Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Илаһи мүждә

 ДӘРС 2

Аллаһы таныјаг

Аллаһы таныјаг

1. Нәјә ҝөрә јалныз Аллаһа ибадәт етмәк лазымдыр?

Һәр шеји јарадан Аллаһдыр. Онун нә башланғыҹы, нә дә сону вардыр (Зәбур 90:2). Мүгәддәс Китабда јазылмыш ҝөзәл мүждәләрин дә мәнбәји Одур (1 Тимутијә 1:11). Бизә һәјаты Аллаһ бәхш етдији үчүн јалныз Она ибадәт етмәлијик. Вәһј 4:11 ајәсини охујун.

2. Аллаһ һаггында нә билирсиниз?

Аллаһы һеч бир инсан ҝөрмәјиб. О, руһдур, Ону ҝөрмәк мүмкүн дејил. Руһ ҹисмани варлыглардан алидир (Јәһја 4:24). Бунунла белә, биз Аллаһын хүсусијјәтләрини Онун јаратдыгларында ҝөрә биләрик. Мәсәлән, чешид-чешид мејвәләр, ал-әлван чичәкләр Онун мәһәббәт вә һикмәтини бүрузә верир. Уҹсуз-буҹагсыз Каинат исә һәдсиз ҝүҹүнә шәһадәт едир. Ромалылара 1:20 ајәсини охујун.

Аллаһы даһа јахшы танымаг үчүн Мүгәддәс Китабы охумаг лазымдыр. Орада Аллаһын нәдән разы галыб нәји бәјәнмәдији барәдә, инсанларла неҹә рәфтар етмәси, һәмчинин мүхтәлиф һаллара һансы мүнасибәтлә јанашмасы барәдә данышылыр. Зәбур 103:7—10 ајәләрини охујун.

3. Аллаһын нечә ады вар?

Аллаһа мүхтәлиф сифәтләрлә мүраҹиәт олунур, амма Онун тәк бир ады вардыр. Давуд пејғәмбәр демишдир: «Ја Рәббимиз Јеһова, бүтүн дүнјада исмин неҹә әзәмәтлидир, еһтишамыны ҝөјләрдән јүксәјә галдырдын!» (Зәбур 8:1). Аллаһын ады мүхтәлиф дилләрдә мүхтәлиф ҹүр тәләффүз олунур. Мүгәддәс Китабын 2014-ҹү илдә дәрҹ едилмиш азәрбајҹанҹа тәрҹүмәсиндә бу ад «Јеһова» формасында ишләнир. «Азәрбајҹан Милли Енсиклопедијасы»нда «Јәһва» кими верилиб (I ҹилд, сәһ. 333). Аллаһын сөзләрини гәләмә алмыш пејғәмбәрләр Онун уҹа адыны Мүгәддәс Китабда тәхминән 7000 дәфә јазмышлар. Мәтта 22:37, 38 ајәләрини охујун.

 4. Дүнјадакы әзаблар Аллаһдандырмы?

Аллаһ чәкдијимиз әзаблары ҝөрүр вә тезликлә онлара сон гојаҹаг

Бу ҝүн дүнјада әзаб-әзијјәт баш алыб ҝетдијиндән бәзи инсанлар дүшүнүр ки, Аллаһ бизимлә марагланмыр. Бир башгалары исә дејир ки, Аллаһ бизи бу јолла сынаға чәкир. Амма бу белә дејил. Јагуб 1:13 ајәсини охујун.

Аллаһ инсана ирадә азадлығы кими мисилсиз немәт бәхш едиб. Әслиндә, инсан бу азадлыгдан Аллаһа хош ҝедән ишләр үчүн истифадә етмәлидир (Јушә 24:15). Әфсус ки, бир чохлары пислик јолуну сечиб, буна ҝөрә дә зүлм ҝетдикҹә артыр. Бу ҹүр һагсызлыглары ҝөрмәк Аллаһа гәтијјән хош дејил. Јарадылыш 6:5, 6 ајәләрини охујун.

Јеһова бизим рифаһымызы дүшүнән Аллаһдыр вә истәјир ки, биз хошбәхт јашајаг. О, тезликлә әзаб-әзијјәтин дә, онлары төрәдән инсанларын да көкүнү кәсәҹәк. Һәләлик исә Аллаһын әзабларын гаршысыны алмамасы сәбәбсиз дејил. Сәккизинҹи фәсилдә бу сәбәбләри арашдыраҹағыг. 2 Бутрус 2:9; 3:7, 13 ајәләрини охујун.

5. Аллаһа јахынлашмаг үчүн нә етмәлијик?

Јеһова Аллаһ биз инсанлара дуа етмәји бујурур. Беләҹә, биз Она јахынлаша биләрик. О, шәхсән һәр биримизлә марагланыр (Зәбур 65:2; 145:18). Бәзән биз сәһвләр едирик, амма Аллаһ бағышлајандыр. Ону разы салмаг үчүн етдијимиз ҹәһдләр Онун ҝөзүндән јајынмыр. Демәли, ҝүнаһлы олсаг да, Аллаһа јахынлаша биләрик. Зәбур 103:12—14; Јагуб 4:8 ајәләрини охујун.

Һәјатын баниси Јеһова Аллаһ олдуғу үчүн һамыдан вә һәр шејдән чох Ону севмәлијик (Марк 12:30). Аллаһы севдијимизи Онун һаггында өјрәнмәклә вә Онун тәләбләринә әмәл етмәклә ҝөстәрә биләрик. Беләҹә, Аллаһа јахынлашарыг. 1 Тимутијә 2:4; 1 Јәһја 5:3 ајәләрини охујун.