Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Хошбәхтлик ҝәтирән һәгиги иман

 Бөлмә 3

Һәјаты јахшылашдыран фајдалы мәсләһәтләр

Һәјаты јахшылашдыран фајдалы мәсләһәтләр

ТУТАГ КИ, јашадығыныз әразијә тәзә һәким тәјин олунуб. Ола билсин, әввәлҹә сиз онун јанына ҝетмәјә еһтијат едәҹәксиниз. Анҹаг онун дост-танышларыныздан кимәсә көмәји дәјдијини вә онларын сағламлығынын хејли дәрәҹәдә јахшылашдығыны биләндә сиз дә онун јанына ҝетмәк гәрарына ҝәлмәјәҹәксинизми?

Мүгәддәс Јазылары мүәјјән мәнада бу һәкимлә мүгајисә етмәк олар. Бәзи инсанлар бу јазылара мүраҹиәт етмәјә тәрәддүд едирдиләр. Лакин орада олан мүдрик мәсләһәтләри тәтбиг едәндә һәјатлары хејли дәрәҹәдә дәјишди. Ҝәлин бәзи нүмунәләри нәзәрдән кечирәк.

Аилә проблемләринин һәлли

«Јениҹә аилә һәјаты гуранда әрим Һәбиб * мәнә гаршы чох етинасыз иди, — дејә Сәријјә хатырлајыр. — Мән һирсимдән гышгырыб-бағырыр, ону тәһгир едир, әлимә кечәни үстүнә атыр, һәтта вурурдум. Бәзән о дәрәҹәдә өзүмдән чыхырдым ки, һушуму итирирдим.

Һәбиб Мүгәддәс Китабы өјрәнмәјә башлајанда мән ону әлә салырдым. Лакин өјрәнмә заманы о бири отагдан ҝизлиҹә гулаг асырдым. Бир ҝүн онлар Мүгәддәс Китабдан бир ајә охујаркән ешитдим: “Гој арвадлар Ағаја табе олур кими, әрләринә табе олсунлар, ...әр[ләр]инә дәрин һөрмәт бәсләсин[ләр]” (Ефеслиләрә 5:22, 33). Бу сөзләр үрәјимә тәсир етди. Аллаһа јалварырдым ки, әрими сөјүб тәһгир етдијимә ҝөрә мәни бағышласын. Јахшы арвад олмағым үчүн дуа едиб көмәк диләјирдим. Тезликлә биз Мүгәддәс Китабы бирликдә өјрәнмәјә башладыг».

Һәбиб вә Сәријјә

Мүгәддәс Китабда һәмчинин дејилир: «Әр арвадыны өз бәдәнини севдији кими севмәлидир» (Ефеслиләрә 5:28). Сәријјә давам едир: «Бу шејләри өјрәнмәјимиз һәр икимизә тәсир етди. О, ишдән ҝәләндә мән она чај ҝәтирмәјә вә онунла мүлајим данышмаға башладым. Һәбиб дә, өз нөвбәсиндә, мәнә гаршы даһа нәвазишли иди вә һәмишә ев ишләриндә мәнә көмәк етмәјә чалышырды. Һәр икимиз дә чалышырыг ки, бир-биримизә гаршы хејирхаһ, шәфгәтли олаг вә бир-биримизи үрәкдән бағышлајаг (Ефеслиләрә 4:32). Бунун сајәсиндә, бир-биримизә мәһәббәтимиз вә һөрмәтимиз артыб. Инди биз 40 илдән чохдур ки, хошбәхт аилә һәјаты сүрүрүк. Аллаһын Кәламынын мүдрик мәсләһәтләри никаһымызы хилас етди!»

 Гәзәби ҹиловламаг

Тајиб дејир: «Мән өзүмдән тез чыхыр, далашыр вә башгаларыны силаһла һәдәләјирдим. Һәмчинин арвадым Зөһрәни дөјүрдүм, һәтта елә вурурдум ки, јерә сәрилирди. Чохлары мәндән горхурду.

Зөһрә вә Тајиб һәр ахшам бирликдә Аллаһа дуа едирләр

Бир ҝүн мән Исанын сөзләрини охудум: “Сизә јени бир әмр верирәм: бир-биринизи севин. Мән сизи севдијим кими, сиз дә бир-биринизи севин” (Јәһја 13:34). Бу мәнә ҝүҹлү тәсир бағышлады вә мән о андан дәјишмәк гәрарына ҝәлдим. Дахилимдә гәзәб јарандығыны һисс едәндә сакитләшмәк үчүн Аллаһа дуа едиб Ондан көмәк истәјирдим. Дәрһал гәзәбим сојујурду. Һәјат јолдашымла мән Ефеслиләрә 4:26, 27 ајәләриндәки мәсләһәти тәтбиг едирик: «Гәзәбләнсәниз дә ҝүнаһ ишләмәјин; гој һирсиниз ҝүн батмамыш сојусун, Иблисә фүрсәт вермәјин». Биз һәр ахшам бирликдә Мүгәддәс Китабы охујур вә бизә көмәк етмәси үчүн Аллаһа дуа едирик. Бу, ҝүн әрзиндә баш вермиш ҝәрҝинлији арадан галдырыр вә бизи бир-биримизә јахынлашдырыр.

Инди мәни һамы сүлһпәрвәр инсан кими таныјыр. Һәјат јолдашымла ушагларым мәни севир вә һөрмәт едирләр. Һал-һазырда чохлу достларым вар вә мән өзүмү Аллаһа јахын һисс едирәм. Мән сөзүн әсил мәнасында хошбәхтәм».

Наркотик дүшкүнлүјүнүн өһдәсиндән ҝәлмәк

Галиб

Галиб дејир: «Мән авара ҝәнҹләрә гошулмушдум. Чохлу сигарет чәкирдим вә ҝеҹәләри сәрхош һалда күчәләрдә сәрилиб галмаг мәндә адәт һалыны алмышды. Һәмчинин гејри-гануни наркотикдән — мариһуана вә екстазидән һәм истифадә едир, һәм дә сатырдым. Онлары ҝүлләкечирмәјән жилетимин алтында ҝизләдирдим. Бу гәдәр сәрт ҝөрүнмәјимә вә давранмағыма бахмајараг, горху ичиндә јашајырдым.

Сонра бир нәфәр мәнә Мүгәддәс Китабдан нөвбәти ајәләри ҝөстәрди: “Оғлум,  тәлимими унутма... Онлар өмрүнү узадар, һәјатына илләр, фираванлыг артырар” (Сүлејманын мәсәлләри 3:1, 2). Мән узун өмүр вә динҹ һәјат арзулајырдым. Еләҹә дә орадан белә сөзләр охудум: “Әзизләрим, бизә верилмиш вәдләрин мүгабилиндә ҝәлин бәдәни вә руһу мурдарлајан һәр шејдән өзүмүзү тәмизләјәк вә Аллаһ горхусу илә там мүгәддәслијә јетишәк” (2 Коринфлиләрә 7:1). Беләликлә, наркотик маддәләрдән истифадә етмәји тәрҝитдим, пис достларымла әлагәми кәсдим вә Аллаһа хидмәт етмәјә башладым.

Артыг 17 илдир ки, наркотикдән ҹанымы гуртармышам. Инди мәним хошбәхт аиләм, ҝөзәл достларым вар, виҹданым исә тәмиздир. Артыг сәрхош һалда күчәләрдә јох, ҝеҹә чарпајымда раһат јатырам».

Миллијјәтчилик руһуна үстүн ҝәлмәк

«Јенијетмә јашларында ҹинајәткарлыгла мәшғул олурдум вә гурбанларымын чоху нифрәтлә јанашдығым башга милләтләрдән олан инсанлар иди», — дејә Һарун адлы бир нәфәр етираф едир.

«Лакин мүәјјән вахтдан сонра Аллаһы ахтармаға башладым. Нәтиҹәдә, Мүгәддәс Јазылары арашдыран бир група раст ҝәлдим. Орада әввәлләр нифрәтлә јанашдығым етник груплардан олан инсанлар мәни сәмимијјәтлә саламлајырдылар! Һәмчинин диггәт јетирдим ки, орада мүхтәлиф иргдән олан инсанлар бир-биринә гајнајыб-гарышырлар. Бу, мәни һејрәтләндирди! Сонра Мүгәддәс Китабда јазылан бу сөзләрин мәнасыны баша дүшдүм: “Аллаһымыз ајры-сечкилик етмәјән Аллаһдыр, һәр халгын ичиндә Ондан горхан вә салеһ һәјат сүрән адамы хошлајыр” (Һәвариләрин ишләри 10:34, 35).

Бу ҝүн үрәјимдә һеч кимә гаршы нифрәт һисс етмирәм. Ән јахшы достларым арасында әввәлләр нифрәт етдијим милләтдән олан инсанлар да вар. Мүгәддәс Китаб васитәси илә Аллаһ мәнә башгаларыны севмәји өјрәтди».

Һарун инди мүхтәлиф иргләрдән олан инсанларла үнсијјәт етмәкдән мәмнунлуг дујур

Зоракылыгдан әл чәкмәк

Мәнсур адлы бир нәфәр дејир: «Мән јенијетмә оланда ики дәфә оғурлуға ҝөрә, бир дәфә исә бир нәфәри гәддарҹасына дөјдүјүмә ҝөрә һәбсә дүшмүшәм. Сонралар мән гијамчы дәстәјә гошулдум вә чохлу инсанын һәјатына баис олдум. Мүнагишә вә тоггушмалар битдикдән сонра инсанлары сојмаг  вә мәлумат алмаг үчүн һәдә-горху ҝәлән дәстәјә башчылыг етмәјә башладым. Ҹанҝүдәнләрим һәр јердә мәни мүшајиәт едирдиләр. Мән чох зоракы вә тәһлүкәли инсан идим.

Мәнсур артыг зоракылыг етмир, инди она Аллаһын Кәламыны өјрәдән адам кими һөрмәт едирләр

Бир ҝүн нөвбәти ајәләри охудум: “Мәһәббәт сәбирли вә хејирхаһдыр. Мәһәббәт пахыл дејил, ловғаланмыр, јекәханалыг етмир, налајиг давранмыр, өз хејрини ҝүдмүр, әсәбиләшмир, она едилән пислијин һесабыны тутмур” (1 Коринфлиләрә 13:4, 5). Бу сөзләр мәнә ҝүҹлү тәсир бағышлады. Мән башга јерә көчдүм, Мүгәддәс Китабы өјрәнмәјә вә онун мәсләһәтләрини һәјатымда тәтбиг етмәјә башладым.

Артыг зоракылыгдан әл чәкмишәм. Инди мәнә Аллаһын Кәламыны өјрәдән бир адам кими, һөрмәт едирләр. Мән мәналы өмүр сүрүр вә һәјатымдан мәмнунам».

Аллаһын Кәламы гүдрәтлидир

Бу вә диҝәр сајсыз-һесабсыз нүмунәләр ҝөстәрир ки, «Аллаһын сөзү ҹанлы вә гүдрәтлидир» (Ибраниләрә 4:12). Онун мәсләһәтләри садә, практики вә тәшвигедиҹидир.

Бәс Мүгәддәс Китаб сизә дә көмәк едә биләрми? Әлбәттә, гаршылышадығыныз проблемдән асылы олмајараг, онун сизә бөјүк көмәји дәјә биләр: «Мүгәддәс Јазылардакы һәр кәлмә Аллаһ тәрәфиндән илһамланмышдыр вә тәлим, тәнбеһ, ислаһ вә салеһлик јолунда тәрбијә үчүн фајдалыдыр. Бунун сајәсиндә Аллаһ бәндәси там сәриштәли, һәр ҹүр јахшы ишә тамамилә һазыр ола биләр» (2 Тимотејә 3:16, 17).

Буна ҝөрә дә, ҝәлин Мүгәддәс Китабын әсас тәлимләриндән бәзиләрини нәзәрдән кечирәк.

^ абз. 6 Бәзи адлар дәјишдирилиб.