Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  август 2014

Јеһованын сәсини һәмишә ешит

Јеһованын сәсини һәмишә ешит

Арханыздан “Јол будур, ҝедин бу јолла” дејилән сәси ешидәҹәксиниз» (ЈЕШАЈА 30:21).

1, 2. Јеһова садиг бәндәләринә һансы үсулларла рәһбәрлик верир?

ГӘДИМДӘ инсанлар Јеһовадан мүхтәлиф үсулларла рәһбәрлик алыблар. Аллаһ кимләрләсә мәләкләр васитәсилә, кимләрләсә дә ҝөрүнтү вә ја јухулар васитәсилә данышыб. Бунунла онлар ҝәләҹәкдә ваге олаҹаг һадисәләрдән хәбәрдар едилирдиләр. Јеһова һәмчинин онлара хүсуси ишләр дә тапшырырды (Сај. 7:89; Јез. 1:1; Дан. 2:19). Диҝәрләри исә рәһбәрлији Јеһованын тәшкилатынын јерүзү һиссәсинин нүмајәндәләриндән алырдылар. Јеһованын халгынын Онун сөзүнү һансы үсулла ешитмәсиндән асылы олмајараг, бу ҝөстәришләри гәбул едәнләр хејир тапырдылар.

2 Индики заманда исә Јеһова халгына Мүгәддәс Китаб, мүгәддәс руһ вә јығынҹаг васитәсилә рәһбәрлик едир (Һәв. иш. 9:31; 15:28; 2 Тим. 3:16, 17). Аллаһдан алдығымыз рәһбәрлик о гәдәр ајдындыр ки, санки архамыздан: «Јол будур, ҝедин бу јолла», — дејилән сәси ешидирик (Јешаја 30:21). Јығынҹаглара «садиг вә ағыллы нөкәр» васитәсилә рәһбәрлик етмәклә Иса да Јеһованын сәси илә бизә мүраҹиәт едир (Мат. 24:45). Биз бу ҝөстәришләрә вә рәһбәрлијә ҹидди јанашмалыјыг, чүнки әбәди һәјатымыз итаәткарлығымыздан асылыдыр (Ибр. 5:9).

3. Јеһованын рәһбәрлијинә табе олмағымыза нәләр манечилик төрәдә биләр? (Мәгаләнин әввәлиндәки шәклә бах.)

3 Шејтан Иблис алдығымыз хиласедиҹи рәһбәрлији ҝөздән салмаг үчүн дәридән-габыгдан чыхыр. Үстәлик, һијләҝәр үрәјимиз  Јеһованын рәһбәрлијинә табе олмағымыза манечилик төрәдә биләр (Јер. 17:9). Буна ҝөрә дә ҝәлин Аллаһын сәсини ешитмәјимизә манеә олаҹаг шејләри неҹә үстәләјә биләҹәјимизи арашдыраг. Һәмчинин ҝәлин Јеһова илә сых үнсијјәтдә олмағын истәнилән вәзијјәтдә Онунла мүнасибәтимизи горумаға неҹә көмәк едәҹәјинә нәзәр салаг.

ШЕЈТАНЫН ФӘНДЛӘРИНӘ ҮСТҮН ҜӘЛ

4. Шејтан инсанларын дүшүнҹәсинә неҹә тәсир етмәјә чалышыр?

4 Шејтан јанлыш мәлуматлар вә чашгынлыға салан тәблиғатларла инсанларын дүшүнҹәсинә тәсир етмәјә чалышыр. (1 Јәһја 5:19 ајәсини оху.) Ән уҹгар јерләр дә дахил олмагла, бүтүн дүнјада чап едилмиш материалларла јанашы, радио, телевизија вә Интернет әлчатандыр. Белә мәнбәләрдәки мәлуматлар мараглы олса да, Јеһованын нормаларына зидд ҝедән һәрәкәтләри ашылајыр (Јер. 2:13). Мисал үчүн, хәбәрләрдә вә шоуларда ејниҹинсли инсанларын никаһына нормал бир шеј кими бахылыр вә чохлары дүшүнүр ки, Мүгәддәс Китабын һомосексуализм барәдә дедикләри олдугҹа сәртдир (1 Кор. 6:9, 10).

5. Шејтанын тәблиғатына ујмамаг үчүн нә едә биләрик?

5 Аллаһын салеһлик нормаларына бағлы олан кәсләр Шејтанын тәблиғатына ујмамаг үчүн нә едә биләрләр? Онлар јахшыны писдән неҹә ајыра биләрләр? Јалныз вә јалныз «[Аллаһын] сөзләринә бағлы галмагла!» (Мәз. 119:9). Аллаһын Кәламындакы рәһбәрлик бизә һәгигәти сахта тәблиғатдан ајырд етмәјә көмәк едир (Сүл. мәс. 23:23). Иса Мүгәддәс Јазылардан ситат ҝәтирәрәк демишди ки, «инсан... Јеһованын ағзындан чыхан һәр сөзлә јашамалыдыр» (Мат. 4:4). Она ҝөрә дә биз Мүгәддәс Китаб принсипләрини һәјатымызда тәтбиг етмәји өјрәнмәлијик. Мисал үчүн, Муса Аллаһын әхлагсызлыгла бағлы әмрини гәләмә алмаздан һәлә узун илләр өнҹә Јусиф баша дүшүрдү ки, белә иш тутмаг Аллаһа гаршы ҝүнаһдыр. Потифарын арвады ону јанлыш һәрәкәтә ширникдирәндә Јеһоваја итаәтсизлик ҝөстәрмәк Јусифин һеч ағлындан белә кечмирди. (Јарадылыш 39:7—9 ајәләрини оху.) Бир мүддәт бу гадынын ҹазибәси илә үзләшмәсинә бахмајараг, Јусиф јол вермәди ки, онун мәлаһәтли сәси Аллаһын сәсини үстәләсин. Јеһованын сәсинә гулаг асмагла вә гулағымызы Шејтанын јајдығы тәблиғатлара гаршы тыхамагла доғруну јанлышдан сечә биләрик.

6, 7. Шејтанын зәһәрли мәсләһәтләринә гулаг асмамаг үчүн нә етмәлијик?

6 Дүнја бир-биринә зидд ҝедән дини тәлим вә еһкамларла долу олдуғу үчүн инсанлар һәгиги динин ахтарышына чыхмағын әбәс олдуғуну дүшүнүрләр. Анҹаг Јеһова Онун рәһбәрлијини гәбул етмәјә һазыр олан һеч кәсдән Өз рәһбәрлијини әсирҝәмир. Бизә исә галыр, кимә гулаг асаҹағымыза гәрар вермәк. Чүнки ејни вахтда ики сәсә гулаг асмаг мүмкүн дејил. Она ҝөрә дә ҝәлин Јеһованын Өз сүрүсүнү әманәт етдији јеҝанә шәхс олан Исанын сәсини  таныјаг вә она гулаг асаг. (Јәһја 10:3—5 ајәләрини оху.)

7 Иса өзү демишди: «Сөзләримә диггәтлә гулаг асын» (Марк 4:24). Јеһованын рәһбәрлији ајдын вә доғрудур. Вә биз бу рәһбәрлијә бағлы галмалыјыг. Анҹаг илк өнҹә үрәјимизи һазырламалыјыг. Чүнки еһтијатлы олмасаг, Јеһованын мәһәббәтлә вердији рәһбәрлијә јох, Шејтанын зәһәрли мәсләһәтләринә гулаг асмыш оларыг. Һеч вахт јол вермә ки, дүнјанын руһуну әкс етдирән маһнылар, видеолар, телевизија верилишләри, китаблар, танышлар, мүәллимләр вә ја дырнагарасы мүтәхәссисләр һәјатыны идарә етсин (Колос. 2:8).

8. а) Ҝүнаһа мејилли олмағымыз Шејтанын ишини неҹә асанлашдырыр? б) Тәһлүкәни ҝөрмәздән ҝәлсәк, нә баш верә биләр?

8 Ҝүнаһа мејилли олмағымыз Шејтандан ҝизли дејил вә о һеј чалышыр ки, бизә бу тәрәфдән зәрбә ендирсин. Шејтанын белә һәмләләри гаршысында нөгсансызлығы горумаг чәтиндир (Јәһ. 8:44—47). Тутаг ки, кимсә һансыса бир анын ләззәтини чыхармаға чалышыр, анҹаг ағлына белә ҝәтирмир ки, бунун ахыры пис гуртара биләр (Ром. 7:15). Инсаны белә вәзијјәтә нә сүрүкләјә биләр? Еһтимал ки, бу инсанын Јеһованын сәсинә гаршы гулағы јаваш-јаваш тутулмаға башлајыб. Јахуд үрәјиндә баш верән тәһлүкәли дәјишиклији ја сезмир, ја да ҝөрмәмәзликдән ҝәлир. Ола билсин, о артыг дуа етмәји тәрҝидиб, ајда-илдә бир дәфә хидмәтә чыхыр вә јығынҹаг ҝөрүшләринин биринә ҝәләндә бешинә ҝәлмир. Нәтиҹәдә, өз истәкләринин гулуна чеврилир вә биләрәкдән сәһв аддым атыр. Әҝәр биз белә бир вәзијјәтә дүшмәк истәмириксә, ҝүнаһа гаршы ҝөзүмүзү дөрд ачмалы вә дәрһал һәрәкәтә кечмәлијик. Бундан савајы, әҝәр гулағымыз Јеһованын сәсиндә олса, һеч вахт дөнүк фикирләрә гулаг асмајаҹағыг (Сүл. мәс. 11:9).

9 Хәстәлик илкин мәрһәләдә ашкар едиләрсә, инсанын һәјатыны гуртармаг мүмкүн олар. Ејнилә, өзүмүздә ҝүнаһа сүрүкләјән мејилләри дәрһал ашкар етсәк, онда бәдбәхтлијин баш вермәсинин гаршысыны ала биләрик. Бу кими мејилләримизи ашкар едәндә јахшы олар ки, «Иблисин истәкләрини јеринә јетирмәк үчүн онун торуна дири-дири [дүшмәјәк]» дејә дәрһал буна бир әнҹам чәкәк (2 Тим. 2:26). Бәс әҝәр өз ағлымыза вә истәкләримизә ујуб Јеһованын тәләбләриндән чыхмышыгса, онда нә етмәлијик? Вахт итирмәдән тәвазөкарлыгла Јеһоваја дөнмәли, гулағымызы ачыб Онун мәсләһәтләрини диггәтлә динләмәлијик (Јешаја 44:22). Унутмамалыјыг ки, верилән сәһв гәрар бизә елә јара вура  биләр ки, узун мүддәт алтыны чәкә биләрик. Белә ҹидди сәһвләрин гаршысыны алмаг үчүн дәрһал һәрәкәтә кечмәк олдугҹа ваҹибдир.

Мүнтәзәм руһани ишләрлә мәшғул олмаг сәни Шејтанын фәндләриндән неҹә горуја биләр? (4—9-ҹу абзаслара бах)

ТӘКӘББҮРӘ ВӘ ТАМАҺКАРЛЫҒА ҮСТҮН ҜӘЛ

10, 11. а) Тәкәббүр өзүнү неҹә бүрузә верир? б) Гораһ, Датан вә Авирамдан һансы ибрәт дәрсини ҝөтүрә биләрик?

10 Биз дәрк етмәлијик ки, үрәјимиз бизи јолдан чыхара биләр. Ҝүнаһлы мејилләримиз бизә ҝүҹлү тәсир ҝөстәрә биләр. Ҝөтүрәк тәкәббүр вә тамаһкарлығы. Бу мәнфи хүсусијјәтләр Јеһованын сәсини ешитмәјимизә мане ола вә бизи учурума сүрүкләјә биләр. Мәсәлән, гүрурлу инсан өзү һагда јүксәк фикирдә олур. Ола билсин, о фикирләшир ки, истәдијини етмәјә һаггы чатыр вә һеч ким она «ҝөзүн үстүндә гашын вар» дејә билмәз. Буна ҝөрә дә о, фикирләшә биләр ки, һәмиманлыларынын, ағсаггалларын, һәтта Аллаһын тәшкилатынын вердији мәсләһәт вә ҝөстәриш она аид дејил. Белә инсанын гулағына Јеһованын сәси пычылты кими ҝәлир.

11 Исраиллиләр сәһрада долашаркән Гораһ, Датан вә Авирам Муса илә Һарунун сәлаһијјәтинә гаршы гијам галдырды. Тәкәббүрдән ҝөзләри тутулмуш бу адамлар Јеһоваја ибадәтдә һүрријјәт давасы дөјүрдүләр. Бәс Јеһова бу мәсәләни неҹә јолуна гојду? О, үсјанкарлары мәһв етди (Сај. 26:8—10). Бу тарихи һадисә бизим үчүн неҹә дә ибрәтамиз нүмунәдир! Демәли, Јеһоваја гаршы үсјан инсаны учурума апара биләр. Вә унутмајаг ки, «әҹәлдән әввәл тәкәббүр ҝәләр» (Сүл. мәс. 16:18; Јешаја 13:11).

12, 13. а) Тамаһкарлығын инсанын башына бәла ачдығына даир нүмунә чәк. б) Гаршысы алынмаса, тамаһкарлыг инсанын евини неҹә јыха биләр?

12 Тамаһкарлыг да инсанын ахырына чыхыр. Белә ки, тамаһкар инсан чох вахт өзбашына һәрәкәт едиб һәддини ашыр. Елиша пејғәмбәр Арамын орду башчысы Нааманы ҹүзам хәстәлијиндән сағалдандан сонра онун вердији һәдијјәни ҝөтүрмәмишди. Лакин Елишанын нөкәри Ҝеһази бу һәдијјәләрә тамаһ салмышды. О, өз-өзүнә деди: «Вар олан Рәббә анд олсун ки, [Нааманын] далынҹа гачыб ондан нәсә алаҹағам». Елишадан хәбәрсиз өзүнү Наамана јетириб нә вар-нә вар «бир талант ҝүмүш вә ики дәст палтар» алаҹаг дејә јалан данышды. Ҝеһазинин тутдуғу бу иш вә пејғәмбәрә јалан сатмасы ҹавабсыз галдымы? Хејр, Нааманын ҹүзамы тамаһкар Ҝеһазијә кечди (2 Пад. 5:20—27).

13 Тамаһкарлыг хырда шејләрдән башлаја, амма гаршысы алынмаса, тез бир заманда инсаны өзүнә гул едә биләр. Мүгәддәс Китабда ады чәкилән Аканын нүмунәси тамаһкарлығын инсана неҹә ҝүҹ ҝәлә биләҹәјини ҝөстәрир. Тамаһкарлыг руһу онун ҹанына тез һопду. О, өзү етираф етмишди: «Талан малындан Бабил малы олан ҝөзәл бир палтар, ики јүз шекел ҝүмүш вә ағырлығы әлли шекел олан бир гызыл күлчә ҝөрәндә онлара тамаһ салыб ҝөтүрдүм». Јанлыш истәкләрдән јаха гуртармаг әвәзинә, Акан тамаһкарлыгла гәнимәти оғурлајыб чадырында ҝизләтди. Аканын пахыры үзә чыханда Јешуа деди ки, Јеһова ону бәлаја салаҹаг. Акан вә онун аиләси елә һәмин ҝүн дашгалаг едилиб өлдүрүлдү (Јешуа 7:11, 21, 24, 25). Тамаһкарлыг бизи көлҝә кими изләјән бир бәладыр. Буна ҝөрә дә ҝәлин өзүмүзү «һәр ҹүр тамаһкарлыгдан [горујаг]» (Лука 12:15). Бәзән биз јанлыш дүшүнҹәјә гапыла вә ја әхлагсыз шејләри тәсәввүрүмүздә ҹанландыра биләрик. Буна ҝөрә дә дүшүнҹәмизи даим нәзарәтдә сахламалы вә истәкләримизин бизи ҝүнаһа сүрүкләмәсинә јол вермәмәлијик. (Јагуб 1:14, 15 ајәләрини оху.)

14. Әҝәр тәкәббүрә вә ја тамаһкарлыға мејилли олдуғумузу ҝөрүрүксә, нә етмәлијик?

14 Тәкәббүрүн дә, тамаһкарлығын да нәтиҹәси аҹынаҹаглы ола биләр. Јанлыш һәрәкәтләрин  агибәти барәдә дүшүнмәк Јеһованын сәсини ешитмәјимизә мане олан мејилләри өзүмүздән говмаға көмәк едәҹәк (Ганун. т. 32:29). Мүгәддәс Китабда Аллаһ бизә јалныз доғру јолу ҝөстәрмир, һәмчинин бу јолда јеримәјин сәфасыны, јеримәмәјин исә ҹәфасыны изаһ едир. Әҝәр үрәјимиздән тәкәббүрә вә ја тамаһкарлыға апаран һәр һансы бир шеји етмәк кечирсә, онун нәтиҹәләри барәдә дүшүнмәк мүдриклик оларды. Биз јанлыш һәрәкәтин өзүмүзә, јахынларымыза, хүсусилә дә Јеһова илә мүнасибәтимизә неҹә тәсир едәҹәји үзәриндә дүшүнмәлијик.

ЈЕҺОВА ИЛӘ СЫХ ҮНСИЈЈӘТИ ГОРУ

15. Исанын Јеһова илә үнсијјәтиндән нә өјрәнирик?

15 Јеһова бизим үчүн ән јахшысыны истәјир (Мәз. 1:1—3). Буна ҝөрә дә лазыми вахтда лазыми рәһбәрлик верир. (Ибраниләрә 4:16 ајәсини оху.) Камил олмасына бахмајараг, Исада Јеһова илә үнсијјәт етмәк тәләбаты вар иди вә о дурмадан дуа едирди. Јеһова да, өз нөвбәсиндә, һејрәтамиз үсулларла Исаны дәстәкләјир, рәһбәрлик верирди. Јеһова она хидмәт етмәләри үчүн мәләкләр ҝөндәрмиш, мүгәддәс руһундан вермиш вә 12 һәварини сечмәкдә рәһбәрлик етмишди. Аллаһын сәсинин ҝөјдән ешидилмәси Исаны дәстәкләдијинин вә ондан разы галдығынын тәзаһүрү иди (Мат. 3:17; 17:5; Марк 1:12, 13; Лука 6:12, 13; Јәһ. 12:28). Иса кими, бизим дә дуада үрәјимизи Аллаһа бошалтмаға еһтијаҹымыз вар (Мәз. 62:7, 8; Ибр. 5:7). Биз дуа васитәсилә Јеһова илә сых үнсијјәт гура вә Она шәрәф ҝәтирән һәјат јолунда мүвәффәгијјәтлә аддымлаја биләрик.

16. Јеһованын сәсини ешитмәјә бизә нә көмәк едир?

16 Биз Јеһованын мәсләһәтләрини асанлыгла әлдә едә биләрик. Анҹаг О, һеч кими бу мәсләһәтләрә риајәт етмәјә мәҹбур етмир. Ондан мүгәддәс руһу васитәсилә бизә јол ҝөстәрмәсини хаһиш етмәлијик вә О, буну мәмнунијјәтлә едәҹәк. (Лука 11:10—13 ајәләрини оху.) Лакин, ән әсасы, гулаг асмагдыр (Лука 8:18). Мисал үчүн, порнографијаја вә ја әхлагсыз филмләрә бахмагдан әл чәкмәјиб Јеһовадан әхлагсызлыға олан мејлимизә үстүн ҝәлмәк үчүн көмәк истәмәк икиүзлүлүк оларды. Јеһованын бизә көмәк етмәсини истәјириксә, Онун мүгәддәс руһунун һөкм сүрдүјү јерләрдән, јығынҹаг ҝөрүшләриндән ајрылмамалыјыг. Јеһованын бир чох хидмәтчиләри јығынҹаг ҝөрүшләриндә Ону динләмәклә өзләрини бәладан горујурлар. Белә ки, онлар үрәкләриндә баш галдыран јанлыш истәкләри ҝөрүр вә өзләриндә дәјишикликләр едирләр (Мәз. 73:12—17; 143:10).

ЈЕҺОВАНЫН СӘСИНИ ЕШИТМӘЈӘ ДАВАМ ЕТ

17 Гәдим Исраилин падшаһы Давудун нүмунәсинә диггәт јетирәк. Ҝәнҹ икән о, нәһәнҝ филиштли Голјат үзәриндә гәләбә чалмышды. Сонрадан Давуд һәм ҹәнҝавәр, һәм хиласкар, һәм дә һаким олду. Лакин о, өзүнә ҝүвәнмәјә башлајанда үрәји ону алдатды вә Бат-Шева илә ҹидди ҝүнаһа јол верди, һәтта онун әри Уријанын өлүмүнә баис олду. Әмәлинә ҝөрә ҹәзаландырыланда Давуд ҝүнаһыны бојнуна алыб Јеһова илә мүнасибәтләрини бәрпа етди (Мәз. 51:4, 6, 10, 11).

18. Гулағымыз һәмишә Јеһованын сәсиндә олсун дејә нә етмәлијик?

18 Ҝәлин 1 Коринфлиләрә 10:12 ајәсиндәки мәсләһәти тәтбиг едәк вә өзүмүзә ҝүвәнмәјәк. Аддымларымызы дүзәлтмәк өз әлимиздә олмадығындан биз ја Јеһованын, ја да Онун дүшмәнинин сәсинә гулаг асаҹағыг (Јер. 10:23). Буна ҝөрә дә ҝәлин дурмадан дуа едәк, мүгәддәс руһун рәһбәрлијинә ујғун давранаг вә һәмишә Јеһованын сәсинә диггәтлә гулаг асаг.