Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  октјабр 2014

Падшаһлыға иманыны сарсылмаз ет

Падшаһлыға иманыны сарсылмаз ет

«Иман үмид едилән шејләрин мүтләг јеринә јетәҹәјинә олан [әминликдир]» (ИБР. 11:1).

1, 2. Падшаһлығын Аллаһын бәшәријјәтә даир нијјәтини јеринә јетирәҹәјинә әминлијимизи нә артыраҹаг вә нә үчүн? (Мәгаләнин әввәлиндәки шәклә бах.)

ЈЕҺОВАНЫН ШАҺИДЛӘРИ олан бизләр чох вахт Аллаһын Падшаһлығынын бүтүн проблемләрин јеҝанә һәлли олмасы барәдә данышырыг. Инсанларын диггәтини Мүгәддәс Јазылардакы бу ваҹиб һәгигәтә јөнәлдирик. Бундан савајы, Падшаһлығын ҝәтирәҹәји хејир-дуалара олан үмид бизә гәлб раһатлығы верир. Бәс Падшаһлығын реал олдуғуна вә мәгсәдинә чатаҹағына нә дәрәҹә дә әминик? Падшаһлыға олан мөһкәм иманымыз нәјә әсасланыр? (Ибр. 11:1).

2 Күлли-Ихтијар Аллаһ бу Падшаһлығы хилгәтлә бағлы нијјәтини ҝерчәкләшдирмәк үчүн гуруб. Аллаһын идарә етмәјә там һаггы чатдығы үчүн бу Падшаһлыг мөһкәм бүнөврә үзәриндә гурулуб. Онун падшаһы, һакимијјәт шәрикләри, онларын сәлаһијјәтләри бу Падшаһлығын ваҹиб ҹәһәтләридир вә бүтүн бунлар әһдләр васитәсилә гануни олараг тәјин олунуб. Бу гануни сазишләрин тәрәфләриндән бири ја Аллаһ олуб, ја да Оғлу Иса Мәсиһ. Бу әһдләр үзәриндә дүшүнмәк Аллаһын нијјәтинин әслиндә неҹә јеринә јетәҹәјини анламаға вә Онун  ҝөрдүјү тәдбирин нә дәрәҹә дә сарсылмаз олдуғуну ҝөрмәјә көмәк едәҹәк. (Ефеслиләрә 2:12 ајәсини оху.)

3. Бу вә нөвбәти мәгаләдә нәји арашдыраҹағыг?

3 Мүгәддәс Китабда Иса Мәсиһин идарә етдији Падшаһлыгла бағлы алты әсас әһддән сөз ачылыр. Онлар 1) Ибраһим пејғәмбәрлә бағланан әһд, 2) Ганун әһди, 3) Давудла бағланан әһд, 4) Мелхиседегә бәнзәр каһин үчүн бағланан әһд, 5) јени әһд вә 6) Падшаһлыг әһдидир. Ҝәлин һәр бир әһдин Падшаһлыға һансы аидијјаты олдуғуну, еләҹә дә Аллаһын јер вә бәшәријјәт үчүн нијјәтинин јеринә јетмәсинә неҹә хидмәт етдијини нәзәрдән кечирәк. («Аллаһ нијјәтини неҹә ҝерчәкләшдирәҹәк?» адлы чәрчивәјә бах.)

АЛЛАҺЫН НИЈЈӘТИНИН НЕҸӘ ҜЕРЧӘКЛӘШӘҸӘЈИНИ ҜӨСТӘРӘН ВӘД

4. «Јарадылыш» китабына әсасән, Аллаһ инсанларла бағлы һансы үч шәрти билдирмишди?

4 Јеһова инсанларын јашамасы үчүн ҝөзәл планет јаратдыгдан сонра онларла бағлы үч шәрти билдирди: 1) Аллаһ инсанлары Өз сурәтиндә јарадаҹагды, 2) онлар јер үзүнү Ҹәннәтә чевирәҹәк вә салеһ нәсилләри илә долдураҹагдылар вә 3) гадаған олунмуш хејирлә шәри билмә ағаҹындан јемәјәҹәкдиләр (Јар. 1:26, 28; 2:16, 17). Башга һеч бир шәрт јох иди. Аллаһ инсаны јаратдыгдан сонра Онун нијјәтинин јеринә јетирилмәси үчүн јердә галан ики шәртә там әмәл етмәк лазым иди. Бәс онда нә үчүн әһдләрин бағланмасына еһтијаҹ јаранды?

5, 6. а) Шејтан Аллаһын нијјәтини неҹә позмаға чалышды? б) Јеһова Шејтанын үсјанына Еден бағында неҹә ҹаваб верди?

5 Шејтан Иблис алчагҹасына Аллаһын нијјәтини позмаға чалышды. О, буну асанлыгла тәсир едә биләҹәји шәрти, јәни инсанлардан итаәткарлыг тәләб едән јеҝанә шәрти позмаға чалышмагла етди. О, илк гадын олан Һәвваны хејирлә шәри билмә ағаҹы илә бағлы гадағаны позмаға ширникләндирди (Јар. 3:1—5; Вәһј 12:9). Белә етмәклә, Шејтан Аллаһын бүтүн јаратдыглары үзәриндә һөкмранлыг етмәк һүгугуну суал алтына алды. Даһа сонра исә Шејтан Аллаһын садиг бәндәләринин ајағына худбин нијјәтләр јазды (Әјј. 1:9—11; 2:4, 5).

6 Бәс Јеһова Шејтанын үсјанына неҹә ҹаваб верәҹәкди? О, үсјанкарлары мәһв етмәклә галдырылан үсјана сон гоја биләрди. Амма белә етсәјди, Онун Адәмлә Һәвванын итаәткар нәслинин јер үзүнү долдурмасы илә бағлы әзәли нијјәти пуча чыхарды. Буна ҝөрә дә үсјанкарлары јериндәҹә јох етмәк әвәзинә, Јарадан ҝүҹлү бир пејғәмбәрлик етмәклә Шејтанын ҹавабыны верди. Едендәки вәд Јеһованын сөзләринин хырдалығына гәдәр јеринә јетәҹәјинә зәманәт иди. (Јарадылыш 3:15 ајәсини оху.)

7. Едендәки вәд илан вә онун баласы илә бағлы бизи нәјә әмин едир?

7 Едендәки вәд васитәсилә Јеһова илана вә онун баласына, јәни Шејтан Иблисә вә Аллаһын һөкмранлыг етмәк һүгугу илә бағлы мәсәләдә Шејтанын тәрәфини тутаҹаг кәсләрә һөкм чыхарды. Вә бу һөкмү иҹра етмәк сәлаһијјәтини сәмави гадынын өвладына верди. Беләҹә, Едендәки вәд јалныз үсјана тәһрик едәнин вә онун бүтүн ишләринин мәһв едиләҹәјини јох, бунун неҹә баш верәҹәјини ҝөстәрди.

8. Гадынын вә өвладынын кимлији һагда нә дејә биләрик?

8 Бәс гадынын өвлады ким олмалы иди? Бу өвладын иланын башындан вурмасы, јәни руһани варлыг олан Шејтан Иблиси мәһв етмәси ҝөстәрир ки, о, өзү дә руһани  варлыг олмалы иди (Ибр. 2:14). Демәли, өвлады дүнјаја ҝәтирәҹәк гадын да руһани варлыг олмалы иди. Едендәки вәддән сонра тәхминән 4000 ил әрзиндә иланын баласы сүрәтлә чохалдығындан гадыны вә онун өвладыны мүәјјән етмәк мүмкүн дејилди. Бу илләр әрзиндә өвладын мүәјјән едилмәси вә онун васитәсилә Шејтанын бәшәријјәтә вурдуғу зәрәрин арадан галдырылаҹағына хидмәтчиләрини әмин етмәк үчүн Јеһова бир нечә әһд бағлады.

ӨВЛАДЫ МҮӘЈЈӘНЛӘШДИРӘН ӘҺД

9. Ибраһимлә һансы әһд бағланмышды вә бу, нә заман гүввәјә минди?

9 Шејтана һөкм чыхарылдыгдан тәхминән ики мин ил сонра Јеһова гәбилә башчысы Ибраһимә Ур шәһәриндәки (Месопотамија) евини тәрк едиб Кәнан дијарына ҝетмәји әмр етди (Һәв. иш. 7:2, 3). Јеһова она деди: «Өз торпағындан, гоһумларынын арасындан, ата евиндән чых, сәнә ҝөстәрәҹәјим торпаға ҝет. Сәндән бөјүк бир милләт төрәдәҹәјәм, сәнә хејир-дуа верәҹәјәм, адыны уҹалдаҹағам вә бәрәкәт гајнағы олаҹагсан. Сәнә хејир-дуа верәнләрә хејир-дуа верәҹәјәм, сәнә ләнәт едәнләри ләнәтләјәҹәјәм. Јер үзүнүн бүтүн тајфалары сәнин васитәнлә хејир-дуа алаҹаг» (Јар. 12:1—3). Бу сөзләр Ибраһимлә бағланан әһдлә бағлы илк јазылы мәлуматдыр. Амма Јеһованын илк дәфә бу әһди Ибраһимлә нә заман бағладығы дәгиг мәлум дејил. Бир о мәлумдур ки, бу әһд ерамыздан әввәл 1943-ҹү илдә Ибраһим 75 јашында Хараны тәрк едиб Фәрат чајыны кечдији вахт гүввәјә минди.

10. а) Ибраһим Аллаһын вәдләринә иман етдијини неҹә ҝөстәрди? б) Јеһова гадынын өвлады илә бағлы һансы тәфәррүатлары ачыглады?

 10 Јеһова бағладығы әһди Ибраһимә дәфәләрлә тәкрарлајыр вә ҝет-ҝедә даһа чох мәлумат верирди (Јар. 13:15—17; 17:1—8, 16). Ибраһим оғлуну гурбан вермәјә һазыр олмагла Јеһованын вәдләринә сарсылмаз иман ҝөстәрдији үчүн Аллаһ вердији вәдлә бу әһдин мөһүрүнү гојду. (Јарадылыш 22:15—18; Ибраниләрә 11:17, 18 ајәләрини оху.) Ибраһимлә бағланан әһд гүввәјә миндикдән сонра Јеһова тәдриҹән гадынын өвлады илә бағлы ваҹиб тәфәррүатлары ачыглады. Өвлад Ибраһимин нәслиндән ҝәлмәли, бир нәфәрдән ибарәт олмамалы, падшаһлыг етмәли, бүтүн дүшмәнләри мәһв етмәли вә чохлары үчүн хејир-дуа олмалы иди.

Ибраһим Аллаһын вәдләринә сарсылмаз иман ҝөстәрди (10-ҹу абзаса бах)

11, 12. Мүгәддәс Китаб Ибраһимлә бағланан әһдин ҝениш мигјасда јеринә јетдијини неҹә ҝөстәрир вә бу, бизим үчүн нә демәкдир?

11 Ибраһимлә бағланан әһд онун нәсли Вәд едилмиш дијары аланда һәрфи мәнада јеринә јетди. Лакин Мүгәддәс Китаб ҝөстәрир ки, бу әһд руһани мәнада да јеринә јетмәлидир (Галат. 4:22—25). Һәвари Павел Аллаһдан илһам алараг бу әһдин ҝениш мигјасда һәјата кечмәси илә бағлы изаһ етмишди ки, Ибраһимин нәслинин әсас һиссәси Мәсиһ, икинҹи дәрәҹәли һиссәси исә 144 000 нәфәрдән ибарәт олан руһла мәсһ олунмуш мәсиһчиләрдир (Галат. 3:16, 29; Вәһј 5:9, 10; 14:1, 4). Өвлады дүнјаја ҝәтирән гадын исә «сәмави Јерусәлим» — садиг руһани варлыглардан ибарәт Аллаһын тәшкилатынын ҝөјдәки һиссәсидир (Галат. 4:26, 31). Ибраһимлә бағланан әһддә вәд едилдији кими гадынын өвлады бәшәријјәт үчүн хејир-дуалар ҝәтирәҹәк.

12 Бу әһд сәмави Падшаһлығын реал олаҹағына, Падшаһын вә онун һакимијјәт шәрикләринин Падшаһлығы мирас алаҹагларына зәманәт верир (Ибр. 6:13—18). Бу әһд нә вахта гәдәр гүввәдә галаҹаг? Јарадылыш 17:7 ајәсиндә дејилдији кими бу, «әбәди әһд»дир. Һәмин әһд Мәсиһин идарә етдији Падшаһлыг Аллаһын дүшмәнләрини там мәһв едәнә вә бүтүн бәшәр аиләсинә бол хејир-дуалар ҝәтирәнә гәдәр гүввәдә галаҹаг (1 Кор. 15:23—26). Анҹаг бу әһдин ҝәтирәҹәји хејир-дуалар әбәди олаҹаг. Ибраһимлә бағланан әһд бир даһа ҝөстәрир ки, Јеһова салеһ инсанларын «јер үзүнү [бүрүмәси]» илә бағлы нијјәтини һәјата кечирмәкдә гәти гәрарлыдыр (Јар. 1:28).

ПАДШАҺЛЫҒЫН ӘБӘДИ ДУРАҸАҒЫНА ЗӘМАНӘТ ВЕРӘН ӘҺД

13, 14. Давудла бағланан әһд Мәсиһин һакимијјәти илә бағлы нәјә зәманәт верир?

13 Едендәки вәд вә Ибраһимлә бағланан әһд вурғулајыр ки, Јеһованын Падшаһлығы васитәсилә тәзаһүр етдирдији али һакимијјәти тамамилә Онун салеһлик нормаларына әсасланыр (Мәз. 89:14). Бәс бу Падшаһлыг нә вахтса дағылаҹаг? Диҝәр гануни әһд зәманәт верир ки, бу, әсла баш вермәјәҹәк.

14 Ҝәлин ҝөрәк Јеһова Давудла бағланан әһд васитәсилә гәдим Исраилин падшаһы Давуда һансы вәди вермишди. (2 Шамуел 7:12, 16 ајәләрини оху.) Јеһова бу әһди Давуд Јерусәлимдә падшаһлыг етдији заман бағламышды вә она вәд етмишди ки, Мәсиһ онун нәслиндән ҝәләҹәк (Лука 1:30—33). Бунунла Јеһова өвладын нәсил шәҹәрәсини конкретләшдирди вә ҝөстәрди ки, Давудун вариси Аллаһын Падшаһлығында тахта әјләшмәјә «һагг саһиби» олаҹаг (Јез. 21:25—27). Исанын васитәсилә Давудун тахты «сабит галаҹаг». Һәгигәтән дә, Давудун нәсли «тахтда әбәди галаҹаг,  тахты... ҝүнәш кими дураҹаг» (Мәз. 89:34—37). Бәли, Мәсиһин һакимијјәти һеч вахт дағылмајаҹаг, онун ишләри әбәди галаҹаг!

КАҺИНЛИК ВӘЗИФӘСИНИ ТӘМИН ЕДӘН ӘҺД

15-17. Мелхиседегә бәнзәр каһин үчүн бағланан әһдә әсасән, өвлад даһа һансы ролу иҹра едәҹәк вә нә үчүн?

15 Ибраһимлә вә Давудла бағланан әһддән ҝөрүнүр ки, гадынын өвлады падшаһ вәзифәсини иҹра едәҹәк. Анҹаг бүтүн милләтләрин там хејир-дуаланмасы үчүн бу вәзифә кифајәт дејил. Бунун үчүн бәшәријјәт ҝүнаһдан тәмизләниб Јеһованын ваһид аиләсинә дахил олмалыдыр. Бу тәләбләрин тәмин едилмәси үчүн өвлад каһин мөвгејиндә дә фәалијјәт ҝөстәрмәлидир. Даһи Јараданымыз буну диҝәр бир гануни сазиш — Мелхиседегә бәнзәр каһин үчүн бағланан әһд васитәсилә тәмин етди.

16 Јеһова Давуд падшаһ васитәсилә ачыгламышды ки, О, Иса илә икимәгсәдли шәхси әһд бағлајаҹаг. Биринҹиси, Иса дүшмәнләрини мәғлуб едәнә гәдәр Аллаһын сағында отураҹаг. Икинҹиси, «Мелкиседег вәзифәли әбәди бир [каһин]» олаҹаг. (Мәзмур 110:1, 2, 4 ајәләрини оху.) Бәс нәјә ҝөрә мәһз «Мелкиседег вәзифәли»? Чүнки Ибраһимин нәсли Вәд едилмиш дијара ајаг басмаздан һәлә узун илләр өнҹә Сәлим падшаһы Мелхиседег (Мелкиседег) «Аллаһ-Тааланын каһини» кими хидмәт едирди (Ибр. 7:1—3). О, бу вәзифәјә бирбаша Јеһова тәрәфдән сечилмишди. Ибраниҹә Мүгәддәс Јазыларда јалныз онун падшаһ вә каһин кими хидмәт етдијиндән бәһс едилир. Үстәлик, онун нә сәләфи, нә дә хәләфи олмадығы үчүн ону «әбәдилик каһин» адландырмаг олар.

17 Иса Мәсиһ Јеһованын онунла бағладығы шәхси әһдин сајәсиндә бирбаша каһин тәјин олунуб вә о, «Мелхиседегә бәнзәр әбәди [каһин]» олаҹаг (Ибр. 5:4—6). Бу әһд ајдын ҝөстәрир ки, Јеһова бәшәријјәтлә бағлы әзәли нијјәтини һәјата кечирмәк үчүн Өз үзәринә гануни өһдәчилик ҝөтүрүб вә буну Падшаһлыг васитәсилә едәҹәк.

ПАДШАҺЛЫҒА ГАНУНИ ӘСАС ВЕРӘН ӘҺДЛӘР

18, 19. а) Арашдырдығымыз әһдләр Падшаһлыгла бағлы нәји ачыглады? б) Нөвбәти мәгаләдә нә арашдырылаҹаг?

18 Арашдырдығымыз әһдләрин Падшаһлыгла неҹә бағлы олдуғуну вә бу Падшаһлығын һәмин гануни сазишләрә неҹә әсасландығыны өјрәндик. Едендәки вәддән ҝөрдүк ки, Јеһова јер күрәси вә бәшәријјәтлә бағлы нијјәтини гадынын өвлады васитәсилә ҝерчәкләшдирәҹәк. Ибраһимлә бағланан әһддән исә бу өвладын кимлијини вә һансы вәзифәни иҹра едәҹәјини арашдырдыг.

19 Давудла бағланан әһддән өвладын әсас һиссәсинин нәсил шәҹәрәси вә Падшаһлығын ҝөрәҹәји ишләрин әбәди галмасы үчүн она бүтүн јер үзүнү идарә етмәк сәлаһијјәти верилдији мәлум олду. Мелхиседегә бәнзәр каһин үчүн бағланан әһддән исә бу әһдин өвлада каһин вәзифәсини иҹра етмәјә әсас вердијини өјрәндик. Анҹаг Иса бәшәријјәти камиллијә тәкбашына чатдырмајаҹаг. Чүнки һәм падшаһ, һәм дә каһин кими хидмәт етмәјә тәјин олунан башгалары да вар. Бәс онлар һарадан сечиләҹәкдиләр? Бу суал нөвбәти мәгаләдә ҹавабланаҹаг.