Контентә кеч

Мүндәриҹаты ҝөстәр

ФӘСИЛ 117

Ағанын шам јемәји

Ағанын шам јемәји

МӘТТА 26:21—29 МАРК 14:18—25 ЛУКА 22:19—23 ЈӘҺЈА 13:18—30

  • ЈӘҺУДА САТГЫН ЧЫХЫР

  • ИСА МӘСИҺ АНМА МӘРАСИМИНИ ТӘССИС ЕДИР

Бир аз әввәл Иса Мәсиһ һәвариләринин ајагларыны јумагла онлара тәвазөкарлығын ваҹиблијини ҝөстәрди. Инди, ҝөрүнүр, Пасха јемәјиндән сонра о, Давуд падшаһын пејғәмбәрлик сөзләрини ситат ҝәтирир: «Ҝүвәндијим кәс, јахын достум, чөрәк кәсдијим адам мәнә хәјанәт етди». Сонра буну изаһ едир: «Сизләрдән бири мәни сатаҹаг» (Зәбур 41:9; Јәһја 13:18, 21).

Һәвариләр бир-биринә бахыб ондан сорушурлар: «Аға, бу мәнәм?» Һәтта Јәһуда Искәрјут да бу суалы верир. Бутрус Мәсиһин јанында отуран Јәһјаја дејир ки, бу сатгынын ким олдуғуну ондан өјрәнсин. Јәһја Иса Мәсиһә тәрәф әјилиб ондан сорушур: «Аға, о адам кимдир?» (Мәтта 26:22; Јәһја 13:25).

Иса пејғәмбәр ҹаваб верир: «Чөрәји касанын ичинә батырыб кимә версәм, одур». О, чөрәји касаја батырыб Јәһуда Искәрјута верир вә дејир: «Инсан Оғлу онун һаггында јазылдығы кими ҝедир, амма вај ону сатанын һалына! О адам дүнјаја һеч ҝәлмәсәјди, онун үчүн даһа јахшы оларды» (Јәһја 13:26; Мәтта 26:24). Бундан сонра Шејтан Јәһуданын үрәјинә ҝирир. Јәһуда артыг јолуну азыб вә беләҹә, Иблисин истәјинә хидмәт едир, бунунла да о, «һәлака ҝедән адам» олур (Јәһја 6:64, 70; 12:4; 17:12).

Мәсиһ Јәһудаја дејир: «Нә едәҹәксәнсә, тез елә». Пул гутусу Јәһудада олдуғу үчүн диҝәр һәвариләр елә билир ки, Иса Мәсиһ она: «Бајрам үчүн лазым олан шејләри ал», — дејир, ја да она касыблара бир шеј пајламағы тапшырыр (Јәһја 13:27—30). Јәһуда исә ҝедиб Мәсиһи сатыр.

Пасха јемәји олан ахшам Иса Мәсиһ јени бир мәрасим тәсис едир. О, чөрәји ҝөтүрүр, Аллаһа шүкүр едәндән сонра чөрәји бөлүр вә һәвариләринә өтүрүр. О дејир: «Бу чөрәк сизин уғрунузда фәда едиләҹәк бәдәними тәмсил едир. Хатирәми јад етмәк үчүн буну һәмишә един» (Лука 22:19). Һәвариләр чөрәји бир-биринә өтүрүб јејирләр.

Сонра Иса Мәсиһ әлинә ичиндә шәраб олан ҹамы ҝөтүрүр, Аллаһа шүкүр едир вә ону да өтүрүб дејир: «Бу ҹам сизин уғрунузда ахыдылаҹаг ганым әсасында бағланан јени әһди тәмсил едир» (Лука 22:20). Һәвариләрин һәр бири шәрабдан ичир.

Беләҹә, Иса Мәсиһ өлүмүнүн анма мәрасимини тәсис едир. Онун давамчылары һәр ил нисанын 14-ү бу ҝүнү јад етмәлидирләр. Бу, онлара Иса Мәсиһин вә Аллаһын иманлы инсанлары ҝүнаһын вә өлүмүн пәнҹәсиндән гуртармаг үчүн нәләр етдикләрини хатырладаҹаг. Бу мәрасим јәһудиләр үчүн олан Пасха бајрамындан да бөјүк мәна дашыјыр, бу, иманлары олан инсанлара әсил гуртулушу вурғулајыр.

Иса Мәсиһ дејир ки, онун ганы бир чохларынын ҝүнаһыны әфв етмәк үчүн ахыдылаҹаг. Әфв олунанларын сырасында онун садиг һәвариләри вә диҝәр шаҝирдләри вар. Онлар Иса Мәсиһлә бирҝә Аллаһын Падшаһлығында олаҹаглар (Мәтта 26:28, 29).