Контентә кеч

Мүндәриҹаты ҝөстәр

 ТӘЛИМ МӘГАЛӘСИ 10

Вәфтиз олунмағыма нә мане олур?

Вәфтиз олунмағыма нә мане олур?

«Филип вә мәмур суја ҝирдиләр, Филип ону вәфтиз етди» (ҺӘВ. 8:38).

НӘҒМӘ 52 Сәнә мәхсусуг, еј Јеһова!

ИҸМАЛ *

1. Адәмлә Һәвва нәләри итирди вә бу, нә илә нәтиҹәләнди?

СИЗҸӘ, нәјин јахшы, нәјин пис олдуғуна гәрар вермәјә кимин сәлаһијјәти чатыр? Адәмлә Һәвва хејирлә шәри билмә ағаҹынын мејвәсиндән јемәклә ачыг-ајдын ҝөстәрдиләр ки, Јеһоваја вә Онун нормаларына һөрмәт етмирләр. Онлар нәјин јахшы, нәјин пис олдуғуну өзләри мүәјјән етмәк гәрарына ҝәлдиләр (Јар. 3:22). Амма бу онлара баһа баша ҝәлди: Јеһова илә јахын мүнасибәтләрини итирдиләр вә әбәди јашамаг имканындан мәһрум олдулар. Үстәлик, ҝүнаһ вә өлүмү өвладларына өтүрдүләр (Ром. 5:12). Адәмлә Һәвванын гәрары әзаб-әзијјәтлә нәтиҹәләнди.

Иса Мәсиһә иман ҝәтирән һәбәшистанлы мәмур дәрһал вәфтиз олунмаг истәјир (2 вә 3-ҹү абзаслара бахын)

2, 3. а) Һәбәшистанлы мәмур мүждәчи Филипин тәблиғинә неҹә һај верди? б) Вәфтиз һансы немәтләрә јол ачыр? Һансы суаллары арашдыраҹағыг?

2 Ҝәлин Адәмлә Һәвва вә һәбәшистанлы мәмур арасындакы фәргә бахаг. Мүждәчи Филип мәмура тәблиғ едәндә о, неҹә һај верди? Мәмур Јеһованын вә Иса Мәсиһин онун үчүн етдикләринә ҝөрә о гәдәр миннәтдар иди ки, дәрһал вәфтиз олунду (Һәв. 8:34—38). Биз дә өзүмүзү Јеһоваја һәср едиб вәфтиз олунмагла ачыг-ајдын ҝөстәририк ки, Јеһованын вә Иса Мәсиһин бизим үчүн етдикләрини чох гијмәтләндиририк. Бунунла нәјин јахшы, нәјин пис олдуғуна гәрар вермәјә Онун сәлаһијјәти чатдығыны гәбул едир вә Она етибар етдијимизи ҝөстәририк.

3 Јеһоваја ибадәт етмәјин ҝәтирдији немәтләр һагда бир дүшүнүн! Әввәла, Јеһова бизә Адәмлә Һәвванын итирдији һәр шеји, о ҹүмләдән әбәди јашамаг имканыны вериб. Иса Мәсиһә иман етмәјин сајәсиндә Јеһова ҝүнаһларымызы  бағышлајыр вә бизә тәмиз виҹдан бәхш едир (Мәт. 20:28; Һәв. 10:43). Бундан әлавә, биз ҝөзәл ҝәләҹәјә үмид едән садиг инсанлара гошулуб Аллаһын аиләсинин үзвү олуруг (Јәһ. 10:14—16; Ром. 8:20, 21). Бу гәдәр немәтләрә бахмајараг, бәзиләри һәбәшистанлы мәмур кими давранмаға тәрәддүд едир. Онлара вәфтиз олмаға нә мане олур? Бу манеәләри неҹә ашмаг олар?

ВӘФТИЗ ОЛУНМАҒА НӘЛӘР МАНЕ ОЛУР?

Вәфтизә мане олан чәтинликләр

Өзүнәинам һиссинин ашағы олмасы (4 вә 5-ҹи абзаслара бахын) *

4, 5. Ејвери вә Һанна адлы ҝәнҹләрин һансы чәтинлији вар иди?

4 Өзүнәинамсызлыг. Ејверинин валидејнләри Јеһованын Шаһидидир. Атасы гајғыкеш валидејн вә зәһмәткеш ағсаггал кими јахшы ад газаныб. Бунунла белә, Ејвери вәфтиз олмаға тәрәддүд едирди. Ҝөрәсән нијә? О дејир: «Горхурдум ки, атам кими мүвәффәгијјәтли олмајым». О һәмчинин ҝәләҹәкдә ала биләҹәји мәсулијјәтләрин өһдәсиндән ҝәлә билмәјәҹәјини дүшүнүрдү. Ејвери дејир: «Нараһат идим ки, бирдән мәнә дуа етмәк, мәрузә сөјләмәк вә ја тәблиғ групуна рәһбәрлик етмәји тапшырарлар».

5 18 јашлы Һаннанын өзүнәинам һисси һәдсиз дәрәҹәдә ашағы иди. Јеһоваја хидмәт едән валидејнләрин әһатәсиндә бөјүмәсинә бахмајараг, Јеһованын нормаларына ујғун јашаја билмәјәҹәјини дүшүнүрдү. Нә үчүн? Һанна өзүнү олдугҹа дәјәрсиз һисс едирди. Бәзән о гәдәр пис олурду ки, өзүнә хәтәр јетирирди. Бу исә онун вәзијјәтини даһа да ағырлашдырырды. О дејир: «Өзүмә хәтәр јетирдијими индијә кими һеч кимә, һәтта валидејнләримә дә демәмишәм. Дүшүнүрдүм ки, Јеһова етдикләримә ҝөрә һеч вахт мәним кимисинин Она хидмәт етмәсини истәмәз».

Дост-танышларын тәсири (6-ҹы абзаса бахын) *

6. Ванессанын вәфтизинә нә мане олурду?

6 Дост-танышларын тәсири. 22 јашлы Ванесса дејир: «Он илә јахын иди таныдығым чох јахшы бир рәфигәм вар иди». Лакин Ванессанын рәфигәси һәгигәтлә марагланмырды вә вәфтизлә бағлы мәгсәдинә чатмагда она дәстәк олмурду. Бу, Ванессаја пис тәсир едирди. О дејир: «Дост тапмаг мәним үчүн чох чәтиндир вә горхурдум ки, достлуғумуза сон гојсам, бир дә һеч вахт јахын рәфигәм олмајаҹаг».

Сәһвә јол вермәк горхусу (7-ҹи абзаса бахын) *

7. Макајла адлы ҝәнҹ гызын һансы горхусу вар иди вә нәјә ҝөрә?

7 Ҹидди сәһв етмәк горхусу. Гардашы јығынҹагдан кәнар едиләндә Макајланын беш јашы вар иди. Бөјүдүкҹә Макајла гардашынын давранышларынын валидејнләринә неҹә үрәк ағрысы вердијини ҝөрүрдү. О дејир: «Горхурдум ки, вәфтиз олунсам,  сәһв едиб јығынҹагдан кәнар олунарам вә валидејнләримин дәрдинә дәрд гатарам».

Мүгавимәтлә үзләшмәк горхусу (8-ҹи абзаса бахын) *

8. Мајлз адлы ҝәнҹ нәдән горхурду?

8 Мүгавимәтлә үзләшмәк горхусу. Мајлзын атасы вә өҝеј анасы Јеһоваја хидмәт едир. Доғма анасы исә Јеһованын Шаһиди дејил. О дејир: «18 ил анамла јашамышам вә вәфтиз олунмаг истәдијими она демәјә горхмушам. Атам Јеһованын Шаһиди оланда анамын неҹә мүнасибәт ҝөстәрдијини ҝөрмүшдүм. Она ҝөрә дә мәнә әнҝәл чыхараҹағындан горхурдум».

МАНЕӘЛӘРИ АШМАҒЫН ЈОЛЛАРЫ

9. Јеһованын сәбри вә мәһәббәти барәдә өјрәнмәк инсана неҹә тәсир едир?

9 Адәмлә Һәвванын Јеһоваја ибадәт етмәк истәмәмәсинә сәбәб Она дәрин мәһәббәт јетишдирмәмәләри иди. Буна бахмајараг, Јеһова онлара узун өмүр сүрүб оғул-ушаг саһиби олмаға вә өвладларыны өз истәдикләри кими тәрбијә етмәјә изин верди. Лакин чох кечмәмиш Адәмлә Һәвванын Јеһовадан асылы олмамаг гәрарынын нә гәдәр бөјүк ағылсызлыг олдуғу бәлли олду. Онларын бөјүк оғлу ҝүнаһсыз гардашыны гәтлә јетирди вә ҝет-ҝедә зоракылыг, худбинлик бәшәр аиләси үзәриндә һөкм сүрмәјә башлады (Јар. 4:8; 6:11—13). Бунунла белә, Јеһованын Адәмлә Һәвванын өвладлары арасындан Она хидмәт етмәк истәјәнләри хилас етмәк үчүн бир тәдбири вар иди (Јәһ. 6:38—40, 57, 58). Јеһованын нә гәдәр сәбирли вә мәһәббәтли олдуғу һагда өјрәндикҹә Она севҝиниз дә бир о гәдәр артаҹаг. Онда Адәмлә Һәвванын јолу илә ҝетмәјиб, өзүнүзү Јеһоваја һәср етмәк истәјәҹәксиниз.

Бу манеәләри ашмағын јоллары

(9 вә 10-ҹу абзаслара бахын) *

10. Зәбур 19:7 ајәси үзәриндә дүшүнмәк Јеһоваја хидмәтдә сизә неҹә көмәк едә биләр?

10 Јеһованы јахындан танымаға давам един. Јеһованы даһа јахындан таныдыгҹа Она хидмәт едә биләҹәјинизә әминлијиниз артаҹаг. Јухарыда ады чәкилән Ејвери дејир: «Зәбур 19:7 ајәсиндәки вәд һагда охујуб үзәриндә дүшүнмәјин сајәсиндә өзүнәинам һиссим јаранды».  (Ајәни охујун.) Јеһованын бу вәдини неҹә јеринә јетирдијини ҝөрәндә Ејверинин Она мәһәббәти даһа да артды. Аллаһа мәһәббәт өзүнәинам һиссини артырмагла јанашы, Онун бәјәнмәдији ишләрдән узаг дурмаға вә истәјини јеринә јетирмәјә көмәк едир. Јухарыда һаггында данышдығымыз Һанна дејир: «Мүгәддәс Китабы охумағын вә мүталиәнин сајәсиндә анладым ки, өзүмә хәтәр јетирәндә Јеһованы инҹидирәм» (1 Бут. 5:7). Һанна Јеһованын сөзүнүн иҹрачысы олду (Јаг. 1:22). Бәс бу, һансы нәтиҹәни верди? О дејир: «Јеһоваја итаәт етмәјин фајдасыны ҝөрдүкҹә Она мәһәббәтим артды. Инди әминәм ки, көмәјә еһтијаҹ дујдуғум истәнилән мәгамда Јеһова мәнә јол ҝөстәрәҹәк». Һанна өзүнә хәтәр јетирмәк мејлинә үстүн ҝәлди вә һәјатыны Јеһоваја һәср едиб вәфтиз олунду.

(11-ҹи абзаса бахын) *

11. Ванесса јахшы достлар газанмаг үчүн нә едиб вә биз бундан нә өјрәнирик?

11 Дост сечиминдә һикмәтли олун. Јухарыда ады чәкилән Ванесса сонда баша дүшүр ки, рәфигәси онун Јеһоваја хидмәт етмәсинә мане олур. Одур ки, онунла мүнасибәтләринә сон гојур. Ејни заманда, јығынҹагда өзүнә јени достлар газанмаг үчүн әлиндән ҝәләни едир. Ванесса Нуһ пејғәмбәрлә аиләсинин гојдуғу нүмунәдән чох шеј өјрәндијини дејир: «Онлар Јеһованы севмәјән инсанларын ичәрисиндә јашајырдылар, бунунла белә, өз араларында ҝөзәл мүнасибәтләри вар иди». Вәфтиз олунандан сонра Ванесса өнҹүл хидмәтинә башлады. О дејир: «Бунун сајәсиндә тәк өз јығынҹағымыздан јох, башга јығынҹаглардан да достларым вар». Сиз дә Јеһованын һәвалә етдији ишдә мүмкүн гәдәр фәал олмагла јахшы достлар газана биләрсиниз (Мәт. 24:14).

(12–15 абзаслара бахын) *

12. Адәмлә Һәввада һансы горху јох иди вә бу, нәјә ҝәтириб чыхарды?

12 Горхуја дүзҝүн јанашын. Бәзи шејләрдән горхмағымыз јахшыдыр. Мисал үчүн, биздә Јеһованы наразы салмаг горхусу олмалыдыр (Зәб. 111:10). Адәмлә Һәввада Аллаһ хофу олсајды, Она үсјан етмәздиләр. Әфсус ки, онлар Аллаһын гануну поздулар. Бундан сонра онларын  ҝөзләри ачылды, јәни ҝүнаһлы олдугларыны дәрк етдиләр. Онлар өвладларына да ҝүнаһ вә өлүмдән башга һеч нә өтүрә билмәдиләр. Аллаһын ганунуну поздугларынын фәргинә варандан сонра чылпаг олдугларына ҝөрә утанмаға башладылар вә ајыб јерләрини ҝизләтдиләр (Јар. 3:7, 21).

13, 14. а) 1 Бутрус 3:21 ајәсинә әсасән, нә үчүн өлүмдән һәдсиз дәрәҹәдә горхмамалыјыг? б) Јеһованы севмәк үчүн һансы сәбәбләримиз вар?

13 Аллаһ хофунун олмасы лабүд олса да, өлүмдән һәдсиз дәрәҹәдә горхмамалыјыг. Јеһова әбәди јашамағымыз үчүн јол ачыб. Ҝүнаһ ишләјән шәхс сәмими-гәлбдән төвбә едирсә, Јеһова онун ҝүнаһындан кечир. О бизи Оғлунун фидјә гурбанлығына иманымыз әсасында бағышлајыр. Фидјәјә иманымызы ҝөстәрмәјин әсас јолу исә өзүмүзү Јеһоваја һәср едиб вәфтиз олунмагдыр. (1 Бутрус 3:21 ајәсини охујун.)

14 Јеһованы севмәјимиз үчүн чохлу сәбәбләримиз вар. О бизә һәр ҝүн ҝөзәл немәтләр бәхш етмәклә јанашы, Өзү вә нијјәти һагда һәгигәти өјрәдир (Јәһ. 8:31, 32). Бизә јол ҝөстәрмәк вә дәстәк олмаг үчүн мәсиһи јығынҹағы тәсис едиб. Буҝүнкү чәтинликләрә дөзмәјимизә көмәк едир, ҝәләҹәкдә исә мүкәммәл шәраитдә әбәди јашамаг вәди верир (Зәб. 68:19; Вәһј 21:3, 4). Мәһәббәтиндән долајы уғрумузда етдикләри барәдә дүшүнәндә Она дујдуғумуз севҝи даһа да артыр. Бу севҝи сајәсиндә биз дүзҝүн горху һиссинә саһиб олуруг, јәни бүтүн гәлбимизлә севдијимиз Аллаһы кәдәрләндирмәјә горхуруг.

15. Макајла сәһв етмәк горхусуна неҹә үстүн ҝәлди?

15 Јухарыда ады чәкилән Макајла Јеһованын нә гәдәр бағышлајан олдуғуну дәрк етмәси сајәсиндә сәһвә јол вермәк горхусуна үстүн ҝәлди. О дејир: «Анладым ки, һамымыз гејри-камилик вә сәһвләримиз олаҹаг. Ону да баша дүшдүм ки, Јеһова бизи севир вә фидјә гурбанлығы әсасында бағышлајыр». Макајла Јеһоваја мәһәббәтдән ирәли ҝәләрәк өзүнү Она һәср едиб вәфтиз олунду.

(16-ҹы абзаса бахын) *

16. Мајлз мүгавимәтлә үзләшмәк горхусуну неҹә јенди?

16 Анасынын вәфтиз олунмаг гәрарына гаршы чыхаҹағындан горхан Мајлз рајон нәзарәтчиси илә мәсләһәтләшир. О дејир: «Мәним кими, онун да анасы Јеһованын Шаһиди дејил. О мәни баша салды ки, вәфтизлә бағлы гәрары атамын тәкиди илә јох, өз истәјимлә вердијими анама изаһ едим». Мајлзын анасы онун гәрарыны һеч дә јахшы гаршыламады. Ахырда еви тәрк етмәк мәҹбуријјәтиндә галса да, Мајлз гәрарындан дөнмәди. О дејир: «Јеһованын мәндән өтрү нәләр етдијини өјрәнмәк үрәјими риггәтә ҝәтирди. Иса Мәсиһин фидјә гурбанлығы һагда дәриндән дүшүндүкҹә Јеһованын мәни нә гәдәр чох севдијини  анладым. Беләҹә, өзүмү Јеһоваја һәср едиб вәфтиз олунмаг гәрарына ҝәлдим».

ГӘРАРЫНЫЗДАН ДӨНМӘЈИН!

Биздән өтрү етдикләринә ҝөрә Јеһоваја миннәтдарлығымызы билдирмәк имканымыз вар (17-ҹи абзаса бахын)

17. Бизим һансы имканымыз вар?

17 Һәвва Әдән бағындакы ағаҹын мејвәсиндән јејәрәк Јеһовадан үз дөндәрди. Адәм арвадыны дәстәкләмәклә Јеһованын бүтүн јахшылыгларынын гаршылығында нашүкүрлүк етди. Һәр биримизин Адәмлә Һәвва кими олмадығымызы, Јеһованын бизим үчүн етдикләрини гијмәтләндирдијимизи ҝөстәрмәк имканы вар. Вәфтиз олунмагла Јеһоваја ҝөстәририк ки, бизим үчүн нәјин јахшы, нәјин пис олдуғуна гәрар вермәјә Онун сәлаһијјәти чатдығыны гәбул едирик. Бунунла сәмави Атамызы севдијимизи, Она етибар етдијимизи сүбут едирик.

18. Јеһоваја хидмәтдә мүвәффәгијјәт газанмаг үчүн нә едә биләрсиниз?

18 Вәфтиздән сонра да һәр ҝүнүмүзү өз истәдијимиз кими јох, Јеһованын истәдији кими јашамалыјыг. Милјонларла инсан бу ҹүр јашајыр. Сиз дә онларын сырасына гошула биләрсиниз. Бунун үчүн Аллаһын Кәламынын дәринлијинә вармаға, баҹы-гардашларла мүнтәзәм үнсијјәтдә олмаға вә мәһәббәтли Аллаһ һагда өјрәндикләринизи башгаларына данышмаға давам един (Ибр. 10:24, 25). Гәрар гәбул едәндә Јеһованын Кәламы вә тәшкилаты васитәсилә вердији ҝөстәришләрә гулаг асын (Әшј. 30:21). Онда һәр ишиниздә уғур газанаҹагсыныз! (Мәс. 16:3, 20).

19. Нә барәдә даим дүшүнмәлијик вә нә үчүн?

19 Јеһованын ҝөстәрдији јолла ҝетмәјин фајдалары барәдә даим дүшүндүкҹә Она вә гојдуғу гајда-ганунлара мәһәббәтиниз артаҹаг. Онда Шејтанын һеч бир тәклифи сизин Јеһоваја хидмәт етмәјинизә мане ола билмәјәҹәк. Һәтта мин ил дә кечсә, вәфтиз олунмаг гәрарынызын ән дүзҝүн гәрар олдуғуна әмин олаҹагсыныз!

НӘҒМӘ 28 Јеһованын досту олаг

^ абз. 5 Инсанын һәјатда верә биләҹәји ән мүһүм гәрар вәфтизлә бағлы вердији гәрардыр. Нәјә ҝөрә? Мәгаләдә бунун сәбәби арашдырылыр. Һәмчинин вәфтиз олунмаға мане олан әнҝәлләри ашмағын јоллары ҝөстәрилир.

^ абз. 56 ШӘКИЛИН ИЗАҺЫ. Өзүнәинамсызлыг. Ҝәнҹ оғлан шәрһ вермәјә чәкинир.

^ абз. 58 ШӘКИЛИН ИЗАҺЫ. Достлар. Ҝәнҹ мәсиһи она пис тәсир едән рәфигәси илә јол ҝедәркән диндашларыны ҝөрүб сыхылыр.

^ абз. 60 ШӘКИЛИН ИЗАҺЫ. Мүвәффәгијјәтсизлик. Гардашынын јығынҹагдан кәнар олунуб еви тәрк етдијини ҝөрән ҝәнҹ гыз бир ҝүн онун кими давранаҹағына ҝөрә нараһат олур.

^ абз. 62 ШӘКИЛИН ИЗАҺЫ. Мүгавимәт. Ҝәнҹ оғлан иманда олмајан анасынын јанында дуа етмәјә чәкинир.

^ абз. 65 ШӘКИЛИН ИЗАҺЫ. Өзүнәинамсызлыг. Ҝәнҹ гардаш бунун өһдәсиндән ҝәлмәк үчүн фәрди мүталиәјә даһа чох вахт ајырыр.

^ абз. 67 ШӘКИЛИН ИЗАҺЫ. Достлар. Ҝәнҹ гыз Јеһованын Шаһиди олмасы илә фәхр етмәји өјрәнир.

^ абз. 69 ШӘКИЛИН ИЗАҺЫ. Мүвәффәгијјәтсизлик. Ҝәнҹ гыз Јеһова илә мүнасибәтләрини мөһкәмләндириб вәфтиз олунур.

^ абз. 71 ШӘКИЛИН ИЗАҺЫ. Мүгавимәт. Ҝәнҹ оғлан иманда олмајан анасына ҹәсарәтлә өз етигадыны изаһ едир.