Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Мүгәддәс Китаб тәлимләри

 Фәсил 8

Аллаһын Падшаһлығы

Аллаһын Падшаһлығы

1, 2. Иса Мәсиһ һансы үч шеј барәдә дуа етмәји өјрәтмишди?

ИСА МӘСИҺ шаҝирдләринә дуа етмәји өјрәтмишди. Ҝәлин ҝөрәк о, бу дуада һансы сөзләри демишди вә һәмин дуанын бизим үчүн һансы әһәмијјәти вар.

2 Иса демишди: «Бу ҹүр дуа един: “Ҝөјләрдә олан Атамыз, гој адын мүгәддәс тутулсун. Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин”». (Мәтта 6:9—13 ајәләрини охујун.) Ҝөрәсән, нәјә ҝөрә Иса Мәсиһ мәһз бу үч шеј барәдә дуа етмәји өјрәтмишди? (19-ҹу әлавәјә бахын.)

3. Аллаһын Падшаһлығы барәдә нә өјрәнәҹәјик?

3 Өтән фәсилләрдән Аллаһын адынын Јеһова олдуғуну өјрәндик. Һәмчинин ҝөрдүк ки, Аллаһ инсанлара ҝөзәл ҝәләҹәк бәхш едәҹәк, дүнјаны ҹәннәтә чевирәҹәк. Инди исә ҝәлин ҝөрәк Иса Мәсиһин «гој Падшаһлығын ҝәлсин» сөзләри нә мәна дашыјыр. Бу фәсилдә биз Аллаһын Падшаһлығы, онун ҝөрәҹәји ишләр вә Аллаһын адыны неҹә мүгәддәс едәҹәји барәдә өјрәнәҹәјик.

АЛЛАҺЫН ПАДШАҺЛЫҒЫ НӘДИР?

4. Аллаһын Падшаһлығы нәдир вә онун падшаһы кимдир?

4 Јеһова Аллаһ ҝөјдә бир һөкумәт гуруб вә Иса Мәсиһи бу һөкумәтин падшаһы тәјин едиб. Мүгәддәс Китабда бу һөкумәт Аллаһын Падшаһлығы адланыр. Иса Мәсиһ «падшаһлар Падшаһы вә ағалар Ағасыдыр» (1 Тимутијә 6:15). Иса һеч бир һөкмдарын баҹармадығы  ишләри ҝөрмәјә гадирдир, бүтүн һөкмдарлары бир јерә ҹәмләсәк, гүдрәтдә она чата билмәзләр.

5. Аллаһ Өз һөкумәтини һарада гуруб вә бу һөкумәт һараны идарә едәҹәк?

5 Иса дириләндән гырх ҝүн сонра Јеһова Аллаһ ону Өз дәрҝаһына галдырды, сонралар исә ону гурдуғу Падшаһлығын Падшаһы гојду (Һәвариләрин ишләри 2:33). Бу һөкумәт ҝөјдән јер үзүнү идарә едәҹәк (Вәһј 11:15). Буна ҝөрә дә, Мүгәддәс Китабда Аллаһын Падшаһлығы сәмави Падшаһлыг адланыр (2 Тимутијә 4:18).

6, 7. Нәјә ҝөрә Иса Мәсиһ бүтүн инсан һөкмдарларындан үстүндүр?

6 Мүгәддәс Китабда дејилир ки, Мәсиһ бүтүн инсан һөкмдарларындан уҹадыр, чүнки о, «өлмәзлијә јеҝанә малик олан» шәхсдир (1 Тимутијә 6:16). Бүтүн инсан һөкмдарлары әввәл-ахыр өлүб ҝедир, Иса Мәсиһ исә һеч вахт өлмәјәҹәк. Иса Мәсиһин бизә бәхш едәҹәји немәтләр дә өзү кими әбәди олаҹаг.

7 Бир пејғәмбәр Иса Мәсиһин әдаләтли вә мәрһәмәтли падшаһ олаҹағыны демишди: «Јеһованын руһу онун үзәриндә олаҹаг, һикмәт вә дәрракә руһу, өјүд-нәсиһәт вә гүдрәт руһу, елм вә Јеһовадан горхмаг руһу онун үзәриндә олаҹаг. О, Јеһова хофунда зөвг тапаҹаг. Ҝөзләринин ҝөрдүјү илә һөкм етмәјәҹәк, гулағы илә ешитдијинә ҝөрә тәнбеһ етмәјәҹәк. О, фағыр-фүгәра үчүн инсафла һөкм чыхараҹаг» (Әшија 11:2—4). Сиз белә бир падшаһын һакимијјәти дөврүндә јашамаг истәмәздиниз?

8. Һарадан билирик ки, Мәсиһ тәк һөкмранлыг етмәјәҹәк?

8 Аллаһ башга инсанлара да Иса илә бирҝә сәмави һөкумәтдә һөкмранлыг етмәк сәлаһијјәти вериб. Һәвари Булус Тимутијә јазмышды: «Дөзүм ҝөстәририксә, бирликдә  дә падшаһлыг едәҹәјик» (2 Тимутијә 2:12). Бәс Мәсиһлә бирҝә нечә нәфәр һакимијјәт сүрәҹәк?

9. Мәсиһлә бирҝә нечә нәфәр падшаһлыг едәҹәк? Аллаһ онлары нә вахтдан сечмәјә башлајыб?

9 Једдинҹи фәсилдә охумушдуг ки, һәвари Јәһја вәһјдә Иса Мәсиһи ҝөјдә Падшаһ ҹалалында ҝөрүр; онун јанында 144 000 башга падшаһ да дајанмышды. Бу 144 000 нәфәр кимдир? Һәвари Јәһја јазмышды: «Онларын алынларында Гузунун [јәни Исанын] вә онун Атасынын ады јазылмышды... Гузу һара ҝетсә, онлар да онун ардынҹа ҝедирләр. Онлар... инсанларын арасындан... алынмышлар». (Вәһј 14:1, 4 ајәләрини охујун.) Бу 144 000 нәфәр Мәсиһлә бирҝә «јер үзәриндә падшаһлыг» етмәк үчүн Аллаһ тәрәфиндән сечилмиш садиг мәсиһиләрдир. Онлар өләндән сонра дирилиб ҝөјә галхырлар (Вәһј 5:10). Јеһова Аллаһ бу 144 000 падшаһы биринҹи әсрдән башлајараг сечир.

10. Нәјә ҝөрә демәк олар ки, Јеһова Аллаһын Иса Мәсиһи вә 144 000 нәфәри падшаһ сечмәси Онун бизә мәһәббәтинин тәзаһүрүдүр?

10 Мәсиһлә бирҝә һөкмранлыг едәҹәк бу падшаһларын инсанларын арасындан сечилмәси Јеһова Аллаһын бизи дүшүндүјүнү ҝөстәрир. Иса чох јахшы һөкмдар олаҹаг, чүнки о, бизи баша дүшүр, инсан олмағын, әзаб чәкмәјин нә демәк олдуғуну јахшы билир. Һәвари Булус јазмышды ки, Иса бизим һиссләримизи баша дүшүр, зәифликләримизи анлајыр, «о да бизим кими, һәр ҹәһәтдән сынаныб» (Ибраниләрә 4:15; 5:8). 144 000 падшаһ да, бизим кими, инсан олуб. Онлар да ҝүнаһла мүбаризә апарыблар, хәстәлик, ағры-аҹы дадыблар. Буна ҝөрә дә әмин ола биләрик ки, Иса Мәсиһ вә 144 000 падшаһ  нәинки бизим һиссләримизи баша дүшәҹәк, һәтта гејри-камиллик уҹбатындан проблемләрлә гаршылашанда бизә анлајыш ҝөстәрәҹәкләр.

АЛЛАҺЫН ПАДШАҺЛЫҒЫ НӘЛӘРӘ НАИЛ ОЛАҸАГ?

11. Демәк олармы ки, ҝөјдә бүтүн илаһи варлыглар һәмишә Аллаһын ирадәсини јеринә јетириб?

11 Нәјә ҝөрә Иса шаҝирдләринә бујурмушду ки, Аллаһын ирадәсинин ҝөјдә јеринә јетмәси һагда дуа етсинләр? 3-ҹү фәсилдән Шејтанын Аллаһа гаршы чыхдығыны өјрәндик. Бу үсјандан сонра Јеһова Аллаһ Шејтана вә онун тәрәфдашлары олан хаин мәләкләрә, јәни ҹинләрә бир мүддәт ҝөјдә јашамаға изин верди. Буна ҝөрә дә демәк олар ки, һәмин вахт ҝөјдә һамы Аллаһын ирадәсини јеринә јетирмирди. Шејтан вә ҹинләр барәдә әтрафлы мәлумат 10-ҹу фәсилдә јазылыб.

12. Вәһј 12:10 ајәсиндә һансы ики һадисә тәсвир олунуб?

12 «Вәһј» китабында јазыланлара әсасән, Мәсиһ Аллаһын Падшаһлығында Падшаһ тахтына отуран кими Шејтанла вурушмалы иди. (Вәһј 12:7—10 ајәләрини охујун.) 10-ҹу ајәдә ики мүһүм һадисә тәсвир олунур. Биринҹиси, Аллаһын Падшаһлығы, башында Иса Мәсиһ олмагла, һакимијјәт сүрмәјә башлајыр. Икинҹиси, Шејтан ҝөјдән јерә атылыр. Бу фәсилдә бу һадисәләрин артыг баш вердијини өјрәнәҹәјик.

13. Шејтан јерә атыландан сонра ҝөјдә нә баш верди?

13 Мүгәддәс Китабда јазылыб ки, Шејтан вә онун ҹинләри јерә атыландан сонра садиг мәләкләр севинирдиләр. Вәһј 12:12 ајәсиндә дејилир: «Еј ҝөјләр вә ҝөјләрин сакинләри, севинин!» Бәли, инди ҝөјдә сүлһ вә бирлик һөкм сүрүр, чүнки орада һамы Аллаһын ирадәсини јеринә јетирир!

Шејтан вә онун ҹинләри ҝөјдән јерә атылдыгдан сонра јердә әзаб-әзијјәт артыб. Тезликлә Аллаһ бу әзаблара сон гојаҹаг

14. Шејтанын ҝөјдән атылмағы јерә неҹә тәсир етди?

 14 Јер үзүндә исә һәјат тамам башга ҹүрдүр. Инсанлар олмазын зүлмләр чәкир, «чүнки Иблис вахтынын аз олдуғуну биләрәк бөјүк гәзәблә» јерә ениб (Вәһј 12:12). Шејтан ҝөјдән јерә атылдығы үчүн вә тезликлә мәһв олаҹағыны билдији үчүн һирсиндән алышыб-јаныр. О, бүтүн дүнјаја әзаб-әзијјәт чәкдирмәк үчүн әлиндән ҝәләни едир.

15. Аллаһын јерлә бағлы нијјәти нәдир?

15 Амма Аллаһ јер үзү илә бағлы нијјәтиндән дөнмәјиб. О истәјир ки, јер үзү ҹәннәт олсун вә инсанлар камиллијә јетишиб орада әбәди јашасын (Зәбур 37:29). Бәс сәмави Падшаһлыг Јеһова Аллаһын бу нијјәтини неҹә јеринә јетирәҹәк?

16, 17. Дәнјал 2:44 ајәсиндән Аллаһын Падшаһлығы барәдә нә өјрәнирик?

16 Дәнјал 2:44 ајәсиндә дејилир: «О падшаһларын дөврүндә ҝөјләрин Аллаһы һеч вахт дағылмајаҹаг бир падшаһлыг гураҹаг. Бу падшаһлыг башга халга кечмәјәҹәк. О, бүтүн бу падшаһлыглары әзиб јох едәҹәк, өзү исә әбәди дураҹаг». Бу ајә Аллаһын Падшаһлығы барәдә нәји ачыглајыр?

17 Биринҹиси, ајәдә дејилир ки, Аллаһын Падшаһлығы «о падшаһларын дөврүндә» һакимијјәт сүрмәјә башлајаҹаг. Јәни Падшаһлыг ҝөјдә идарә етмәјә башлајанда јердә башга һөкумәтләр дә мөвҹуд олаҹаг. Икинҹиси, Аллаһын Падшаһлығы әбәди һөкмранлыг сүрәҹәк вә онун јерини башга һөкумәт тутмајаҹаг. Үчүнҹүсү, Аллаһын Падшаһлығы илә бу дүнјанын һөкумәтләри арасында саваш олаҹаг. Аллаһын Падшаһлығы гәләбә чалыб дүнјаны идарә едән јеҝанә һөкумәт олаҹаг. Онда  инсанлар тајы-бәрабәри олмајан һөкумәтин идарәси алтында јашајаҹаглар.

18. Аллаһын Падшаһлығы илә бу дүнјанын һөкумәтләри арасында олаҹаг һәлледиҹи мүһарибә неҹә адланыр?

18 Дүнја һөкумәтләри илә Аллаһын Падшаһлығы арасындакы мүһарибәдән әввәл нә баш вермәлидир? Армаҝеддон адланан бу һәлледиҹи мүһарибәдән габаг, ҹинләр «јер үзүнүн падшаһларынын јанына ҝедиб» онлары алдадараг «Гадир Аллаһын бөјүк ҝүнүндә олаҹаг мүһарибәјә» топлајаҹаглар. Бәли, дүнја һөкумәтләри Аллаһын Падшаһлығына гаршы дөјүшәҹәк. Тәбии ки, бу мүһарибәнин галиби Аллаһын Падшаһлығы олаҹаг (Вәһј 16:14, 16; 10-ҹу әлавәјә бахын).

19, 20. Нәјә ҝөрә Аллаһын Падшаһлығына еһтијаҹ вар?

19 Инсанларын Аллаһын Падшаһлығына еһтијаҹы вар. Буна, ән азы, үч сәбәб ҝәтирмәк олар. Биринҹиси, бәшәријјәт ҝүнаһы мирас алдығы үчүн хәстәлик вә өлүм һеч кимдән јан кечмир. Лакин Мүгәддәс Китаб хәбәр верир ки, Аллаһын Падшаһлығынын рәһбәрлији алтында инсанлар әбәди јашајаҹаг. Буна сүбут олараг ҝәлин Јәһја 3:16 ајәсинә бахаг: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун».

20 Икинҹи сәбәб одур ки, биз пис инсанларын әһатәсиндә јашајырыг. Јалан, оғурлуг вә әхлагсызлыг баш алыб ҝедир. Бунун гаршысыны алмаг бизим әлимиздә дејил, буна јалныз Аллаһ гадирдир. Шәр әмәлләриндән әл чәкмәјән инсанлар Армаҝеддонда мәһв олаҹаг. (Зәбур 37:10 ајәсини охујун.) Үчүнҹү сәбәб исә, инсан һөкумәтләринин аҹиз, гәддар вә чиркабла долу олмасыдыр.  Онлар инсанларын Аллаһа итаәт етмәси үчүн һеч нә етмирләр. Мүгәддәс Китабда дејилир ки, «инсанын инсана ағалыг етмәси инсанын зәрәринә»дир (Ваиз 8:9).

21. Падшаһлыг Аллаһын ирадәсини јер үзүндә неҹә јеринә јетирәҹәк?

21 Армаҝеддондан сонра Аллаһын Падшаһлығы јер үзүндә Аллаһын ирадәсини јеринә јетирәҹәк. Мәсәлән, Падшаһлыг Шејтаны вә онун ҹинләрини зәрәрсизләшдирәҹәк (Вәһј 20:1—3). Һеч бир инсан нә хәстәләнмәјәҹәк, нә өлмәјәҹәк. Чүнки Аллаһа садиг галан инсанлар фидјәнин сајәсиндә ҹәннәтдә әбәди јашајаҹаглар (Вәһј 22:1—3). Падшаһлыг Аллаһын адыны мүгәддәс едәҹәк. Бу о демәкдир ки, Аллаһын Падшаһлығы јер үзүнү идарә едәндә бүтүн инсанлар Јеһованын адыны мүгәддәс тутаҹаг. (20-ҹи әлавәјә бахын.)

МӘСИҺ НӘ ВАХТ ПАДШАҺ ОЛДУ?

22. Һарадан билирик ки, Иса Мәсиһ јердә оланда вә ја ҝөјә галхан кими Падшаһ олмады?

22 «Гој Падшаһлығын ҝәлсин», — дејә Иса шаҝирдләринә дуа етмәји өјрәтмишди. Бу сөзләрдән ајдын олур ки, һәмин дөврдә Аллаһын һөкумәти һәлә гурулмамышды. Әввәла, Јеһова Аллаһ һөкумәт гурмалы вә Исанын бу һөкумәтин Падшаһы гојмалы иди. Бәс Иса ҝөјә галхан  кими Падшаһ олду? Хејир, о, бир мүддәт ҝөзләмәли иди. Иса Мәсиһ дириләндән бир мүддәт сонра һәвари Бутрус вә Булус Зәбур 110:1 ајәсини Мәсиһә аид едәрәк бу фикри тәсдигләмишдиләр. Ајәдә Јеһова белә дејир: «Дүшмәнләрини кәтил кими ајағынын алтына гојанадәк сағымда отур» (Һәвариләрин ишләри 2:32—35; Ибраниләрә 10:12, 13). Мәсиһ Падшаһ олаҹағы вахты нә гәдәр ҝөзләмәли иди?

Аллаһын Падшаһлығы јер үзүндә Аллаһын ирадәсини јеринә јетирәҹәк

23. а) Иса нечәнҹи илдә Падшаһ олду? б) Нөвбәти фәсилдә нә барәдә өјрәнәҹәјик?

23 XIX әсрин сонлары, XX әсрин әввәлләри һәгиги мәсиһиләр баша дүшдүләр ки, 1914-ҹү ил Мүгәддәс Китаб пејғәмбәрлији бахымындан әламәтдар ил олмалыдыр. 1914-ҹү илдән бәри дүнјада баш верән һадисәләр онларын дүзҝүн нәтиҹәјә ҝәлдијини сүбут едир. Мәһз һәмин ил Иса Мәсиһ ҝөјдә падшаһ олду (Зәбур 110:2). Бу һадисәдән дәрһал сонра Шејтан ҝөјдән јерә атылды, һазырда онун чох аз вахты галыб (Вәһј 12:12). Нөвбәти фәсилдә бизим мәһз бу дөврдә јашадығымызы тәсдиг едән сүбутлары нәзәрдән кечирәҹәјик. Һәмчинин әмин олаҹағыг ки, тезликлә Аллаһын Падшаһлығы Аллаһын ирадәсини јердә јеринә јетирәҹәк. (21-ҹи әлавәјә бахын.)