Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  јанвар 2017

Һәр вәзијјәтдә тәвазөкар олун

Һәр вәзијјәтдә тәвазөкар олун

«Аллаһын өнүндә тәвазөкарлыгла [јеријин]» (МИК. 6:8).

НӘҒМӘ: 48, 95

1—3. Јәһудадан олан пејғәмбәр нә етмәли иди, амма етмәди вә бунун нәтиҹәси нә олду? (Мәгаләнин әввәлиндәки шәклә бахын.)

ӘРУБАМ ПАДШАҺЫН һакимијјәти дөврүндә Јеһова Аллаһ Јәһудадан олан бир пејғәмбәрә бу аси падшаһа һөкм хәбәрини чатдырмағы бујурур. Пејғәмбәр тәвазөкарҹасына Аллаһын бујруғуну јеринә јетирир вә Јеһова ону гәзәбли падшаһын әлиндән гуртарыр (1 Пад. 13:1—10).

2 Јеһова бу пејғәмбәрә бујурмушду: «Орада нә чөрәк је, нә дә су ич. Ҝетдијин јолла да ҝери гајытма». Пејғәмбәр евинә гајыданда јолда онун габағына Бејтелдән олан гоҹа бир киши чыхыр. Киши Аллаһын пејғәмбәри олдуғуну иддиа едир. О, јаландан Аллаһдан вәһј алдығыны дејир. Бу киши пејғәмбәри евинә јемәк јемәјә дәвәт едир. Пејғәмбәр Аллаһын сөзүндән чыхыб онунла ҝедир. Тәбии ки, бу, Јеһованын наразылығына сәбәб олур. Пејғәмбәр евинә гајыданда јолда растына шир чыхыб ону өлдүрүр (1 Пад. 13:11—24).

3 Нәјә ҝөрә пејғәмбәр гоҹа кишинин сөзүнә ујуб өзбашына һәрәкәт етди? Бу барәдә Мүгәддәс Китабда һеч нә јазылмајыб. Ола билсин, о, «Аллаһын өнүндә тәвазөкарлыгла» јеримәјин нә демәк олдуғуну унутмушду. (Микә 6:8 ајәсини охујун.) Мүгәддәс Китаба әсасән, Јеһованын өнүндә јеримәк Она етибар етмәк, Онун һакимијјәтинин тәрәфиндә олмаг вә Онун ҝөстәрдији јолла ҝетмәк демәкдир. Тәвазөкар инсан јахшы дәрк  едир ки, мәһәббәтли вә гүдрәтли Јарадана даим дуа етмәк мүтләгдир. Пејғәмбәр Јеһовадан бу ҝөстәришлә бағлы мәсләһәт истәјә биләрди. Амма ҝөрүнүр, о, буну етмәмишди, чүнки Мүгәддәс Китабда бу барәдә мәлумат јохдур. Һәрдән биз дә ҹидди гәрарлар вермәли олуруг вә дәгиг билмирик неҹә давранаг. Тәвазөкарлыг ҝөстәриб Јеһова Аллаһдан мәсләһәт истәмәк бизә дүзҝүн гәрар вермәјә көмәк едәҹәк.

4. Бу мәгаләдән нә өјрәнәҹәјик?

4 Өтән мәгаләдән өјрәндик ки, нәјә ҝөрә мәсиһи тәвазөкар олмалыдыр вә тәвазөкар олмаг нә демәкдир. Инди исә ҝәлин ҝөрәк һансы вәзијјәтләр бизим тәвазөкарлығымызы сынаја биләр вә әсл тәвазөкарлығы неҹә јетишдирә биләрик? Бу суаллара ҹаваб тапмаг үчүн бу мәгаләдә тәвазөкарлығымызы сынајан үч вәзијјәти нәзәрдән кечирәҹәјик вә бу вәзијјәтләрин һәр бириндә һикмәтлә давранмаг үчүн нә етмәли олдуғумузу ҝөрәҹәјик (Мәс. 11:2).

ВӘЗИЈЈӘТ ДӘЈИШӘНДӘ

5, 6. Бәрзиллајын тәвазөкар олдуғу нәдән ҝөрүнүр?

5 Һәјатымызда вә тәјинатымызда дәјишикликләр оланда тәвазөкарлығымыз сынана биләр. Белә вәзијјәтләрдә Давуд падшаһын досту Бәрзиллајдан чох шеј өјрәнә биләрик. Бир дәфә Давуд падшаһ 80 јашлы Бәрзиллајы сарајында јашамаға дәвәт едир. Тәбии ки, бу, Бәрзиллај үчүн бөјүк шәрәф иди. Чүнки сарајда јашамагла о, падшаһа јахын олаҹагды. Амма Бәрзиллај тәклифи гәбул етмәди. Ҝөрәсән, нијә? Чүнки о, артыг гоҹалмышды вә өзүнүн дә дедији кими падшаһа јүк олмаг истәмирди. Бәрзиллај падшаһа, еһтимал ки, оғулларындан бири олан, Кимһамы онун јеринә сараја апармағы тәклиф етди (2 Ишм. 19:31—37).

6 Тәвазөкарлыг Бәрзиллаја ағыллы гәрар вермәјә көмәк етди. Кимсә дүшүнә биләр ки, Бәрзиллај чијинләринә ағыр јүк ҝөтүрмәк истәмәдији вә ја өмрүнүн галан һиссәсини раһат јашамаг истәдији үчүн падшаһын тәклифини гәбул етмәди. Хејр, сәбәб бу дејил. Садәҹә, о, баша дүшүрдү вә гәбул едирди ки, вәзијјәт инди дәјишиб вә о, әввәлки гәдәр иш ҝөрә билмир. О, өһдәсинә ҝүҹү чатандан артыг мәсулијјәт ҝөтүрмәк истәмирди. (Галатијалылара 6:4, 5 ајәләрини охујун.) Әҝәр фикримизи һансыса мөвгејә уҹалмаға, ад-сан газанмаға ҹәмләсәк, нәтиҹәдә, әлдә етдијимиз јеҝанә шеј худбинлик, рәгабәт вә пешманчылыг олаҹаг (Гал. 5:26). Тәвазөкарлыг исә бизи тәшвиг едәҹәк ки, бүтүн габилијјәтләримизи вә ҝүҹүмүзү Аллаһа шәрәф ҝәтирмәјә вә башгаларына көмәк етмәјә ҹәмләјәк (1 Кор. 10:31).

7, 8. Тәвазөкарлыг инсана өзүнә архаланмамаға неҹә көмәк едир?

7 Адәтән, мәсулијјәтли ишә тәјин олунан инсан, ејни заманда јүксәк мөвгејә дә уҹалыр вә бу, онун нә дәрәҹәдә тәвазөкар олдуғуну сынаја биләр. Нәһәмја пејғәмбәр Јерусәлимдәки ҹамаатын аҹынаҹаглы вәзијјәтдә олдуғуну ешидәндә Јеһоваја јалварыб көмәк истәди (Нәһ. 1:4, 11). Дуасына ҹаваб олараг шаһ Артаксеркс ону һәмин әразијә вали тәјин етди. Нәһәмја јүксәк вәзифә, вар-дөвләт вә ад-сан саһиби олса да, һеч вахт өз тәҹрүбәсинә вә габилијјәтләринә архаланмырды. О, һәмишә Аллаһла јеријирди, һәмишә Төвратын васитәсилә Јеһовадан мәсләһәт истәјирди (Нәһ. 8:1, 8, 9). Нәһәмја инсанларын үзәриндә ағалыг етмирди, әксинә, өз һесабына онлара көмәк едирди (Нәһ. 5:14—19).

8 Нәһәмјанын нүмунәсиндән ҝөрүнүр ки, тәјинат дәјишәндә вә ја әлавә иш тапшырыланда тәвазөкарлыг инсана өзүнә архаланмамаға көмәк едир. Ола билсин, ағсаггал өз тәҹрүбәсинә архаланараг  јығынҹағын ишләри илә бағлы мәсәләләрдә Јеһоваја дуа етмәдән гәрар верир, јахуд мәсиһиләрдән кимсә гәрар вериб сонра Јеһовадан бу гәрара хејир–дуа вермәсини диләјир. Белә һалда онлары тәвазөкар адландырмаг олармы? Тәвазөкар инсан Аллаһла мүгајисәдә нә дәрәҹәдә аҹиз олдуғуну вә Аллаһын онун үзәринә гојдуғу ишин нәдән ибарәт олдуғуну һеч вахт унутмур. Нә гәдәр баҹарыглы олсаг да, диггәтли олмалыјыг ки, өзүмүзә ҝүвәнмәјәк, хүсусән дә, дәфәләрлә растлашдығымыз һаллар јарананда. (Мәсәлләр 3:5, 6 ајәләрини охујун.) Биз диггәтимизи рүтбәјә вә јүксәк пилләјә галхмаға јох, Аллаһын аиләсинин үзвү кими аиләдә вә јығынҹагда өһдәмизә дүшән мәсулијјәтләри јеринә јетирмәјә ҹәмләмәлијик (1 Тим. 3:15).

ТӘНГИД ВӘ ТӘРИФ ЕШИДӘНДӘ

9, 10. Һагсыз јерә тәнгид олунанда тәвазөкарлыг инсана неҹә көмәк едә биләр?

9 Һагсыз јерә тәнгид олунанда инсана һиссләрини ҹиловламаг чох чәтин олур. Һәннәнин ҝүнүсү Фәнинә бүтүн ҝүнү онунла чәкиширди, онун ҝүнүнү гара етмишди. Әри Һәннәни чох севсә дә, о, хошбәхт дејилди, чүнки ушағы олмурду. Бир дәфә Һәннә мүгәддәс чадырда дуа едәндә баш каһин Әли сәһвән онун ичкили олдуғуну дүшүнүр вә буна ҝөрә ону данлајыр. Бүтүн бунлара бахмајараг, Һәннә тәмкинини позмады вә Әли илә һөрмәтлә данышды. Сонра о, чох тәсирли бир дуа етди вә бу дуа Мүгәддәс Китаба јазылды. Бу дуадан онун ҝүҹлү иман саһиби, шүкр едән вә Аллаһы севән инсан олдуғу ҝөрүнүр (1 Ишм. 1:5—7, 12—16; 2:1—10).

10 Тәвазөкарлыг бизә «пислијә јахшылыгла» галиб ҝәлмәјә көмәк едә биләр (Ром. 12:21). Шејтан дүнјасы һагсызлыгла долудур, буна ҝөрә дә еһтијатлы олмалыјыг ки, шәр инсанларын рәфтары бизи өзүмүздән чыхармасын (Зәб. 37:1). Диндашларымызла проблем јашајанда дөзмәк даһа чәтин олур. Белә һалларда тәвазөкар инсан Иса Мәсиһи өрнәк алаҹаг. Мүгәддәс Китабда онун барәсиндә јазылыб: «О, тәһгирә тәһгирлә ҹаваб вермирди... Лакин өзүнү  адил Һакимә тапшырырды» (1 Бут. 2:23). Иса дәрк едирди ки, гисас Јеһованындыр (Ром. 12:19). Мәсиһиләрә Иса кими тәвазөкар олмаг вә «пислијә писликлә» ҹаваб вермәмәк бујрулур (1 Бут. 3:8, 9).

11, 12. а) Чохлу тәриф ешидәндә вә јерсиз тәриф олунанда тәвазөкарлыг инсаны нәјә тәшвиг едәҹәк? б) Тәвазөкарлыг инсанын ҝејим-кечиминә вә давранышына неҹә тәсир едир?

11 Чохлу тәриф ешидәндә вә јерсиз тәриф олунанда да инсанын нә дәрәҹәдә тәвазөкар олдуғу үзә чыха биләр. Ҝәлин ҝөрәк Әстәр бу ҹүр вәзијјәтдә неҹә давранды, һәјатында баш верән ҝөзләнилмәз дәјишикликләр онун хасијјәтинә неҹә тәсир етди. О, Фарс империјасындакы сај-сечмә ҝөзәлләрдән бири иди. Әстәр шаһ сарајында бир ил ҝөзәллик гуллуғу кечмишди. О, һәр ҝүн бүтүн империјадан топланан вә шаһын рәғбәтини газанмаг үчүн дәридән-габыгдан чыхан ҝәнҹ гызларла үнсијјәт едирди. Нәһајәтдә шаһ Әстәри мәликә тәјин етди. Бүтүн бунлар Әстәри дәјишмәди. О, гүрурланмады, тәвазөкар, хејирхаһ вә һөрмәтҹил инсан олараг галды (Әст. 2:9, 12, 15, 17).

Ҝејим-кечимимиз һаггымызда нә дејир: биз Јеһова Аллаһа вә баҹы-гардашлара һөрмәт едирик, јохса тәвазөкарлыгдан узағыг? (12-ҹи абзаса бахын)

12 Тәвазөкар инсанын ҝејим-кеҹиминдә, рәфтарында һәмишә ләјагәт вә һөрмәт өзүнү ҝөстәрир. О баша дүшүр ки, јерсиз јерә диггәти өзүнә ҹәлб етмәклә јох, «сакит вә һәлим руһ» тәзаһүр етдирмәклә инсанларын үрәјини фәтһ етмәк олар. (1 Бутрус 3:3, 4 ајәләрини охујун; Әрм. 9:23, 24.) Инсанын өзү һаггында һансы фикирдә олдуғу ҝеҹ-тез онун һәрәкәтләриндә өзүнү бүрузә верәҹәк. Мәсәлән, инсан сөзарасы өһдәсинә дүшән ишин хүсуси олдуғуну, мәсул гардашларла јахын мүнасибәти олдуғуну дејә вә билијини нүмајиш етдирә биләр. Јахуд башгаларынын көмәји илә әрсәјә ҝәлән бир иши өз адына јаза биләр. Бәс Иса белә давранардымы? Хејр! Онун сөзләринин әксәријјәти Төврата әсасланырды, о, тез-тез орадан ситатлар ҝәтирирди. О, чох тәвазөкар инсан иди, данышдыгларыны өзүнүн тәхәјјүлүнүн вә һикмәтинин мәһсулу кими гәләмә вермирди. Һәмишә өз нитгиндә Јеһованы уҹалдырды (Јәһ. 8:28).

ГӘРАР ВЕРӘНДӘ

13, 14. Гәрар верәндә тәвазөкарлыг инсана неҹә көмәк едир?

13 Инсан гәрар верәндә дә онун тәвазөкар олуб-олмадығы үзә чыха биләр. Һәвари Булус Гејсәријјәдә оланда Ағаб пејғәмбәр она деди ки, Јерусәлимә ҝетсә, ону һәбс едәҹәкләр. Пејғәмбәрин сөзләринә әсасән, һәварини өлдүрә дә биләрдиләр. Гардашлар Булуса ҝөрә горхдуглары үчүн ону јолдан сахламаға чалышдылар. Амма Булусу фикриндән дөндәрә билмәдиләр. О, горхуја дүшмәди. Амма буна сәбәб онун өзүнәархајын олмасы дејилди. О, Јеһоваја тәвәккүл едирди вә нә олур-олсун, Онун тапшырдығы иши баша чатдырмаға гәрарлы иди. Булусун гәтијјәтини ҝөрән гардашлар да тәвазөкарлыг ҝөстәриб даһа ону фикриндән дашындырмаға чалышмадылар (Һәв. 21:10—14).

14 Инсан ҝәләҹәјин өзү илә нә ҝәтирәҹәјинә ҝөрә нараһат оланда она гәрар вермәк чәтин олур, амма бу вәзијјәтдә дә тәвазөкарлыг көмәјимизә чатыр. Мәсәлән, таммүддәтли хидмәтә башламаг истәјән мәсиһи дүшүнә биләр: «Сабаһ хәстәлијә тутулсам, неҹә олаҹаг? Валидејнләрим јаша доланда көмәк лазым олса, нә едәҹәјәм? Гоҹаланда өзүмү неҹә доландыраҹағам?» Нә гәдәр дуа етсәк дә, нә гәдәр арашдырма апарсаг да, бу кими суалларын ҹавабыны тапмајаҹағыг (Ваиз 8:16, 17). Јеһова Аллаһа етибар едән инсан ҝүҹүнүн мәһдуд олдуғуну нәинки билир, һәм дә бу һәгигәтлә барышыр. О, арашдырма апарандан, киминләсә мәсләһәтләшәндән вә көмәк үчүн дуа едәндән сонра Аллаһын руһунун ҝөстәрдији  истигамәтдә ирәлиләјир. (Ваиз 11:4—6 ајәләрини охујун.) Белә даврансаг, Јеһова гәрарымыза хејир-дуа верәҹәк, бәлкә дә планларымызы дәјишмәји мәсләһәт ҝөрәҹәк (Мәс. 16:3, 9).

ТӘВАЗӨКАР ОЛУН

15. Јеһова Аллаһ барәдә дүшүнмәк тәвазөкар олмаға неҹә көмәк едир?

15 Ҝөрүндүјү кими, тәвазөкарлыг чох ваҹиб хүсусијјәтдир. Бәс ону өзүмүздә неҹә јетишдирә биләрик? Бунун дөрд јолу вар. Биринҹиси, Јеһова Аллаһын мүкәммәл хүсусијјәтләри вә уҹалығы барәдә дүшүнмәк бизи, сөзүн әсл мәнасында, тәвазөкар олмаға вә Јараданымыза еһтирам бәсләмәјә тәшвиг едәҹәк (Әшј. 8:13). Јадда сахламалыјыг ки, биз мәләјин вә ја инсанын јох, Күлли-Ихтијар Аллаһын өнүндә јеријирик. Бу һәгигәти дәрк етмәк бизи Аллаһын гүдрәтли әли алтында тәвазөкар олмаға тәшвиг едәҹәк (1 Бут. 5:6).

16. Јеһова Аллаһын мәһәббәти барәдә дүшүнмәк бизә тәвазөкар олмаға неҹә көмәк едир?

16 Инсана тәвазөкар олмаға көмәк едән икинҹи амил Јеһова Аллаһын мәһәббәти барәдә дүшүнмәкдир. Һәвари Булус јазмышды ки, Јеһова Аллаһ бәдәнин «нисбәтән шәрәфсиз сандығымыз» һиссәләринә «даһа бөјүк шәрәф» ҝөстәриб (1 Кор. 12:23, 24). Јеһованын бизә дә мүнасибәти ејнидир. О, мәһдуд имканларымыза бахмајараг, һәр биримизин гејдинә галыр, бизи бир-биримизлә мүгајисә етмир, сәһв едәндә биздән үз дөндәрмир. Јеһова Аллаһын бизи севдијинә әмин олдуғумуз үчүн һарада хидмәт едириксә едәк, өзүмүзү Онун мүдафиәси алтында һисс едирик.

17. Башгаларында јахшы ҹәһәтләри ҝөрмәјин һансы фајдасы вар?

17 Тәвазөкар олмаг үчүн үчүнҹү аддым Јеһова Аллаһ кими баҹы-гардашларда јахшы ҹәһәтләри ҝөрмәкдир. Һәмишә диггәт мәркәзиндә олмаға вә башгаларына ҝөстәриш вермәјә чалышмамалыјыг, әксинә, башгаларындан мәсләһәт истәмәли вә онларын мәсләһәтини гәбул етмәлијик (Мәс. 13:10). Кимсә тәјинат аланда онунла бирҝә севинмәлијик. Јеһованын дүнјадакы бүтүн гардашларымыза хејир-дуа вердијини ҝөрәндә Она шүкүрләр охумалыјыг (1 Бут. 5:9).

18. Виҹданы тәрбијә етмәк тәвазөкар олмаға неҹә көмәк едир?

18 Дөрдүнҹү амил, виҹданымызы Мүгәддәс Китаб принсипләри әсасында тәрбијә етмәкдир. Һәр шејә Јеһова Аллаһын ҝөзү илә бахмағы өјрәнсәк, Ону разы салан гәрарлар верәҹәјик. Мүнтәзәм мүталиә илә мәшғул олсаг, дуа етсәк вә өјрәндикләримизә ујғун јашасаг, тәдриҹән виҹданымыз камилләшәҹәк (1 Тим. 1:5). Јеһова бизә башгаларыны өзүмүздән үстүн тутмағы өјрәдир. Бүтүн бу шејләрә әмәл етсәк, Аллаһ вәд едир ки, бизә өзүмүздә тәвазөкарлығы вә диҝәр ҝөзәл кејфијјәтләри јетишдирмәјә көмәк едәрәк тәлимимизи баша чатдыраҹаг (1 Бут. 5:10).

19. Бизә әбәдијјән Јеһова Аллаһын өнүндә тәвазөкарлыгла јеримәјә нә көмәк едә биләр?

19 Мәгаләнин әввәлиндә һаггында сөз ачылан пејғәмбәр бир өзбашына һәрәкәтин үстүндә һәјатыны вә Јеһова Аллаһла мүнасибәтини итирди. Амма Аллаһын биздән әввәл вә бизим дөврдә јашајан итаәткар хидмәтчиләри сүбут едибләр ки, һәр вәзијјәтдә тәвазөкар галмаг мүмкүндүр. Инсан нә гәдәр чох Аллаһа хидмәт едирсә, бир о гәдәр тәвазөкар олмалыдыр (Мәс. 8:13). Јеһованын јолунда һансы иши ҝөрмәјимиз елә дә бөјүк әһәмијјәт дашымыр, Онун өнүндә јеримәјимиз артыг өзү-өзлүјүндә бөјүк шәрәфдир. Ҝәлин бизә ҝөстәрилән бу шәрәфи һәмишә гијмәтләндирәк вә әбәдијјән Јеһова Аллаһын өнүндә тәвазөкарлыгла јеримәк үчүн вар ҝүҹүмүзлә чалышаг.