Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  нојабр 2015

Јеһова Аллаһ мәһәббәтдир

Јеһова Аллаһ мәһәббәтдир

«Аллаһ мәһәббәтдир» (1 ЈӘҺ. 4:8, 16).

НӘҒМӘ: 18, 91

1. Аллаһын ән әсас кејфијјәти нәдир вә бу, сиздә Она гаршы һансы һиссләри доғурур?

МҮГӘДДӘС КИТАБДА дејилир ки, Јеһова Аллаһ мәһәббәтдир. Фикир верин, дејилмир ки, мәһәббәт Онун ҝөзәл кејфијјәтләриндән биридир, дејилир ки, «Аллаһ мәһәббәтдир» (1 Јәһ. 4:8). Мәһәббәт Аллаһын ән әсас, ән ваҹиб кејфијјәтидир. Мәһәббәт Јеһовада олан кејфијјәтләрдән бири дејил, Јеһова мәһәббәтин тәҹәссүмүдүр. Каинатын вә бүтүн ҹанлыларын Јараданынын мәһәббәтли Аллаһ олдуғуну билмәк неҹә дә ҝөзәлдир! О, һәр шеји мәһәббәтдән ирәли ҝәләрәк едир.

2. Аллаһын мәһәббәти бизи нәјә әмин едир? (Мәгаләнин әввәлиндәки шәклә бахын.)

2 Аллаһын Өз јаратдыгларына дујдуғу исти, нәҹиб һиссләр бизи әмин едир ки, О, бәшәр аиләси үчүн олан нијјәтини ән ҝөзәл шәкилдә һәјата кечирәҹәк вә бу, Онун һакимијјәти алтында јашајан инсанлара сәадәт бәхш едәҹәк. Мәсәлән, Јеһова мәһәббәтдән ирәли ҝәләрәк «бир ҝүн тәјин едиб вә һәмин ҝүндә тәјин етдији адам [јәни Иса Мәсиһ] васитәсилә бүтүн дүнјаны әдаләтлә мүһакимә едәҹәк» (Һәв. 17:31). Бу нијјәтин јеринә јетәҹәјинә  архајын ола биләрик. Салеһ вә итаәткар инсанлар бәраәт газаныб әбәдијјән сүрәҹәк хошбәхт һәјата гәдәм гојаҹаглар.

ТАРИХ НӘЈИ СҮБУТ ЕДИР?

3. Аллаһ бәшәријјәти севмәсәјди, һәјат неҹә оларды?

3 Аллаһ бәшәријјәти севмәсәјди, тәсәввүр един дүнја нә вәзијјәтдә оларды. Инсанлар бу дүнјанын гәддар, залым аллаһы Шејтан Иблисин һакимијјәти алтында һәмишә бир-бириләринә ағалыг едәрдиләр. Бизә дә дүнја сәһнәсиндә баш верән фаҹиәләри чарәсиз-чарәсиз изләмәкдән башга һеч нә галмазды (2 Кор. 4:4; 1 Јәһ. 5:19; Вәһј 12:9, 12 ајәләрини охујун). Бәли, әҝәр каинаты Аллаһын мәһәббәти идарә етмәсәјди, ҝәләҹәк дәһшәтли оларды.

4. Јеһова нәјә ҝөрә адил һакимијјәтинә гаршы галхан үсјанын гаршысыны алмады?

4 Иблис Јеһова Аллаһын һакимијјәтинә гаршы үсјан едәндә Адәмлә Һәвваны да ејни һәрәкәтә сүрүкләди. О, Аллаһын али һакимијјәтинин гануни вә әдаләтли олмасыны шүбһә алтына алды. Маһијјәт етибарилә, Шејтан иддиа етди ки, о, Јарадандан даһа јахшы идарә едә биләр (Јар. 3:1—5). Јеһова Шејтана бу мәсәләдә өзүнү сүбут етмәјә иҹазә версә дә, бу һал мүвәггәти иди. Јеһованын һикмәти сонсуздур. О, јол верди ки, мүәјјән вахт кечсин вә сүбут олунсун ки, Ондан башга һеч кәс мүвәффәгијјәтлә идарә етмәјә гадир дејил. Бәшәријјәтин аҹынаҹаглы тарихи ҝөстәрир ки, нә инсандан, нә дә Шејтандан јахшы һөкмдар чыха билмәз.

5. Бәшәр тарихи нәји ајдын шәкилдә ҝөстәрир?

5 Тәкҹә сон 100 ил әрзиндә милләтләрарасы мүһарибәләрдә јүз милјондан чох инсан һәлак олуб. Бу ҝүн дүнјанын вәзијјәти ҝетдикҹә лап бетәр олур. Аллаһын Кәламында ахырзаманда вәзијјәтин мәһз белә олаҹағы јазылмышды. Орада дејилмишди: «Пис адамлар вә фырылдагчылар... ҝет-ҝедә даһа бетәр ишләр ҝөрәҹәкләр» (2 Тим. 3:1, 13). Тарихә нәзәр саланда Мүгәддәс Китабда јазылмыш нөвбәти сөзләрин доғрулуғуна зәррә гәдәр дә олсун шүбһә јери галмыр: «Јеһова, билирәм ки, инсанын јолу өз әлиндә дејил, аддымларыны јөнәлтмәк инсанын ихтијарында дејил» (Әрм. 10:23). Бәли, Јеһова инсанлара Онун рәһбәрлији олмадан, мүстәгил шәкилдә ишләрини идарә етмәк ихтијары вә ја баҹарығы вермәјиб.

6. Аллаһ нәјә ҝөрә пислијә мүвәггәти олараг изин вериб?

6 Пислијин бир мүддәт давам етмәси сајәсиндә һәм инсан һакимијјәтинин фани олдуғу үзә чыхды, һәм дә башга бир мәгсәдә наил олунду. Белә ки, јалныз Аллаһын һакимијјәтинин уғурлу олдуғу һәмишәлик сүбута јетирилди. Јеһова шәри вә онун сәбәбкарларыны мәһв едәндән сонра кимсә јенидән Јеһованын һакимијјәтини шүбһә алтына алса, артыг бу мәсәләнин узанмасына лүзум олмајаҹаг. Бәшәр тарихи үсјанкарларын дәрһал мәһв едилмәли олдуғуна бир сүбут кими хидмәт едәҹәк. Аллаһ пислијин јер үзүндә бир дә көк атмасына изин вермәјәҹәк.

ЈЕҺОВАНЫН МӘҺӘББӘТИ ҜӨЗ ӨНҮНДӘДИР

7, 8. Јеһова Өз бөјүк мәһәббәти неҹә ҝөстәрир?

7 Јеһованын интәһасыз мәһәббәти чох шејдә өзүнү бүрузә верир. Мәсәлән, әсрарәнҝиз Каината нәзәр салын. Каинатда милјардларла галактикалар, һәр галактикада исә милјардларла улдузлар вә планетләр вар. Бизим Сүд Јолу галактикамыздакы улдузлардан бири дә ҝүнәшдир. Ҝүнәш олмасајды, јер үзүндә һәјат олмазды. Бүтүн хилгәт Јеһованын Јарадан  олдуғуна, ҝүҹ, һикмәт вә мәһәббәт кими кејфијјәтләринә шәһадәт едир. Бәли, Аллаһын «ҝөзәҝөрүнмәз кејфијјәтләри: әбәди гүдрәти вә илаһилији дүнја јаранандан бәри ајдын ҝөрүнүр, јарадылмыш шејләр васитәсилә дәрк едилир» (Ром. 1:20).

8 Јеһова јер үзүнү елә јарадыб ки, орада һәјат мүмкүн олсун. О, инсанлар үчүн ҝөзәл ҹәннәт бағы јаратмышды, онлара камил шүур бәхш етмишди, әбәдијјән мөвҹуд ола билән бәдән вермишди. (Вәһј 4:11 ајәсини охујун.) Үстәлик, О, бүтүн ҹанлылара рузи верир, чүнки мәһәббәти әбәдидир (Зәб. 136:25).

9. Јеһова мәһәббәтли Аллаһ олса да, Онда бәзән һансы һиссләр олур вә нә үчүн?

9 Јеһова Өзүнү мәһәббәт Аллаһы кими танытмагла јанашы пислијә нифрәт етдијини дә билдирир. Мәсәлән, Зәбур 5:4—6 ајәләриндә Јеһова һаггында дејилир: «Сән шәрдән хошланан Аллаһ дејилсән... залымлара нифрәт едирсән». Сонра әлавә едилир: «Зоракы, һијләҝәр адамдан икраһ едирсән, еј Јеһова».

ТЕЗЛИКЛӘ ПИСЛИЈИН СОНУ ҜӘЛӘҸӘК

10, 11. а) Шәр инсанлары нә ҝөзләјир? б) Јеһова салеһ инсанлара һансы мүкафаты верәҹәк?

10 Јеһова мәһәббәтли Аллаһ олдуғу вә пислијә нифрәт етдији үчүн нијјәт едиб ки, һакимијјәт мәсәләси јолуна гојуланда јер үзүнү, еләҹә дә бүтүн дүнјаны писликдән тәмизләсин. Аллаһын Кәламында дејилир: «Писләрин көкү кәсиләҹәк, Јеһоваја ҝүвәнәнләр исә јер үзүнә саһиб олаҹаг. Аз галыб! Артыг пис адам олмајаҹаг... Јеһованын дүшмәнләри әлван чәмәнтәк солуб ҝедәҹәк, думан кими дағылаҹаглар» (Зәб. 37:9, 10, 20).

11 Диҝәр тәрәфдән Аллаһын Кәламында вәд олунур: «Салеһләр јерә саһиб олаҹаг, орада әбәди јашајаҹаглар» (Зәб. 37:29). Салеһ инсанлар «әмин-аманлығын боллуғундан һәзз алаҹаглар» (Зәб. 37:11). Бу ҝерчәкләшәҹәк, чүнки мәһәббәтли Аллаһымыз һәмишә өз садиг хидмәтчиләринин рифаһы үчүн чалышыр. Мүгәддәс Китабда дејилир: «О, онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (Вәһј 21:4). Јеһованын мәһәббәтини гијмәтләндириб Һөкмдар кими Она хидмәт едәнләри мөһтәшәм бир ҝәләҹәк ҝөзләјир.

12. Камил адам кимдир?

12 Аллаһын Кәламында дејилир: «Камил адама фикир вер, әмәлисалеһә бах, белә адамын ҝәләҹәји әмин-аман олаҹаг. Лакин асиләрин һамысы мәһв едиләҹәк, шәр адамларын ахыры јохдур» (Зәб. 37:37, 38). Камил адам Јеһова вә Онун Оғлу һагда өјрәнән вә Аллаһын ирадәсинә бојун әјән инсандыр. (Јәһја 17:3 ајәсини охујун.) Белә инсан 1 Јәһја 2:17 ајәсиндәки сөзләрә ҹидди јанашыр: «Дүнја өз истәкләри илә бәрабәр кечиб ҝедир, Аллаһын истәјини јеринә јетирән исә әбәди јашајыр». Дүнјанын сону јахынлашдығы үчүн үмидимизи Јеһоваја бағламаг, Онун јолуну тутмаг сон дәрәҹә ваҹибдир (Зәб. 37:34).

МӘҺӘББӘТИН ӘН БӨЈҮК ТӘЗАҺҮРҮ

13. Јеһова ҝүнаһкар инсанлара бөјүк мәһәббәтини неҹә ҝөстәрмишди?

13 Биз гејри-камил олсаг да, Јеһованын јолуну тута биләрик. Һәмчинин Јеһованын бөјүк мәһәббәтдән ирәли ҝәләрәк атдығы бир аддымын сајәсиндә Онунла достлаша биләрик. О, Иса Мәсиһи фидјә кими гурбан верәрәк итаәткар инсанларын Адәмдән мирас алдығы ҝүнаһ вә өлүмдән азад олмасына јол ачыб. (Ромалыла ра 5:12; 6:23 ајәләрини охујун.) Јеһова јеҝанә Оғлуна там етибар едирди, чүнки о, саја-һесаба ҝәлмәз илләр әрзиндә ҝөјдә сәдагәтлә Она хидмәт етмишди. Сөзсүз ки, јер үзүндә Исаја гаршы едилән һагсызлыглар өвладыны севән Ата кими Јеһованын үрәјини ағрыдырды. Бунунла белә Иса сәдагәтлә Аллаһын һакимијјәтинин тәрәфини тутду вә ҝөстәрди ки, камил инсан ән чәтин вәзијјәтләрдә белә Јеһоваја садиг гала биләр.

Аллаһ мәһәббәтдән ирәли ҝәләрәк Оғлуну јерә ҝөндәрди (13-ҹү абзаса бахын)

14, 15. Исанын өлүмү сајәсиндә нәјә наил олунду?

14 Иса ән шиддәтли сынаг заманы белә нөгсансызлығыны горуду, Јеһованын һакимијјәтинә садиг галды. О, һәјаты баһасына баша ҝәлсә дә, Атасына сәдагәтиндән дөнмәди. Биз сон дәрәҹә миннәтдарыг ки, Иса өз өлүмү илә һәмчинин бәшәријјәти хилас етмәк үчүн лазым олан фидјәни өдәди вә Аллаһын вәд етдији јени дүнјада әбәди јашамаға јол ачды. Һәвари Булус фидјәнин һәм Јеһова, һәм дә Иса тәрәфиндән бөјүк бир мәһәббәт ифадәси олдуғуну белә ҝөстәрмишди: «Биз һәлә зәиф оларкән Мәсиһ тәјин олунмуш вахтда ҝүнаһлы адамлар уғрунда өлдү. Салеһ адам уғрунда чәтин ки, кимсә өлә, амма јахшы адам уғрунда, ола билсин, кимсә ҹанындан кечәр. Аллаһ исә Өз мәһәббәтини бизә онунла ҝөстәрир ки, биз һәлә ҝүнаһлы икән Мәсиһ уғрумузда  өлдү» (Ром. 5:6—8). Һәвари Јәһја јазмышды: «Аллаһ мәһәббәти бизә бу ҹүр изһар олду: Аллаһ илкин Оғлуну дүнјаја ҝөндәрди ки, онун васитәсилә һәјата говушаг. Мәһәббәт ондадыр ки, биз Аллаһы јох, О, бизи севди вә Оғлуну ҝүнаһларымызы өртән кәффарә гурбаны кими дүнјаја ҝөндәрди» (1 Јәһ. 4:9, 10).

15 Аллаһын бәшәријјәтә севҝиси илә бағлы Иса демишди: «Аллаһ [фидјәјә еһтијаҹы олан] дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:16). Аллаһын инсанлара мәһәббәти елә бөјүкдүр ки, Она нәјин баһасына баша ҝәлсә дә, һеч нәји онлардан әсирҝәмир. Онун мәһәббәти әбәдидир. О, бизи Өз мәһәббәтиндән һеч вахт мәһрум етмәјәҹәк. Һәвари Булус јазмышды: «Мән әминәм ки, нә өлүм, нә һәјат, нә мәләкләр, нә һакимијјәтләр, нә индики шејләр, нә ҝәләҹәк шејләр, нә бир гүввә, нә һүндүрлүк, нә дәринлик, нә дә мөвҹуд олан башга бир шеј бизи Ағамыз Мәсиһ Иса васитәсилә ифадә олунан Аллаһын мәһәббәтиндән ајыра билмәз» (Ром. 8:38, 39).

ПАДШАҺЛЫГ ФӘАЛИЈЈӘТ ҜӨСТӘРИР

16. Јеһованын гурдуғу Падшаһлыг нәдир вә О, бу Падшаһлыгда һакимијјәти кимә етибар едиб?

16 Аллаһын бәшәријјәтә мәһәббәти һәмчинин Онун гурдуғу Падшаһлыгдан да ҝөрүнүр. Јеһова бу һөкумәтин башына бәшәријјәти севән вә идарә етмәјә лајиг олан Оғлуну гојуб (Мәс. 8:31). Үстәлик, Исанын 144 000 һәмвариси дириләндә јер үзүндә јашајаркән топладыглары тәҹрүбәни унутмајаҹаглар (Вәһј 14:1). Падшаһлыг Иса Мәсиһин тәлимләринин әсас мөвзусу иди. О, шаҝирдләринә белә дуа етмәји өјрәтмишди: «Ҝөјләрдә олан Атамыз, гој адын мүгәддәс тутулсун. Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мәт. 6:9, 10). Бу кими дуаларын јеринә јетмәси итаәткар бәшәријјәтә чох ҝөзәл немәтләр бәхш едәҹәк.

17. Исанын һакимијјәти илә ҝүнаһлы инсанларын һакимијјәти арасында һансы фәрг вар?

17 Исанын Падшаһлығы илә милјонларла инсанлары мүһарибәләрдә гырдыран инсан һакимијјәтләри арасында неҹә дә бөјүк фәрг вар. Иса өз тәбәәләринин гејдинә галыр вә Аллаһын әсрарәнҝиз кејфијјәтләрини, хүсусилә дә мәһәббәтини өз хасијјәтиндә әкс етдирир (Вәһј 7:10, 16, 17). О демишди: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр. Чүнки бојундуруғум раһат, јүкүм јүнҝүлдүр» (Мәт. 11:28—30). Бу вәддә неҹә дә бөјүк мәһәббәт әкс олунур!

18. а) Аллаһын Падшаһлығы тәсис олунандан бәри һансы иши ҝөрүр? б) Нөвбәти мәгаләдә нәји мүзакирә едәҹәјик?

18 Мүгәддәс Китабдакы пејғәмбәрликләр ҝөстәрир ки, Аллаһын сәмави Падшаһлығы 1914-ҹү илдә Мәсиһин һүзуру башлананда тәсис олунмушду. О вахтдан бәри Иса илә ҝөјдә идарә едәҹәк мәсһ олунмушларын галан һиссәси, еләҹә дә бу дүнјанын сонунда сағ галыб јени дүнјада јашајаҹаг бөјүк издиһам јығылыр (Вәһј 7:9, 13, 14). Бәс бөјүк издиһам нә дәрәҹәдә бөјүкдүр? Бура дахил олан инсанлардан нә тәләб олунур? Нөвбәти мәгаләдә бу суаллара ҹаваб вериләҹәк.