Контентә кеч

Икинҹи дәрәҹәли менју

Јеһованын Шаһидләри

Aзәрбајҹан (кирил әлифбасы)

Тәнһалыг һиссиндән неҹә јаха гуртармаг олар?

Тәнһалыг һиссиндән неҹә јаха гуртармаг олар?

Ашағыдакылары едә биләрсән:

1. Мүсбәт ҹәһәтләрин һаггында дүшүн (Инҹил, 2 Коринфлиләрә 11:6). Бир тәрәфдән, мәнфи ҹәһәтләрини етираф етмәк јахшы олса да, диҝәр тәрәфдән, нәзәрә алмалысан ки, сәнин чохлу мүсбәт ҹәһәтләрин дә вар. Буну јадда сахласан, сәни боған негатив һиссләрдән азад ола биләрсән. Өзүндән соруш: «Мәним һансы мүсбәт ҹәһәтләрим вар?» Өз мүсбәт ҹәһәтләрини вә баҹарыгларыны садала.

2. Башгаларына сәмими диггәт ҝөстәр. Шәрт о дејил ки, бирдән-бирә һамыја диггәт ҝөстәрсән. Бир-ики нәфәрдән башласан, кифајәтдир. «Садәҹә һал-әһвал тутмаг вә ја ишләри илә марагланмаг инсанларла даһа јахын мүнасибәтләрин башланғыҹына зәмин јарадыр», — дејә Хорхе адлы ҝәнҹ өз мүшаһидәләрини гејд едир.

Сәни башгаларындан ајыран учурум үзәриндән көрпү сал

Мәсләһәт. Анҹаг һәмјашыдларынла үнсијјәт етмәклә кифајәтләнмә. Мүгәддәс Јазыларда араларында бөјүк јаш фәрги олан инсанлар арасында достлугдан бәһс едилир. Мәсәлән, Рут илә Наоми, Давуд илә Јонатан, Тимотеј илә Павел арасында мөһкәм достлуг телләри вар иди (Рут 1:16, 17; Пејғәмбәрләрин китабы, 1 Шамуел 18:1; Инҹил, 1 Коринфлиләрә 4:17). Үнсијјәт алтында монолог јох, диалог нәзәрдә тутулур. Инсанлар онлары динләмәји баҹаранлары јүксәк гијмәтләндирирләр. Әҝәр утанҹагсанса, унутма ки, сөһбәти биринҹи башламағын шәрт дејил.

3. Хошрәфтар ол (Инҹил, 1 Петер 3:8). Һәмсөһбәтинлә нәдәсә разы дејилсәнсә, ону ахыра кими динләмәјә чалыш. Сәбирли ол. Фикирләринизин үст-үстә дүшдүјү мәгамлара диггәт јетир вә сөһбәти бунун әсасында гур. Әҝәр нә илә исә разы дејилсәнсә, буну тәмкинли вә нәзакәтли шәкилдә билдирсән, јахшы олар.

Мәсләһәт. Башгаларынын сәнинлә неҹә данышмаларыны истәјирсәнсә, сән дә онларла елә даныш. Инсанларла мүбаһисә етсән, лаға гојсан, тәһгир вә ја тәнгид етсән, һеч ким сәнә јахын дуран дејил. Ејнилә дә әксинә, әҝәр сөзләрин үрәкачан олса, һамы сәнинлә үнсијјәт етмәк истәјәҹәк (Инҹил, Колослулара 4:6).