Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Иман өрнәкләри

 ОН СӘККИЗИНҸИ ФӘСИЛ

О, ешитдикләринин мәнасы үзәриндә дүшүнүрдү

О, ешитдикләринин мәнасы үзәриндә дүшүнүрдү

1, 2. Мәрјәмҝил һара ҝедир вә нәјә ҝөрә Мәрјәмә јол ҝетмәк чәтиндир?

МӘРЈӘМ нечә саатдыр ки, улағын белиндә јол ҝедир, о, чох јорғундур. Јусиф габагда ҝедир. Онларын сәфәри Бејтләһмәдир. Мәрјәм јенә бәтниндә ушағын тәрпәндијини һисс едир.

2 Мәрјәм һамиләлијинин сонунҹу ајындадыр. Инҹилдә јазылыб: «Мәрјәм бир аздан доғмалы иди» (Лука 2:5). Јусифлә Мәрјәм тарлаларын јанындан кечдикҹә јәгин јер шумлајан, тохум сәпән кәндлиләр Мәрјәми ҝөрүб фикирләширләр ки, нә үчүн бу гадын белә вәзијјәтдә јола чыхыб. Доғрудан да, Мәрјәми Насирәдән чыхыб узаг сәфәрә јолланмаға нә вадар едиб?

3. Мәрјәм һансы тапшырығы алмышды вә бу фәсилдә биз онун һаггында нә өјрәнәҹәјик?

3 Бир нечә ај бундан габаг бу ҹаван јәһуди гыз һәлә һеч кәсин алмадығы бир тапшырыг алмышды. О, Аллаһын Оғлуну, ҝәләҹәк Мәсиһи дүнјаја ҝәтирмәли иди (Лука 1:35). Доғуш вахты јахынлашанда бу сәфәрә чыхмаг лазым ҝәлди. Гаршыда Мәрјәми иманыны сынаға чәкән чәтинликләр ҝөзләјир. Ҝәлин ҝөрәк она иманыны горумаға нә көмәк едир.

Бејтләһм сәфәри

4, 5. а) Јусифлә Мәрјәм нәјә ҝөрә Бејтләһмә ҝедир? б) Сезарын фәрманы һансы пејғәмбәрлијин јеринә јетмәсинә јол ачды?

4 Бу әрәфәдә јола чыхан тәкҹә Јусифлә Мәрјәм дејил. Бу јахынларда Сезар Август өлкә әһалисинин сијаһыја алынмасы илә бағлы фәрман вериб. Фәрмана ҝөрә, һәр кәс әслән мәнсуб олдуғу шәһәрә ҝедиб гејдијјатдан кечмәлидир. Јусиф дә бу әмрә табе олду. Мүгәддәс Китабда јазылыб: «Јусиф дә Давуд евиндән вә нәслиндән олдуғуна ҝөрә Ҹәлиләнин Насирә шәһәриндән чыхыб Јәһудијјәјә, Давудун Бејтләһм адланан шәһәринә јола дүшдү» (Лука 2:1—4).

5 Фәрманын мәһз бу вахт чыхмасы тәсадүфи дејилди.  Тәхминән једди јүз ил әввәл Микә пејғәмбәр демишди ки, Мәсиһ Бејтләһмдә доғулаҹаг. Мараглыдыр ки, Насирәдән ҹәми 11 километр аралыда Бејтләһм адлы бир шәһәр вар иди. Лакин пејғәмбәрликдә дејилмишди ки, Мәсиһ Бејтләһм Әфратда доғулаҹаг. (Микә 5:2 ајәсини оху.) Насирәдән Бејтләһм Әфрат кәндинә ҝетмәк үчүн, Сәмәријјәдән кечәрәк дәрәли-тәпәли јолларла тәхминән 130 километр јол гәт етмәк лазым иди. Јусифҝил гејдијјатдан кечмәк үчүн мәһз Бејтләһм Әфрата ҝетдиләр. Чүнки һәр икиси әслән Бејтләһм Әфратдан олан Давуд падшаһын нәслиндән идиләр.

6, 7. а) Нәјә ҝөрә јола чыхмаг Мәрјәмә чәтин иди? б) Мәрјәмин әрдә олмағы һәјатына неҹә тәсир етди? (Һәмчинин һашијәјә бах.)

6 Һамилә вәзијјәтдә јола чыхмаг Мәрјәм үчүн чәтин олса да, о, Јусифин гәрары илә разылашды. Еһтимал ки, һәмин вахт октјабр ајынын әввәли иди. Гураглыг мөвсүмүнүн ахырлары иди, јәгин нарын јағышлар јағырды. Үстәлик, Бејтләһм тәпәнин башында, 760 метр јүксәкликдә јерләширди. Бир нечә ҝүн јол ҝедәндән сонра тәпәнин башына галхмаг Мәрјәмә чох чәтин олаҹагды. Еһтимал ки, сәфәр адәтән олдуғундан чох чәкәҹәкди, чүнки Мәрјәмә ара-сыра дајаныб динҹәлмәк лазым ҝәләҹәкди. Адәтән һамилә гадынлар доғмаға аз галмыш евдән узаға ҝетмирләр, аиләләринин, достларынын јанында олурлар ки, доғуш санҹылары тутанда  онлара көмәк едән олсун. Шүбһәсиз, Мәрјәмин узун сәфәрә чыхмасы ҹәсарәтли аддым иди.

Бејтләһмә сәфәр асан дејилди

7 Бүтүн бу чәтинликләрә бахмајараг, Јусиф Мәрјәмлә бирликдә гејдијјатдан кечмәјә ҝетди. Мүгәддәс Китабда јазылыб ки, о, артыг Мәрјәмлә евләнмишди (Лука 2:4, 5). Мәрјәм әрдә олдуғу үчүн даһа тәкбашына гәрар верә билмәзди. О, әрини аиләнин башчысы һесаб едир вә Аллаһын аиләдә бир гадын кими она ајырдығы ролу иҹра едәрәк әринин гәрарларыны дәстәкләјирди *. Беләҹә, Мәрјәм әринә итаәт етмәклә иманлы гадын олдуғуну ҝөстәрди.

8. а) Ола билсин, Мәрјәм һансы сәбәбләрә ҝөрә Бејтләһмә ҝетмәјә разы олмушду? б) Мәрјәм Аллаһын хидмәтчиләринә нәдә өрнәк гојуб?

8 Мараглыдыр, Мәрјәм јалныз әринә табе олдуғу үчүн јола чыхмышды? Бәлкә, о, Мәсиһин Бејтләһмдә доғулаҹағы барәдә пејғәмбәрлији билирди? Мүгәддәс Китабда бу барәдә һеч нә дејилмир. Бәлкә дә, билирди, чүнки дин рәһбәрләриндән тутмуш ади адамлара кими, һәр кәсин бу пејғәмбәрликдән хәбәри вар иди (Мәт. 2:1—7; Јәһ. 7:40—42). Һәмчинин Мәрјәм Мүгәддәс  Јазылары да јахшы билирди (Лука 1:46—55). Ола билсин, Мәрјәм ја әринә итаәт етдији үчүн, ја фәрмана табе олдуғу үчүн, ја Аллаһын пејғәмбәрлијинин јеринә јетмәси үчүн, ја да бүтүн бу сәбәбләрә ҝөрә Бејтләһмә јола дүшмәјә разылашды. Сәбәб нә олурса олсун, әсас одур ки, о, бу һәрәкәтилә һамымыза ҝөзәл өрнәк гојуб. Јеһова Аллаһ һәм кишидә, һәм дә гадында итаәткарлығы вә һәлимлији чох гијмәтләндирир. Мәрјәм Аллаһын бүтүн хидмәтчиләри үчүн ҝөзәл өрнәкдир, чүнки јашадығымыз зәманәдә инсанларын әксәријјәти һеч кимә табе олмаг истәмир.

Мәсиһ доғулур

9, 10. а) Бејтләһмә јахынлашдыгҹа, ола билсин, Јусифлә Мәрјәм нә һагда дүшүнүр? б) Јусифлә Мәрјәм һарада ҝеҹәләмәли олур вә нәјә ҝөрә?

9 Јәгин Мәрјәм узагдан Бејтләһми ҝөрәндә раһат нәфәс алыр. Онлар тәпәнин башына галхыр, зејтунлуглардан кечирләр. (Зејтун ән ахырда јығылан мәһсуллардан бири иди.) Јәгин јухары галха-галха бу балаҹа кәндин тарихи барәдә дүшүнүрләр. Микә пејғәмбәрин дедији кими, бу јер Јәһуда шәһәрләри арасында ады чәкилмәјәҹәк гәдәр кичикдир. Амма тәхминән мин ил габаг бурада Буәз, Наимә, Давуд падшаһ дүнјаја ҝәлмишди.

10 Мәрјәмлә Јусиф кәндә ҝирир. Кәнд адамла долудур. Ҹамаат гејдијјатдан кечмәјә ҝәлиб. Одур ки, Јусифлә Мәрјәм меһманханада јер тапа билмир *. Онлар әлаҹсыз галыб төвләдә ҝеҹәләмәли олурлар. Мәрјәм өмрүндә кечирмәдији ағрылар кечирир, ағры ҝет-ҝедә артыр. Јәгин арвадынын әзаб чәкдијини ҝөрәндә Јусиф чох пис олур. Белә бир јердә, төвләдә Мәрјәмин доғуш санҹылары башлајыр.

11. а) Нәјә ҝөрә гадынлар Мәрјәмин нәләр кечирдијини баша дүшә биләр? б) Иса Мәрјәмин о бири ушагларындан нә илә фәргләнирди?

11 Мәрјәмин нәләр кечирдијини гадынлар јахшы баша дүшәр. Тәхминән дөрд мин ил әввәл Јеһова Аллаһ демишди ки, бүтүн гадынлар ҝүнаһ уҹбатындан доғуш заманы кәскин ағрылар кечирәҹәк (Јар. 3:16). Мәрјәм дә ади гадын иди. Һәвари Лука Мәрјәмин кечирдији ағрылары тәсвир етмәјиб, садәҹә јазыб ки, «Мәрјәм бир оғлан ушағы доғду. Бу, онун илки иди» (Лука 2:7). Бәли, бу, онун илки иди. Мәрјәмин ән азы једди ушағы олмушду вә бу ушаг онлардан биринҹиси иди (Марк 6:3). Амма бу ушаг о бириләрдән фәргләнирди. О, тәкҹә Мәрјәмин илки дејилди, һәм дә бүтүн хилгәтин илки, Јеһова Аллаһын јаратдығы илк варлыг иди (Кол. 1:15).

12. а) Мәрјәм ушағы доғандан сонра һара гојду? б) Исанын доғулмасы неҹә тәсвир олунур, бәс әслиндә неҹә олуб?

 12 Мүгәддәс Китабда јазылыб ки, Мәрјәм «ушағы бәләјиб төвләдә ахура гојду» (Лука 2:7). Исанын доғулмасы Милад тамашаларында, рәсм әсәрләриндә вә филмләрдә чох сентиментал, реаллыгдан узаг тәсвир олунур. Ҝәлин ҝөрәк әслиндә неҹә олуб. Гејд етдијимиз кими, Јусифлә Мәрјәм төвләдә ҝеҹәләмәли олур. Адәтән төвләдә һавасызлыг олур, тәмизликдән исә данышмаға дәјмәз. Мәрјәм ушағы доғандан сонра ону ахура, һејванларын јемләндији јерә гојур. Һансы валидејн өвладынын төвләдә доғулмағыны истәјәр?! Әксәр валидејнләр ушагларына ән ҝөзәл шејләри арзулајырлар. Әлбәттә ки, Јусифлә Мәрјәм дә Аллаһын Оғлуна ән јахшы шејләри бәхш етмәк истәјәрдиләр.

13. а) Мәрјәмлә Јусиф чәтин вәзијјәтдә неҹә даврандылар? б) Һикмәтли валидејн Јусифлә Мәрјәмдән нәдә өрнәк алмалыдыр?

13 Вәзијјәт нә гәдәр чәтин олса да, онлар бу вәзијјәтлә барышдылар вә нә баҹардыларса, ону еләдиләр. Диггәт јетирәк ки, Мәрјәм өзү ушағын гајғысына галды, ону сәлигә илә бәләди, еһмалҹа ахура гојду ки, исти вә раһат јердә јатсын. Мәрјәм һәтта белә чәтин шәраитдә ушағы үчүн әлиндән ҝәләни етди. Мәрјәм дә, Јусиф дә јахшы билирди ки, ән ваҹиби ушагларына Јеһова Аллаһа севҝи ашыламагдыр. (Ганунун тәкрары 6:6—8 ајәләрини оху.) Аллаһа ибадәтин ваҹиб сајылмадығы бу дүнјада һикмәтли валидејн өвладынын тәрбијәсиндә руһани дәјәрләрә өнәм вермәлидир.

Јусифлә Мәрјәм руһланыр

14, 15. а) Нәјә ҝөрә чобанлар тәләм-тәләсик Бејтләһмә ҝәлибләр? б) Чобанлар ушағы ҝөрәндә нә едирләр?

14 Гәфилдән төвләдәки сакитлик позулур. Бир дәстә чобан тәләсик төвләјә ҝирир. Онлар Јусифлә Мәрјәми, ән әсасы исә ушағы ҝөрмәјә ҝәлибләр. Онлар һәјәҹан ичиндәдирләр, севинҹдән үзләри ишыг сачыр. Чобанлар гојун отардыглары тәпәләрдән гачыб ҝәлибләр *. Тәәҹҹүб ичиндә олан Јусифлә Мәрјәмә бир аз әввәл ҝөрдүкләри мөҹүзәни нәгл едирләр. Ҝеҹәјарысы гәфилдән онларын гаршысында бир мәләк пејда олмушду. Јеһова Аллаһын ҹалалы әтрафа нур сачмышды. Мәләк чобанлара демишди ки,  индиҹә Бејтләһмдә Мәсиһ доғулуб. Онлар ону ахурун ичиндә, бәләкдә тапаҹаглар. Сонра чох мөһтәшәм бир шеј баш вермишди, сајсыз-һесабсыз мәләкләр пејда олуб Аллаһы мәдһ етмишди (Лука 2:8—14).

15 Тәләм-тәләсик Бејтләһмә ҝәлән бу садәгәлбли адамлар мәләјин тәсвир етдији кими көрпәни ахурда ҝөрәндә јәгин чох севинирләр. Онлар ешитдикләри шад хәбәри ҝизләтмирләр. Мүгәддәс Китабда јазылыб: «Мәләјин... сөјләдикләрини онлара данышдылар. Чобанларын дедикләрини ешидәнләр мат-мәәттәл галдылар» (Лука 2:17, 18). О вахт дин хадимләри чобанлары адам јеринә гојмурдулар. Амма Јеһова Аллаһ бу садәгәлбли, иманлы инсанлара дәјәр верирди. Ҝөрәсән, чобанларын зијарәти Мәрјәмә неҹә тәсир едир?

Јеһова Аллаһ бу садәгәлбли, иманлы инсанлара дәјәр верирди

16. Мәрјәмин дәрин дүшүнән инсан олдуғу нәдән ҝөрүнүр вә мөһкәм иман саһиби олмаға она әсасән нә көмәк етмишди?

16 Мәрјәм һалсыз олса да, чобанларын һәр кәлмәсинә диггәтлә гулаг асыр. О, садәҹә гулаг асмыр, ешитдикләрини үрәјиндә сахлајыр, онларын мәнасы үзәриндә дүшүнүр (Лука 2:19). Мәрјәм дәрин дүшүнән гадындыр. О баша дүшүр ки, мәләјин чатдырдығы хәбәр чох ваҹиб хәбәрдир. Јеһова Аллаһ истәјир ки, Мәрјәм оғлунун неҹә ваҹиб шәхсијјәт олдуғуну билсин. Бу сәбәбдән Мәрјәм ешитдикләрини үрәјиндә сахлајыр ки, ҝәләҹәкдә онларын үзәриндә дүшүнсүн. Мәһз буна ҝөрә Мәрјәм өмрү боју иманда мөһкәм галды. (Ибраниләрә 11:1 ајәсини оху.)

Мәрјәм чобанларын һәр кәлмәсинә диггәтлә гулаг асырды вә бунлары үрәјиндә сахлајырды

17. Мәрјәмдән өрнәк алараг Мүгәддәс Китабдан охудугларымыза неҹә јанашмалыјыг?

17 Биз Мәрјәмдән өрнәк алмалыјыг. Јеһова Аллаһ Өз Кәламында чох ваҹиб фикирләр јаздырыб. Амма орада јазыланлар бизә фајда ҝәтирсин дејә, онлара дүзҝүн мүнасибәт бәсләмәлијик. Мүгәддәс Китабы һәр ҝүн охумалыјыг, она әдәби китаб кими јох, Аллаһдан назил олан китаб кими јанашмалыјыг (2 Тим. 3:16). Һәмчинин Мәрјәм кими орадан өјрәндикләримизи үрәјимизә һәкк етмәли вә онларын мәнасы үзәриндә дүшүнмәлијик. Әҝәр Мүгәддәс Китабдан охудугларымыз барәдә дүшүнсәк вә Јеһова Аллаһын нәсиһәтләринә неҹә әмәл едәҹәјимизи фикирләшсәк, иманымыз ҝет-ҝедә ҝүҹләнәҹәк.

 Мәрјәмин үрәји илаһи кәлмәләрлә долур

18. а) Јусифлә Мәрјәм Мусанын Ганунуна әсасән, нә едир? б) Јусифлә Мәрјәмин ҝәтирдији гурбандан онларын мадди дуруму барәдә нә өјрәнирик?

18 Ушаг сәккиз ҝүнлүк оланда Јусифлә Мәрјәм Мусанын Ганунуна әсасән, ону сүннәт едирләр вә Ҹәбрајыл мәләјин бујурдуғу кими, адыны Иса гојурлар (Лука 1:31). Ушағын гырх ҝүнү тамам оланда ону Бејтләһмдән һарадаса 10 километр аралыда јерләшән Јерусәлимдәки мәбәдә апарырлар. Ганунда касыблар үчүн нәзәрдә тутулан пакланма гурбаныны (бир ҹүт гумру гушу, ја да бир ҹүт ҝөјәрчин) ҝәтирирләр. Бәлкә дә, онлар башга валидејнләр кими гоч гурбаны ҝәтирә билмәдикләри үчүн пис олурлар, амма имканлары дахилиндә Ганунун тәләбинә әмәл едирләр. Әсас одур ки, мәбәддә онларын иманы чох мөһкәмләнир (Лука 2:21—24).

19. а) Мәрјәм Шәмунун һансы сөзләрини үрәјинә һәкк едир? б) Һәннә ушағы ҝөрәндә нә едир?

19 Мәбәддә Шәмун адында гоҹа бир киши јахынлашыб онларла данышыр. Мәрјәм онун дедији сөзләри үрәјинә һәкк едир. Аллаһ Шәмуна сөз вермишди ки, Мәсиһи ҝөрмәмиш өлмәјәҹәк. Инди Јеһова Аллаһын мүгәддәс руһу она бу көрпәнин вәд олунмуш Хиласкар олдуғуну ачыр. Шәмун һәмчинин Мәрјәмин бир ҝүн јара алаҹағыны сөјләјир. Она дејир ки, онун бағрыны, санки, гылынҹ јараҹаг (Лука 2:25—35). Бу сөзләр Мәрјәми һәмин ағыр ҝүнә, отуз үч ил сонра  баш верәҹәк һадисәјә һазырлајыр. Сонра балаҹа Исаны пејғәмбәр Һәннә ҝөрүр. О, Јерусәлимин гуртулушуну ҝөзләјәнләрә Иса һагда данышмаға башлајыр. (Лука 2:36—38 ајәләрини оху.)

Јусифлә Мәрјәм Јеһова Аллаһын мәбәдиндә чох руһланыр

20. Нәјә ҝөрә демәк олар ки, Јусифлә Мәрјәм көрпә Исаны мәбәдә ҝәтирмәклә дүз еләмишдиләр?

20 Нә јахшы ки, Јусифлә Мәрјәм көрпәни Јеһова Аллаһын мәбәдинә ҝәтирмишдиләр! Бунунла онлар оғулларына мәбәдә ҝәлмәји алышдырмаг үчүн илк аддымы атдылар. Мәбәддә олдуглары вахт Јеһова Аллаһа имканлары чатан гурбаны тәгдим етдиләр, орада нәсиһәт алдылар вә руһландылар. Мәрјәм о ҝүн мәбәддән чыханда иманы даһа да мөһкәмләнмишди, үрәји илаһи кәлмәләрлә долуб-дашырды. Јәгин о, бу кәлмәләр барәдә дүшүнүр вә онлары башгаларына чатдырырды.

21. Мәрјәм кими иманымызы неҹә ҝүҹләндирә биләрик?

21 Бу ҝүн Јусифлә Мәрјәмдән нүмунә ҝөтүрән валидејнләри ҝөрмәк чох хошдур! Мәсиһи валидејнләр мүнтәзәм олараг өвладларыны ибадәт ҝөрүшләринә ҝәтирирләр. Бу валидејнләр Аллаһын јолунда баҹардыгларыны едирләр, онлар өз сөзләри илә иман баҹы-гардашларыны руһландырырлар вә ибадәт ҝөрүшләриндән руһән мөһкәм, хошбәхт һалда евләринә гајыдырлар. Бу ҝөрүшләрдән алдыглары ҝөзәл руһани немәтләри башгалары илә бөлүшүрләр. Бу ҹүр инсанларла бир јерә топлашмаг чох ҝөзәлдир! Бу ҝөрүшләрә мүнтәзәм ҝәлсәк, Мәрјәм кими, бизим дә иманымыз ҝет-ҝедә ҝүҹләнәҹәк.

^ абз. 7 Бу сәфәрлә Мәрјәмин Илсәбаҝилә ҝетмәси арасында бир фәрги ҝөрмәк олар. Лука 1:39 ајәсиндә јазылыб ки, Мәрјәм дәрһал јығышыб ҝетди. Бу һалда онун нишанлы, амма субај бир гыз кими Јусифлә мәсләһәтләшмәдән јола чыхмаг ихтијары вар иди. Онлар евләнәндән сонра исә вәзијјәт дәјишди. Лука 2:4 ајәсиндә јазылыб ки, Јусиф Бејтләһмә јола дүшдү. Бу, о демәкдир ки, јола чыхмаг гәрарыны Мәрјәм јох, Јусиф вермишди.

^ абз. 10 О дөврдә шәһәрләрдә јолчуларын ҝеҹәләмәси үчүн меһманханалар олурду.

^ абз. 14 Чобанларын өз сүрүләри илә һәмин вахт чөллүкдә ҝеҹәләмәси Мүгәддәс Китаб хронолоҝијасындакы бир мәгамын доғрулуғуну тәсдиг едир: Мәсиһ һарадаса октјабр ајынын әввәлләриндә доғулуб. О, декабрда доғула билмәзди, чүнки бу вахт сүрүнү евә јахын јердә сахлајырдылар.