Контентә кеч

Мүндәриҹаты ҝөстәр

ФӘСИЛ 10

Јерусәлимә сәјаһәт

Јерусәлимә сәјаһәт

ЛУКА 2:40—52

  • ОНИКИЈАШЛЫ ИСА МҮӘЛЛИМЛӘРӘ СУАЛЛАР ВЕРИР

  • ИСА ПЕЈҒӘМБӘР ЈЕҺОВА АЛЛАҺА АТА ДЕЈӘ МҮРАҸИӘТ ЕДИР

Баһар фәслидир. Һәр ил бу вахты Јусиф аиләсини ҝөтүрүб гоһум-гоншулары илә бирҝә Јерусәлимә зијарәтә ҝедир. Чүнки Гануна әсасән, онлар Пасха бајрамыны гејд етмәлидирләр (Ганунун тәкрары 16:16). Јерусәлим Насирә шәһәриндән тәхминән 120 километр аралыда јерләшир. Һәмишәки кими, сәјаһәтгабағы һамы әл-ајаға дүшүб. Иса артыг 12 јашын ичиндәдир, о, бу бајрамы вә јенидән мәбәддә олмағы сәбирсизликлә ҝөзләјир.

Иса аиләси илә бура јалныз бир ҝүнлүк ҝәлмир. Пасха бајрамынын сәһәриси ҝүнү једди ҝүн давам едән Мајасыз чөрәк бајрамы башлајыр (Марк 14:12). Бу, Пасха бајрамынын бир һиссәси һесаб олунур. Јол да дахил олмагла, Насирәдән Јерусәлимә ҝедиб-гајытмаг ики һәфтә чәкир. Амма бу ил Исанын башына ҝәлән һадисәјә ҝөрә сәјаһәт бир гәдәр узаныр. Бу хошаҝәлмәз һадисә Јерусәлимдән гајыданда баш верир.

Гајыдан башы Јусифлә Мәрјәм елә фикирләшир ки, онларла бирҝә олан гоһум-гоншунун арасындадыр. Амма ҝеҹәләмәк үчүн дајананда ҝөрүрләр ки, Иса јохдур. Јусифлә Мәрјәм ону јол јолдашлары арасында ахтармаға башлајырлар, лакин тапа билмирләр. Буна ҝөрә дә тәзәдән Јерусәлимә гајыдасы олурлар.

Дүз ики ҝүн ону дурмадан ахтарырлар, амма ахтарышлары боша чыхыр. Нәһајәт, үчүнҹү ҝүн ону чохлу отаглары олан мәбәддә тапырлар. Иса јәһуди мүәллимләринин арасында отуруб онлара гулаг асыр вә суаллар верир. Һамы онун ағлына һејран галыр.

Мәрјәм ондан сорушур: «Оғлум, сән нијә белә еләдин? Атанла мән сәни чох ахтардыг, сәни тапана гәдәр үрәјимизи једик» (Лука 2:48).

Иса валидејнләринин онун һарада олдуғуну билмәдикләринә тәәҹҹүбләнир. О дејир: «Мәни нијә ахтарырдыныз? Мәҝәр билмирдиниз ки, мән Атамын евиндә олмалыјам?» (Лука 2:49).

Иса валидејнләри илә бирликдә евә, Насирәјә гајыдыр. О, һеч вахт валидејнләринин сөзүндән чыхмыр. Иса бөјүјүр вә һикмәтлә долур. О, кичик јашларындан Аллаһын вә инсанларын һүсн-рәғбәтини газаныр. Бәли, Иса лап ушаглыгдан һәм руһани ишләрә ҹан атмагда, һәм ата-анаја һөрмәт ҝөстәрмәкдә ҝөзәл нүмунә гојур.