Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  октјабр 2015

«Иманымызы артыр»

«Иманымызы артыр»

«Нәдә иманым чатышмыр, мәнә көмәк ет!» (МАРК 9:24).

НӘҒМӘ: 81, 135

1. Иман нә дәрәҹәдә ваҹибдир? (Мәгаләнин әввәлиндәки шәклә бахын.)

НӘ ВАХТСА сиздә белә бир суал јараныб: «Ҝөрәсән, Јеһова мәни бөјүк мүсибәтдә хилас едәҹәк? Мәни јени дүнјада ҝөрмәк истәјәҹәк?» Сөзсүз ки, хилас олмаг үчүн мүәјјән тәләбләр вар. Һәмин ваҹиб тәләбләрдән бирини һәвари Булус вурғуламышды: «Иман етмәдәнсә Аллаһын разылығыны газанмаг мүмкүн дејил» (Ибр. 11:6). Бу, садә тәләб кими ҝөрүнсә дә, әслиндә белә дејил, чүнки 2 Салоникилиләрә 3:2 ајәсиндә дејилдији кими, һамынын иманы јохдур. Бу ајәләр бизә мөһкәм имана саһиб олмағын нә гәдәр ваҹиб олдуғуну анламаға көмәк едәҹәк.

2, 3. а) Иманын ваҹиблији илә бағлы һәвари Бутрус нә демишди? б) Һансы суаллары нәзәрдән кечирәҹәјик?

2 Һәвари Бутрус да иманын ваҹиблијини хүсуси олараг вурғуламышды. О демишди ки, сынанмыш иман Иса Мәсиһин зүһурунда тәрифә, шөһрәт вә шәрәфә лајиг ҝөрүләҹәк. (1 Бутрус 1:7 ајәсини охујун.) Бөјүк мүсибәт сүрәтлә јахынлашыр. Буна ҝөрә дә иманымыз елә олмалыдыр ки, Шанлы Падшаһымыз Иса зүһур едәндә бизи иманымыза ҝөрә тәрифләсин. Сөзсүз ки, биз иман едиб һәјатыны горујанлардан олмаг истәјирик (Ибр. 10:39). Бу мәгсәдә чатмаг үчүн Мәсиһә јалваран киши кими, биз дә Аллаһа јалвармалыјыг: «Нәдә иманым чатышмыр, мәнә көмәк ет!» (Марк 9:24). Јахуд да Исанын һәвариләри кими биз дә: «Иманымызы артыр», — дејә Аллаһа дуа етмәлијик (Лука 17:5).

 3 Иманы артырмағын ваҹиблијиндән данышаркән ортаја бир нечә суал чыхыр. Иманымызы неҹә мөһкәмләндирә биләрик? Иман саһиби олдуғумузу неҹә ҝөстәрә биләрик? Нә үчүн әминик ки, иманла бағлы етдијимиз дуалар гәбул олунаҹаг?

АЛЛАҺА МӘГБУЛ ИМАНА САҺИБ ОЛУН

4. Кимләрин нүмунәси бизи иманымызы мөһкәмләндирмәјә тәшвиг едир?

4 Мүгәддәс Китабда «јазыланларын һамысы бизә нәсиһәт олараг јазылыб» (Ром. 15:4). Орада адлары чәкилән мөмин инсанлардан иман барәдә чох шеј өјрәнә биләрик. Ибраһим, Сара, Исһаг, Јагуб, Муса, Раһаб, Ҹәдун, Бәрәг вә башгалары һагда јазыланлар бизи иманымызы јохламаға тәшвиг едир (Ибр. 11:32—35). Үстәлик, мүасир дөврдәки иманлы баҹы-гардашларымызын нүмунәләри дә бизә ҝүҹ верир ки, вар ҝүҹүмүзлә чалышыб иманымызы мөһкәмләндирәк *.

5. Илјас пејғәмбәр Јеһоваја үрәкдән иман етдијини неҹә ҝөстәрди вә онун нүмунәси бизи нә барәдә дүшүнмәјә тәшвиг едир?

5 Ҝәлин Мүгәддәс Китабдан Илјас пејғәмбәрин нүмунәсинә бахаг. Нөвбәти һадисәләр заманы о, Јеһоваја үрәкдән етибар етдијини ҝөстәрмишди. Әһәб падшаһа Јеһованын гураглыг ҝәтирәҹәјини билдирәндә Илјас пејғәмбәр әминликлә демишди: «Јеһоваја анд олсун ки, мән демәјинҹә... нә шеһ олаҹаг, нә дә јағыш јағаҹаг!» (1 Пад. 17:1). Илјас пејғәмбәр инанырды ки, гураглыг заманы Јеһова һәм она, һәм дә башгаларына нә лазымдырса, јетирәҹәк (1 Пад. 17:4, 5, 13, 14). О әмин иди ки, Јеһова Аллаһ дул гадынын оғлуну дирилдә биләр (1 Пад. 17:21). Пејғәмбәр Кармел дағында оланда зәррә гәдәр дә шүбһә етмирди ки, Јеһова од ҝөндәриб онун гурбаныны јандыраҹаг (1 Пад. 18:24, 37). Гураглыға сон гојмаг вахты ҝәләндә, һәлә јағышын јағаҹағына һеч бир әламәт јох иди, анҹаг Илјас пејғәмбәр Әһәб падшаһа демишди: «Дур, је-ич. Чүнки лејсан сәси ҝәлир!» (1 Пад. 18:41). Мәҝәр бу әһвалатлар бизи тәшвиг етмир ки, иманымызын бу ҹүр мөһкәм олуб-олмадығыны јохлајаг?

ИМАНЫМЫЗЫ НЕҸӘ МӨҺКӘМЛӘНДИРӘ БИЛӘРИК?

6. Иманымызы мөһкәмләндирмәк үчүн Јеһовадан нә истәмәлијик?

6 Биз өз ҝүҹүмүзә иманымызы мөһкәмләндирә билмәрик. Иман Аллаһын мүгәддәс руһунун бәһрәсинә дахилдир (Гал. 5:22). Јахшы оларды ки, Иса Мәсиһин мәсләһәтинә әмәл едиб Аллаһдан мүгәддәс руһ диләјәк. О демишди ки, Аллаһ ондан истәјәнләрә мүгәддәс руһ верәҹәк (Лука 11:13).

7. Иманымызы неҹә мөһкәм сахлаја биләрик? Нүмунә чәкин.

7 Иманымыз мөһкәмләнәндән сонра да ону бәсләмәк лазымдыр. Иманы оҹагла мүгајисә етмәк олар. Оҹаг галананда ҝур аловла јанмаға башлајыр. Анҹаг оҹаға одун атмајанда, од сәнҝијәрәк сөнүр, јериндә көз галыр, јаваш-јаваш көз дә сојуг күлә чеврилир. Анҹаг оҹаға вахташыры одун атанда, онун алову сөнмүр. Иман да беләдир. Ону мүнтәзәм олараг Аллаһын Кәламы илә гидаландырсаг, о, ҹанлы галаҹаг. Мүгәддәс Китабы дәриндән өјрәндикҹә, арашдырдыгҹа үрәјимиздә һәм бу китаба, һәм дә онун Мүәллифинә дәрин мәһәббәт јаранаҹаг. Бу мәһәббәт тәмәли үзәриндә исә мөһкәм иман гура биләҹәјик.

8. Иманы мөһкәмләндирмәк вә горумаг үчүн нә етмәк олар?

8 Иманы мөһкәмләндирмәк вә горумаг  үчүн даһа нә едә биләрсиниз? Вәфтиз олунана гәдәр алдығыныз биликләрин үзәриндә галмајын (Ибр. 6:1, 2). Мүгәддәс Китабын јеринә јетән пејғәмбәрликләрини арашдырын. Бу, сизин иманынызы мөһкәмләндирәҹәк. Һәмчинин Мүгәддәс Китабдан бир мејар кими истифадә едәрәк иманынызы јохлајын. Белә ки, орада иманлы инсандан нә тәләб олундуғу јазылыб. Ҝөрүн сизин иманыныз һәмин тәләбләрә ујғун ҝәлир, јохса јох. (Јагуб 1:25; 2:24, 26 ајәләрини охујун.)

9, 10. Јахшы достлуг, јығынҹаг ҝөрүшләри вә тәблиғ хидмәти иманымызы неҹә мөһкәмләндирир?

9 Һәвари Булус мәсиһиләрә демишди ки, онлар иманлары васитәсилә бир-бирини руһландыра биләрләр (Ром. 1:12). Биз һәмиманлыларымызла, хүсусилә дә сынанмыш имана саһиб олан баҹы-гардашларымызла үнсијјәт едәндә бир-биримизин иманыны мөһкәмләндиририк (Јаг. 1:3). Пис достлуг иманы мәһв едир, анҹаг јахшы достлуг ону мөһкәмләндирир (1 Кор. 15:33). Бу сәбәбдән, бизә јығынҹаг ҝөрүшләриндән галмамаг, бир-биримизи руһландырмаг мәсләһәт ҝөрүлүр. (Ибраниләрә 10:24, 25 ајәләрини охујун.) Диҝәр сәбәб исә одур ки, һәмин ҝөрүшләрдә ешитдикләримиз иманымызы мөһкәмләндирир. Бу да һәвари Булусун сөзләри илә һәмаһәнҝдир: «Иман инсанда сөзү ешидәндән сонра јараныр» (Ром. 10:17). Өзүнүзә суал верин: «Јығынҹаглар мәним һәјатымын ајрылмаз һиссәсидир?»

10 Биз тәблиғ хидмәтиндә иштирак едәндә тәкҹә башгаларынын јох, һәмчинин өз иманымызы да мөһкәмләндиририк. Бу заман биз илк мәсиһиләр кими, Јеһоваја там етибар етмәји, һәр бир вәзијјәтдә ҹәсарәтлә данышмағы өјрәнирик (Һәв. 4:17—20; 13:46).

11. Нәјә ҝөрә Калиблә Јушәнин иманы мөһкәм иди вә биз онлара неҹә бәнзәјә биләрик?

11 Һәјатымызда Јеһованын көмәјини дујдугҹа, Онун дуаларымыза ҹаваб вердијини ҝөрдүкҹә иманымыз артыр. Калиб вә Јушә илә дә ејни шеј баш вермишди. Онлар Вәд едилмиш дијара кәшфијјата ҝедәндә иманла һәрәкәт етмишдиләр. Анҹаг бундан сонра да һәјатларында һәр дәфә Јеһованын рәһбәрлијини ҝөрдүкҹә онларын иманы даһа да артмышды. Тәәҹҹүблү дејил ки, Јушә исраиллиләрә әминликлә демишди: «Аллаһыныз Јеһованын сизә вердији ҝөзәл вәдләрдән һеч бири боша чыхмады». Сонра әлавә етмишди: «Јеһовадан горхун, Она сидги-үрәкдән, сәдагәтлә гуллуг един... Мән исә аиләмлә бирликдә Јеһоваја ибадәт едәҹәјәм» (Јуш. 23:14; 24:14, 15). Јеһованын кәрамәтини даддыгҹа бизим дә иманымыз мөһкәмләнәҹәк (Зәб. 34:8).

ИМАНЫНЫЗЫ ҜӨСТӘРИН

12. Иман саһиби олдуғумузу неҹә ҝөстәрә биләрик?

12 Иманымызын ҹанлы олдуғуну неҹә ҝөстәрә биләрик? Мәсиһин шаҝирди Јагубун сөзләринә әсасән, иман әмәлдә ҝөрүнмәлидир (Јаг. 2:18). Бәли, бизим иман саһиби олдуғумуз әмәлләримиздән бәлли олаҹаг. Ҝәлин бир нечә нүмунәјә бахаг.

Хидмәтә ҹан гојанлар мөһкәм иман саһиби олдугларыны ҝөстәрирләр (13-ҹү абзаса бахын)

13. Нәјә ҝөрә тәблиғ етмәклә биз иманымызы ҝөстәририк?

13 Јеһоваја иман етдијимизи тәблиғ ишиндә иштирак етмәклә ҝөстәрә биләрик. Әҝәр биз тәблиғ едириксә, демәли, сонун јахын олдуғуна вә онун ҝеҹикмәјәҹәјинә инанырыг (Һәб. 2:3). Иманымызын нә дәрәҹәдә бөјүк олдуғуну билмәк үчүн хидмәтдә нә гәдәр иштирак етдијимизә нәзәр салмалыјыг. Биз инсанлара Аллаһ барәдә данышмаг үчүн әлимиздән ҝәләни едирик? Хидмәтимизи ҝенишләндирмәјә чалышырыг? (2 Кор. 13:5). Бәли, хилас хәбәрини бәјан етмәклә биз иманымызын нә гәдәр мөһкәм олдуғуну ҝөстәририк. (Ромалылара 10:10 ајәсини охујун.)

14, 15. а) Ҝүндәлик һәјатымызда иманымызы неҹә ҝөстәрә биләрик? б) Иманынын ҝүҹлү олдуғуну әмәлдә ҝөстәрән бир нәфәрин нүмунәсини чәкин.

 14 Биз һәмчинин һәјатын чәтинликләри илә чарпышаркән Аллаһа иман етдијимизи ҝөстәририк. Хәстәлик, мәјуслуг, сыхынты, касыбчылыг вә башга проблемләрлә үзләшәндә инанырыг ки, Јеһова вә Онун Оғлу дар ҝүнүмүздә бизә көмәк едәҹәк (Ибр. 4:16). Тәкҹә руһани еһтијаҹларымыз үчүн јох, башга дәрдләримиз үчүн дә дуа етмәклә Јеһоваја иман етдијимизи ҝөстәририк. Иса Мәсиһ демишди ки, ҝүндәлик рузимиз дә дахил олмагла, мадди шејләр барәдә дә дуа едә биләрик (Лука 11:3). Мүгәддәс Китабда гәләмә алынан һадисәләр бизи архајын едир ки, Јеһова бизи корлуг чәкмәјә гојмајаҹаг. Исраилдә сәрт гураглыг оланда Јеһова Илјасын јемәјини дә, сујуну да јетирирди. Јеһованын ҝөстәриши илә «гузғунлар сәһәр-ахшам она чөрәк вә әт ҝәтирирдиләр, сују исә чајдан ичирди» (1 Пад. 17:3—6). Јеһова бизим үчүн дә һадисәләри елә јөнәлдә биләр ки, һеч нәдән корлуг чәкмәјәк. Биз буна инанырыг.

Һәјатын чәтинликләри илә чарпышаркән Јеһоваја иман етдијимизи ҝөстәририк (14-ҹү абзаса бахын)

15 Биз әминик ки, Мүгәддәс Китабдакы мәсләһәтләрлә отуруб-дурсаг, евимиздән рузи-бәрәкәт әскик олмајаҹаг. Асијада јашајан Ребека адлы баҹы бунун һәгигәт олдуғуну өз тәҹрүбәсиндән билир. Ребека баҹы вә һәјат јолдашы Мәтта 6:33 вә Мәсәлләр 10:4 ајәсинә ујғун олараг Падшаһлығы һәр шејдән үстүн тутурлар вә әлләринин зәһмәти илә јашајырлар. Амма бир вахтлар онун јолдашынын иши онларын һәр икисинин руһанилијини тәһлүкә алтына алмышды. Буна ҝөрә дә о, ишдән чыхмышды. Анҹаг дөрд ушағы доландырмаг лазым иди. Ребека дејир: «Биз ширнијјат һазырлајыб сатмаға башладыг. Нечә илдир ки, бунунла доланырыг. Јеһова бизи һеч вахт тәрк етмәјиб. Һәлә бир дәфә дә олсун, сүфрәмиздән јемәк әскик олмајыб». Сиз дә өз әмәлләринизлә Мүгәддәс Китабын ән дүзҝүн јолу ҝөстәрдијинә инандығынызы сүбут едирсиниз?

16. Аллаһа етибар етсәк, нә бичәҹәјик?

16 Биз шүбһә етмәмәлијик ки, Аллаһын  ҝөстәрдији јолла ҝетсәк, мүтләг хејир тапаҹағыг. Һәвари Булус Һәбгуг пејғәмбәрин сөзләриндән ситат ҝәтирәрәк јазмышды: «Салеһ иманы сајәсиндә јашајаҹаг» (Гал. 3:11; Һәб. 2:4). Она ҝөрә дә дадымыза чатаҹаг Кәсә иман етмәјимиз ваҹибдир. Һәвари Булус јазмышды ки, Аллаһ «биздә фәалијјәт ҝөстәрән ҝүҹү васитәсилә хаһиш етдијимиз, дүшүндүјүмүз һәр бир шејдән гат-гат артығыны етмәјә гадир»дир (Ефес. 3:20). Јеһованын хидмәтчиләри Онун ирадәсини һәјата кечирмәк үчүн әлләриндән ҝәләни едирләр. Анҹаг ејни заманда билирләр ки, һәр шеј онлардан асылы дејил, буна ҝөрә дә ҝерисини Јеһованын өһдәсинә бурахырлар, инанырлар ки, Јеһова Өзү иши јолуна гојаҹаг. Мәҝәр биз бу ҹүр Аллаһымыз олдуғуна ҝөрә хошбәхт дејилик?

ИМАНЛА БАҒЛЫ ДУАЛАР ГӘБУЛ ОЛУНУР

17. а) Һәвариләрин иманла бағлы етдикләри хаһиш неҹә ҹавабланды? б) Нәјә ҝөрә әмин ола биләрик ки, даһа чох иман диләсәк, буну алаҹағыг?

17 Бу фикирләри арашдырдыгдан сонра, ола билсин, ҝөрүрүк ки, бизә иманымызы мөһкәмләндирмәк лазымдыр. Ејни шеј һәвариләрлә дә баш вермишди. Онлар Мәсиһдән хаһиш етмишдиләр: «Иманымызы артыр» (Лука 17:5). Онларын бу хаһиши ҹавабсыз галмады. Ерамызын 33-ҹү илинин Әллинҹи ҝүн бајрамында мүгәддәс руһ алдылар вә Аллаһын нијјәтини даһа дәриндән анладылар. Бу, онларын иманынын мөһкәмләндирди. Нәтиҹәдә онлар о вахта гәдәр ҝөрүлмәмиш ән бөјүк тәблиғ фәалијјәтинә башладылар (Кол. 1:23). Бәс Аллаһ бизим иманымызы артырмагла бағлы хаһишимизи јеринә јетирәҹәк? Мүгәддәс Китаб бизи әмин едир ки, Аллаһын ирадәсинә мүвафиг нә диләјириксә, ону алаҹағыг (1 Јәһ. 5:14).

18. Јеһова иманыны мөһкәмләндирән инсанлара неҹә јар олур?

18 Јеһова бүтүн варлығы илә Она етибар едәнләрдән разыдыр. О, бизим хаһишимизи мүтләг ешидәҹәк, иманымызы артыраҹаг вә биз Аллаһын Падшаһлығына лајиг ҝөрүләҹәјик (2 Салон. 1:3, 5).

^ абз. 4 Нүмунә үчүн Лилиан Гобитас Клозе («Ојанын!» журналы 1993-ҹү ил 22 ијул сајы (инҝ.)), Феликс Борис («Ојанын!» журналы 1994-ҹү ил мај сајы (түрк.)) вә Ҹозефина Елиасын («Ојанын!» журналы 2009-ҹу ил сентјабр сајы (рус.)) биографијасына баха биләрсиниз.