Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  апрел 2015

Јеһова илә мүнасибәтини мөһкәмләндир

Јеһова илә мүнасибәтини мөһкәмләндир

«Аллаһа јахынлашын, О да сизә јахынлашаҹаг» (ЈАГ. 4:8).

1. Нәјә ҝөрә Јеһова илә мүнасибәтимизи мөһкәм сахламалыјыг?

ӘҜӘР сән өзүнү Јеһова Аллаһа һәср едиб вәфтиз олунмусанса, демәли, чох дәјәрли бир шејә саһибсән. Бу, Аллаһла сәнин аранда олан мүнасибәтдир. Анҹаг бу мүнасибәт тәкҹә Шејтан дүнјасынын дејил, һәм дә ҝүнаһлы тәбиәтимизин һүҹумларына мәруз галыр. Бу вәзијјәтлә бүтүн мәсиһиләр үзләшир. Буна ҝөрә дә бизим Јеһова илә мүнасибәтимиз мүмкүн гәдәр мөһкәм олмалыдыр.

2. а) Мүнасибәт дејәндә нә баша дүшүрсән? (Һашијәјә бахын.) б) Јеһова илә мүнасибәтимизи неҹә мөһкәмләндирә биләрик?

2 Бәс Јеһова сәнин үчүн нә дәрәҹәдә реалдыр? Онунла мүнасибәтини даһа да мөһкәмләндирмәк истәјәрдин? Јагуб 4:8 ајәсиндән бунун неҹә мүмкүн олдуғуну өјрәнирик: «Аллаһа јахынлашын, О да сизә јахынлашаҹаг». Диггәт јетирдинсә, бу, икитәрәфли просесдир *. Биз Аллаһа сары аддымладыгҹа, О да бизә сары аддымлајыр. Бу гаршылыглы һәрәкәтин тез-тез тәкрарланмасы Јеһова илә мүнасибәтимизи  мөһкәмләндирир. Нәтиҹәдә исә Јеһова бизим үчүн даһа да реал олур. Белә оланда биздә дә Иса Мәсиһдәки кими әминлик јараныр. О демишди: «Мәни ҝөндәрән ҝерчәкдир... Ону мән таныјырам» (Јәһ. 7:28, 29). Бәс онда Аллаһа даһа да јахынлашмаг үчүн һансы аддымлары атмаг лазымдыр?

Аллаһла неҹә үнсијјәтдә ола биләрсән? (3-ҹү абзаса бахын)

3. Јеһова илә неҹә үнсијјәтдә олмаг олар?

3 Јеһоваја јахынлашмаг үчүн Онунла мүнтәзәм үнсијјәтдә олмаг ваҹибдир. Бәс Аллаһла неҹә үнсијјәтдә олмаг олар? Сән узагда јашајан достунла неҹә үнсијјәт сахлајырсан? Јәгин ки, тез-тез бир-биринизлә јазышыр, телефонла данышырсыныз. Бу, Јеһова илә мүнасибәтләрә дә аиддир. Јеһова Аллаһа тез-тез дуа етмәклә сән Онунла данышырсан. (Зәбур 142:2 ајәсини охујун.) Мүнтәзәм олараг Аллаһын Кәламыны охујуб үзәриндә дүшүнәндә исә, Јеһованын сәнинлә данышмасына јол верирсән. (Әшија 30:20, 21 ајәләрини охујун.) Ҝәлин инди бу икитәрәфли үнсијјәтин Јеһова илә мүнасибәтимизи неҹә мөһкәмләндирдијини, Аллаһы сәнин үчүн неҹә даһа реал етдијини нәзәрдән кечирәк.

ЈЕҺОВА МҮГӘДДӘС КИТАБ ВАСИТӘСИЛӘ ДАНЫШЫР

4, 5. Јеһова шәхсән сәнинлә Өз Кәламы васитәсилә неҹә данышыр? Нүмунә чәк.

4 Сөзсүз, разылашаҹагсан ки, Мүгәддәс Китаб Аллаһын бүтүн бәшәријјәтә үнванладығы намәдир. Бәс Мүгәддәс Китабда шәхсән сәнин Јеһоваја неҹә јахынлаша биләҹәјин барәдә мәлумат вар? Әлбәттә вар. Мүгәддәс Китабы мүнтәзәм охујуб арашдыранда охудугларына неҹә јанашдығына фикир вер, онлары өз һәјатына неҹә тәтбиг едә биләҹәјин барәдә дүшүн. Бунунла, Јеһованын Өз Кәламы васитәсилә сәнинлә данышмасына јол верирсән. Бу исә сәни Она даһа да јахынлашдырыр (Ибр. 4:12; Јаг. 1:23—25).

5 Мәсәлән, Исанын «өзүнүзә јердә хәзинә топламајын» сөзләрини охујуб үзәриндә дүшүн. Әҝәр сән артыг Падшаһлығын ишини һәјатында биринҹи јерә гојмусанса, онда Јеһованын сәндән разы олдуғуну дујаҹагсан. Јох әҝәр бу ајәләри охујанда ҝөрүрсән ки, һәјатыны садәләшдирмәлисән, Падшаһлығын ишинә даһа чох вахт ајырмалысан, онда бу о демәкдир ки, Јеһова Она јахынлашмағын үчүн нә етмәли олдуғуну сәнә дејир (Мәт. 6:19, 20).

6, 7. а) Мүгәддәс Китабы арашдырмаг Јеһова илә мүнасибәтимизә неҹә тәсир едир? б) Мүталиә едәркән мәгсәдимиз нә олмалыдыр?

 6 Дүздүр, адам Мүгәддәс Јазылары арашдыранда дүзәлтмәли олдуғу саһәләри ҝөрүр. Амма Кәламы арашдырмағын фајдасы тәкҹә бунунла битмир. Биз һәм дә Јеһованын ҝөрдүјү ишләрә бәләд олуруг, бу исә Она мәһәббәтимизи артырыр. Бизим Аллаһа мәһәббәтимиз артдыгҹа Онун да бизә мәһәббәти артыр вә беләҹә, мүнасибәтләримиз мөһкәмләнир. (1 Коринфлиләрә 8:3 ајәсини охујун.)

7 Јеһоваја јахынлашмаг үчүн биз Мүгәддәс Китабы дүзҝүн мәгсәдлә мүталиә етмәлијик. Јәһја 17:3 ајәсиндә дејилир: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар». Беләликлә, бизим мәгсәдимиз садәҹә билик алмаг јох, Јеһованын неҹә Аллаһ олдуғуну өјрәнмәк олмалыдыр (Чыхыш 33:13 ајәсини охујун; Зәб. 25:4).

8. а) 2 Падшаһлар 15:1—5 ајәләриндә Јеһованын Әзрија падшаһла неҹә давранмасы һансы суаллары доғура биләр? б) Јеһованы танымағымыз Онун ишләри илә бағлы шүбһәләри неҹә арадан галдырыр?

8 Јеһова Аллаһы даһа јахындан таныдыгҹа Мүгәддәс Китабда Онун мүәјјән вәзијјәтләрдә нәјә ҝөрә белә давранмасы изаһ едилмәјәндә белә биз һәддән артыг нараһат олмајаҹағыг. Мисал үчүн, Јеһованын Јәһуда падшаһы Әзрија илә неҹә давранмасы һагда нә дүшүнүрсән? (2 Пад. 15:1—5). Бахмајараг ки, «халг һәлә дә сәҹдәҝаһларда гурбан ҝәтирир, гурбан түстүсү тәгдим едирди», Әзрија «Јеһованын бәјәндији ишләри ҝөрүрдү». Бунунла белә, «Јеһова падшаһын ҹанына азар салды вә о, өмрүнүн ахырынадәк ҹүзамлы галды». Буна сәбәб нә иди? Бу барәдә һәмин парчада һеч нә дејилмир. Бу, бизи нараһат етмәлидирми? Јеһованын Әзријаны сәбәбсиз јерә ҹәзаландырдығыны дүшүнмәлијик? Әҝәр биз Јеһованын ишләринә јахшы бәләдиксә, јох. Јеһованы јахшы таныјырыгса, билирик ки, Јеһова һәмишә «лазыми өлчүдә» ислаһ едир (Әрм. 30:11). Демәли, Јеһованын Әзријаја гаршы бу ҹүр давранмасынын сәбәбини һәтта билмәсәк дә, әмин ола биләрик ки, Онун чыхардығы һөкм адилдир.

9. Јеһованын Әзријаны нә үчүн ҹәзаландырдығына һансы амилләр ајдынлыг ҝәтирир?

9 Анҹаг бу һагда Мүгәддәс Китабын башга јериндә әлавә мәлумат вар. Әзрија падшаһ Үзијјә кими дә танынырды (2 Пад. 15:7, 32). Ејни һадисәнин гәләмә алындығы 2 Салнамәләр 26:3—5, 16—21 ајәләриндә дејилир ки, Үзијјә бир мүддәт Јеһованын бәјәндији ишләри ҝөрсә дә, сонралар «гүрурланды вә бу гүрур ону учурума апарды». О, тәкәббүрлә сәлаһијјәти чатмајан бир иши, каһинләрин ишини ҝөрмәјә ҹәһд ҝөстәрди. Сәксән бир каһин она гаршы дуруб, ону фикриндән дашындырмаға чалышды. Бәс Үзијјә өзүнү неҹә апарды? О, ичиндәки тәкәббүрү үзә чыхарды: каһинләрә «гәзәбләнди». Јеһова да һаглы олараг онун ҹанына ҹүзам салды.

10. Јеһованын етдији һәр шејин изаһыны ахтармаға нијә лүзум јохдур вә Онун ишләринин адил олдуғуна әминлијимизи неҹә артыра биләрик?

10 Бундан нә өјрәнирик? Тутаг ки, Мүгәддәс Китабдакы бәзи башга әһвалатлар кими, бу һадисә һагда да әлавә мәлумат верилмәјиб. Онда сән Аллаһын әдаләтинә шәкк ҝәтирәрдин? Јохса дүшүнәрдин ки, Јеһованын һәмишә дүзҝүн даврандығына, һагг-наһагы биләнин  О олдуғуна әмин олмағын үчүн Мүгәддәс Китабда кифајәт гәдәр мәлумат вар? (Ган. 32:4). Јеһованы јахындан таныдыгҹа Она мәһәббәтимиз вә етибарымыз о гәдәр артаҹаг ки, етдији һәр шејин изаһыны ахтармаға еһтијаҹ галмајаҹаг. Аллаһын Өз Кәламы васитәсилә дедикләрини нә гәдәр чох охујуб үзәриндә дүшүнсән, Она етибарын да бир о гәдәр артаҹаг (Зәб. 77:12, 13). Бу исә өз нөвбәсиндә, Јеһова илә мүнасибәтләрини мөһкәмләндирәҹәк, О, сәнин үчүн даһа да реал олаҹаг.

ДУА ЕДӘНДӘ СӘН ЈЕҺОВА ИЛӘ ДАНЫШЫРСАН

11-13. Јеһованын дуалары ешитдијини һарадан билирсән? (Мәгаләнин әввәлиндәки шәклә бахын.)

11 Дуа едәндә биз Јеһоваја јахынлашырыг, Она һәмд-сәна едирик, Ондан рәһбәрлик диләјирик (Зәб. 32:8). Анҹаг Јеһова сәнин үчүн реал олсун дејә, әмин олмалысан ки, О, сәнин дуаны ешидир.

12 Бәзи инсанлар дүшүнүр ки, дуанын јалныз психоложи фајдасы вар. Онлар дејирләр ки, инсан фикирләрини дилә ҝәтирдији, проблемини дәгигләшдирдији вә диггәтини онун һәллинә јөнәлтдији үчүн дуасына ҹаваб алдығыны зәнн едир. Дүздүр, дуанын белә фајдалары вар. Анҹаг дуада үрәјини Јеһоваја бошалданда О, сәни ешидир. Буну нәјә әсасән дејә биләрик?

13 Јер үзүнә инсан кими ҝәлмәздән габаг Иса Мәсиһ Јеһованын Өз садиг бәндәләринин дуаларына ҹаваб вердијинә өзү шаһид олурду. Сонралар јер үзүндә хидмәт етдији заман өзү дә һиссләрини дуада Јеһоваја ачырды. Бир дәфә һәтта бүтүн ҝеҹәни сәһәрә гәдәр ојаг галыб дуа етмишди. Әҝәр Иса Јеһованын ону динләмәдијини фикирләшсәјди, һеч дуа едәрди? (Лука 6:12; 22:40—46). Әҝәр дуанын психоложи фајдадан башга бир шеј олмадығыны дүшүнсәјди, онда шаҝирдләринә дуа етмәји өјрәдәрди? Ајдындыр ки, Иса дуанын Јеһова илә ҹанлы үнсијјәт олдуғуну билирди. Бир дәфә о демишди: «Шүкүрләр олсун сәнә, Ата, мәни ешитдин. Билирәм, Сән мәни һәмишә ешидирсән». Биз дә әмин ола биләрик ки, Јеһова «дуалары ешидән» Аллаһдыр (Јәһ. 11:41, 42; Зәб. 65:2).

14, 15. а) Конкрет дуаларын һансы фајдасы вар? б) Бир баҹынын дуалары онун Јеһова илә мүнасибәтинә неҹә тәсир етди?

14 Јеһованын сәнин дуаларына вердији  ҹаваб һәмишә ајдын һисс едилмәјә биләр. Анҹаг дуаларында конкрет олсан, Јеһованын вердији ҹавабы даһа ајдын ҝөрәҹәксән вә О, сәнин үчүн даһа реал олаҹаг. Үстәлик, ән мәһрәм һиссләрини Јеһова илә бөлүшәндә О, сәнә даһа да јахын олаҹаг.

15 Ҝәлин Кати * адлы баҹынын нүмунәсинә бахаг. О, һеч вахт хидмәтдән галмаса да, хидмәт она севинҹ вермирди. Кати дејир: «Мән хидмәти севмирдим. Сөзүн әсил мәнасында севмирдим. Мән ишдән чыханда бир ағсаггал мәни өнҹүл олмаға тәшвиг етди, һәтта мәнә бланк да верди. Мән өнҹүл хидмәтинә башламаг гәрарына ҝәлдим. Анҹаг һәр ҝүн Јеһоваја дуа едирдим ки, хидмәти мәнә севдирсин». Јеһова онун дуаларына ҹаваб вердими? О дејир: «Инди үчүнҹү илдир ки, өнҹүләм. Даһа чох хидмәт етдикҹә, тәҹрүбәли баҹыларла әмәкдашлыг етдикҹә јахшы тәблиғ етмәји өјрәндим. Бу ҝүн мән хидмәти нәинки севирәм, һәтта она вурғунам. Ән әсасы, Јеһова илә мүнасибәтим әввәлкиндән гат-гат мөһкәмдир». Һәгигәтән дә, Катинин дуалары ону Јеһоваја јахынлашдырды.

ӨҺДӘМИЗӘ ДҮШӘНИ ЕДӘК

16, 17. а) Јеһова илә мүнасибәтимизи ҝүнү-ҝүндән неҹә мөһкәмләндирә биләрик? б) Нөвбәти мәгаләдә һансы суал ишыгландырылаҹаг?

16 Јеһоваја јахынлашмаг өмүрлүк просесдир. Әҝәр Онун бизә јахынлашмасыны истәјириксә, өзүмүз Она јахынлашмалыјыг. Она ҝөрә дә, ҝәлин Мүгәддәс Китабы арашдырараг вә дуа едәрәк Јеһова Аллаһла мүнтәзәм үнсијјәтдә олаг. Белә етсәк, Јеһова илә мүнасибәтимиз ҝүнү-ҝүндән мөһкәмләнәҹәк, бу исә бизә чәтинликләрә синә ҝәрмәјә көмәк едәҹәк.

Јеһоваја јахынлашмаг өмүрлүк просесдир (16, 17-ҹи абзаслара бахын)

17 Лакин бәзән сидги-үрәкдән нә гәдәр дуалар етсәк дә, проблемләримиз һәллини тапмыр ки тапмыр. Белә вәзијјәтдә Јеһоваја олан етибарымыз сарсыла биләр. Биздә Јеһованын дуаларымызы ешитдијинә, јахуд һәлә дә бизи Өзүнә јахын сандығына шүбһә јарана биләр. Белә вәзијјәтләрдә Јеһова илә мүнасибәтләримизи неҹә горуја биләрик? Нөвбәти мәгаләдә бу суал ишыгландырылаҹаг.

^ абз. 2 Мүнасибәт сөзү ики инсан арасында олан гаршылыглы һисс вә рәфтары билдирир. Јәни мүнасибәтдә һәр ики тәрәф фәал олур.

^ абз. 15 Ад шәртидир.