Контентә кеч

Икинҹи дәрәҹәли менју

Јеһованын Шаһидләри

Aзәрбајҹан (кирил әлифбасы)

Скај-Тауердә гаршысы алынан интиһар

Скај-Тауердә гаршысы алынан интиһар

80 јашы олан Грејһам Браун адлы Јеһованын Шаһиди әгли зәифлији олан бир нәфәри Јени Зеландијанын Окленд шәһәриндәки 328 метрлик Скај-Тауер ҝөјдәләниндән өзүнү атмаға гојмајыб. Грејһам һадисәни белә нәгл едир: «Һәмин шәхс бир Јеһованын Шаһиди илә данышмаг истәдијини дејәндә полис мәнә зәнҝ вуруб көмәк етмәјими истәди.

Ҝөјдәләнин ишчиләри мәнә горујуҹу кәмәри тахдылар вә Мүгәддәс Китабымы узун кәндирлә бағладылар. Сонра полис мәни јердән 192 метр һүндүрлүјүндә олан хариҹи мүшаһидә платформасына апарды. Ҝөјдәләнин әтрафында гылынҹ кими кәсән сојуг күләк түғјан едирди. Өзүнү атмагла һәдәләјән киши илә арамызда гыса мәсафә вар иди. О, енсиз һиссәдә отуруб ајагларыны ашағы салламышды.

Мән она уҹадан сәсләндим, Јеһованын Шаһиди олдуғуму вә она көмәк етмәк истәдијими дедим. Сонра үрәјимдә дуа едиб Мүгәддәс Китабы ачдым вә сөһбәтә башладым.

Һәјатын дәјәриндән данышдым. Елә һәмин әрәфәдә бу мөвзу илә бағлы Падшаһлыг залымызда чыхыш етмишдим.

Мән она дедим: “Сән Аллаһын ҝөзүндә дәјәрлисән вә О, сәнә бу мөһтәшәм һәдијјәни — һәјаты вериб. Нијә дә Аллаһа бу һәдијјәни гијмәтләндирдијини ҝөстәрмәјәсән? Хаһиш едирәм, тәһлүкәсизлик һасарынын архасына кеч”.

Мән она: “Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын” — сөзләринин јазылдығы Јәһја 3:16 ајәси дә дахил олмагла, бир нечә ајә охудум.

Сонра әлавә етдим: “Аллаһ сәни чох севир вә истәјир ки, сән јашајасан”.

Әввәл-әввәл мәнә елә ҝәлди ки, о, дедикләримә фикир вермир. Буна ҝөрә үрәјимдә дуа едәрәк Јеһовадан ону јола ҝәтирмәкдә мәнә көмәк етмәсини истәдим. Ахырда еһмалҹа ајаға галхды вә бир аз мәнә јахынлашды. Ҝөзләриндән ҝөрүнүрдү ки, дахилиндә бөјүк нараһтчылыг кечирирди.

О деди: “Јеһованын Шаһидләри бу јахынларда мәним евимә ҝәлмишдиләр, амма мән онлара гаршы кобуд даврандым. Буна ҝөрә өзүмү чох гынајырам. Мәни бағышлаја биләҹәксиниз?”

“Һәтта Јеһованын Шаһиди олмамышдан габаг бизләрдән бәзиләри дә белә едиб. Инан ки, Јеһова сәни бағышлајаҹаг”, — дејә мән ону әмин етмәјә чалышдым.

О ҹаваб верди: “Сағ олун, хејли сакитләшдим”.

Мән давам етдим: “Бир билсән, мән сәнә ҝөрә неҹә нараһатам. Мән горујуҹу кәмәри тахмышам, амма сән јох; сүрүшүб јыхылсан, дәјәрли һәјатыны итирәҹәксән вә бу, Јеһованы чох кәдәрләндирәҹәк. Хаһиш едирәм, бу тәрәфә кеч”.

Бир аз сакитләшиб өзүнә ҝәлди. Јавашҹа: “Јахшы, ҝәлирәм”, — деди.

О, платформаја ајаг басан кими полис ҹәлд ону тәһлүкәсиз јерә апарды. Дүз бир саат онунла сөһбәт етдик».

Јеһованын Шаһидләри инсанлара гаршы чох гајғыкешдирләр, хүсусилә мәјуслуға гапылан инсанлара гаршы. Дүнјанын һәр јериндә онлар Мүгәддәс Китаб ајәләринин көмәји илә Аллаһын бизим һалымыза јандығыны әмин едәрәк инсанлара үмид вә тәсәлли верирләр.