүнјанын руһуна мүгавимәт ҝөстәрмәлијик. Ҝејимимиз вә хариҹи ҝөркәмимиз әдәбли олмалыдыр, пул мәсәләсинә таразлы јанашмалыјыг. Биз һәмчинин Аллаһын вердији бүтүн јараглары ҝејинмәлијик. (16-ҹы әлавәјә бах.)

 АЛЛАҺЫН ПАДШАҺЛЫҒЫНА САДИГ ОЛ

3. Иса Мәсиһ сијасәтә неҹә јанашырды?

3 Иса Мәсиһ јер үзүндә оланда ҝөрүрдү ки, инсанларын дәрди-сәри башындан ашыр, һәјаты ағыр кечир. О, инсанларын һалына аҹыјырды, онлара көмәк етмәк истәјирди. Анҹаг Иса онларын һөкмдары олмады. О билирди ки, инсанлар Аллаһын Падшаһлығына, јәни һөкумәтинә мөһтаҹдырлар. Иса һәмин Падшаһлығын Падшаһы олаҹагды вә о, әсасән, бу Падшаһлыг һаггында тәблиғ едирди (Дәнјал 7:13, 14; Лука 4:43; 17:20, 21). Иса сијасәтә гарышмырды, һәмишә битәрәф галырды. О, Рома валиси Понти Пилатын һүзурунда дуранда демишди: «Мәним Падшаһлығым бу дүнјадан дејил» (Јәһја 18:36). Онун шаҝирдләри дә битәрәф идиләр. Бир китабда дејилир ки, илк мәсиһиләр сијаси вәзифә тутмурдулар («On the Road to Civilization»). Бу ҝүн дә һәгиги мәсиһиләр ејни ҹүр давранырлар. Биз сәдагәтлә Аллаһын Падшаһлығынын тәрәфиндә дуруруг вә бу дүнјанын сијаси мәсәләләриндә битәрәф галырыг (Мәтта 24:14).

Нәјә ҝөрә Аллаһын Падшаһлығынын тәрәфиндә олдуғуну изаһ едә билирсән?

 

4. Һәгиги мәсиһиләр Аллаһын Падшаһлығыны неҹә дәстәкләјирләр?

4 Сәфирләр хариҹи өлкәдә өз дөвләтләрини тәмсил едирләр. Буна ҝөрә дә онлар һәмин өлкәнин сијасәтинә гарышмырлар. Иса Мәсиһлә ҝөјдә идарә етмәјә үмид едән мәсһ олунмушлар да ејни мөвгени тутурлар. Һәвари Булус мәсһ олунмуш мәсиһиләрә јазмышды: «Биз Мәсиһин адындан хидмәт едән сәфирләрик» (2 Коринфлиләрә 5:20). Мәсһ олунмушлар Аллаһын һөкумәтини тәмсил едирләр. Онлар бу дүнјанын сијасәтинә вә дөвләт ишләринә гарышмырлар (Филиппилиләрә  3:20). Әксинә, онлар милјонларла инсана Аллаһын һөкумәти барәдә өјрәнмәјә көмәк едирләр. Аллаһын вәд етдији јени дүнјада әбәди јашамаға үмид едән «башга гојунлар» мәсһ олунмушлары дәстәкләјирләр. Онлар да битәрәф галырлар (Јәһја 10:16; Мәтта 25:31—40). Ајдындыр ки, һәгиги мәсиһи олан кәс бу дүнјанын сијаси ишләринә гарышмајаҹаг. (Әшија 2:2—4 ајәләрини оху.)

5. Мәсиһиләрин мүһарибәјә ҝетмәмәсинин сәбәби нәдир?

5 Һәгиги мәсиһиләр бүтүн диндашларына аилә үзвү кими бахырлар. Һансы өлкәдән, һансы халгдан олмаларындан асылы олмајараг, мәсиһиләрин арасында бирлик һөкм сүрүр (1 Коринфлиләрә 1:10). Әҝәр биз мүһарибәјә ҝетсәк, онда өз аиләмизә, өз диндашымыза гаршы вурушмуш олаҹағыг. Иса Мәсиһ исә демишди ки, биз онлары севмәлијик (Јәһја 13:34, 35; 1 Јәһја 3:10—12). Бундан башга Иса демишди ки, онун  шаҝирдләри дүшмәнләрини дә севмәлидир (Мәтта 5:44; 26:52).

6. Јеһованын хидмәтчиләри һөкумәтә неҹә јанашыр?

6 Мәсиһиләр битәрәф галсалар да, јахшы вәтәндаш олмаға чалышырлар. Мәсәлән, биз ганунлара табе олараг, верҝиләри өдәјәрәк һөкумәтә һөрмәт етдијимизи ҝөстәририк. Анҹаг «Аллаһа мәхсус шејләри» һәмишә Аллаһа веририк (Марк 12:17; Ромалылара 13:1—7; 1 Коринфлиләрә 6:19, 20). Аллаһа мәхсус шејләрә Она олан севҝимиз, итаәтимиз вә ибадәтимиз дахилдир. Биз Јеһоваја итаәтсизлик етмәкдәнсә, ҹанымыздан кечмәјә һазырыг (Лука 4:8; 10:27; Һәвариләрин ишләри 5:29; Ромалылара 14:8 ајәләрини оху).

ДҮНЈАНЫН РУҺУНА МҮГАВИМӘТ ҜӨСТӘРИН

7, 8. Бу дүнјанын руһу нәдир вә инсанлара неҹә тәсир едир?

7 Шејтан дүнјасындан ајры дурмаг о демәкдир ки, бу дүнјанын руһунун бизи идарә етмәсинә јол вермирик. Дүнјанын руһу Шејтандан гајнагланан дүшүнҹә тәрзи вә давранышдыр. Јеһоваја хидмәт етмәјән инсанлары бу руһ идарә едир. Лакин мәсиһиләр бу руһа мүгавимәт ҝөстәрирләр. Һәвари Булус демишкән, «биз дүнјанын руһуну јох, Аллаһдан ҝәлән руһу алдыг» (1 Коринфлиләрә 2:12; Ефеслиләрә 2:2, 3; 17-ҹи әлавәјә бах).

8 Дүнјанын руһу инсанларда худбинлик, гүрур вә дикбашлыг јарадыр. Онлара ашылајыр ки, Аллаһа итаәт етмәк лазым дејил. Шејтан истәјир ки, инсанлар нәтиҹәсини дүшүнмәдән үрәкләри истәјәни етсинләр вә дүшүнсүнләр ки, ҹисмин истәјини, ҝөзләрин истәјини јеринә  јетирмәк дүнјада ән ваҹиб шејдир (1 Јәһја 2:16; 1 Тимутијә 6:9, 10). Шејтан, хүсусилә дә Јеһованын хидмәтчиләрини аздырмаға вә өз фикрини онлара ашыламаға чалышыр (Јәһја 8:44; Һәвариләрин ишләри 13:10; 1 Јәһја 3:8).

9. Дүнјанын руһу бизә неҹә тәсир ҝөстәрә биләр?

9 Бу дүнјанын руһу нәфәс алдығымыз һава кими һәр јандадыр. Әҝәр биз мүгавимәт ҝөстәрмәсәк, бу руһ бизә дә тәсир едәҹәк. (Мәсәлләр 4:23 ајәсини оху.) Бу, әввәлҹә зәрәрсиз ҝөрүнән шејләрдән башлајаҹаг. Мәсәлән, биз Јеһоваја ибадәт етмәјән инсанларын фикирләринин, онларын әһвали-руһијјәсинин тәсири алтына дүшәҹәјик (Мәсәлләр 13:20; 1 Коринфлиләрә 15:33). Јахуд биздә порнографијаја, дөнүк фикирләрә вә ја зоракы идман нөвләринә мејил јаранаҹаг. (18-ҹи әлавәјә бах.)

10. Дүнјанын руһуна неҹә мүгавимәт ҝөстәрә биләрик?

10 Бәс дүнјанын руһунун тәсири алтына дүшмәмәк үчүн нә етмәлијик? Биз Јеһоваја јахын олмалы вә Онун һикмәтилә јашамалыјыг. Дуада һәмишә мүгәддәс руһ истәмәлијик вә хидмәтдә фәал олмалыјыг. Јеһова каинатда ән гүдрәтли варлыгдыр. Биз әминик ки, О бизә дүнјанын руһуна мүгавимәт ҝөстәрмәјә көмәк едә биләр (1 Јәһја 4:4).

АЛЛАҺЫ ШӘРӘФЛӘНДИРӘН ҜЕЈИМ

11. Дүнјанын руһу инсанларын ҝејиминә неҹә тәсир едир?

11 Биз дүнјаја мәхсус олмадығымызы ҝејимимиз вә хариҹи ҝөркәмимизлә ҝөстәрә биләрик. Бу дүнјада инсанлар елә ҝејинирләр ки, диггәти өзләринә ҹәлб етсинләр,  башгаларында әхлагсыз фикирләр ојатсынлар, ҹәмијјәтә гаршы чыхдыгларыны ҝөстәрсинләр вә ја пулларыны нүмајиш етдирсинләр. Еләләри дә вар ки, неҹә ҝөрүндүкләри веҹләринә дејил. Онлар сәлигәсиз вә чиркли ҝејинирләр. Бизим ҝејимимиздә вә хариҹи ҝөрүнүшүмүздә бу шејләрин һеч биринә јол верилмәмәлидир.

Ҝејимимлә Јеһоваја шәрәф ҝәтирирәм?

12, 13. Ҝејим сечәркән һансы принсипләрин бизә көмәји дәјәҹәк?

12 Мәсиһиләр Јеһоваја хидмәт етдикләри үчүн һәмишә тәмиз, сәлигәли, зөвглә вә вәзијјәтә ујғун ҝејинмәлидирләр. Биз абыр-һәја илә, ағыл-камалла  ҝејинирик ки, инсанлар мөмин олдуғумузу ҝөрсүнләр (1 Тимутијә 2:9, 10; Јәһуда 21).

13 Бизим ҝејимимиз инсанларын Јеһоваја вә Онун халгына олан мүнасибәтинә тәсир едир. Биз һәр шеји елә етмәк истәјирик ки, нәтиҹәдә, Аллаһ шәрәфләнсин (1 Коринфлиләрә 10:31). Абыр-һәја илә ҝејинмәк о демәкдир ки, биз башгаларынын фикирләринә вә һиссләринә һөрмәт едирик. Демәли, өзүмүзә ҝејим сечәндә, јахуд хариҹи ҝөрүнүшүмүзлә бағлы гәрар верәндә бунун башгаларына да тәсири олаҹағыны нәзәрә алмалыјыг (1 Коринфлиләрә 4:9; 2 Коринфлиләрә 6:3, 4; 7:1).

14. Мәсиһи фәалијјәти үчүн ҝејим сечәркән нә барәдә дүшүнмәлијик?

14 Ибадәт ҝөрүшләринә вә ја хидмәтә ҝедәндә неҹә ҝејинирик? Ҝејимимизлә диггәти өзүмүзә ҹәлб едирик? Башгалары бизим ҝејимимизи ҝөрәндә хәҹаләт чәкмир? Ҝејимин шәхси мәсәлә олдуғуну, һеч кимә аидијјәти олмадығыны дүшүнүрүк? (Филиппилиләрә 4:5; 1 Бутрус 5:6). Дүздүр, биз һамымыз јахшы ҝөрүнмәк истәјирик, амма бизи ҝөзәлләшдирән мәсиһи кејфијјәтләридир. Јеһова бизә баханда биздә бу кејфијјәтләри ахтарыр. Онлар бизим дахилән неҹә инсан олдуғумузу, дахили варлығымызы ҝөстәрир. Бу кејфијјәтләр «Аллаһын ҝөзүндә чох гијмәтли»дир (1 Бутрус 3:3, 4).

15. Нәјә ҝөрә Јеһова бизә нә ҝејинәҹәјимизи, неҹә ҝөрүнәҹәјимизи диктә етмир?

15 Јеһова бизә нәји ҝејиниб-ҝејинмәмәклә бағлы ганунлар сијаһысы вермәјиб. О бизә Мүгәддәс Китаб принсипләри вериб, онлар бизә дүзҝүн гәрар вермәјә  көмәк едә биләр (Ибраниләрә 5:14). Аллаһ истәјир ки, һәм кичик, һәм дә бөјүк, башга сөзлә, бүтүн гәрарларымыз Она вә инсанлара олан мәһәббәтимизә әсаслансын. (Марк 12:30, 31 ајәләрини оху.) Бүтүн дүнјада Јеһованын халгы мәдәнијјәтләриндән вә зөвгләриндән асылы олараг мүхтәлиф ҹүр ҝејинирләр. Бу мүхтәлифлик ҝөз охшајыр.

ПУЛА ТАРАЗЛЫ МҮНАСИБӘТ

16. Исанын дедијиндән фәргли олараг, бу дүнјада пула һансы мүнасибәт вар? Биз өзүмүзә һансы суаллары вермәлијик?

16 Шејтан истәјир ки, инсанлар хошбәхтлији пулда,  вар-дөвләтдә ҝөрсүнләр. Амма Јеһованын хидмәтчиләри билир ки, бу белә дејил. Биз Исанын сөзләринә етибар едирик: «Инсанын вар-дөвләти башындан ашыб-дашса да, һәјаты бундан асылы дејил» (Лука 12:15). Пул инсана һәгиги хошбәхтлик ҝәтирмир. Пулла әсл дост, гәлб раһатлығы, әбәди һәјат алмаг олмаз. Дүздүр, јашамаг, һәјатдан зөвг алмаг үчүн бизә мүәјјән шејләр лазымдыр. Амма Иса дејирди ки, Аллаһла јахын мүнасибәтимиз олса вә ибадәти һәјатымызда һәр шејдән үстүн тутсаг, хошбәхт олаҹағыг (Мәтта 5:3; 6:22). Өзүндән соруш: «Бу дүнјанын пула олан мүнасибәти мәнә дә тәсир едиб? Мәним сөһбәтләримдә, фикирләримдә пул әсас јери тутур?» (Лука 6:45; 21:34—36; 2 Јәһја 6).

17. Пула дүнјадакы кими јанашмасаг, һәјатымыз неҹә олар?

17 Диггәтимизи хидмәтә ҹәмләсәк вә пула бу дүнјанын јанашдығы кими јанашмасаг, һәјатымыз мәналы олаҹаг (Мәтта 11:29, 30). Биз һәјатдан мәмнунлуг дујаҹағыг, үрәјимиз раһат олаҹаг (Мәтта 6:31, 32; Ромалылара 15:13). Маддијјата ҝөрә чох нараһат олмајаҹағыг. (1 Тимутијә 6:9, 10 ајәләрини оху.) Әлиачыг олуб, хошбәхт олаҹағыг (Һәвариләрин ишләри 20:35). Үстәлик, севдијимиз инсанларла даһа чох вахт кечирә биләҹәјик. Ҝеҹәләри дә раһат јатаҹағыг (Ваиз 5:12).

БҮТҮН ЈАРАГЛАРЫ ӘЈНИНӘ ҜЕЈИН

18. Шејтан бизә нә етмәјә чалышыр?

18 Шејтан бизим Јеһова илә мүнасибәтләримизи корламаға чалышыр. Она ҝөрә дә биз бу мүнасибәтләримизи  горумаг үчүн әлимиздән ҝәләни етмәлијик. Биз шәр руһи гүввәләрә гаршы мүбаризә апарырыг (Ефеслиләрә 6:12). Шејтан вә ҹинләр бизим хошбәхт олмағымызы, әбәди јашамағымызы истәмир (1 Бутрус 5:8). Бу ҝүҹлү дүшмәнләр бизә гаршы вурушурлар. Амма Јеһованын көмәјилә биз бу дөјүшдә галиб ҝәлә биләрик.

19. Ефеслиләрә 6:14—18 ајәләриндә мәсиһинин ҝејинмәли олдуғу јараглар неҹә тәсвир олунур?

19 Гәдимдә әсҝәрләр дөјүшдә өзләрини горумаг үчүн јараг-әсләһә ҝөтүрүрдүләр, биз дә Јеһованын вердији «бүтүн јараглары» әјнимизә ҝејинмәлијик (Ефеслиләрә 6:13). Бу бизи горујаҹаг. Ефеслиләрә 6:14—18 ајәләриндә бу јараг һаггында јазылыб: «Һәгигәт гуршағыны белинизә бағлајыб, салеһлик зиреһини дөшүнүзә тахыб, сүлһ мүждәсини тәблиғ етмәк һазырлығыны ајағыныза ҝејиниб дәјанәтлә дајанын. Бунлардан башга бөјүк иман галханыны ҝөтүрүн, онунла сиз Шәририн бүтүн аловлу охларыны сөндүрәҹәксиниз. Һәмчинин хилас дәбилгәсини вә руһун гылынҹыны, јәни Аллаһын сөзүнү ҝөтүрүн. Ејни заманда һәр ан руһун тәсирилә һәр ҹүр диләк вә јалварышла дуа един».

20. Јарагларын бизи горумасы үчүн нә етмәлијик?

20 Әсҝәр јараглардан бирини јаддан чыхарса, бәдәнин һансыса һиссәси мүдафиәсиз галаҹаг вә дүшмән ону һәмин јердән вураҹаг. Биз дә бу јарагларын бизи горумасыны истәјириксә, онларын һеч бирини унутмамалыјыг. Бу јараглар һәмишә әјнимиздә олмалыдыр вә онлары јахшы вәзијјәтдә сахламалыјыг. Бизим дөјүшүмүз Шејтан дүнјасы мәһв олана гәдәр, Шејтан вә ҹинләр јер үзүндән ҝөтүрүләнәдәк  давам едәҹәк (Вәһј 12:17; 20:1—3). Буна ҝөрә дә пис арзуларла, јахуд башга зәифликлә мүбаризә апарырыгса, тәслим олмамалыјыг (1 Коринфлиләрә 9:27).

21. Шејтанла мүбаризәдә неҹә галиб ҝәлә биләрик?

21 Өзүмүзә галса, биз Шејтандан ҝүҹлү дејилик, лакин Јеһованын көмәјилә ҝүҹлү ола биләрик. Садиг галмаг үчүн биз Јеһоваја дуа етмәли, Онун Кәламыны өјрәнмәли вә баҹы-гардашларла үнсијјәтдә олмалыјыг (Ибраниләрә 10:24, 25). Бу бизә Аллаһа садиг галмаға вә иманымызы мүдафиә етмәк үчүн һазыр олмаға көмәк едәҹәк.

ИМАНЫНЫ МҮДАФИӘ ЕТМӘЈӘ ҺАЗЫР ОЛ

22, 23. а) Иманымызы мүдафиә етмәјә неҹә һазыр ола биләрик? б) Нөвбәти фәсилдә нәдән данышылаҹаг?

22 Биз һәр заман иманымызы мүдафиә етмәјә һазыр олмалыјыг (Јәһја 15:19). Јеһованын Шаһидләринин бәзи мәсәләләрдә тутдуғу мөвге ҹәмијјәтин мөвгејиндән фәргләнир. Өзүндән соруш: «Мән нәјә ҝөрә бу мөвгеји тутдуғуму баша дүшүрәм? Мүгәддәс Китабын, садиг вә ағыллы нөкәрин һәгигәти өјрәтдијинә әминәм? Јеһованын Шаһиди олмағымла фәхр едирәм? (Зәбур 34:2; Мәтта 10:32, 33). Етигадларымы башгаларына изаһ едә биләрәм?» (Мәтта 24:45; Јәһја 17:17; 1 Бутрус 3:15 ајәсини оху).

23 Бир чох һалларда дүнјадан ајры галмаг үчүн нә етмәли олдуғумузу дәгиг билирик. Лакин бәзи һалларда буну конкрет билмирик. Шејтан бизи мүхтәлиф јолларла тәләјә салмаг истәјир. Бу тәләләрдән бири дә әјләнҹәдир. Дүзҝүн әјләнҹәни неҹә сечә биләрик? Буну нөвбәти фәсилдә ҝөрәҹәјик.