Контентә кеч

Мүндәриҹаты ҝөстәр

 ОНЛАР БАҸАРДЫЛАР

Рикардо вә Андресин биографијасы

Рикардо вә Андресин биографијасы

Мүгәддәс Китабдакы елм инсаны дәјишмәк гүдрәтинә саһибдир. Ҝәлин Рикардо вә Андресин нүмунәсинә бахаг.

РИКАРДО: Ҝәнҹлијимин чылғын дөврүндә, 15 јашымда гулдур дәстәсинә гошулдум. Јени достларымын тәсири алтына дүшдүм. Гаршыма мәгсәд гојмушдум ки, 10 ил һәбсханада јатаҹағам. Бу, ахмаг фикир олса да, бизим әразидә һәбсханада јатан адамла фәхр едирдиләр, она һөрмәт ҝөстәрирдиләр. Мән дә елә олмаг истәјирдим.

Гулдур һәјатынын һәр саһәсини — наркотики, әхлагсызлығы, зоракылығы тәҹрүбәдән кечирдим. Бир ҝеҹә атышма олду, фикирләширдим ки, өләҹәјәм. Амма мәнә һеч нә олмады. Бундан сонра һәјатым, мәгсәдләрим барәдә ҹидди дүшүнмәјә башладым вә гәрара ҝәлдим ки, дәјишмәлијәм. Амма неҹә? Кимә үз тутум?

Гоһумларымын әксәријјәти бәдбәхт иди. Хиртдәјәдәк проблемин ичиндә идиләр. Анҹаг бир дајымын аиләси башга ҹүр иди. Билирдим ки, онлар јахшы адамлардырлар, Мүгәддәс Китаб принсипләринә әсасән јашајырлар. Бир дәфә онлардан өјрәнмишдим ки, Аллаһын ады Јеһовадыр. Һәмин атышмадан чох кечмәмиш Јеһоваја ады илә мүраҹиәт едиб дуа етдим, ондан көмәк истәдим. Дүз сәһәриси ҝүн Јеһованын Шаһидләриндән бири гапымы дөјәндә һејрәтдән јеримдә донуб галдым. О мәнә Мүгәддәс Китаб дәрси кечмәјә башлады.

Чох кечмәмиш бөјүк сынагла үзләшдим. Көһнә достларым тез-тез мәнә зәнҝ едиб онлара гошулмағымы истәјирдиләр. Асан олмаса да, бу тәклифи рәдд етдим. Мүгәддәс Китабы өјрәнмәјә гәрарлы идим! Чох хошбәхтәм ки, гәрарымдан дөнмәдим. Һәјатым көкүндән дәјишди, әсл хошбәхтлији тапдым.

Бир дәфә Аллаһа дуада дедим ки, бир вахтлар дәстә үзвләринин һөрмәтини газанмаг үчүн он ил һәбсдә јатмаг истәјирдим. Инди исә иҹазә вер, һеч олмаса, он ил тамвахтлы хидмәт едим, неҹә ки мәнә көмәк едибләр, мән дә башгаларына көмәк едим. Аллаһ дуама ҹаваб верди. Артыг 17 илдир тамвахтлы хидмәт едирәм! Бир шеји дә гејд едим ки, һеч вахт һәбсханаја дүшмәмишәм.

Кечмиш достларымдан чоху узун илләрдир һәбсдәдир. Бәзиләри артыг һәјатда дејил. Кечмиши тәһлил едәндә Јеһованын Шаһиди олан гоһумларыма чох миннәтдар олурам. Онлар һамыдан фәргләнмәјә, Мүгәддәс Китаба ујғун јашамаға чәкинмирдиләр. Мән онлара һөрмәт етдијим гәдәр гулдур дәстәсинин һеч бир үзвүнә һөрмәт етмәмишәм. Ән әсасы исә Аллаһа миннәтдарам ки, мәнә ән јахшы һәјат јолуну өјрәдиб.

 АНДРЕС: Мән касыб бир рајонда доғулуб, боја-баша чатмышам. Орада наркоманија, сојғунчулуг, гатиллик вә әхлагсызлыг ади һал иди. Атам әјјаш вә кокаин дүшкүнү иди. Анамла һәмишә әлбәјаха даваја чыхардылар.

Кичик јашларындан ичкијә, наркотикә гуршандым. Ҝүнүм күчәләрдә кечирди, оғурлуг едирдим, сонра исә оғурладығым әшјалары сатырдым. Мән бөјүјәндә атам чалышды ки, мәнимлә јахын мүнасибәт јаратсын, амма буну јанлыш тәрздә еләди. О мәнә наркотики вә диҝәр гачаг маллары өлкәјә ҝәтириб сатмағы өјрәтди. Тез бир заманда чохлу пул газандым. Анҹаг бир ҝүн полисләр евимә ҝәлди. Мән һәбс олундум вә адам өлдүрмәјә ҹәһд етмәкдә иттиһам олунараг беш ил һәбс ҹәзасына мәһкум олундум.

Бир ҝүн сәһәр һәбсханада елан олунду ки, Јеһованын Шаһидләри Мүгәддәс Китабдан данышаҹаглар вә дустаглар ора дәвәт олунурлар. Мән дә ҝетмәк гәрарына ҝәлдим. Ешитдикләрим мәнә ағлабатан ҝәлди. Беләликлә, Јеһованын Шаһидләри илә Мүгәддәс Китабы өјрәнмәјә башладым. Онлар гулаға хош ҝәлсин дејә Мүгәддәс Китабдакы фикирләри тәһриф етмирдиләр. Әксинә, мәнә Аллаһын али ганунларыны өјрәдирдиләр.

Тезликлә баша дүшдүм ки, тәк башыма һеч нәји дәјишә билмәјәҹәјәм. Хүсусилә дә, өјрәнмәјимдән хошу ҝәлмәјән дустаглар мәнә һәдә-горху ҝәләндә Јеһоваја дуа едиб Ондан ҝүҹ вә һикмәт истәдим, Јеһова да мәнә көмәк етди. Мән һәтта бир нөв һүҹума кечмәјә, јәни онлара Мүгәддәс Китаб һагда данышмаға да мүвәффәг олдум.

Һәбс мүддәтим гуртаранда елә һәјәҹанлы идим ки, бир мүддәт дә һәбсханада галмаг истәјирдим. Һәбсханадан чыханда хејли мәһбус мәнимлә сағоллашды. Бәзиләри исә меһрибанлыгла дедиләр: «Сәнә јахшы јол, кичик кешиш».

Отуруб фикирләшәндә ки, Аллаһдан тәлим алмасајдым, һәјатым неҹә оларды, ҹаныма горху дүшүр. Аллаһа о гәдәр миннәтдарам ки, мәни севир вә һеч вахт мәндән әлини үзмәјиб *.

^ абз. 15 Мүгәддәс Китабын һәјатлары дәјишмәјә гадир олдуғуну ҝөстәрән диҝәр нүмунәләри jw.org сајтындан тапа биләрсиниз. Бунун үчүн МҮГӘДДӘС КИТАБ ТӘЛИМЛӘРИ > ХОШБӘХТЛИК ВӘ ГӘЛБ РАҺАТЛЫҒЫ бөлмәсинә дахил олун.