Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Иса пејғәмбәр. Јол, һәгигәт, һәјат

 ФӘСИЛ 139

Мәсиһ Ҹәннәт јарадыб тәјинатыны битирир

Мәсиһ Ҹәннәт јарадыб тәјинатыны битирир

1 КОРИНФЛИЛӘРӘ 15:24—28

  • ГОЈУНЛАРЛА КЕЧИЛӘРИН АГИБӘТИ

  • ЧОХЛАРЫ ҸӘННӘТДӘ ЈАШАЈАҸАГ

  • ИСА МӘСИҺ ЈОЛ, ҺӘГИГӘТ ВӘ ҺӘЈАТДЫР

Иса пејғәмбәр вәфтиз олунандан дәрһал сонра, һәлә хидмәтинә башламамыш бир дүшмәнлә үзләшмишди. Бу дүшмән, јәни Иблис дөнә-дөнә ону сынаға чәкмишди. Сонралар Иса Мәсиһ онун һагда демишди: «Бу дүнјанын һөкмдары ҝәлир. Онун мәним үзәримдә һакимијјәти јохдур» (Јәһја 14:30).

Һәвари Јәһја Иблис вә Шејтан адланан бөјүк әждаһанын агибәтини ҝөстәрән вәһј алыр. Бәшәријјәти гарабагара изләјән бу дүшмән ҝөјдән јерә атылыб вә мәһвинә аз галдығыны билдији үчүн чох гәзәблидир (Вәһј 12:9, 12). Мәсиһиләр јахшы билирләр ки, сона аз галан дөврдә јашајырлар. Тезликлә Шејтан Иблис мин иллијинә дибсиз гујуја атылаҹаг вә Иса Мәсиһ Аллаһын Падшаһлығында идарә етдији бүтүн бу мүддәт әрзиндә фәалијјәтсиз олаҹаг (Вәһј 20:1, 2).

Бәс бу вахт әрзиндә јер үзүндә нәләр баш верәҹәк? Орада кимләр јашајаҹаг? Мәсиһ јер үзүндә оларкән бу суаллары ҹавабландырмышды. Гојунлар вә кечиләр, јәни салеһләр вә итаәтсиз оланлар барәдә мәсәлиндә о, бу ики груп инсанын агибәтини ҝөстәрмишди. Иса Мәсиһин гардашларындан јахшылығы әсирҝәмәјән вә онларла әмәкдашлыг едән салеһ инсанлар әбәди һәјата говушаҹаг, бунлары етмәјәнләр исә әбәдилик мәһв олаҹаг (Мәтта 25:46).

Бу, бизә Иса Мәсиһин онунла бирҝә едам олунан ҹинајәткара дедији сөзләри баша дүшмәјә көмәк едир. Иса Мәсиһ һәвариләринә онунла бирликдә Падшаһлыгда олаҹагларыны вәд етдији һалда, бу адама башга бир вәд вермишди. О демишди: «Буну бил: сән мәнимлә Ҹәннәтдә олаҹагсан» (Лука 23:43). Бу адамын ҝөзәл бағда, јәни Ҹәннәтдә јашамаг үмиди јаранды. Мәнтиглидир ки, бу ҝүн салеһлијини сүбут едәнләр, о ҹүмләдән әбәди һәјата лајиг оланлар Ҹәннәтдә јашајаҹаглар.

 Бу, һәвари Јәһјанын јер үзүндә һөкм сүрәҹәк шәраити тәсвир едәркән дедији сөзләрлә үст-үстә дүшүр: «Аллаһын чадыры инсанларладыр. О, онларла мәскән салаҹаг, онлар да Онун халгы олаҹаглар. Аллаһ Өзү онларла олаҹаг. О, онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (Вәһј 21:3, 4).

Һәмин ҹинајәткар Ҹәннәтдә јашамаг үчүн илк өнҹә дирилмәлидир. Амма дирилән јалныз о олмајаҹаг. Иса Мәсиһ буну ачыг-ајдын ҝөстәрмишди: «Елә бир вахт ҝәләҹәк ки, гәбирләрдә оланларын һамысы онун сәсини ешидәҹәк, јахшы иш ҝөрәнләр һәјата говушмаг үчүн, пис иш ҝөрәнләрсә һөкмә дүчар олмаг үчүн дириләҹәкләр» (Јәһја 5:28, 29).

Бәс Иса Мәсиһлә бирҝә ҝөјдә идарә едәҹәк садиг һәвариләр вә мәһдуд сајда олан диҝәр инсанлар барәдә нә демәк олар? Мүгәддәс Китабда дејилир: «Онлар Аллаһын вә Мәсиһин каһинләри олаҹаг вә мин ил әрзиндә Мәсиһлә бирликдә падшаһлыг едәҹәкләр» (Вәһј 20:6). Иса Мәсиһин һәмварисләри јер үзүндән ҝөтүрүлән гадынлар вә кишиләр олдуғу үчүн онлар шәфгәтли вә анлајышлы рәһбәрләр олаҹаг (Вәһј 5:10).

Иса Мәсиһ фидјә гурбанлығыны бүтүн бәшәријјәтә тәтбиг едәҹәк вә онлары мирас алдыглары ҝүнаһын ләнәтиндән гуртараҹаг. Мәсиһ вә онун һәмварисләри бәшәријјәти камиллијә јетишдирәҹәк. Бәли, Аллаһын инсанларла бағлы әзәли нијјәти ҝерчәкләшәҹәк. Чүнки та башланғыҹда Аллаһ Адәмлә Һәвванын төрәјиб чохалмаларыны вә јер үзүнү долдурмаларыны нијјәт етмишди. Һәтта Адәмин ҝүнаһынын нәтиҹәси олан өлүмә дә сон гојулаҹаг!

Беләҹә, Иса Мәсиһ Јеһованын бујурдуғу бүтүн ишләри һәјата кечирәҹәк. Миниллијин сонунда исә о, Падшаһлығы вә камил инсан аиләсини Атасына тәһвил верәҹәк. Тәвазөкарлыгдан доған бу һәрәкәт барәдә Булус јазмышды: «Һәр шеј она табе едиләндән сонра Оғул өзү дә она һәр шеји табе едәнә табе олаҹаг ки, Аллаһ һәр кәс үчүн һәр шеј олсун» (1 Коринфлиләрә 15:28).

Бәли, Иса Мәсиһ Аллаһын али нијјәтләринин ҝерчәкләшмәсиндә ваҹиб рол ојнајыр. Бу нијјәтләр әбәдијјәт боју ҝерчәкләшдикҹә Иса пејғәмбәр өзү һагда дедији бу сөзләри доғрулдаҹаг: «Јол, һәгигәт вә һәјат мәнәм» (Јәһја 14:6).

Әлава мәлумат

ИЛАҺИ МҮЖДӘ

Аллаһын бәшәријјәт үчүн нијјәти

Мүгәддәс Китабда Аллаһын јери нә үчүн јаратдығы, әзабларын нә вахт битәҹәји, ҝәләҹәкдә јер үзүндә олаҹаг дәјишикликләр вә орада јашајаҹаг инсанлар һагда бәһс олунур.