Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Иса пејғәмбәр. Јол, һәгигәт, һәјат

 ФӘСИЛ 90

«Дирилмә вә һәјат мәнәм»

«Дирилмә вә һәјат мәнәм»

ЈӘҺЈА 11:17—37

  • ИСА ПЕЈҒӘМБӘР ИЛАЗӘР ӨЛӘНДӘН СОНРА ҜӘЛИР

  • «ДИРИЛМӘ ВӘ ҺӘЈАТ МӘНӘМ»

Иса пејғәмбәр Перејадан Бејтанијјәјә ҝәлир. Бу кәнд Јерусәлимдән тәхминән 3 километр шәргдә јерләшир. Илазәрин баҹылары Мәрјәмлә Марта јаслыдырлар. Чохлу адам башсағлығына ҝәлиб.

Бирдән кимсә Мартаја Иса пејғәмбәрин ҝәлдијини дејир. О, тез онун габағына гачыр. Марта Иса пејғәмбәрә дејир: «Аға, сән бурада олсајдын, гардашым өлмәзди». Гардашлары өләндән бәри баҹылар, ола билсин, дөрд ҝүндүр ки, бу һагда фикирләширләр. Бунунла белә, Мартанын үмиди һәлә өлмәјиб. О дејир: «Әминәм ки, Аллаһдан нә истәсән, сәнә верәҹәк» (Јәһја 11:21, 22). Марта инаныр ки, Иса Мәсиһ һәлә дә онун гардашы үчүн нә исә едә биләр.

Иса Мәсиһ ҹаваб верир: «Гардашын дириләҹәк». Марта елә баша дүшүр ки, Мәсиһ ҝәләҹәкдә јер үзүндә олаҹаг дирилмәдән — Ибраһим пејғәмбәрин вә диҝәрләринин ҝөзләдији вахтдан данышыр. О, буна иман етдијини нөвбәти сөзләрлә билдирир: «Билирәм, о, ахырынҹы ҝүндә, дирилмә заманы дириләҹәк» (Јәһја 11:23, 24).

Бәс Иса пејғәмбәр дирилмәни инди едә биләр? О дејир: «Мәнә иман едән өлсә дә, һәјата гајыдаҹаг вә мәнә инамла јашајан адам һеч вахт өлмәјәҹәк». О, Мартаја хатырладыр ки, Аллаһ она өлүм үзәриндә һакимијјәт вериб (Јәһја 11:25, 26).

Әлбәттә, Иса пејғәмбәр шаҝирдләринин һеч вахт өлмәјәҹәјини демәк истәмир. Һәвариләринә дедији кими, һәтта өзү дә өлмәлидир (Мәтта 16:21; 17:22, 23). О билдирир ки, она иман едәнләр әбәди јашајаҹаглар. Инсанларын әксәријјәти дирилиб әбәди һәјата говушаҹаг. Лакин ахырзаманда јашајан Аллаһын бәзи садиг бәндәләри һеч вахт өлүмү дадмајаҹаг. Һәр ики һалда, она иман едән кәсләр һеч вахт әбәдијјән өлү вәзијјәтдә галмајаҹаг.

Бир аз өнҹә «дирилмә вә һәјат мәнәм» дејән Иса пејғәмбәр дөрд ҝүн әввәл өлән Илазәри дирилдә биләҹәк? О, Мартадан сорушур: «Буна инанырсан?» Марта ҹаваб верир: «Бәли, Аға, мән инанырам ки, сән Аллаһын Оғлусан, дүнјаја ҝәлмәли олан Мәсиһсән». Пејғәмбәрин елә инди нәсә едәҹәјинә иман едәрәк Марта тез евә гачыб тәкликдә баҹысына дејир: «Устад ҝәлиб, сәни ҝөрмәк истәјир» (Јәһја 11:25—28). Мәрјәм евдән чыхыб ҝедир. Орадакы ҹамаат онун Илазәрин мәзарына ҝетдијини дүшүнәрәк онун далынҹа ҝедир.

Мәрјәм исә Иса Мәсиһин јанына ҝедир. Ағлајараг онун ајағына дүшүр вә баҹысынын дедији сөзләри тәкрарлајыр: «Аға, сән бурада олсајдын, гардашым өлмәзди». Пејғәмбәр Мәрјәмин вә онун ардынҹа ҝәлән ҹамаатын ағладығыны ҝөрәндә бәрк гәһәрләнир вә дәриндән аһ чәкир. О һәтта ҝөз јашларыны сахлаја билмир. Бу, чохларына тәсир едир. Амма бәзиләри белә дејир: «Корун ҝөзүнү ачан бир шеј едә билмәзди ки, бу јазыг өлмәсин?» (Јәһја 11:32, 37).