Контентә кеч

Икинҹи дәрәҹәли менју

Јеһованын Шаһидләри

Aзәрбајҹан (кирил әлифбасы)

Јенидән доғулмаг нә демәкдир?

Јенидән доғулмаг нә демәкдир?

Мүгәддәс Јазыларын ҹавабы

«Јенидән доғулмаг» ифадәси Аллаһла јенидән доғулан инсан арасында мүнасибәтләрин јени башланғыҹыны билдирир (Јәһја 3:3, 7). Аллаһ јенидән доғулан инсанлара Өз өвлады кими јанашыр (Ромалылара 8:15, 16; Галатијалылара 4:5; 1 Јәһја 3:1). Гануни шәкилдә өвладлыға ҝөтүрүлән инсанлар кими, онлар өз мөвгеләрини дәјишиб, Аллаһын аиләсинә дахил олурлар (2 Коринфлиләрә 6:18).

Нәјә ҝөрә инсан јенидән доғулур?

Иса Мәсиһ демишди: «Инсан јенидән доғулмаса, Аллаһын Падшаһлығыны ҝөрә билмәз» (Јәһја 3:3). Белә ки, јенидән доғулмаг инсаны Аллаһын Падшаһлығында Мәсиһлә бирҝә идарә етмәјә һазырлајыр. Бу Падшаһлыг ҝөјдән идарә едир. Буна ҝөрә дә Мүгәддәс Китабда «јени һәјат» «ҝөјләрдә горунуб [сахланылан]» мирас кими тәсвир олунур (1 Бутрус 1:3, 4). Јенидән доғуланлара Мәсиһлә бирҝә падшаһлыг етмәк етибар едилиб (2 Тимутијә 2:12; 2 Коринфлиләрә 1:21, 22).

Инсан неҹә јенидән доғула биләр?

Иса Мәсиһ бу мөвзудан данышанда демишди ки, јенидән доғулмаг үчүн «судан вә руһдан» доғулмаг лазымдыр (Јәһја 3:5). Бу ифадә су илә, сонра исә мүгәддәс руһла вәфтиз олунмағы билдирир (Һәвариләрин ишләри 1:5; 2:1—4).

Иса јенидән доғулан илк инсан иди. О, Иордан чајында вәфтиз олунандан сонра Аллаһ ону мүгәддәс руһла мәсһ етди, јәни вәфтиз етди. Иса Мәсиһ Аллаһын руһани оғлу кими јенидән доғулараг ҝөјдәки һәјатына гајытмаг үмидинә малик олду (Марк 1:9—11). Аллаһ Исаны руһани бәдәндә дирилдәрәк бу үмиди ҝерчәкләшдирди (Һәвариләрин ишләри 13:33).

Јенидән доғулан диҝәр инсанлар да суда вәфтиз олунандан сонра мүгәддәс руһ алыблар * (Һәвариләрин ишләри 2:38, 41). Онлар ҝөјдә јашамаг үмидинә сонрадан әмин олурлар вә бу үмиди Аллаһ дирилмә васитәсилә ҝерчәкләшдирәҹәк (1 Коринфлиләрә 15:42—49).

Јенидән доғулмагла бағлы јанлыш фикирләр

Сәһв. Инсан гуртулмаг вә мәсиһи олмаг үчүн јенидән доғулмалыдыр.

Доғру. Мәсиһин гурбанлығы тәкҹә ҝөјдә Мәсиһлә бирҝә идарә етмәк үчүн јенидән доғуланлары јох, һәмчинин Аллаһын Падшаһлығынын јер үзүндәки тәбәәләрини хилас едәҹәк (1 Јәһја 2:1, 2; Вәһј 5:9, 10). Икинҹи груп мәсиһиләрин јер үзү Ҹәннәтдә әбәди јашамаг фүрсәти вар (Зәбур 37:29; Мәтта 6:9, 10; Вәһј 21:1—5).

Сәһв. Инсан јенидән доғулуб-доғулмамағы өзү сечә биләр.

Доғру. Һәр кәсин Аллаһа јахынлашмаг вә хилас олмаг имканы вар (1 Тимутијә 2:3, 4; Јагуб 4:8). Лакин кимин јенидән доғулаҹағыны, јәни мүгәддәс руһла мәсһ едиләҹәјини Аллаһ Өзү сечир. Мүгәддәс Китаба әсасән, јенидән доғулмаг «инсанларын арзусундан, јахуд ҹәһдләриндән јох,.. Аллаһдан асылыдыр» (Ромалылара 9:16). «Јенидән доғулмаг» ифадәси һәмчинин «јухарыдан доғулмаг» кими ишләнир вә кимин јенидән доғулаҹағынын јухарыдан, јәни Аллаһ тәрәфиндән сечилдијини ҝөстәрир (Јәһја 3:3, һашијә).

^ абз. 9 Корнилини вә онунла оланлары чыхмаг шәртилә (Һәвариләрин ишләри 10:44—48).