Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Аллаһын Падшаһлығы һөкмранлыг едир!

 ФӘСИЛ 17

Падшаһлығын хидмәтчиләри кими тәлим алырыг

Падшаһлығын хидмәтчиләри кими тәлим алырыг

МӨВЗУ

Теократик мәктәбләр Падшаһлығын хидмәтчиләрини алдыглары тапшырыглары там шәкилдә јеринә јетирмәјә һазырлајыр

1-3. Иса тәблиғ ишини неҹә ҝенишләндирди вә бунунла бағлы һансы суаллар ортаја чыхыр?

ИСА пејғәмбәр ики ил әрзиндә Ҹәлиләдә тәблиғ етмишди. (Мәтта 9:35—38 ајәләрини охујун.) О, шәһәрләри вә кәндләри бир-бир ҝәзәрәк синагогларда инсанлары өјрәдир вә Падшаһлыг һаггында мүждәни бәјан едирди. Иса һарада тәблиғ едирдисә, әтрафына издиһам јығылырды. О ҝөрүрдү ки, «мәһсул бол»дур вә даһа чох ишчијә еһтијаҹ вар.

2 Иса тәблиғ ишини ҝенишләндирмәјин гајғысына галды. Бунун үчүн о, 12 һәварисини «Аллаһын Падшаһлығыны тәблиғ етмәјә» ҝөндәрди (Лука 9:1, 2). Ола билсин, бу ишин өһдәсиндән неҹә ҝәләҹәкләринә даир һәвариләрин чохлу суаллары варды. Иса һәвариләрини тәблиғә ҝөндәрмәмишдән әввәл, сәмави Атасынын ону өјрәтдији кими, о да мәһәббәтдән ирәли ҝәләрәк онлара тәлим верди.

3 Бунунла әлагәдар ортаја бир нечә суал чыхыр: Иса сәмави Атасындан һансы тәлими алмышды? Иса һәвариләринә һансы тәлими вермишди? Бәс бу ҝүн Падшаһлығын Падшаһы тәблиғ ишини јеринә јетирмәләри үчүн өз давамчыларына тәлим верирми? Әҝәр верирсә, онда неҹә?

«Ата мәнә нә өјрәдибсә, мән дә ону данышырам»

4. Иса сәмави Атасындан нә заман вә һарада тәлим алмышды?

4 Иса Атасы тәрәфиндән өјрәдилдијини ачыг-ајдын шәкилдә етираф едирди. Хидмәт заманы о демишди: «Ата мәнә нә өјрәдибсә, мән дә ону данышырам» (Јәһ. 8:28). О, нә заман вә һарада тәлим алмышды? Шүбһәсиз, Аллаһын илкин Оғлунун тәлими о, јарадыландан дәрһал сонра башламышды (Кол. 1:15). Атасы илә бәрабәр ҝөјдә оланда Оғул сајсыз-һесабсыз илләр әрзиндә Бөјүк Нәсиһәтчијә гулаг асмыш вә Ону мүшаһидә етмишди (Әшј. 30:20). Нәтиҹәдә, Оғул Атасынын хүсусијјәтләри, ишләри вә мәгсәдләри барәдә мүкәммәл тәлим алмышды.

5. Ата Өз Оғлуна јер үзүндә иҹра етмәли олдуғу хидмәтлә бағлы һансы ҝөстәришләри вермишди?

5 Вахты чатанда Јеһова Өз Оғлуна јер үзүндә иҹра етмәли олдуғу хидмәтлә бағлы тәлим кечди. Ҝәлин Бөјүк Нәсиһәтчи вә Онун илк Оғлу арасындакы јахын мүнасибәти тәсвир едән пејғәмбәрлији нәзәрдән кечирәк. (Әшија 50:4, 5 ајәләрини  охујун.) Пејғәмбәрликдә дејилир ки, Јеһова Оғлуну «һәр сәһәр» ојадырды. Бу сөзләр инсанын ағлында тәлим вермәк үчүн һәр сәһәр өз шаҝирдини ојадан мүәллими ҹанландырыр. Мүгәддәс Китаба даир бир әсәрдә дејилир: «Јеһова... ону, санки, шаҝирд кими, мәктәбә апарыр, нә барәдә вә неҹә тәблиғ едәҹәјини өјрәдир». Бу сәмави «мәктәб»дә Јеһова Оғлуна инсанларла «нә һагда данышмағы, нә демәји» өјрәтмишди (Јәһ. 12:49). Ата Оғлуна һәмчинин башгаларына неҹә тәлим вермәји дә өјрәтмишди *. Иса алдығы тәлими јер үзүндә тәкҹә өз хидмәтини јахшы јеринә јетирмәк үчүн истифадә етмирди, һәмчинин давамчыларыны өјрәдирди ки, онлар да өз хидмәтләрини јеринә јетирә билсинләр.

6, 7. а) Иса шаҝирдләринә нәји өјрәтмишди вә бу онлары нәјә һазырламышды? б) Иса бизим ҝүнләрдә давамчыларынын һансы тәлими кечмәләринин гајғысына галыр?

6 Иса һәвариләринә нә өјрәдирди? Мәттанын јаздығы мүждәнин 10-ҹу фәслинә әсасән, Иса хидмәтләрини иҹра етмәләри үчүн шаҝирдләринә нөвбәти конкрет ҝөстәришләри вермишди: һарада тәблиғ етмәли (5 вә 6-ҹы ајәләр), һансы хәбәри чатдырмалы (7-ҹи ајә), Јеһоваја неҹә ҝүвәнмәли (9 вә 10-ҹу ајәләр), ев саһибләри илә сөһбәтә неҹә башламалы (11—13–ҹү ајәләр), етиразлара неҹә мүнасибәт ҝөстәрмәли (14 вә 15-ҹи ајәләр) вә тәгибләр заманы неҹә давранмалы (16—23–ҹү ајәләр) *. Исанын вердији бу ајдын тәлим сајәсиндә шаҝирдләр ерамызын биринҹи әсриндә хош хәбәрин тәблиғ ишинә рәһбәрлик етмәк үчүн лазыми билик вә баҹарыгла тәмин олунмушдулар.

7 Бәс бизим ҝүнләр барәдә нә демәк олар? Аллаһын Падшаһлығынын Падшаһы олан Иса өз шаҝирдләринә ән ваҹиб иши — «Падшаһлыг һаггындакы мүждә халгларын һамысына шәһадәт олсун дејә» бүтүн јер үзүндә тәблиғ етмәји тапшырмышды (Мәт. 24:14). Бәс Падшаһ бу ваҹиб иши иҹра етмәк үчүн Аллаһын халгына тәлим кечибми? Әлбәттә. Аллаһын дәрҝаһында олан Падшаһымыз гајғы ҝөстәриб ки, давамчылары тәблиғ етмәк вә јығынҹагда шәрәфли мәсулијјәтләри иҹра етмәк үчүн тәлим кечсинләр.

Хидмәтчиләр тәблиғ етмәји өјрәнирләр

8, 9. а) Теократик Хидмәт Мәктәбинин әсас мәгсәди нәдир? б) Теократик Хидмәт Мәктәби сизә хидмәтдә даһа мәһарәтли олмаға неҹә көмәк едиб?

8 Јеһованын тәшкилаты узун илләрдир ки, конгресләр вә јығынҹаг ҝөрүшләри (мәсәлән, Хидмәти ҝөрүш) васитәсилә Аллаһын халгыны хидмәтә һазырлајыр. Анҹаг 1940-ҹы илләрдән етибарән мәркәзи идарәдәки мәсул гардашлар мүхтәлиф мәктәбләр кечирмәк үчүн тәдрис програмлары һазырламаға башладылар.

9 Теократик Хидмәт Мәктәби. Кечән фәсилдән өјрәндијимиз кими, бу мәктәб 1943-ҹү илдән кечирилмәјә башлајыб. Бәс мәктәбин мәгсәди шаҝирдләрә јалныз јығынҹаг ҝөрүшләриндә мәһарәтлә мәрузәләр сөјләмәјә көмәк етмәкдир? Әлбәттә ки, јох. Мәктәбин әсас мәгсәди дәјишилмәз олараг галыр. Онун мәгсәди Аллаһын халгына нитг әнамындан истифадә едәрәк Јеһованы иззәтләндирмәкдир (Зәб. 150:6). Мәктәбә јазылан  баҹы-гардашлар Падшаһлығын даһа мәһарәтли тәблиғчиләри олмағы өјрәнирләр.

10, 11. Һал-һазырда Ҝилеад Мәктәбиндә кимләр тәлим алыр вә бу мәктәбин әсас мәгсәди нәдир?

10 Ҝөзәтчи Гүлләсинин Мүгәддәс Китаб Мәктәби Ҝилеад. Һал-һазырда Ҝөзәтчи Гүлләсинин Мүгәддәс Китаб Мәктәби Ҝилеад адланан бу мәктәб 1943-ҹү ил февралын 1-дән кечирилмәјә башлајыб. Бу мәктәбин лап әввәлдән башлыҹа мәгсәди пионерләрә вә диҝәр таммүддәтли хидмәтчиләрә дүнјанын мүхтәлиф јерләриндә хүсуси тәјинатлы мүждәчи кими хидмәт етмәк үчүн тәлим вермәк олуб. Анҹаг 2011-ҹи илин октјабрындан етибарән Ҝилеад Мәктәбинә тәлим алмаг үчүн јалныз хүсуси таммүддәтли хидмәт нөвүндә оланлары — хүсуси пионерләри, бејтеллиләри, сәјјар нәзарәтчиләри вә һәјат јолдашларыны, еләҹә дә бу мәктәби кечмәјән хүсуси тәјинатлы мүждәчиләри дәвәт едирләр.

11 Бәс Ҝилеад Мәктәбинин мәгсәди нәдир? Узун мүддәтдир ки, бу мәктәбин тәлиматчысы олан бир гардаш бу суала белә ҹаваб верир: «Аллаһын Кәламыны һәртәрәфли арашдырмағын сајәсиндә шаҝирдләрин иманыны мөһкәмләндирмәк вә онлара тәјинатларында үзләшәҹәкләри чәтинликләрин өһдәсиндән мүвәффәгијјәтлә ҝәлмәк үчүн лазыми руһани хүсусијјәтләрә јијәләнмәјә көмәк етмәкдир. Һәмчинин бу мәктәбин мәгсәди шаҝирдләрә хош хәбәри даһа шөвглә вәз етмәк истәји ашыламагдыр» (Ефес. 4:11).

12, 13. Ҝилеад Мәктәби үмумдүнја тәблиғ ишинин ирәлиләмәсинә һансы төһфәни вериб? Нүмунә чәкин.

12 Ҝилеад Мәктәби үмумдүнја тәблиғ ишинин ирәлиләмәсинә һансы төһфәни вериб? 1943-ҹү илдән бәри мәктәбин 8500-дән чох мәзуну олуб * вә бу мәктәбдә тәлим алан хүсуси тәјинатлы мүждәчиләр 170-дән чох өлкә вә әразидә хидмәт едир. Бу хүсуси тәјинатлы мүждәчиләр сәјлә хидмәт етмәклә вә башгаларына да буну өјрәтмәклә алдыглары тәлими сәмәрәли шәкилдә истифадә едирләр. Бир чох һалларда хүсуси тәјинатлы мүждәчиләр аз тәблиғчиси олан вә ја һеч тәблиғчиси олмајан әразиләрдә тәблиғ ишинә рәһбәрлик едирләр.

13 Ҝәлин ҝөрәк Икинҹи Дүнја мүһарибәси заманы Јапонијада тәшкил олунмуш тәблиғ хидмәти тамамилә дајандырылмаг үзрә оланда нәләр баш вермишди. 1949-ҹу илин августунда орада һеч он тәблиғчи јох иди. Анҹаг һәмин илин сонунда артыг Јапонијада Ҝилеад Мәктәбинин 13 мәзуну фәал шәкилдә тәблиғ едирди. Сонрадан бир чох хүсуси тәјинатлы мүждәчиләр дә онлара гошулду. Әввәлҹә онлар диггәтләрини даһа бөјүк шәһәрләрә ҹәмләјирдиләр, сонра исә башга шәһәрләрә үз тутдулар. Хүсуси тәјинатлы мүждәчиләр өјрәтдикләри инсанлары вә диҝәр мәсиһчиләри ҹан-дилдән пионер хидмәтиндә онлара гошулмаға тәшвиг едирдиләр. Онларын бу ҹүр сәјлә хидмәт етмәләри ҝөзәл сәмәрәләр верди. Һал-һазырда Јапонијада 216 000-дән чох тәблиғчи вар вә онлардан 40 фаизи пионер кими хидмәт едир! *

14. Теократик мәктәбләр нәјин сүбутудур? (Һәмчинин 188—191 сәһифәләрдәки « Падшаһлығын хидмәтчиләри үчүн мәктәбләр» адлы чәрчивәјә бахын.)

 14 Диҝәр теократик мәктәбләр. Пионер Хидмәти Мәктәби, Мәсиһчи Әр-арвадлар үчүн Мүгәддәс Китаб Мәктәби вә Субај Гардашлар үчүн Мүгәддәс Китаб Мәктәби орада тәлим аланларын руһән инкишафында вә башгаларына нүмунә гојараг хидмәтдә ҹанла-башла иштирак етмәсиндә әвәзсиз рол ојнајыб *. Бүтүн бу теократик мәктәбләр Падшаһын өз давамчыларыны хидмәтләрини јеринә јетирмәләри үчүн там јарагландырмасына ҝүҹлү сүбутдур (2 Тим. 4:5).

Гардашлар хүсуси тәјинатларын өһдәсиндән ҝәлмәк үчүн тәлим кечирләр

15. Аллаһын халгы арасында мәсул мөвге тутан кишиләр Исаны нәдә тәглид етмәк истәјирләр?

15 Әшијанын пејғәмбәрлијиндә дејилирди ки, Иса Аллаһдан тәлим алырды. Бу сәмави «мәктәбдә» Оғул «јериндә дејилмиш сөзлә јорғунлара» неҹә ҹаваб вермәји өјрәнирди (Әшј. 50:4). Иса јер үзүндә оланда өјрәндикләринә әсасән давранараг зәһмәткешләрә вә јүкү ағыр оланлара тәравәт верирди (Мәт. 11:28—30). Аллаһын халгы арасында мәсул мөвге тутан кишиләр Исаны тәглид едәрәк баҹы-гардашлары үчүн тәравәт мәнбәји  олмаг истәјирләр. Буна ҝөрә дә мәсул гардашлара һәмиманлыларына даһа сәмәрәли шәкилдә хидмәт етмәјә көмәк едән мүхтәлиф мәктәбләр тәсис олунуб.

16, 17. Падшаһлыг Хидмәти Мәктәбинин мәгсәди нәдир? (Һәмчинин һашијәјә бахын.)

16 Падшаһлыг Хидмәти Мәктәби. Бу мәктәбин илк синфи 1959-ҹу ил мартын 9-да Саут-Лансингдә (Нју-Јорк) кечирилиб. Бу бирајлыг курсу кечмәк үчүн сәјјар нәзарәтчиләр вә јығынҹаг хидмәтчиләри дәвәт олунурду. Сонралар бу Мәктәбин програмы инҝилис дилиндән башга дилләрә тәрҹүмә олунду вә тәдриҹән бүтүн дүнјада кечирилмәјә башланды *.

Ллојд Берри гардаш Јапонијада Падшаһлыг Хидмәти Мәктәби кечирир, 1970-ҹи ил

17 Падшаһлыг Хидмәти Мәктәбинин мәгсәди илә бағлы 1962-ҹи ил үчүн «Јеһованын Шаһидләринин иллик мәҹмуәси»ндә дејилмишди: «Чохлу ишләмәк лазым ҝәлән буҝүнкү дүнјада Јеһованын Шаһидләринин јығынҹаг нәзарәтчиси өз һәјатыны елә гурмағы баҹармалыдыр ки, бүтүн јығынҹаға лазыми гајғы ҝөстәрә билсин вә онлар үчүн хејир-дуа олсун. Ејни заманда да о, јығынҹағын рифаһы наминә аилә мәсулијјәтләринә башдансовду јанашмамалы, сағламдүшүнҹәли олмалыдыр. Бүтүн дүнјадан олан јығынҹаг хидмәтчиләринин Падшаһлыг Хидмәти Мәктәбинә  топлашараг нәзарәтчи мәсулијјәтини јеринә јетирмәјә көмәк едән тәлим алмалары, һәгигәтән дә, ҝөзәл фүрсәтдир!» (1 Тим. 3:1—7; Тит. 1:5—9).

18. Нәјә ҝөрә демәк олар ки, Падшаһлыг Хидмәти Мәктәби Аллаһын бүтүн халгына фајда ҝәтирир?

18 Падшаһлыг Хидмәти Мәктәби Аллаһын бүтүн халгына фајда ҝәтирир. Нәјә әсасән белә демәк олар? Ағсаггаллар вә јығынҹаг хидмәтчиләри мәктәбдә өјрәндикләрини тәтбиг едәндә, Иса кими, онлар да һәмиманлылары үчүн тәравәт мәнбәји олурлар. Мәҝәр ағсаггалын вә ја јығынҹаг хидмәтчисинин хош сөз демәси, гулаг асмасы вә ја башчәкмәси сизи руһландырмыр? (1 Салон. 5:11). Јеһовадан тәлим алмыш бу ҹүр гардашлар јығынҹаг үчүн әсил хејир-дуадыр!

19. Тәлим комитәсинин нәзарәтиндә даһа һансы мәктәбләр вар вә бу мәктәбләрин мәгсәди нәдир?

19 Диҝәр теократик мәктәбләр. Рәһбәрлик Шурасынын Тәлим комитәси тәшкилатдакы мәсул гардашларын тәлим алдығы диҝәр мәктәбләрә дә нәзарәт едир. Бу мәктәбләр јығынҹаг ағсаггаллары, сәјјар нәзарәтчиләр вә филиалын комитә үзвләри кими мәсул гардашлара үзәрләринә дүшән чох сајлы мәсулијјәтләри даһа сәриштәли шәкилдә јеринә јетирмәјә көмәк етмәк үчүн јарадылыб. Мүгәддәс Китаба әсасланан бу тәлим заманы гардашлары руһаниликләрини горумаға вә Јеһованын онлара етибар етдији дәјәрли сүрү илә Мүгәддәс Китаб принсипләринә әсасән давранмаға тәшвиг едирләр (1 Бут. 5:1—3).

Малавидә кечирилән Хидмәти Тәкмилләшдирмә Мәктәбинин илк синфи, 2007-ҹи ил

20. Нәјә ҝөрә Иса демишди ки, бизим һамымыз Јеһовадан елм алмышыг вә сиз нә етмәјә гәтијјәтлисиниз?

20 Һеч бир шүбһә јохдур ки, Аллаһын Падшаһлығынын Падшаһы давамчыларынын јахшы тәлим алмаларынын гајғысына галыр. Бүтүн бу тәлимләр Јеһовадандыр: О, Өз оғлуну, Оғул исә давамчыларыны өјрәдир. Буна ҝөрә дә Иса демишди ки, бизим һамымыз Јеһовадан елм алмышыг (Јәһ. 6:45; Әшј. 54:13). Ҝәлин Падшаһын бизә тәгдим етдији тәлимләрдән — Теократик Хидмәт Мәктәбиндән, диҝәр јығынҹаг ҝөрүшләриндән, еләҹә дә бу фәсилдә ады чәкилән һәр бир мәктәбдән там фајда әлдә етмәјә гәтијјәтли олаг. Ҝәлин һәмишә јадда сахлајаг ки, алдығымыз бу тәлимләрин әсас мәгсәди хидмәтимизи там шәкилдә јеринә јетирмәк үчүн руһән мөһкәм галмағымыза көмәк етмәкдир.

^ абз. 5 Һарадан билирик ки, Ата Оғула неҹә тәлим вермәји өјрәдиб? Ҝәлин бир шејә диггәт јетирәк: Иса дүнјаја ҝәлмәмишдән әсрләр өнҹә гәләмә алынмыш пејғәмбәрликдә дејилдији кими, өз тәлимләриндә чохлу нүмунәләрдән истифадә едирди (Зәб. 78:2; Мәт. 13:34, 35). Шүбһәсиз, бу пејғәмбәрлијин Мүәллифи олан Јеһова Аллаһ чох-чох әввәл гәрар вермишди ки, Онун Оғлу нүмунәләрлә вә мәсәлләрлә өјрәдәҹәк (2 Тим. 3:16, 17).

^ абз. 6 Ајлар сонра Иса «јетмиш шаҝирд тәјин едиб онлары... ики-ики [тәблиғә] ҝөндәрди». О, онлара да тәлим верди (Лука 10:1—16).

^ абз. 12 Бәзиләри Ҝилеад Мәктәбини бир нечә дәфә кечиб.

^ абз. 13 Ҝилеад Мәктәби кечмиш хүсуси тәјинатлы мүждәчиләрин үмумдүнја тәблиғ саһәсинә һансы фајданы ҝәтирдикләри барәдә әлавә мәлуматы «Јеһованын Шаһидләри — Аллаһын Падшаһлығынын мүждәчиләри» китабынын 23-ҹү фәслинә (рус.) бахын.

^ абз. 14 Сон ики мәктәб Падшаһлығын Мүждәчиләри үчүн Мәктәб илә әвәз олунуб.

^ абз. 16 Һал-һазырда бүтүн ағсаггаллар Падшаһлыг Хидмәти Мәктәбиндән фајда әлдә едирләр. Бу мәктәб бир нечә илдән бир кечирилир вә кечирилмә мүддәти мүхтәлифдир. 1984-ҹү илдән бәри јығынҹаг хидмәтчиләри дә бу мәктәбдә тәлим алырлар.