«Гој... һеч бир адам сизи мүкафатдан мәһрум етмәсин» (КОЛ. 2:18).

НӘҒМӘ: 122, 139

1, 2. а) Аллаһын гуллары һансы мүкафатын арзусу илә јашајырлар? б) Ҝөзүмүзү мүкафатдан ајырмамаға бизә нә көмәк едә биләр? (Мәгаләнин әввәлиндәки шәклә бахын.)

ҺӘВАРИ БУЛУС «Аллаһын... ҝөјләр дәвәти мүкафатын»ы алмаг арзусу илә јашајырды. Мүасир дөврдә дә мәсһ едилмиш мәсиһиләр ејни арзу илә јашајырлар (Филип. 3:14). Онлара Иса Мәсиһлә сәмави Падшаһлыгда һакимијјәт шәрики олмаг, бәшәријјәти ҝүнаһдан азад етмәк кими мүгајисәјәҝәлмәз шәрәф нәсиб олуб (Вәһј 20:6). Галан мәсиһиләри гаршыда башга мүкафат ҝөзләјир — Ҹәннәт һәјаты вә әбәдилик (2 Бут. 3:13).

2 Биринҹи әсрдәки мәсһ едилмишләр ҝөзләрини мүкафатдан ајырмасынлар дејә, һәвари Булус онлары чағырырды: «Һәмишә сәмави шејләр һаггында дүшүнүн» (Кол. 3:2). Јәни онлар ҝөјдә мүкафат алмаг үмидини фикирләриндә даима парлаг сахламалы идиләр (Кол. 1:4, 5). Бу нәсиһәт Ҹәннәт үмиди илә јашајан мәсиһиләрә дә шамил едилә биләр. Алаҹағымыз немәтләр барәдә дүшүнмәк бизә иман јолунда ҝөзүмүзү мүкафатдан ајырмајараг аддымламаға көмәк едәҹәк (1 Кор. 9:24).

3. Һәвари Булус диндашларыны һансы тәһлүкәдән хәбәрдар етмишди?

 3 Һәвари Булус диндашларыны һәмчинин хәбәрдар етмишди ки, онлары мүкафатдан мәһрум едә биләҹәк үнсүрләр дә вар. Мәсәлән, о, Колосдакы јығынҹағы сахта мәсиһиләрдән еһтијат етмәјә сәсләјирди. Бу адамлар Мәсиһә иманы бир кәнара гојуб Аллаһын ризасыны Төврат ганунларына әмәл етмәклә газанмаға ҹан атырдылар (Кол. 2:16—18). Бундан башга һәвари әхлагсызлыг, диндашлар арасындакы ҝәрҝинликләр, аилә проблемләри кими ҝүнүмүздә дә актуал олан бир сыра әнҝәлдән сөз ачмыш, бу әнҝәлләри ашмағын јолларыны ҝөстәрмишди. Бу манеәләрин бизи мүкафата апаран јолдан узаглашдырмамасы үчүн ҝәлин Булусун Колослулара үнванладығы мәктубдакы нәсиһәтләри тәһлил едәк.

ӘХЛАГСЫЗ АРЗУЛАРЫ ӨЛДҮРҮН

4. Әхлагсыз арзулар нәјә ҝәтириб чыхара биләр?

4 Һәвари Булус иман гардашларына шәрик олдуглары мисилсиз үмиди хатырладыб демишди: «Буна ҝөрә дә јердәки бәдәнинизин үзвләриндә олан мејилләри — әхлагсызлыға, натәмизлијә, шәһвәтә, нәфсә вә бүтпәрәстлик олан тамаһкарлыға мејилләри өлдүрүн» (Кол. 3:5). Әхлагсыз арзуларын товлајыҹы тәсири елә ҝүҹлүдүр ки, мәсиһини руһани немәтләрдән мәһрум едә биләр. Әхлагсыз арзуларын далынҹа дүшмәјин аҹы нәтиҹәләрини дадмыш бир гардаш јығынҹаға гајыдандан сонра демишди: «Арзуларым ағлымы башымдан алмышды. Ајыланда артыг иш-ишдән кечмишди».

5. Өзүмүзү тәһлүкәли вәзијјәтләрдән неҹә горуја биләрик?

5 Илк нөвбәдә әхлагсызлыға сөвг едә биләҹәк вәзијјәтләрдә еһтијатлы олмаг тәләб олунур. Мәсәлән, гызла оғлан ҝөрүшәндә физики тәмас, өпүшмәк, тәкликдә галмаг кими мәсәләләрдә лап әввәлдән конкрет сәрһәд гојсалар, мүдрик һәрәкәт етмиш оларлар (Мәс. 22:3). Езамијјәтә ҝетмәк, гаршы ҹинсин нүмајәндәси илә ишләмәк кими һаллар да өзүндә потенсиал тәһлүкә дашыја биләр (Мәс. 2:10—12, 16). Белә вәзијјәтләрдә јахшы оларды ки, бәри башдан Јеһованын Шаһиди олдуғумузу билдирәк, өзүмүзү әкс ҹинслә ағыр апараг вә јадда сахлајаг ки, флирт кими артыг-әскик һәрәкәтләрин ахыры пис гуртара биләр. Депрессија вә тәнһалыг һисси дә еһтијатлы олмағы тәләб едән вәзијјәтләрдәндир, чүнки белә һалларда инсан она тәсәлли верән адам ахтарыр. Һәрдән бу емосионал тәләбат о дәрәҹәдә ҝүҹлү олур ки, инсан истәнилән адамын ҝөстәрдији диггәтә гаршылыг верә биләр. Бу исә чох тәһлүкәлидир, чүнки бизи мүкафатдан мәһрум едә биләр. Буна ҝөрә дә ән јахшысы көмәји Јеһова Аллаһда вә Онун халгында ахтармагдыр. (Зәбур 34:18; Мәсәлләр 13:20 ајәләрини охујун.)

6. Әјләнҹә сечәркән нәји јадда сахламалыјыг?

6 Әхлагсыз арзулары өлдүрмәк үчүн әхлагсыз әјләнҹәләрдән узаг дурмалыјыг. Буҝүнкү әјләнҹә сәнајеси гәдим Сәдум вә Әмурә шәһәрләри кими әхлагсызлыгла долудур (Јһд. 7). Бу ишин башында дуранлар әхлагсызлығы нормал, зәрәрсиз бир шеј кими гәләмә верирләр. Одур ки, чох еһтијатлы олмалыјыг, әјләнҹә дүнјасынын истеһсал етдији һәр шеји гәбул етмәмәлијик. Елә әјләнҹә сечмәлијик ки, ҝөзүмүзү мүкафатдан ајырмасын (Мәс. 4:23).

МӘҺӘББӘТИ ВӘ ХЕЈИРХАҺЛЫҒЫ «ҜЕЈИНИН»

7. Јығынҹагда һансы проблемләрлә үзләшә биләрик?

7 Сөз јох ки, һамымыз мәсиһи јығынҹағынын үзвү олдуғумуз үчүн өзүмүзү хошбәхт һисс едирик. Ҝөрүшләрдә Мүгәддәс Китабы өјрәнмәк, бир-биримизә мәһәббәт вә хејирхаһлыг ҝөстәрмәк бизә ҝөзүмүзү мүкафатда сахламаға көмәк едир.  Амма һәрдән арамызда анлашылмазлыглар јараныр, бу исә мүнасибәтләрдә ҝәрҝинлијә сәбәб ола биләр. Әҝәр бу проблемләри вахтында һәлл етмәсәк, гәлбимиздә кин-күдурәт јува салар. (1 Бутрус 3:8, 9 ајәләрини охујун.)

8, 9. а) Һансы хүсусијјәтләр бизә мүкафаты алмаға көмәк едә биләр? б) Диндашымыз хәтримизә дәјәндә мүнасибәти позмамаға бизә нә көмәк едә биләр?

8 Кин-күдурәт дә бизи мүкафатдан мәһрум едә биләр. Бәс бунун гаршысыны неҹә ала биләрик? Һәвари Булусун Колосдакы мәсиһиләрә јаздығы мәсләһәт карымыза ҝәләр: «Аллаһын сечилмишләри, мүгәддәс вә севимли бәндәләри кими шәфгәти, һәмчинин хејирхаһлығы, тәвазөкарлығы, мүлајимлији вә сәбри ҝејинин. Бир-биринизә гаршы һәмишә сәбирли олун, биринизин диҝәриндән шикајәти олса да, бир-биринизи үрәкдән бағышлајын. Јеһова сизи үрәкдән бағышладығы кими, сиз дә бир-биринизи үрәкдән бағышламалысыныз. Бүтүн бунлардан зијадә, мәһәббәтә бүрүнүн, чүнки мәһәббәт инсанлар арасында камил бирлик јарадыр» (Кол. 3:12—14).

9 Әҝәр биздә мәһәббәт вә хејирхаһлыг кими үлви хүсусијјәтләр варса, бир-биримизи бағышламаг асан олаҹаг. Мисал үчүн, әҝәр бир диндашымыз сөзләри, ја һәрәкәтләри илә хәтримизә дәјибсә, јадымыза сала биләрик ки, нә вахтса биз дә кимисә инҹитмишик. Мәҝәр һәмин адам бизә мәһәббәт вә хејирхаһлыг ҝөстәриб сәһвимиздән кечәндә севинмирдик?! (Ваиз 7:21, 22 ајәләрини охујун.) Мәсиһ бизә хејирхаһлыг ҝөстәриб бизи бир диндә бирләшдириб (Кол. 3:15). Һамымыз ејни Аллаһа ибадәт едир, ејни мүждәни тәблиғ едир вә ејни сынагларла үзләширик. Буна ҝөрә дә ҝәлин баҹы-гардашлара хејирхаһлыг, мәһәббәт ҝөстәриб онлары бағышлајаг ки, бу бирлији горуја вә ҝөзүмүзү мүкафатда сахлаја биләк.

10, 11. а) Киминсә пахыллығыны чәкмәк нәјә ҝөрә тәһлүкәлидир? б) Пахыллыг мүкафата апаран јолда бизә неҹә әнҝәл ола биләр?

10 Мүгәддәс Китабда јазылмыш ибрәтамиз нүмунәләр ҝөстәрир ки, пахыллыг бизә мүкафата апаран јолда манеә ола биләр. Мисал үчүн, Габилин гардашы Һабили өлдүрмәјинә пахыллыг сәбәб олмушду. Гарун, Датан, Абирам Муса пејғәмбәрин пахыллығыны чәкдикләри үчүн она гаршы галхмышдылар. Талут падшаһ Давудун уғурларына пахыллыг едиб ону өлдүрмәк истәјирди. Буна ҝөрәдир ки, Аллаһын Кәламында дејилир: «Пахыллыг вә һөҹәт олан јердә гармагарышыглыг вә һәр ҹүр пислик һөкм сүрүр» (Јаг. 3:16).

11 Гәлбимиздә мәһәббәт вә хејирхаһлыг јува гурса, орада пахыллыға јер галмајаҹаг. Мүгәддәс Китабда дејилир: «Мәһәббәт сәбирли вә хејирхаһдыр. Мәһәббәт пахыл дејил» (1 Кор. 13:4). Пахыллығын гәлбимиздә көк атмамасы үчүн биз һәр шејә Јеһованын ҝөзү илә бахмалы, јәни баҹы-гардашлара бир бәдәнин үзвү кими јанашмалыјыг. Мүгәддәс Китабда јазылан нөвбәти мәсләһәт бизә бу ишдә көмәк едәҹәк: «Әҝәр бир үзв шәрәфә јетиширсә, онунла бирликдә бүтүн үзвләр дә севинир» (1 Кор. 12:16—18, 26). Беләҹә, диндашларымызын әлдә етдији немәтләрә пахыллыг етмәјәҹәк, онларын севинҹинә шәрик олаҹағыг. Ҝәлин Талут падшаһын оғлу Јонатанын нүмунәсинә бахаг. Јонатан биләндә ки, Давуд онун јеринә тахта чыхаҹаг онун пахыллығыны чәкмәди, әксинә ону руһландырды (1 Ишм. 23:16—18). Ҝәлин биз дә Јонатан кими диндашларымыза мәһәббәт вә хејирхаһлыг ҝөстәрәк.

МҮКАФАТЫ АИЛӘЛИКҸӘ ГАЗАНЫН

12. Мүгәддәс Китабдакы һансы мәсләһәтә риајәт етмәк аиләликҹә мүкафаты газанмаға көмәк едә биләр?

12 Әҝәр аиләнин һәр бир үзвү Мүгәддәс  Китабдакы мәсләһәтләрә әмәл едәрсә, аиләдә һәм сүлһ вә хошбәхтлик олар, һәм дә Јеһовадан аиләликҹә мүкафат аларлар. Һәвари Булус аиләләрә мәсләһәт вермишди: «Еј гадынлар, әрләринизә Ағанын давамчыларына јарашан тәрздә табе олун. Еј әрләр, арвадларынызы һәмишә севин вә онларла сәрт давранмајын. Еј ушаглар, һәр шејдә валидејнләринизин сөзүнә гулаг асын, чүнки бу, Ағаја хош ҝедир. Еј аталар, ушагларынызы гәзәбләндирмәјин, јохса онлар руһдан дүшәрләр» (Кол. 3:18—21). Шүбһәсиз, аиләнин һәр бир үзвүнүн бу мәсләһәтләри тәтбиг етмәси аиләјә фајда ҝәтирәҹәк.

13. Мәсиһи гадын дининә шәрик олмајан һәјат јолдашыны неҹә «фәтһ» едә биләр?

13 Бәс әҝәр әриниз мәсиһи дејилсә вә сизинлә јахшы рәфтар етмирсә, онда неҹә? Онун сизинлә рәфтарыны мүбаһисәјә чевириб мәсәләни шиширтмәјә дәјәрми? Ола билсин, мүбаһисәдә галиб ҝәлиб һәјат јолдашыныза истәдијинизи еләтдирәҹәксиниз. Амма бу, ону фәтһ едиб һәгигәтә ҝәтирмәјә көмәк едәҹәкми? Чох еһтимал ки, јох. Лакин әринизә бир аилә башчысы кими һөрмәт гојсаныз, аиләнизин меһрибанчылығына сәбәб олар, Аллаһа шәрәф ҝәтирәр, һәтта јолдашынызы Јеһоваја ибадәтә тәшвиг едә биләрсиниз. Беләҹә, һәгигәт јолунда гоша аддымлајыб мүкафаты бирликдә газанарсыныз. (1 Бутрус 3:1, 2 ајәләрини охујун.)

14. Гардашын дининә шәрик олмајан арвады она һөрмәт етмирсә, о неҹә давранмалыдыр?

14 Инди исә суалымыз арвады Јеһованын  јолунда олмајан гардашларадыр. Јолдашыныз сизә һөрмәт етмирсә, неҹә давранмалысыныз? Бәлкә дә, дүшүнүрсүнүз ки, сәсинизи галдырмаг, аиләдә кимин башчы олдуғуну ҝөстәрмәк лазымдыр. Бәс бундан сонра о, сизә һөрмәт едәҹәкми? Әлбәттә ки, јох! Јеһова сиздән һәјат јолдашыныза Иса Мәсиһдән өрнәк ҝөтүрәрәк мәһәббәтлә башчылыг етмәјинизи ҝөзләјир (Ефес. 5:23). Иса Мәсиһ јығынҹаға мәһәббәт вә сәбирлә башчылыг едир (Лука 9:46—48). Беләликлә, сиз бу саһәдә Исаны тәглид етмәклә һәјат јолдашынызы Јеһованын јолуна ҝәтирә биләрсиниз.

15. Мәсиһи әр һәјат јолдашыны севдијини неҹә ҝөстәрмәлидир?

15 Мүгәддәс Китабда дејилир: «Еј әрләр, арвадларынызы һәмишә севин вә онларла сәрт давранмајын» (Кол. 3:19). Һәјат јолдашыны севән әр арвадынын фикирләрини динләмәли, онун дедикләринә һөрмәтлә јанашмалыдыр (1 Бут. 3:7). Әрин сон гәрары арвадынын фикрини там әкс етдирмәјә дә биләр, анҹаг арвады илә мәсләһәтләшмәк она даһа јахшы гәрар вермәкдә һәмишә көмәк едәҹәк (Мәс. 15:22). Һәјат јолдашыны севән әр арвадындан һөрмәти тәләб етмир, әксинә, газанмаға чалышыр. Һәјат јолдашына вә өвладларына севҝи бәсләмәк мәсиһи әрин өз аиләсинин хошбәхтлијинә верә биләҹәји ән бөјүк төһфәләрдәндир. Чох еһтимал ки, белә аилә Јеһоваја севә-севә хидмәт едәҹәк. Бу ҹүр аиләләри исә гаршыда һәјат мүкафаты ҝөзләјир.

Аиләмизи мүкафатдан мәһрум едә биләҹәк мүнагишәләрин гаршысыны неҹә ала биләрик? (13—15 абзаслара бахын)

ҜӘНҸЛӘР, ГОЈ ҺЕЧ НӘ СИЗИ МҮКАФАТДАН МӘҺРУМ ЕТМӘСИН!

16, 17. Ҝәнҹләр валидејнләринин вердији тәрбијәјә неҹә јанашмалыдырлар?

16 Бәзән ҝәнҹләрә елә ҝәлә биләр ки, валидејнләри онлары баша дүшмүр, онлары даим чәрчивәдә сахламаға чалышыр. Бу, онларда Јеһова Аллаһа ибадәтә гаршы сојуглуг јарада биләр. Ҝәнҹләр, билин ки, әҝәр сиз Јеһовадан дөнсәниз, тезликлә ҝөрәҹәксиниз ки, дүнјада һеч ким сизи валидејнләриниздән вә јығынҹагдакы достларыныздан чох севә билмәз.

17 Әҝәр валидејнләриниз сәһвләринизи һеч вахт дүзәлтмәсәјди, онларын сизи севдијини демәк олардымы? Әлбәттә јох (Ибр. 12:8). Ола билсин, сизи мәјус едән тәрбијәнин верилмә тәрзидир. Амма чалышын тәрбијәнин верилмә тәрзинә јох, онун һансы сәбәблә верилдијинә фикринизи ҹәмләјәсиниз. Өзүнүзү әлә алын вә мәзәммәтә кәскин реаксија вермәјин. Мүгәддәс Китабда дејилир: «Чох билән аз данышар, ағыллы адам тәмкинини позмаз» (Мәс. 17:27). Гаршыныза мәгсәд гојун ки, верилмә тәрзиндән асылы олмајараг мәзәммәти јеткин инсан кими, тәмкинлә гәбул едәсиниз (Мәс. 1:8). Унутмајын ки, Јеһованын јолунда аддымлајан, сизи һәјат мүкафатына доғру јөнәлдән валидејнләр сизин үчүн ән бөјүк һәдијјәдир.

18. Нә үчүн ҝөзүмүзү мүкафатдан ајырмамалыјыг?

18 Истәр ҝөјдә, истәрсә дә јердә әбәди јашамаг олсун, һәр бири мисилсиз мүкафатдыр. Бизим үмидимиз мөһкәм әсаслара сөјкәнир, чүнки ону бизә бәхш едән Јараданын Өзүдүр. О, ҝәләҹәк Ҹәннәт һаггында дејир: «Дүнја башдан-баша Јеһова барәдә биликлә долаҹаг» (Әшј. 11:9). Бәли, Ҹәннәтдә анҹаг Јеһовадан елм алмыш кәсләр олаҹаг. Мәҝәр белә һәјат әсл ҹан атыласы мүкафат дејил?! Одур ки, ҝәлин бүтүн диггәтимизи Јеһованын вәдләринә ҹәмләјәк вә һеч нәјин бизи мүкафатдан мәһрум етмәсинә јол вермәјәк.