Контентә кеч

Мүндәриҹаты ҝөстәр

Шәраитимиз дәјишәндә гәлб раһатлығыны итирмәјәк

Шәраитимиз дәјишәндә гәлб раһатлығыны итирмәјәк

«Гәлбими овундуруб сакитләшдирдим» (ЗӘБ. 131:2).

НӘҒМӘ: 128, 129

1, 2. а) Баш верән ҝөзләнилмәз дәјишикликләр мәсиһиләрин һәјатына неҹә тәсир едә биләр? (Мәгаләнин әввәлиндәки шәклә бахын.) б) Зәбур 131-ҹи мәзмура әсасән, нәјин сајәсиндә гәлб раһатлығымызы горуја биләрик?

БЕЈТЕЛДӘ 25 ил хидмәт етмиш Лоид вә Александра ешидәндә ки, саһә хидмәтинә тәјин олунублар, чох мәјус олмушдулар. Лоид дејир: «Дүшүнүрдүм ки, һәмишә Бејтелдә хидмәт едәҹәјәм, һәмишә бу иши ҝөрәҹәјәм. Бу дәјишиклијин нә үчүн едилдијини дәрк етсәм дә, һәфтәләр, ајлар кечдикҹә өзүмү атылмыш һисс едирдим». Лоидин һиссләри тез-тез дәјиширди, бир анын ичиндә ҝаһ өзүнү јахшы һисс едирди, ҝаһ да дилхор олурду.

2 Һәјатымызда ҝөзләнилмәз дәјишиклик баш верәндә нараһатчылыг вә стресс кечиририк (Мәс. 12:25). Һәтта бәзән дәјишикликлә барышмаг чәтин олур. Бу кими вәзијјәтләрдә гәлбимизи овундуруб сакитләшдирмәк үчүн нә едә биләрик? (Зәбур 131:1—3 ајәләрини охујун.) Ҝәлин ҝөрәк Јеһованын һәм кечмишдә, һәм дә мүасир дөврдә јашајан бәзи хидмәтчиләри һәјатларында баш верән дәјишикликләрә бахмајараг, гәлб раһатлыгларыны неҹә горуја билибләр.

 «АЛЛАҺЫН... СҮЛҺҮ»

3. Һәзрәти Јусиф һансы вәзијјәтлә үзләшмишди?

3 Һәзрәти Јусиф атасынын севимлиси иди. 17 јашы оланда доғма гардашлары пахыллыгдан ону гул кими сатыр (Јар. 37:2—4, 23—28). О, тәхминән 13 ил әрзиндә әзиз атасы Јагубдан узагда, Мисир өлкәсиндә гул вә мәһбәс һәјаты јашајыр. Јашадыглары ону үмидсизлијә гәрг едә, залымлашдыра биләрди. Амма белә олмады. Нәјин сајәсиндә?

4. а) Һәзрәти Јусиф мәһбәсдә оланда диггәтини нәјә ҹәмләмишди? б) Јеһова Јусифин дуаларына неҹә ҹаваб верди?

4 Һәзрәти Јусиф һәбсдә олдуғу мүддәтдә чох јәгин ки, диггәтини Јеһовадан алдығы немәтләрә ҹәмләмишди (Јар. 39:21; Зәб. 105:17—19). Бәлкә дә, о, кичик јашларында ҝөрдүјү пејғәмбәрлик мәнасы дашыјан јухулар барәдә дүшүнүр вә Јеһованын онунла олдуғуна әмин олурду (Јар. 37:5—11). Шүбһәсиз ки, о, даима Јеһоваја дуа едир, үрәјинин дәрдини Онунла бөлүшүрдү (Зәб. 145:18). Јеһова Јусифин сәмими дуаларына ҹаваб олараг, бүтүн чәтинликләрдә онунла олаҹағына даир дахили әминлик вермишди (Һәв. 7:9, 10) *.

5. «Аллаһын... сүлһү» Јеһоваја хидмәт етмәк гәтијјәтимизи неҹә артыра биләр?

5 Үзләшдијимиз вәзијјәтин нә гәдәр чәтин олмасындан асылы олмајараг, «Аллаһын... сүлһү» фикирләримизи горујараг бизи сакитләшдирмәјә гадирдир. (Филиппилиләрә 4:6, 7 ајәләрини охујун.) Нараһатчылыг кечирәндә Јеһоваја үз тутсаг, Аллаһын сүлһү тәслим олмамаға вә Јеһоваја хидмәтимизи давам етдирмәјә көмәк едәҹәк. Ҝәлин өз тәҹрүбәләриндә буна әмин олан бәзи баҹы-гардашларымызын нүмунәсинә нәзәр салаг.

АЛЛАҺДАН ГӘЛБ РАҺАТЛЫҒЫ ДИЛӘЈӘК

6, 7. Конкрет дуалар јенидән гәлб раһатлығы дујмағымыза неҹә көмәк едә биләр? Нүмунә чәкин.

6 Рајан вә Ҹүлјетта мүвәггәти хүсуси өнҹүл тәјинатларынын баша чатдығыны өјрәнәндә чох мәјус олмушдулар. Рајан дејир: «Дәрһал бу һагда Јеһоваја дуа етдик. Анлајырдыг ки, Она етибарымызы ҝөстәрмәк үчүн имкан јараныб. Јығынҹағымыздакыларын бир чоху һәгигәтә јени ҝәлмишди. Она ҝөрә дә јахшы иман өрнәји олмаг үчүн дуада Јеһовадан көмәк истәдик».

7 Јеһова онларын дуасына неҹә ҹаваб верди? Рајан хатырлајыр: «Дуа етдикдән дәрһал сонра кечирдијимиз мәнфи һиссләр вә нараһатлыглар јоха чыхды. Үрәјимизи вә фикирләримизи Аллаһын сүлһү горујурду. Баша дүшүрдүк ки, дүзҝүн әһвал-руһијјәдә олсаг, јенә дә Јеһоваја хидмәтдә чох шеј едә биләрик».

8—10. а) Үрәјимиз нараһат оланда Аллаһын руһу бизә неҹә көмәк едир? б) Фикримизи хидмәтә ҹәмләјәндә Јеһовадан һансы көмәји алырыг?

8 Аллаһын руһ һәм үрәјимизи сакитләшдирир, һәм дә диггәтимизи Мүгәддәс Китаб ајәләринә јөнәлдәрәк нәјин даһа ваҹиб олдуғуну анламаға көмәк едир. (Јәһја 14:26, 27 ајәләрини охујун.) Тәхминән 25 ил Бејтелдә хидмәт етмиш Филип вә Мери адлы бир әр-арвадын нүмунәсинә нәзәр салаг. Дөрд ајын ичиндә һәр икисинин анасы вә башга бир гоһумлары вәфат едир. Үстәлик, Меринин атасы деменсија хәстәлијиндән әзијјәт чәкдијиндән она гуллуг етмәли олурлар.

9 Филип хатырлајыр: «Елә билирдим ки,  вәзијјәтин өһдәсиндән јахшы ҝәлирәм, амма бир мәгам диггәтимдән јајынмышды. “Ҝөзәтчи гүлләси”нин тәлим мәгаләләринин бириндә Колослулара 1:11 ајәси диггәтими чәкди. Дүздүр, мән дөзүрдүм, амма буна сөзүн әсл мәнасында дөзүм демәк олмазды. Үзләшдијим вәзијјәтә “севинҹлә вә сәбирлә” таб ҝәтирмәли идим. Бу ајә мәнә хатырлатды ки, хошбәхтлијим һансы вәзијјәтдә олмағымдан јох, Аллаһын руһунун һәјатыма ҝөстәрдији тәсирдән асылыдыр».

10 Филип вә Мери диггәтләрини хидмәтә ҹәмләдикләринә ҝөрә Јеһовадан чохлу немәтләр алдылар. Бејтелдән ҝедәндән гыса мүддәт сонра онлар Мүгәддәс Китаб дәрсләри кечмәјә башладылар. Һәтта шаҝирдләри һәфтәдә бир нечә дәфә дәрс кечмәк истәјирди. Өтән ҝүнләри хатырлајараг Мери дејир: «Онлар бизим севинҹимиз идиләр, елә бил Јеһова онларын васитәсилә “һәр шеј јахшы олаҹаг” дејирди».

БИЗДӘН ҺӘРӘКӘТ, АЛЛАҺДАН БӘРӘКӘТ

Ҝөзләнилмәз дәјишикликләр вахты Һз. Јусифин нүмунәси бизә неҹә көмәк едә биләр? (11—13 абзаслара бахын)

11, 12. а) Һәзрәти Јусиф нәјин сајәсиндә Аллаһдан немәтләр алды? б) Аллаһ Јусифә һансы мүкафаты верди?

11 Һәјатымызда ҝөзләнилмәз дәјишикликләр баш верәндә ҝәләҹәклә бағлы нараһатлыглар үрәјимизи дидиб-парчалаја биләр. Ҝөзләнилмәдән һәбсә дүшән Һз. Јусиф нараһатлығын ону ағушуна алмасына јол вермәмишди. Әксинә, дүшдүјү вәзијјәтдә баҹардығыны еләмишди. О, Фитфирин јанында чалышдығы вахтлардакы кими, зинданда да рәисинин тапшырыгларыны ҹанла-башла јеринә јетирирди (Јар. 39:21—23).

12 Бир ҝүн Јусифә әввәлләр вәзифәдә олмуш ики дустаға нәзарәт етмәк тапшырылыр. Јусиф мүлајим рәфтары илә дустагларын рәғбәтини газаныр. Беләҹә, онлар сыхынтыларыны вә ҝөрдүкләри јухулары она данышырлар (Јар. 40:5—8). Јусифин һәмин вахт хәбәри дә јох иди ки, бу сөһбәт онун хејринә олаҹаг. Бу әһвалатдан сонра даһа ики ил һәбсдә јатан Јусиф нәһајәтдә азадлыға бурахылыр. О, елә һәмин ҝүн фирондан сонра икинҹи шәхс тәјин олунур (Јар. 41:1, 14—16, 39—41).

13. Шәраитимиздән асылы олмајараг, Јеһовадан хејир-дуа алмаг үчүн нә едә биләрик?

13 Биз дә, Һз. Јусиф кими дәјишә билмәјәҹәјимиз вәзијјәтләрлә үзләшә биләрик. Лакин сәбир ҝөстәрсәк вә мөвҹуд вәзијјәтдә әлимиздән ҝәләни етсәк, әмин ола биләрик ки, Јеһова бунларын мүгабилиндә бизә бәрәкәт верәҹәк (Зәб. 37:5). Бәзән «чашгынлыг ичиндә» олсаг да, һәвари Булус демишкән, һеч вахт чарәсиз вә ја «үмидсиз» галмајаҹағыг (2 Кор. 4:8, һаш.). Хүсусилә дә, диггәтимизи хидмәтә ҹәмләмишиксә!

 ДИГГӘТИМИЗИ ХИДМӘТӘ ҸӘМЛӘЈӘК

14—16. Мүждәчи Филип һәјатында баш верән дәјишикликләрә бахмајараг, нәјин сајәсиндә диггәтини хидмәтә ҹәмләмишди?

14 Мүждәчи Филип һәјатында баш верән дәјишикликләрә бахмајараг, диггәтини хидмәтә ҹәмләмәклә бизә ҝөзәл нүмунә гојуб. Јерусәлимдә Стефанын гәтли * илә тәгибләр шиддәтләнән вахт Филип алдығы јени тәјинаты ҹанла-башла иҹра едирди (Һәв. 6:1—6). Лакин мәсиһиләрин Јерусәлимдән гачдығыны ҝөрәндә о, бош отурмур, Сәмәријјәјә, хош хәбәрин тәблиғ олунмадығы шәһәрә јолланыр (Мәт. 10:5; Һәв. 8:1, 5).

15 Филип Јеһованын руһунун јөнәлтдији истәнилән јерә ҝетмәјә һазыр иди. Буна ҝөрә дә Јеһова ону хош хәбәрин тәблиғ олунмадығы әразиләрә ҝөндәрди. Јәһудиләр сәмәријјәлиләрә јухарыдан ашағы бахырды. Лакин Филипин гәрәзсизлији, ҝөрүнүр, сәмәријјәлиләрә хош тәсир бағышлајыр. Тәәҹҹүблү дејил ки, ҹамаат онун дедикләринә диггәтлә гулаг асыр (Һәв. 8:6—8).

16 Сонра Аллаһын руһу Филипи гејри-јәһудиләрин үстүнлүк тәшкил етдији Ашдод вә Гејсәријјә шәһәринә јөнәлдир (Һәв. 8:39, 40). Сәмәријјәдә тәблиғ етдији вахтдан тәхминән 20 ил кечмишди. Филипин вәзијјәти јенә дәјишмишди, о, артыг аиләли иди вә бир әразидә мәскунлашмышды. Һәјат шәраитинин дәјишмәсинә бахмајараг, Филип һәлә дә диггәтини хидмәтә ҹәмләјирди. Буна ҝөрә дә Јеһова һәм она, һәм дә аиләсинә бол-бол бәрәкәт вермишди (Һәв. 21:8, 9).

17, 18. Һәјатымызда дәјишикликләр баш верән заман фикримизи хидмәтә ҹәмләмәк таразлығы горумаға неҹә көмәк едә биләр?

17 Тамвахтлы хидмәтдә олан бир чох мәсиһи гејд едир ки, һәјатларында баш верән дәјишикликләр заманы фикирләрини хидмәтә ҹәмләмәјин сајәсиндә таразлығы горуја билибләр. Ҹәнуби Африкадан олан Озборн вә Полајт адлы бир ҹүтлүк Бејтелдән ҝедәндән сонра тезликлә јашамаға јер вә јарымҝүнлүк иш тапаҹагларына үмид едирдиләр. Озборн дејир: «Әфсуслар олсун ки, иши ҝөзләдијимиз гәдәр тез тапмадыг». Һәјат јолдашы Полајт да һәмин вахтлары хатырлајараг дејир: «Үч ај ишсиз галдыг, әлимиздә пул да јох иди. Һәгигәтән, чәтин иди».

18 Нәјин сајәсиндә онлар бу чәтинлијин өһдәсиндән ҝәлә билдиләр? Озборн дејир: «Јығынҹагла бирҝә тәблиғ етмәк фикримизи  ибадәтә ҹәмләмәјә вә мүсбәт әһвал-руһијјәни горумаға чох көмәк еләди. Отуруб дәрд чәкмәкдәнсә, бүтүн ҝүҹүмүзү тәблиғ ишинә сәрф етмәк гәрарына ҝәлдик. Һәр јердә иш ахтарырдыг вә ахырда тапдыг».

СӘБИРЛӘ ЈЕҺОВАНЫ ҜӨЗЛӘЈӘК

19—21. а) Дахили сүлһү горумағымыза нә көмәк едәҹәк? б) Јени вәзијјәтә ујғунлашмағын шәхсән бизә һансы фајдасы вар?

19 Ҝөрдүјүмүз кими, үзләшдијимиз вәзијјәтдә әлимиздән ҝәләни едиб үмидимизи Јеһоваја бағласаг, үрәјимиз архајын олаҹаг. (Микә 7:7 ајәсини охујун.) Һәтта бир мүддәт сонра вәзијјәтә ујғунлашмағын Јеһова илә мүнасибәтләримизи неҹә мөһкәмләндирдијини ҝөрәҹәјик. Јухарыда ады чәкилән Полајт баҹы өз тәҹрүбәсини бөлүшүр: «Тәјинатымызын дәјишмәси сајәсиндә, һәтта һәр шеј тәрс ҝәтирәндә белә, Јеһоваја ҝүвәнмәјин әслиндә нә демәк олдуғуну өјрәндим. Онунла мүнасибәтләрим даһа да сых олду».

20 Һаггында данышдығымыз Мери баҹы һәлә дә јашлы атасына бахыр. О дејир: «Баша дүшдүм ки, үрәјим нараһат оланда дајанмалы, дуа етмәли вә сакитләшмәлијәм. Һәр шеји Јеһованын өһдәсинә бурахмаг өјрәндијим ән бөјүк дәрс олду. Бу дәрс бүтүн өмрүм боју мәнә лазым олаҹаг».

21 Илк абзасда һаггында данышдығымыз Лоид вә Александра гејд едир ки, шәраитләринин дәјишмәси иманларыны ағылларына белә ҝәлмәјән тәрздә сынады. Онлар дејирләр: «Иман сынаглары иманымызын чәтин вахтларда бизә тәсәлли верәҹәк гәдәр ҝүҹлү вә һәгиги олуб-олмадығыны үзә чыхарыр. Беләҹә, биз даһа јахшы инсан олуруг».

Ҝөзләнилмәз дәјишикликләр ҝөзләнилмәз немәтләрә јол ача биләр! (19—21 абзаслара бахын)

22. Һал-һазыркы вәзијјәтимиздә әлимиздән ҝәләни едириксә, нәјә әмин ола биләрик?

22 Һәјатынызда ҝөзләнилмәз дәјишиклик баш верәндә, мәсәлән, тәјинатыныз дәјишәндә, сәһһәтиниздә проблемләр јарананда, јахуд аилә мәсулијјәтиниз артанда, әмин олун ки, Јеһова сизин гајғыныза галаҹаг вә ән дүзҝүн вахтда көмәк едәҹәк! (Ибр. 4:16; 1 Бут. 5:6, 7). О вахта гәдәр исә, мөвҹуд вәзијјәтдә әлиниздән ҝәләни етмәјә чалышын. Сәмави Атаныза дуа един вә һәр шеји Онун үзәринә гојмағы өјрәнин. Беләҹә, истәнилән вәзијјәтдә гәлб раһатлығынызы горуја биләҹәксиниз.

^ абз. 4 Һәбсдән чыхандан бир мүддәт сонра илк оғлу дүнјаја ҝәләндә Јусиф Аллаһын она тәсәлли вермәк истәдијини анлајыр. О: «Аллаһ бүтүн дәрдләрими... унутдурду» дејәрәк илк оғлунун адыны Мәнәссә гојур (Јар. 41:51, һаш.).

^ абз. 14 Бу сајын «Билирсиниз?» адлы мәгаләсинә бахын.