ГӘДИМ заманларда пејғәмбәрләр Аллаһа иман тәзаһүр етдирирдиләр. Онун вәдләринә инаныр вә һәјатларыны она әсасән гурурдулар. Аллаһ онлара һансы вәдләри вермишди?

Адәмлә Һәвва ҝүнаһ ишләтдикдән дәрһал сонра Аллаһ вәд етди ки, «илан»ла тәмсил олунан «Иблис вә Шејтан адланан бөјүк әждаһа»нын башындан вурараг ону әбәдијјән мәһв едәҹәк бир Шәхс ҝөндәрәҹәк (Јарадылыш 3:14, 15; Вәһј 12:9, 12). Ҝөрәсән, о Шәхс ким олаҹаг?

Бу илк пејғәмбәрликдән тәхминән 2000 ил сонра Јеһова Аллаһ Ибраһим пејғәмбәрә вәд етди ки, ҝөндәрәҹәји Шәхс онун нәслиндән олаҹаг. Аллаһ Ибраһимә деди: «Дүнјанын бүтүн милләтләри сәнин нәслинин васитәсилә хејир-дуа алаҹаг, чүнки сән Мәним сөзүмә гулаг асдын» (Јарадылыш 22:18).

Бизим ерадан әввәл 1473-ҹү илдә Аллаһ Муса пејғәмбәрә бу «өвлад» барәдә нөвбәти сөзләри деди: «Аллаһыныз Рәбб сизин үчүн араныздан — өз сојдашларыныз ичәрисиндән мәним кими бир пејғәмбәр јетирәҹәк. Она гулаг асын» (Ганунун тәкрары 18:15). Муса кими, бу пејғәмбәр дә Ибраһимин өвладлары арасындан ҝәлмәли иди.

Һәмчинин бу пејғәмбәр Падшаһ Давудун нәслиндән чыхмалы вә бөјүк падшаһ олмалы иди. Аллаһ Давуд падшаһа вәд етмишди: «Белиндән ҝәлән өвладыны чыхараҹағам вә... онун шаһлыг тахтыны әбәди мөһкәм едәҹәјәм» (2 Шамуел 7:12, 13). Еләҹә дә Аллаһ ачыглады ки, Давудун нәслиндән ҝәләҹәк  бу Шәхс «Әмин-аманлыг Һөкмдары олаҹаг». Онун «һакимијјәтинин вә әмин-аманлығынын артмасынын сону олмајаҹаг, о, Давудун тахты вә сәлтәнәти үзәриндә һөкм сүрәҹәк, о, һакимијјәтини әдаләтлә вә салеһликлә индидән әбәди олараг гураҹаг» (Јешаја 9:6, 7). Бәли, Аллаһа садиг олан бу Һөкмдар бүтүн дүнјада сүлһү вә әдаләти бәргәрар едәҹәк. Бәс о нә вахт ҝәләҹәк?

Вәд олунмуш «өвлад» Ибраһимин нәслиндән ҝәлмәли, Муса кими, пејғәмбәр олмалы, Давудун нәслиндән ҝәлмәли, ерамызын 29-ҹу илиндә пејда олмалы, иланын — Шејтанын башыны әзмәли иди

Сонралар Ҹәбрајыл мәләк Аллаһын пејғәмбәри олан Даниелә белә бир хәбәр ҝәтирди: «Буну бил вә анла: Јерусәлими бәрпа едиб тикмәк үчүн верилән фәрманын чыхмасындан мәсһ олунмуш һөкмдара гәдәр једди једдииллик дөвр кечәҹәк. Алтмыш ики једдииллик дөвр әрзиндә Јерусәлим јенидән күчәләр вә хәндәкләрлә тикиләҹәк, амма бу чәтин вахтларда олаҹаг» (Даниел 9:25). Һәр бири 7 илдән ибарәт олан бу 69 једдииллик дөвр 483 илә бәрабәрдир. Бу дөвр бизим ерадан әввәл 455-ҹи илдә башлајыб, ерамызын 29-ҹу илиндә битмишдир.

Доғруданмы, Мәсиһ — Мусаја бәнзәр пејғәмбәр вә ҝөзләнилән «өвлад» — ерамызын 29-ҹу илиндә пејда олду? Ҝәлин буну нәзәрдән кечирәк.