Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  ијун 2015

Мәсиһин өјрәтдији дуаја ујғун јашајын. I һиссә

Мәсиһин өјрәтдији дуаја ујғун јашајын. I һиссә

«Гој адын мүгәддәс тутулсун» (МӘТ. 6:9).

1. Хидмәтдә Мәтта 6:9—13 ајәләриндә јазылмыш дуадан неҹә истифадә едирик?

ЕЛӘ инсанлар вар ки, Мәсиһин өјрәтдији дуаны әзбәр билир. Хидмәт заманы инсанлара Аллаһын Падшаһлығынын реал һөкумәт олдуғуну, јер үзүнү ҹәннәтә чевирәҹәјини баша салмаг үчүн бу дуанын сөзләринә истинад едирик. Јахуд да ки, бу дуадакы илк хаһиши охујуб ҝөстәририк ки, Аллаһын ады вар вә бу ад мүгәддәс тутулмалыдыр (Мәт. 6:9).

2. Һарадан билирик ки, Иса өјрәтдији дуаны һәр дәфә сөзбәсөз тәкрар етмәјимизи истәмирди?

2 Иса нәзәрдә тутмурду ки, һәр дәфә бу дуаны әзбәрдән, сөзбәсөз тәкрар етмәк лазымдыр. Бу дуаны өјрәтмәздән әввәл Иса демишди: «Дуа едәндә... ејни сөзләри тәкрар-тәкрар демәјин» (Мәт. 6:7). Сонралар исә јенә дә шаҝирдләринә дуа етмәји өјрәдәндә о, бу дуаны башга сөзләрлә ифадә етмишди. (Лука 11:1—4). Беләҹә, Иса Мәсиһ нәләр һагда дуа етмәји билдирмиш, һәмчинин хаһишләри ваҹиблијинә ҝөрә сыраламышды. Буна ҝөрә дә демәк олар ки, бу дуа нүмунә олараг верилмишди.

3. Мәсиһин өјрәтдији дуаны тәһлил едәркән һансы суаллар барәдә дүшүнмәлијик?

 3 Бу вә нөвбәти мәгаләдә бу дуанын мәзмунуну тәһлил едәҹәјик. Охудугҹа өзүнүздән сорушун: «Бу дуа мәнә өз дуаларымы долғунлашдырмаға неҹә көмәк едә биләр? Вә ән әсасы, мән бу дуаја ујғун јашајыраммы?»

«ҜӨЈЛӘРДӘ ОЛАН АТАМЫЗ»

4. «Атамыз» сөзү бизә нәји хатырладыр вә һансы мәнада Јеһова јер үзүндә әбәди јашамаға үмид едән мәсиһиләрин Атасыдыр?

4 Дуада «Атам» јох, «Атамыз» сөзүнүн ишләнмәси бизә хатырладыр ки, биз бир-бирини сидги-үрәкдән севән гардашлығын үзвүјүк (1 Бут. 2:17). Бу, чох бөјүк шәрәфдир! Јеһова Аллаһын оғуллуға ҝөтүрдүјү, сәмави үмидә малик олан мәсһ олунмуш мәсиһиләр Јеһова Аллаһа сөзүн әсил мәнасында «Ата» дејә мүраҹиәт едирләр (Ром. 8:15—17). Јер үзүндә әбәди јашамаға үмид едән мәсиһиләр дә Јеһованы «Ата» дејиб чағыра биләрләр. Белә ки, Јеһова онлара һәјат вериб, мәһәббәтлә онларын гајғысына галыр. Јердә әбәди јашамаға үмид едән мәсиһиләр камиллијә јетишдикдән вә сонунҹу сынагдан үзүағ чыхдыгдан сонра сөзүн әсил мәнасында Аллаһын өвладлары олаҹаглар (Ром. 8:21; Вәһј 20:7, 8).

5, 6. Валидејнләрин өвладларына ән ҝөзәл һәдијјәси нәдир вә һәр бир өвлад бу һәдијјәјә неҹә јанашмалыдыр? (Мәгаләнин әввәлиндәки шәклә бахын.)

5 Валидејнләрин ушагларына ән бөјүк һәдијјәси онлара дуа етмәји вә Јеһоваја гајғыкеш сәмави Ата кими бахмағы өјрәтмәкдир. Һал-һазырда Ҹәнуби Африкада рајон нәзарәтчиси кими хидмәт едән бир гардаш дејир: «Гызларым доғулан ҝүндән, евдә олмадығым ҝүнләрдән башга, һәр ҝеҹә онларла дуа едирдим. Инди гызларым дејир ки, һәмин дуаларын сөзләри јадларында галмаса да, о аб-һаваны, Атамыз Јеһова илә үнсијјәтин үлвилијини, дахили раһатлығы һәлә дә хатырлајырлар. Гызлар бир аз бөјүјәндә онлара уҹадан дуа етдирирдим ки, ҝөрүм Јеһоваја нә барәдә дуа едирләр. Бу, мәним үчүн, санки, онларын үрәјинә ачылан бир пәнҹәрә иди. Белә оланда дуалары долғун олсун дејә Мәсиһин өјрәтдији дуадакы әсас мәгамлары дуаларына дахил етмәји онлара өјрәдирдим».

6 Тәәҹҹүблү дејил ки, гардашын балаҹа гызлары руһани ҹәһәтдән чох јахшы инкишаф етдиләр. Инди онлар аиләлидирләр вә һәјат јолдашлары илә бирликдә таммүддәтли хидмәтдәдирләр. Бәли, валидејнләрин өвладларына ән јахшы һәдијјәси онлара Јеһова Аллаһла јахын мүнасибәт гурмаға көмәк етмәкдир. Амма бу дәјәрли мүнасибәти горујуб сахламаг һәр кәсин өз өһдәсинә дүшүр. Бунун үчүн Аллаһын адыны севмәји, Она дәрин еһтирам бәсләмәји өјрәнмәк лазымдыр (Зәб. 5:11, 12; 91:14).

«ГОЈ АДЫН МҮГӘДДӘС ТУТУЛСУН»

7. Биз һансы шәрәфә маликик вә бу, бизим үзәримизә һансы мәсулијјәти гојур?

7 Аллаһын адыны билмәк, үстәлик, бу ады дашыјан халг олмаг бизим үчүн бөјүк шәрәфдир (Һәв. 15:14; Әшј. 43:10). Биз дуада сәмави Атамыздан хаһиш едирик: «Гој адын мүгәддәс тутулсун». Етдијимиз бу хаһиш бизи тәшвиг едир ки, Аллаһын мүгәддәс адыны ләкәләјән сөзләрдән вә һәрәкәтләрдән узаг дурмаг үчүн Ондан көмәк истәјәк. Биз биринҹи әсрдәки бәзи адамлара охшамаг истәмирик. Белә ки, онларын әмәлләри  тәблиғ етдикләри шејләрә ујғун ҝәлмирди. Һәвари Булус онлар һагда јазмышды: «Сизә ҝөрә башга халглар арасында Аллаһын адына күфр едилир» (Ром. 2:21—24).

8, 9. Јеһова Онун адыны мүгәддәс тутмаг истәјәнләрә неҹә көмәк едир? Нүмунә чәкин.

8 Биз Аллаһын адыны мүгәддәс тутмаг истәјирик. Норвечдән олан бир баҹы әринин вахтсыз өлүмүндән сонра икијашлы оғлу илә галмышды. Баҹы дејир: «Чох чәтин вахтлар иди. Мән һәр ҝүн, һәр саат дуа едирдим ки, мөһкәм галым, ағылсыз гәрарымла, јахуд сәдагәтсизлијимлә Шејтанын Јеһоваја аҹыг вермәсинә јол вермәјим. Мән Аллаһын адыны мүгәддәс тутмаг истәјирдим. Һәм дә истәјирдим ки, оғлум ҹәннәтдә атасына говушсун» (Мәс. 27:11).

9 Јеһова баҹынын дуаларына ҹаваб верди. Һәмиманлыларла тез-тез үнсијјәт етмәјин баҹыја бөјүк көмәји дәјди. Беш илдән сонра о, бир ағсаггалла аилә гурду. Инди онун оғлунун 20 јашы вар. О, вәфтиз олунмуш гардашдыр. Баҹы дејир: «Мән чох хошбәхтәм ки, јолдашым оғлуму бөјүтмәјә мәнә көмәк етди».

10. Аллаһын адынын там мәнада мүгәддәс тутулмасы үчүн нә лазымдыр?

10 Јеһова Өз адынын там мәнада мүгәддәс тутулмасы вә бүтүн тәнәләрдән тәмизләнмәси үчүн Онун һакимијјәтинә гаршы чыханлары арадан ҝөтүрмәлидир. (Һизгијал 38:22, 23 ајәләрини охујун.) Бундан сонра инсанлар тәдриҹән камиллијә јетишәҹәкләр. О вахт һамы Јеһованын адыны мүгәддәс тутаҹаг. Онда мәһәббәтли сәмави Атамыз «һәр кәс үчүн һәр шеј» олаҹаг. Һәмин вахты неҹә дә һәсрәтлә ҝөзләјирик (1 Кор. 15:28).

«ГОЈ ПАДШАҺЛЫҒЫН ҜӘЛСИН»

11, 12. XIX әсрин ахырларына јахын әсил мәсиһиләр нәји баша дүшдүләр?

11 Иса ҝөјә галхмаздан әввәл һәвариләр ондан сорушмушду: «Аға, Исраилдә падшаһлығы инди бәрпа едәҹәксән?» Иса ҹавабында онлара билдирмишди ки, Аллаһын Падшаһлығынын нә вахт идарә етмәјә башлајаҹағыны билмәјин һәлә вахты дејил. О, шаҝирдләринә диггәти өз ишләринә, шаһидлик ишинә ҹәмләмәји тапшырмышды. (Һәвариләрин ишләри 1:6—8 ајәләрини охујун.) Бунунла белә, Иса давамчыларына Аллаһын Падшаһлығынын ҝәлишини ҝөзләмәји бујурмушду. Беләликлә, һәвариләрин ҝүнләриндән бәри мәсиһиләр Падшаһлығын ҝәлмәси үчүн дуа едирләр.

12 Мәсиһин ҝөјдә падшаһлыг едәҹәји вахт јахынлашанда Јеһова халгына бунун нә вахт баш верәҹәјини анламаға көмәк етди. 1876-ҹы илдә «Мүгәддәс Китаб тәдгигатчысы» адлы журналда Чарлз Тејз Рассел гардашын мәгаләси дәрҹ олунду. «Башга халгларын вахты нә вахт битәҹәк?» адлы бу мәгаләдә 1914-ҹү ил һаггында әламәтдар ил кими данышылырды. Дәнјал пејғәмбәрин бәһс етдији «једди дөвр» Мәсиһин дедији «халглара верилән вахт»ла әлагәләндирилирди * (Дән. 4:16; Лука 21:24).

13. 1914-ҹү илдә нә баш верди вә о вахтдан бәри дүнја һадисәләри нәји тәсдиг едир?

13 1914-ҹү илдә Авропада мүһарибә гопду. Тезликлә бу мүһарибә бүтүн дүнјаны ҹәнҝинә алды. 1918-ҹи илдә мүһарибәнин сонуна јахын дәһшәтли аҹлыг  баш верди. Үстәлик, епидемија һалыны алан грипдән өләнләрин сајы мүһарибәдә һәлак оланларын сајыны өтүб кечди. Бунунла да јер үзүнүн јени Падшаһы олан Исанын ҝөзәҝөрүнмәз һүзурунун әламәти јеринә јетмәјә башлады (Мәт. 24:3—8; Лука 21:10, 11). Чохлу сүбутлар ҝөстәрир ки, Иса Мәсиһә мәһз 1914-ҹү илдә «таҹ верилди» вә «о, зәфәр чала-чала гәләбәсини баша вурмаг үчүн ирәлиләди» (Вәһј 6:2). Мәсиһ Шејтанла вә ҹинләрлә мүһарибә едиб онлары ҝөјдән јерин һүдудларына атды. О вахтдан бәшәријјәт бу сөзләрин ҝерчәк олдуғуну ҝөрүр: «Јерә вә дәнизә исә вај олсун! Чүнки Иблис, вахтынын аз олдуғуну биләрәк, бөјүк гәзәблә јаныныза енди» (Вәһј 12:7—12).

14. а) Нәјә ҝөрә һәлә дә Аллаһын Падшаһлығынын ҝәлмәси барәдә дуа етмәк ваҹибдир? б) Бизим өһдәмизә һансы ваҹиб иш дүшүр?

14 Вәһј 12:7—12 ајәләриндәки пејғәмбәрликдә изаһ едилир ки, нәјә ҝөрә Иса Мәсиһ Аллаһын Падшаһлығында Падшаһ олан кими јер үзүндә индијәдәк арды-арасы кәсилмәјән дәһшәтли һадисәләр баш верди. Белә ки, Иса Мәсиһ дүшмәнләри арасында һөкмранлыг етмәјә башлады. Нә гәдәр ки о, гәләбәсини баша вурмајыб вә јер үзүндәки писликләрә сон гојмајыб, биз Аллаһын Падшаһлығынын ҝәлмәси барәдә даима дуа етмәлијик. Ејни заманда һәмин дуаја ујғун давранмалыјыг, јәни әламәтин ән мөһтәшәм ҹәһәтинин јеринә јетмәсиндә иштирак етмәлијик. Иса демишди:  «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәт. 24:14).

«ГОЈ СӘНИН ИРАДӘН... ЈЕРДӘ ДӘ ЈЕРИНӘ ЈЕТСИН»

15, 16. Биз Аллаһын ирадәсинин јер үзүндә јеринә јетмәси барәдә етдијимиз хаһишә ујғун неҹә јашаја биләрик?

15 Тәхминән 6000 ил габаг Аллаһын ирадәси јер үзүндә там шәкилдә јеринә јетирди. Буна ҝөрә дә Јеһова демишди: «Һәр шеј чох јахшыдыр» (Јар. 1:31). Анҹаг сонра Шејтан үсјан етди вә о вахтдан бәри јер үзүндә аз адам Аллаһын ирадәсини јеринә јетирир. Лакин јашадығымыз дөврдә тәхминән сәккиз милјон Шаһид Аллаһын ирадәсинин јердә јеринә јетмәси үчүн һәм дуа едир, һәм дә дуасына ујғун јашамаға чалышыр. Онлар һәм Аллаһа мәгбул һәјат јашајырлар, һәм дә шаҝирд һазырламаг ишиндә ҹанла-башла иштирак едирләр.

Өвладларыныза Аллаһын ирадәсинин јердә јеринә јетмәси хаһишинә ујғун јашамаға көмәк едирсиниз? (16-ҹы абзаса бахын)

16 Мисал үчүн, 1948-ҹи илдә вәфтиз олунан вә хүсуси тәјинатлы мүждәчи кими Африкада хидмәт етмиш бир баҹы дејир: «Исанын өјрәтдији дуанын бу һиссәсинә ујғун олараг, мән тез-тез дуа едирәм ки, Аллаһы ахтаран бүтүн инсанлар тапылсын вә нә гәдәр ки ҝеҹ дејил Јеһова һаггында өјрәнсин. Һәмчинин кимәсә шаһидлик вермәздән әввәл дуа едиб Аллаһдан мүдриклик истәјирәм ки, инсанын үрәјинә јол тапа билим. Еләҹә дә дуа едирәм ки, Аллаһы ахтаран инсанлара ҝөстәрдијимиз гајғынын бәһрәсини ҝөрәк». Сәксән јашлы бу баҹынын хидмәти чох мәһсулдар олуб. О, диндашларынын көмәјилә бир чохларына Јеһованын Шаһиди олмаға көмәк едиб. Бәли, бир чох баҹы-гардашларымыз аһыл јашда олмаларына бахмајараг, фәдакарлыгла Аллаһын ирадәсини јеринә јетирирләр. Бунунла да онлар бизим үчүн ҝөзәл нүмунә гојурлар. (Филиппилиләрә 2:17 ајәсини охујун.)

17. Јеһованын јер үзүндә ирадәсинин јеринә јетмәси үчүн ҝөрәҹәји ишләр барәдә дүшүнәндә һансы һиссләри кечирирсиниз?

17 Нә гәдәр ки Аллаһын Падшаһлығынын дүшмәнләри јер үзүндән јох едилмәјиб, биз Аллаһын ирадәсинин јеринә јетмәси барәдә дуа етмәлијик. Ҹәннәтдә милјардларла инсан дириләндә исә Аллаһын ирадәси даһа чох јеринә јетәҹәк. Иса демишди ки, «буна һејрәт етмәјин, чүнки елә бир вахт ҝәләҹәк ки, гәбирләрдә оланларын һамысы онун [Исанын] сәсини ешидәҹәк» вә дириләҹәк (Јәһ. 5:28, 29). Итирдијимиз доғмаларымыз дириләндә онлары гаршыламаг неҹә дә ҝөзәл олаҹаг! Аллаһ ҝөзләримиздән «бүтүн јашлары силәҹәк» (Вәһј 21:4). Дириләнләрин әксәријјәти гејри-салеһләр олаҹаг. Бу, о инсанлардыр ки, Јеһова Аллаһ вә Онун Оғлу һаггында һәгигәти билмәдән јашајыб өлүбләр. Биз онлара Аллаһын ирадәси вә дириләнләрлә бағлы нијјәти барәдә өјрәдәҹәјик вә беләликлә, әбәди һәјата лајиг олмаға онлара көмәк едәҹәјик (Һәв. 24:15; Јәһ. 17:3).

18. Бәшәријјәтин ән бөјүк еһтијаҹлары һансылардыр?

18 Јеһованын ады Онун Падшаһлығы васитәсилә мүгәддәс тутулаҹаг вә о заман дүнјада сүлһ вә әмин-аманлыг бәргәрар олаҹаг. Беләликлә, Мәсиһин өјрәтдији дуадакы үч хаһишин там јеринә јетмәсилә бәшәријјәтин ән бөјүк еһтијаҹлары өдәниләҹәк. Бунунла белә, бизим диҝәр зәрури еһтијаҹларымыз да вар. Һәмин дуанын диҝәр дөрд хаһишиндә бу еһтијаҹларын ады чәкилир. Бунлар барәдә нөвбәти мәгаләдә данышаҹағыг.

^ абз. 12 Бу пејғәмбәрлијин 1914-ҹү илдә Аллаһын Падшаһлығынын гурулмасы илә неҹә јеринә јетдијини өјрәнмәк үчүн «Мүгәддәс Китаб әслиндә нә өјрәдир?» адлы китабын 215—218 сәһифәләринә бахын.