Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  март 2015

Ојаг галаҹагсыныз?

Ојаг галаҹагсыныз?

«Буна ҝөрә дә ојаг галын, чүнки о ҝүнү вә о сааты билмирсиниз» (МӘТ. 25:13).

1, 2. а) Иса Мәсиһ ахырзаманла бағлы нәји ачыглады? б) Һансы суаллары нәзәрдән кечирәҹәјик?

ТӘСӘВВҮР ЕДИН, Бутрус, Андреас, Јагуб вә Јәһја Иса Мәсиһлә бирликдә Зејтун дағында отуруб Јерусәлимдәки мәбәдә бахыр. Бу заман Иса ән мөһтәшәм пејғәмбәрликләриндән бирини сөјләјир. Шаҝирдләр нәфәсләрини белә дәрмәдән Исанын узаг ҝәләҹәклә бағлы сөјләдији пејғәмбәрлијә гулаг асырлар. Иса бу шәр дүнјанын сону һагда, Аллаһын Падшаһлығында идарә едәҹәји вахт барәдә чох шеј данышды. Деди ки, һәмин о хүсуси дөврдә садиг вә ағыллы нөкәр ону јер үзүндә тәмсил едәҹәк вә онун хидмәтчиләринә лазым олан руһани гиданы вахтлы-вахтында верәҹәк (Мәт. 24:45—47).

2 Сонра исә елә һәмин пејғәмбәрликдә Иса он гыз мәсәлини данышды. (Мәтта 25:1—13 ајәләрини охујун.) Ҝәлин инди ашағыдакы суаллары нәзәрдән кечирәк: 1) мәсәлин мәғзи нәдән ибарәтдир? 2) Садиг мәсһ олунмушлар мәсәлдәки мәсләһәтә неҹә әмәл едирләр вә бунун сајәсиндә нә мүмкүн  олур? 3) Бу ҝүн һәр биримиз Исанын мәсәлиндән неҹә јарарлана биләрик?

МӘСӘЛИН МӘҒЗИ НӘДИР?

3. Әввәлләр нәшрләримиздә он гыз мәсәлинә неҹә јанашылырды вә белә јанашма нәтиҹәсиндә нә көлҝәдә гала биләрди?

3 Өтән мәгаләдә гејд етдијимиз кими, сон онилликләр әрзиндә садиг нөкәр Мүгәддәс Јазылардакы һадисәләрә пејғәмбәрлик тәсвири кими изаһат вермәјә јох, онларын практики фајдасыны ҝөстәрмәјә үстүнлүк верир. Кечмишдә бизим нәшрләрдә Исанын он гыз мәсәлиндәки ән хырда мәгамлара да — чыраға, јағ габына, јаға вә саирәјә хүсуси рәмзи мәна верилирди. Бәс ҝөрәсән, диггәти хырда мәгамлара ҹәмләмәклә мәсәлин садә, ејни заманда мүһүм мәна дашыјан мәғзи көлҝәдә галмајыб? Бу суалын ҹавабы бөјүк әһәмијјәт кәсб едир.

4. Мәсәлдә бәјин вә гызларын кими тәмсил етдијини неҹә мүәјјән едә биләрик?

4 Ҝәлин Исанын бу мәсәлинин мәғзинә диггәт јетирәк. Биринҹиси, әсас персонажлары нәзәрдән кечирәк. Мәсәлдәки бәј кимдир? Ајдындыр ки, Иса Мәсиһ өзүндән данышырды. Белә ки, мүхтәлиф һалларда о, өзүнү бәј кими тәсвир етмишди (Лука 5:34, 35). Бәс гызлар кимдир? Иса мәсәлдә дејирди ки, бәј ҝәлиб чыханда гызлар һазыр олмалы идиләр вә чыраглары јанмалы иди. Диггәт јетирин ки, Иса ејни ҝөстәриши мәсһ олунмушлардан ибарәт кичик сүрүјә вермишди: «Һазыр олун, гој чырағыныз һәмишә јансын. Сиз ағасынын тој зијафәтиндән гајытмасыны ҝөзләјән... адамлар кими олун» (Лука 12:32, 35, 36). Үстәлик, һәм һәвари Булус, һәм дә һәвари Јәһја Аллаһдан илһам алараг Мәсиһин мәсһ олунмуш давамчыларыны тәртәмиз бакирә гыза бәнзәтмишди (2 Кор. 11:2; Вәһј 14:4). Ајдындыр ки, Иса Мәтта 25:1—13 ајәләриндәки мәсәли чәкмәклә мәсһ олунмуш давамчыларына мәсләһәт вә хәбәрдарлыг вермәк истәјирди.

5. Он гыз мәсәлинин һансы вахта аид олдуғуну Иса Мәсиһ неҹә ҝөстәрди?

5 Икинҹиси, вахт кәсијинә нәзәр салаг. Исанын мәсләһәти һансы вахта аиддир? Иса мәсәлин ахырына јахын буну ајдын ҝөстәрир: «Бәј ҝәлиб чыхды» (Мәт. 25:10). Бу журналын 2013-ҹү ил 15 ијул сајында изаһ едилдији кими, Исанын Мәтта 24 вә 25-ҹи фәсилләрдә јазылмыш пејғәмбәрлијиндә сәккиз дәфә онун ҝәлмәсиндән данышылыр вә һәр дәфә ејни јунан сөзүнүн мүхтәлиф формалары ишләнир. Иса һәр дәфә ҝәлмәсиндән данышанда һөкм етмәк, сонра исә бу шәр дүнјаны мәһв етмәк үчүн ҝәләҹәји вахты — бөјүк мүсибәт вахтыны нәзәрдә тутурду. Бундан белә нәтиҹәјә ҝәлирик ки, бу мәсәл дә ахырзамана аиддир, кулминасија нөгтәси исә бөјүк мүсибәтдә баш верәҹәк.

6. Контекстә әсасән, мәсәлин мәғзи нәдән ибарәтдир?

6 Бәс мәсәлин мәғзи нәдән ибарәтдир? Контексти јадыныза салын. Иса бу мәсәли чәкмәздән әввәл садиг вә ағыллы нөкәрдән данышмышды. Һәмин нөкәр ахырзаманда Мәсиһин давамчыларына рәһбәрлик едән мәсһ олунмушлардан ибарәт кичик груп олаҹагды. Иса хәбәрдарлыг етмишди ки, онлар садиг галмалыдыр. Сонра о, ахырзаманда јашајан бүтүн мәсһ олунмушлара нәсиһәт вермәк үчүн он гыз мәсәлини чәкди. Мәсәлин мәғзи ондан ибарәтдир ки, онлар саһиб олдуглары дәјәрли мүкафаты итирмәсинләр дејә ојаг галмалыдырлар (Мәт. 25:13). Ҝәлин инди бу мәсәли тәһлил едәк вә ҝөрәк мәсһ олунмушлар бу мәсәлдәки мәсләһәтә неҹә јанашырлар.

 МӘСҺ ОЛУНМУШЛАР МӘСӘЛДӘКИ МӘСЛӘҺӘТӘ НЕҸӘ ӘМӘЛ ЕДИРЛӘР?

7, 8. а) Ағыллы гызлар һансы ики сәбәбә ҝөрә бәјин ҝәлишинә һазыр идиләр? б) Мәсһ олунмушлар һазырлыглы олдугларыны неҹә ҝөстәрирләр?

7 Иса мәсәлдә вурғуламышды ки, ағылсыз гызлардан фәргли олараг, ағыллы гызлар бәјин ҝәлишинә һазыр идиләр. Бунун ики сәбәби вар иди: әввәла, онлар һазырлыглы идиләр, икинҹиси исә сајыг идиләр. Гызларын ону да ҝеҹә ојаг галыб бәјин ҝәлишини ҝөзләмәли идиләр. Онларын чыраглары јанылы галмалы иди вә хошбәхт ан ҝәлиб чатана кими онлар саатларла ајыг-сајыг олмалы идиләр. Ағылсыз гызлардан фәргли олараг беш гыз һазырлыглы иди, онлар чырагла бирҝә јағ габында артыг јағ да ҝөтүрмүшдүләр. Бәс ҝөрәсән садиг мәсһ олунмушлар да белә һазырлыглыдыр?

8 Еләдир ки вар! Ахырзаманда јашајан мәсһ олунмушлар бу ағыллы гызлар кими давранырлар. Онлар алдыглары тапшырығы сон ҝәләнәдәк сәдагәтлә иҹра етмәк үчүн һазырлыглыдырлар. Онлар сәдагәтлә хидмәт етмәјин нәјин баһасына баша ҝәлдијини билирләр. Баша дүшүрләр ки, бу тапшырығы јеринә јетирмәк үчүн Шејтан дүнјасынын шан-шөһрәтиндән, вар-дөвләтиндән имтина етмәли олаҹаглар. Онлар өзләрини бүтүнлүклә Јеһоваја һәср едиб Она хидмәт едирләр вә буну сонун јахын олдуғуна ҝөрә јох, Јеһоваја вә Иса Мәсиһә мәһәббәтдән вә сәдагәтдән ирәли ҝәләрәк едирләр. Онлар нөгсансызлыгларыны горујур, бу шәр дүнјанын руһуна јолухмурлар, онун малпәрәстлијини, әхлагсызлығыны вә егоистлијини өзләринә јахын бурахмырлар. Беләликлә, Бәј јубанырмыш кими ҝөрүнсә дә, онлар мәтин галырлар, һазыр дурурлар, һәмишә нур кими парлајырлар (Филип. 2:15).

9. а) Иса мүрҝүләмәклә бағлы һансы хәбәрдарлығы вермишди? б) Мәсһ олунмушлар, санки, «бәј ҝәлир», дејә гышгыран дәлилләрә неҹә һај верирләр? (Һәмчинин һашијәјә бахын.)

9 Гызларын бәјин ҝәлишинә һазыр олмасынын икинҹи сәбәби онларын сајыглығы иди. Ола биләрми ки, мәсһ олунмушлардан кимсә узун сүрән ҝеҹәни ојаг галмалы олдуғу һалда јухуја ҝетсин? Бу, мүмкүндүр. Фикир вердинизсә, Иса дејирди ки, гызларын ону да јубанан бәји ҝөзләјә-ҝөзләјә «мүрҝүләјиб јухуја ҝетдиләр». Иса билирди ки, зәиф ҹисим һәтта ән ҹошгулу, шөвглү руһу белә зәифләдә биләр. Садиг мәсһ олунмушлар Исанын үстүөртүлү шәкилдә вердији бу хәбәрдарлыға ҹидди јанашырлар вә ајыг-сајыг олмаг үчүн вар ҝүҹләри илә чалышырлар. Мәсәлдә ҝеҹә кимсә: «Бәј ҝәлир!» — дејә гышгыранда гызларын һамысы һај верир. Анҹаг јалныз ағыллылар ахыра кими сајыг галырлар (Мәт. 25:5, 6; 26:41). Бәс буҝүнкү садиг мәсһ олунмушлар барәдә нә демәк олар? Ахырзаманда онлар, санки, «Бәј ҝәлир!» дејә гышгыран тутарлы дәлилләрә һај верирләр. Һабелә Бәј ҝәлиб чыхана кими онлар мәтанәтлә һазыр галырлар *. Лакин мәсәлин кулминасија нөгтәси хүсуси бир вахта аиддир. Ҝәлин ҝөрәк бу, һансы вахтдыр?

АҒЫЛЛЫЛАРА МҮКАФАТ, АҒЫЛСЫЗЛАРА ҸӘЗА

10. Ағыллы гызларла ағылсыз гызлар арасында олан сөһбәт һансы суалы доғурур?

10 Јәгин мәсәлин ән чашдырыҹы мәгамы сона јахын ағылсыз гызларла ағыллы гызлар арасында олан сөһбәтдир. (Мәтта  25:8, 9 ајәләрини охујун.) Бу сөһбәтдән белә бир суал доғур: «Аллаһын халгынын тарихиндә нә вахт белә шеј олуб ки, садиг мәсһ олунмушлар онлардан көмәк истәјәнләрә арха чевирсинләр?» Бу мәгама ајдынлыг ҝәтирмәк үчүн ҝәлин јенә вахт кәсијинә нәзәр салаг. Хатырлајырсынызса, јени изаһа ҝөрә Бәј, јәни Иса һөкм чыхартмаг үчүн бөјүк мүсибәтин сонуна јахын ҝәләҹәк. Она ҝөрә дә, ҝөрүнүр, мәсәлин бу һиссәси һәмин һөкм вахты әрәфәсиндә баш верәнләрә аиддир. Чүнки һәмин вахт мәсһ олунмушлар артыг сонунҹу дәфә мөһүрләнмиш олаҹаглар.

11. а) Бөјүк мүсибәт башламаздан әввәл нә баш верәҹәк? б) Ағыллы гызларын ағылсыз гызлары јағ алмаға ҝөндәрмәсинин мәғзи нәдир?

11 Демәли, бөјүк мүсибәт башлајанадәк јер үзүндәки бүтүн садиг мәсһ олунмушлар сонунҹу дәфә мөһүрләнәҹәкләр (Вәһј 7:1—4). Сонунҹу мөһүрләнмәдән сонра онларын ҝөјә ҝетмәси дәгиг олаҹаг. Амма инди бөјүк мүсибәтдән габагкы илләр һагда дүшүнүн. Әҝәр мәсһ олунмушлардан кимләрсә ојаг галмаса вә нөгсансызлығыны горумаса, онларла нә баш верәҹәк? Онлар ҝөјдә јашамаг мүкафатыны итирәҹәкләр. Ајдын мәсәләдир ки, бөјүк мүсибәт башламаздан әввәл сонунҹу дәфә мөһүрләнмәјәҹәкләр. Бөјүк мүсибәт башлајана гәдәр башга садиг мәсиһиләр онларын әвәзинә мәсһ олунаҹаглар. Бөјүк мүсибәт башлајанда ајыг галмајан ағылсызлар Бөјүк Бабилин мәһв едилдијини ҝөрүб сарсылаҹаглар. Бәлкә дә елә онда онлар Бәјин ҝәлишинә һазыр олмадыгларыны баша дүшәҹәкләр. Амма артыг ҝеҹ олаҹаг. Бәс онлар чарәсиз һалда көмәк истәсәләр, нә баш верәҹәк? Исанын мәсәли бу суала ҹаваб верир. Ағыллы гызлар өз јағларындан ағылсызлара вермәдиләр, дедиләр ки, ҝедиб јағ сатанлардан алсынлар. Амма јадыныздадырса, һәмин вахт «ҝеҹә јарысы» иди. О вахт онлар һарадан јағ сатан тапаҹагдылар? Һеч јандан. Чүнки артыг чох ҝеҹ иди.

12. а) Бир вахтлар мәсһ олунан, лакин нөгсансызлығы горумадыглары үчүн сонунҹу дәфә мөһүрләнмәјәнләрин бөјүк мүсибәтдә һалы неҹә олаҹаг? б) Ағылсыз гызлара бәнзәјәнләрин агибәти неҹә олаҹаг?

12 Ејнилә, бөјүк мүсибәтдә дә садиг мәсһ олунмушлар садиг галмајанлара көмәк едә билмәјәҹәкләр. Онлара һеч јандан көмәк олунмајаҹаг. Артыг ҝеҹ олаҹаг. Бәс беләләринин агибәти неҹә олаҹаг? Ағылсыз гызлар јағ алмаға ҝедәркән нә баш вердијини Иса Мәсиһ белә изаһ етди: «Бәј ҝәлиб чыхды. О гызлар ки һазыр иди, бәјлә тој мәҹлисинә ҝирдиләр вә гапы бағланды». Бөјүк мүсибәтин сонуна јахын Мәсиһ өз ҹалалы илә ҝәләндә садиг мәсһ олунмушлары ҝөјә топлајаҹаг (Мәт. 24:31; 25:10; Јәһ. 14:1—3; 1 Салон. 4:17). Гапы ағылсыз гызлара бәнзәјән, садиг галмајан мәсһ олунмушларын үзүнә бағланаҹаг. Онлар гышгырыб дејәҹәкләр: «Аға, аға, бизик, гапыны ач!» Анҹаг онлар кечи илә мүгајисә олунан инсанларын һәмин һөкм вахты алдығы ҹавабы алаҹаглар: «Мән сизи танымырам!» Чох һејиф! (Мәт. 7:21—23; 25:11, 12).

13. а) Нәјә ҝөрә мәсһ олунмушларын чохунун садиг галмајаҹағыны дүшүнмәк јанлыш оларды? б) Нәјә ҝөрә дејә биләрик ки, Исанын хәбәрдарлыг сөзләри онун мәсһ олунмушлардан архајын олмадығына дәлаләт етмир? (Мәгаләнин әввәлиндәки шәклә бахын.)

13 Јухарыда дејиләнләрдән һансы нәтиҹәјә ҝәлирик? Иса демәк истәјирди ки, онун мәсһ олунмуш давамчыларынын чоху садиг галмајаҹаг вә онлары башгалары илә әвәз етмәк лазым ҝәләҹәк? Хејр.  Јадыныза салын ки, о, садиг вә ағыллы нөкәрә хәбәрдарлыг етмишди ки, јарамазлыг етмәсин. Бу о демәк дејил ки, о, садиг нөкәрдән белә һәрәкәт ҝөзләјирди. Ејнилә, бу мәсәл дә сәрт хәбәрдарлыг иди. Гызлардан беши ағылсыз, беши ағыллы олдуғу кими, һәр бир мәсһ олунмуш да һазырлыглы вә сајыг олмаг, јахуд да ахмаг вә ја сәдагәтсиз олмаг гәрарыны өзү верә биләр. Һәвари Булус мәсһ олунмуш мәсиһиләрә мүраҹиәт едәркән охшар бир мәгама тохунмушду. (Ибраниләрә 6:4—9 ајәләрини охујун; Ганунун тәкрары 30:19 ајәси илә мүгајисә един.) Диггәт јетирин ки, Булусун да хәбәрдарлыг сөзләри кифајәт гәдәр сәрт иди, амма о, бу сөзләрдән сонра билдирмишди ки, мәсиһи баҹы-гардашларынын јахшы вәзијјәтдә олдуғуна әминдир. Он гыз мәсәлиндә дә Иса мәсһ олунмушлара хәбәрдарлыг етсә дә, онлардан архајын иди. Мәсиһ әминдир ки, һәр бир мәсһ олунмуш хидмәтчиси садиг гала вә мөһтәшәм мүкафатыны ала биләр.

МӘСИҺИН «БАШГА ГОЈУНЛАРЫ» МӘСӘЛДӘН НЕҸӘ ЈАРАРЛАНЫР?

14. Нәјә ҝөрә «башга гојунлар» да он гыз мәсәлиндән јарарлана биләрләр?

14 Он гыз мәсәлинин мәсһ олунмушлара үнванланмасы о демәкдирми ки, бу мәсәлин Мәсиһин башга гојунларына һеч бир аидијјәти јохдур? (Јәһ. 10:16). Әсла! Мәсәлин мәғзи садәдир: «Ојаг галын». Бәс бу, јалныз мәсһ олунмушлара үнванланыб? Бир дәфә Иса демишди: «Сизә дедијими һамыја дејирәм: ојаг галын!» (Марк 13:37). Иса сәдагәтлә хидмәт етмәјә һазыр олмағы вә ејни ҹүр ајыг галмағы бүтүн давамчыларындан тәләб едир. Беләликлә, бүтүн мәсиһиләр бу саһәдә мәсһ олунмушларын ардынҹа ҝетмәли, онларын нүмунәсини изләмәли вә хидмәти һәјатларында һәр шејдән үстүн тутмалыдырлар. Һәмчинин һәр биримиз јадда сахламалыјыг ки, ағылсыз гызлар ағыллы гызлардан јағ истәмишди. Онларын јерсиз хаһиши бизә бир даһа хатырладыр ки, һеч ким нә бизим јеримизә садиг гала билмәз, нә бизим әвәзимизә һәгигәтдә јеријә билмәз, нә дә ки бизим үчүн ојаг гала билмәз. Һәр биримиз Јеһованын тәјин етдији адил Һакимә ҹаваб верәҹәјик. Биз һазыр олмалыјыг. О, тезликлә ҝәләҹәк!

15. Нәјә ҝөрә бүтүн мәсиһиләр Мәсиһин тојуну севинҹлә ҝөзләјирләр?

15 Исанын бу мәсәлиндәки әсас һадисәдән — тојдан да бүтүн мәсиһиләр јарарлана биләрләр. Ахы бизләрдән ким һәмин о тоју ҝөзләмир? Мәсһ олунмушлар артыг ҝөјдә олаҹаглар. Армаҝеддон мүһарибәсиндән сонра онларын Мәсиһлә тоју олаҹаг (Вәһј 19:7—9). О заман јер үзүндә јашајан һәр кәс ҝөјдә баш тутан тојдан фајда әлдә едәҹәк, чүнки бу тојун сајәсиндә мүкәммәл бир һөкумәт бүтүн бәшәријјәти идарә едәҹәк. Ҝөјдә јахуд јердә јашамаға үмид етмәјимиздән асылы олмајараг, ҝәлин он гыз мәсәлиндән өзүмүзә дәрс ҝөтүрәк. Ҝәлин һазырлыглы олаг, мәтин галаг, сајыглығымызы итирмәјәк. Онда Јеһованын бизим үчүн һазырладығы мөһтәшәм ҝәләҹәјә мүтләг јетишәҹәјик!

^ абз. 9 Мәсәлдә киминсә: «Бәј ҝәлир», — дејә гышгырмасындан (6-ҹы ајә) бәјин ҝәлиб чыхмасынадәк (10-ҹу ајә) мүәјјән гәдәр вахт кечир. Ахырзаманда сајыг мәсһ олунмушлар Иса Мәсиһин һүзурунун әламәтини ҝөрүрләр. Онлар билирләр ки, о «ҝәлир», јәни инди Аллаһын Падшаһлығында идарә едир. Инди онлар Мәсиһ ҝәлиб чыхана кими сајыг галмалыдыр.

Ағылсыз гызларын јағ истәмәси бизә хатырладыр ки, һеч кәс нә бизим јеримизә ојаг гала билмәз, нә дә ки әвәзимизә садиг ола билмәз