Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  ијул 2014

«Јеһова Она мәхсус оланлары таныјыр»

«Јеһова Она мәхсус оланлары таныјыр»

«Ким Аллаһы севирсә, Аллаһ ону таныјыр» (1 КОР. 8:3).

1. Аллаһын бәзи хидмәтчиләри һансы јанлыш дүшүнҹәјә гапыла биләр? Нүмунә чәк. (Мәгаләнин әввәлиндәки шәклә бах.)

ҜҮНЛӘРИН бир ҝүнү сәһәр тездән баш каһин Һарун ичәрисиндә көмүр вә бухур олан бухурданы әлиндә тутуб Јеһованын Һүзур чадырынын ҝиришиндә дајаныр. Ондан бир аз аралыда Гораһла бирликдә 250 нәфәр һәрәси өз бухурданында Јеһоваја бухур тәгдими ҝәтирир (Сај. 16:16—18). Илк бахышдан, бура топлананларын һәр бири Јеһованын садиг хидмәтчиләри тәәссүраты ојадыр. Анҹаг Һарундан савајы, орадакыларын һамысы каһинлик вәзифәсинә ҝөз дикән тәкәббүрлү үсјанкарлардыр (Сај. 16:1—11). Онларын Аллаһын ибадәтләрини гәбул едәҹәјини дүшүнмәклә өзләрини алдадырлар. Лакин үрәкләри охујан вә онлардакы икиүзлүлүјү ҝөрән Јеһованын гаршысында бу ҹүр тәмәнна уммалары әсил рәзилликдир (Јер. 17:10).

2. Муса нәји габагҹадан демишди вә бу сөзләр неҹә ҝерчәк олду?

2 Бу һадисәдән бир ҝүн әввәл Муса пејғәмбәр бәјан етмишди: «Сәһәр Рәбб кимин Она мәхсус... олдуғуну ҝөстәрәҹәк» (Сај. 16:5). Бәс Јеһова әсил хидмәтчиләрини сахтакарлардан ајырд едә билдијини неҹә ҝөстәрди? «Рәббин һүзурундан од чыхды вә бухур тәгдим едән [Гораһы вә] ики јүз әлли нәфәри мәһв етди» (Сај. 16:35; 26:10). Һабелә, Јеһова Һарунун  бир каһин кими сәмими ибадәтини гәбул етдијинә әламәт олараг онун һәјатыны һифз етди. (1 Коринфлиләрә 8:3 ајәсини оху.)

3. а) Һәвари Павелин ҝүнләриндә һансы вәзијјәт јаранмышды? б) Јеһова Мусанын ҝүнләриндәки үсјанкарлара гаршы неҹә өлчү ҝөтүрмүшдү?

3 Бу һадисәдән 1500 ил сонра Павелин ҝүнләриндә дә охшар вәзијјәт јаранмышды. Бәзи сахта мәсиһчиләр јалан тәлимләрә ујмаларына бахмајараг, һәлә дә јығынҹағын бир үзвү идиләр. Кәнардан баханда, ола билсин, бу дөнүкләр јығынҹағын диҝәр үзвләриндән сечилмирдиләр. Лакин онларын дөнүк фикирләри садиг мәсиһчиләр үчүн әсил тәһлүкә иди. Гојун ҹилдинә ҝирмиш бу ҹанаварлар «бәзиләринин иманыны [јыхмаға]» башламышдылар (2 Тим. 2:16—18). Амма Јеһова дуруб кәнардан баш верәнләрә тамаша етмирди. Павел дә јахшы билирди ки, Аллаһ әсрләр өнҹә Гораһла тәрәфдарларына гаршы өлчү ҝөтүрдүјү кими, бу мәсәләјә дә бир әнҹам чәкәҹәк. Инди исә ҝәлин бизи интизарда сахлајан бу мәсәләнин неҹә һәлл олундуғуну вә бундан өзүмүзә һансы нәтиҹәни чыхара биләҹәјимизи нәзәрдән кечирәк.

ЈЕҺОВА ДӘЈИШМӘЗ АЛЛАҺДЫР

4. Павел нәјә әмин иди вә бу, Тимотејә јаздығы сөзләрдән неҹә ҝөрүнүр?

4 Павел әмин иди ки, Јеһова Она јаландан ибадәт едәнләри сәмими-гәлбдән ибадәт едәнләрдән ајырд етмәјә гадирдир. Павелин бу әминлији Аллаһдан илһам алараг Тимотејә јаздығы сөзләрдән ајдын ҝөрүнүр. Дөнүкләрин артыг јығынҹагдан бәзиләринә вурдуғу зәрәрдән сөз ачдыгдан сонра Павел јазмышды: «Бунунла белә, Аллаһын гојдуғу мөһкәм бүнөврә дурур вә онун үзәриндә бу мөһүр гојулуб: “Јеһова Она мәхсус оланлары таныјыр” вә “Гој Јеһованын адыны чағыран һәр кәс һагсызлыгдан әл чәксин”» (2 Тим. 2:18, 19).

5, 6. Павелин истифадә етдији «Аллаһын гојдуғу мөһкәм бүнөврә» ифадәси һансы мәнаны дашыјыр вә бу сөзләр Тимотејә неҹә тәсир етмишди?

5 Павелин истифадә етдији «Аллаһын гојдуғу мөһкәм бүнөврә» ифадәсинә јалныз бу ајәдә раст ҝәлинсә дә, «бүнөврә» вә ја «тәмәл» сөзләри бир чох ајәләрдә бәнзәтмә кими истифадә олунур. Мәсәлән, Мүгәддәс Китабда гәдим Исраилин пајтахты Јерусәлимин тәмәли олдуғу дејилир (Мәз. 87:1, 2). Һәмчинин Јеһованын нијјәтиндә Исанын ролу да бүнөврәјә бәнзәдилир (1 Кор. 3:11; 1 Пет. 2:6). Бәс Павел «Аллаһын гојдуғу мөһкәм бүнөврә» сөзләри илә нәји нәзәрдә тутурду?

6 Павел бу ифадәни Мусанын Сајлар 16:5 ајәсиндә Гораһ вә онун тәрәфдарлары һаггында дедији сөзләриндән ситат ҝәтирәрәк охшар вәзијјәт үчүн истифадә етмишди. Чох еһтимал ки, Павел Мусанын ҝүнләриндә баш вермиш һадисәләрә Тимотеји руһландырмаг вә она Јеһованын үсјанкарлары ифша едиб зәрәрсизләшдирмәјә гадир олдуғуну хатырлатмаг мәгсәдилә истинад етмишди. Јеһова әсрләр өнҹә Гораһын һәрәкәтинә ҝөз јуммадығы кими, мәсиһчи јығынҹағында да дөнүкләрин һәрәкәтләринә ҝөз јуммајаҹагды. Дүздүр, Павел «Аллаһын гојдуғу мөһкәм бүнөврә» сөзләринин мәнасыны тәфсилаты илә изаһ етмәмишди. Бунунла белә, бу сөзләр Тимотејин әминлијини вә Јеһоваја етибарыны ҝүҹләндирмишди.

7. Јеһованын салеһликлә вә сәдагәтлә давранаҹағына нәјә ҝөрә әмин ола биләрик?

7 Јеһованын али принсипләри дәјишилмәздир. Мәзмур 33:11 ајәсиндә дејилир: «Рәббин мәсләһәти әбәди олар, үрәјинин мәгсәди нәсилләр өтсә дә, галар». Диҝәр ајәләрдә Јеһованын рәһбәрлијинин, сарсылмаз  мәһәббәтинин, салеһлијинин вә сәдагәтинин әбәди мөвҹуд олдуғу дејилир (Чых. 15:18; Мәз. 106:1; 112:9; 117:2). Малаки 3:6 ајәсиндә Јеһова дејир ки, «Мән Рәббәм вә һеч вахт дәјишмирәм». Һәмчинин Јагуб 1:17 ајәсиндә Јеһованын «көлҝә кими дәјишкән» олмадығы дејилир.

ЈЕҺОВАЈА ИМАНЫ МӨҺКӘМЛӘНДИРӘН «МӨҺҮР»

8, 9. Павелин тәсвир етдији «мөһүр»дән нә өјрәнә биләрик?

8 Павел 2 Тимотејә 2:19 ајәсиндә бүнөврәнин үзәриндә мөһүр кими басылмыш бир јазы олдуғуну дејир. О вахтлар бинанын бүнөврәсинә бу тикилинин кимә мәхсус олдуғу вә ја бәннасынын ким олдуғу һагда мәлумат јазмаг адәти јох иди. Павел белә әјани нүмунәдән истифадә едән илк Мүгәддәс Китаб јазычысыдыр *. «Аллаһын гојдуғу мөһкәм бүнөврә» үзәриндәки мөһүрдә ики бәјанат вар. Биринҹиси, «Јеһова Она мәхсус оланлары таныјыр» вә икинҹиси, «Гој Јеһованын адыны чағыран һәр кәс һагсызлыгдан әл чәксин». Бу сөзләр бизә Сајлар 16:5 ајәсиндә јазыланлары хатырладыр. (Ајәни оху.)

9 Павелин тәсвир етдији «мөһүр» бизим үчүн дәрин мәна дашыјыр. Белә ки, Јеһоваја мәхсус оланлар үчүн Онун ганун вә принсипләри ики фундаментал һәгигәтдә ҹәмләнир: 1) Јеһова садиг бәндәләрини севир вә 2) Јеһова һагсызлыға вә пис әмәлә нифрәт едир. Бәс бу, јығынҹаг дахилиндәки дөнүклүк мәсәләсинә неҹә аиддир?

10. Дөнүклүк Павелин ҝүнләриндәки садиг мәсиһчиләрә неҹә тәсир едирди?

10 Чох еһтимал ки, Тимотеј вә диҝәр садиг мәсиһчиләр јығынҹагда баш галдыран дөнүклүјә ҝөрә нараһат идиләр. Бәзи мәсиһчиләрдә суал јарана биләрди: ахы нәјә ҝөрә бу ҹүр инсанларын һәлә дә јығынҹагда галмасына јол верилир? Доғруданмы, Јеһова онларын садиглији илә икиүзлү дөнүкләрин ибадәти арасындакы фәрги ҝөрүр? (Һәв. иш. 20:29, 30).

Тимотејин дөнүкләрин тәсири алтына дүшмәк фикри јох иди (10—12 абзаслара бах)

11 Шүбһәсиз, Павелин мәктубу Тимотејин иманыны мөһкәмләндирмишди. Чүнки Павелин сөзләри она Јеһованын садиг Һаруну һифз едиб икиүзлү Гораһ вә тәрәфдарларыны мәһв етдији һадисәни хатырлатмышды. Павелин сөзүнүн ҹаны о  иди ки, Јеһова, Мусанын ҝүнләриндә олдуғу кими, Она, һәгигәтән дә, мәхсус оланлары сахтакарлардан мүтләг ајыраҹаг.

11, 12. Павелин мәктубу Тимотејин иманыны неҹә мөһкәмләндирмишди?

12 Јеһова һеч вахт дәјишмир, О, етибарлы Аллаһдыр. О, пислијә нифрәт едир, төвбә етмәјән ҝүнаһкарлары исә һөкмә дүчар едир. Тимотеј «Јеһованын адыны чағыран» бир инсан кими дәрк едирди ки, о, јығынҹағы сахта мәсиһчиләрин пис тәсириндән тәмизләмәк мәсулијјәти дашыјыр *.

ӘСИЛ ИБАДӘТ ҺӘДӘР ҜЕТМИР

13. Биз нәјә әмин ола биләрик?

13 Павелин Аллаһдан илһам алараг јаздығы бу сөзләр бизә дә руһани ҝүҹ верир. Ән әсасы, бу сөзләр бизи әмин едир ки, садиглијимиз Јеһованын ҝөзүндән јајынмыр. Јеһова Она мәхсус оланлара сәтһи јох, сәмими мараг ҝөстәрир. Мүгәддәс Китабда дејилир: «Рәббин ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин» (2 Салн. 16:9). Буна ҝөрә дә там әмин ола биләрик ки, «сидги-үрәкдән» Онун үчүн етдијимиз һеч бир шеј һәдәр ҝетмир (1 Тим. 1:5; 1 Кор. 15:58).

14. Јеһова һансы ибадәтә ҝөз јуммур?

14 Үстәлик, Јеһова сахта ибадәтә ҝөз јуммур. Онун «ҝөзләри јер үзүнү сејр» етдији үчүн О, үрәји «бүтүнлүклә Онунла» олмајанлары да јахшы ҝөрүр. Сүлејманын мәсәлләри 3:32 ајәсиндә дејилир ки, ҝизлинҹә ҝүнаһ ишләр ҝөрә-ҝөрә мөмин ҹилдинә ҝирән «азғынлар Рәбдә икраһ јарадар». Бу ҹүр һијләҝәр ишләр ҝөрән адамлар мәһарәтлә башгаларынын ҝөзүндән пәрдә ассалар да, Јеһованын һагг-әдаләти вә салеһлији зәманәт верир ки, «ҝүнаһларыны өрт-басдыр едән уғур [газанмајаҹаг]» (Сүл. мәс. 28:13; 1 Тимотејә 5:24; Ибраниләрә 4:13 ајәләрини оху).

15. Нәдән гачмалыјыг вә нәјә ҝөрә?

15 Сөзсүз, Јеһованын халгы Она сәмими-гәлбдән ибадәт едир. Лакин чох надир һалларда хидмәтчиләриндән кимсә Јеһованы сахта ибадәтә дәјишир. Мадам ки, бу һал Мусанын ҝүнләриндә вә биринҹи әсрдә баш вериб, бизим ҝүнләрдә дә гачылмаздыр (2 Тим. 3:1, 5). Анҹаг бу о демәкдирми ки, биз һәмиманлыларымыза шүбһә илә јанашмалы, онларын Јеһоваја хидмәтинә нијјәт јазмалыјыг? Әсла! Баҹы-гардашларымыз һагда әсассыз олараг шүбһәләрә гапылмаг јанлыш һәрәкәт оларды. (Ромалылара 14:10—12; 1 Коринфлиләрә 13:7 ајәләрини оху.) Бундан әлавә, јығынҹагда кимләринсә нөгсансызлығына етибарсыз јанашмаг өз руһанилијимизи корлаја биләр.

16. а) Үрәјимиздә јанлыш нијјәтин көк атмамасы үчүн нә едә биләрик? б) « Даима јохлајын,.. сынајын» чәрчивәсиндән нә өјрәнирик?

16 Һәр бир мәсиһчи «өз ишини сынагдан [кечирмәлидир]» (Галат. 6:4). Ҝүнаһлы тәбиәтимиз уҹбатындан биз гејри-иради олараг Јеһоваја јанлыш нијјәтдән ирәли ҝәләрәк хидмәт едә биләрик (Ибр. 3:12, 13). Буна ҝөрә дә вахташыры олараг Јеһоваја нә нијјәтлә ибадәт етдијимизи јохламалыјыг. Бунун үчүн өзүмүздән соруша биләрик: «Мән Јеһованы севдијим вә Онун һакимијјәтини гәбул етдијим үчүн Она ибадәт едирәм, јохса Ҹәннәтә дүшүб орадакы хејир-дуалары дадмаг үчүн?» (Вәһј 4:11). Сөзсүз, јалныз өз ишимизи сынагдан кечирмәклә вә үрәјимиздән јанлыш нијјәтләри гопарыб атмагла фајда әлдә едә биләрик.

САДИГЛИКДӘН ДОҒАН ХОШБӘХТЛИК

17, 18. Нә үчүн Јеһоваја сәмими вә тәмиз нијјәтлә ибадәт етмәлијик?

17 Јеһоваја сәмими вә тәмиз нијјәтлә ибадәт етмәклә чохлу хејир-дуа бичирик.  Мәзмурчу дејир: «Рәбб тәрәфиндән тәгсиркар сајылмајан, гәлбиндә һијлә олмајан инсан нә бәхтијардыр!» (Мәз. 32:2). Бәли, ибадәтдә сахтакарлыгдан узаг дуран инсан нә хошбәхтдир! Чүнки белә инсан әбәди хошбәхтлијә апаран јолдадыр.

18 Јеһова исә, өз нөвбәсиндә, «салеһлә пис адам, Аллаһа гуллуг едәнлә етмәјән арасындакы фәрги» ашкар едәҹәк вә писликдән әл чәкмәјән, икили һәјат сүрән кәсләри ҹәзаландыраҹаг (Мал. 3:18). Бу арада исә, Јеһованын ҝөзүнүн салеһләрин үстүндә олдуғуну вә гулағынын онларын јалварышларыны ешитдијини билмәк бизә тәравәт ҝәтирир (1 Пет. 3:12).

^ абз. 8 Павелин Тимотејә јаздығы мәктубдан он илләр сонра Вәһј 21:14 ајәсиндә 12 һәваринин ады һәкк олунмуш 12 бүнөврә дашдан бәһс олунур.

^ абз. 12 Нөвбәти мәгаләдә писликдән әл чәкиб Јеһованы неҹә тәглид едә биләҹәјимизи арашдыраҹағыг.