Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  феврал 2014

Әзәмәтли Падшаһ Мәсиһи саламлајын!

Әзәмәтли Падшаһ Мәсиһи саламлајын!

«Әзәмәтинлә уғур газан» (МӘЗ. 45:4).

1, 2. Нәјә ҝөрә 45-ҹи мәзмур бизим үчүн мараг кәсб етмәлидир?

ӘЗӘМӘТЛИ падшаһ һәгигәт вә салеһлик наминә, еләҹә дә дүшмәнләри үзәриндә гәләбәјә доғру чапыр. Дүшмәнләри үзәриндә јекун гәләбә чалдыгдан сонра о, севимли ҝәлини илә евләнир. Падшаһ нәсилдән-нәсилә хатырланыр вә мәдһ едилир. 45-ҹи мәзмурун әсас мөвзусу бундан ибарәтдир.

2 Лакин 45-ҹи мәзмур садәҹә ҝөзәл сону олан мараглы һекајә дејил. Орада гәләмә алынмыш һадисәләр бизим үчүн әһәмијјәт кәсб едир. Бу һадисәләр бирбаша бизим индики һәјатымызла, еләҹә дә ҝәләҹәјимизлә бағлыдыр. Ҝәлин бу мәзмуру диггәтлә арашдыраг.

«ГӘЛБИМ ЈАХШЫ СӨЗЛӘРЛӘ ЧАҒЛАЈЫР»

3, 4. а) Бизә аидијјаты олан «јахшы [сөзләр]» нәдир вә онлар үрәјимизә неҹә тәсир едир? б) Һансы мәнада нәғмәмиз падшаһ һаггындадыр вә дилимиз неҹә хәттатын гәләминә охшајыр?

3 Мәзмур 45:1 ајәсини оху. Мәзмурчунун үрәјини риггәтә ҝәтирән вә чағламасына сәбәб олан «јахшы [сөзләр]» падшаһла бағлыдыр. «Чағлајыр» кими тәрҹүмә олунан ибрани фели әслиндә «дашмаг» вә ја «гајнамаг» мәнасыны верир. Бу мөвзудан мәзмурчунун үрәји шөвглә долуб-дашыр вә  «[дили] маһир бир хәттатын гәләминә охшајыр».

4 Бәс бизим барәмиздә нә демәк олар? Мәсиһин идарә етдији Падшаһлыг һаггындакы хош хәбәр үрәјимизи риггәтә ҝәтирән јахшы сөзләрдир. Падшаһлыг хәбәри хүсусилә 1914-ҹү илдә «хош» олду. Һәмин вахтдан бу хәбәр артыг ҝәләҹәк Падшаһлыгла дејил, һал-һазырда ҝөјдә идарә едән реал һөкумәтлә бағлыдыр. Бу, бизим «милләтләрин һамысына шәһадәт олсун дејә» тәблиғ етдијимиз «Падшаһлыг һаггындакы... хош хәбәр»дир (Мат. 24:14). Бәс бизим үрәјимиз дә Падшаһлыг хәбәриндән чағлајырмы? Падшаһлыг һаггында хош хәбәри сәјлә тәблиғ едирикми? Мәзмурчу кими, бизим дә нәғмәмиз падшаһ һаггындадыр. Биз Иса Мәсиһин Аллаһын Падшаһлығынын Падшаһы олдуғуну бәјан едирик. Үстәлик, һамыны — һөкмдарлары вә тәбәәләри онун һакимијјәтинә табе олмаға сәсләјирик (Мәз. 2:1, 2, 4—12). Вә тәблиғдә Аллаһын Кәламындан ҝениш сурәтдә истифадә етдијимиз үчүн дилимиз «маһир бир хәттатын гәләминә охшајыр».

Падшаһымыз Иса Мәсиһ һаггында хош хәбәри севинҹлә бәјан едирик

ПАДШАҺЫН «ДОДАГЛАРЫНДАН ЛӘТАФӘТЛИ СӨЗЛӘР ТӨКҮЛҮР»

5. а) Иса һансы мәнада ҝөзәл иди? б) Падшаһын ағзындан һансы хош сөзләр чыхырды вә биз онун нүмунәси неҹә тәглид едә биләрик?

5 Мәзмур 45:2 ајәсини оху. Мүгәддәс Китабда Исанын хариҹи ҝөрүнүшүндән чох аз бәһс едилир. Шүбһәсиз, камил олдуғу үчүн онун хариҹи ҝөркәми чох ҝөзәл иди. Лакин онун бу гејри-ади ҝөзәллији Јеһоваја сәдагәтиндән вә сарсылмаз нөгсансызлығындан доғурду. Бундан әлавә, Иса Падшаһлыг һаггындакы хәбәри «хош [сөзләрлә]» тәблиғ едирди (Лука 4:22; Јәһ. 7:46). Бәс биз тәблиғдә онун нүмунәсини изләмәјә вә инсанларын үрәјинә тәсир едәҹәк сөзләрдән истифадә етмәјә чалышырыгмы? (Колос. 4:6).

6. Аллаһ Исаны «әбәдилик» неҹә хејир-дуалы едиб?

6 Иса һәдсиз сәдагәт ҝөстәрдији үчүн Јеһова ону јердәки хидмәти заманы хејир-дуаландырды вә һәјатыны гурбан вердикдән сонра мүкафатландырды. Һәвари Павел јазмышды: «О, [Иса] инсан кими мөвҹуд оланда өзүнү алчалтды вә өлүмәдәк — ишҝәнҹә дирәји үзәриндә өләнәдәк итаәткар галды. Буна ҝөрә дә Аллаһ ону даһа јүксәк мөвгејә уҹалтды вә она бүтүн адлардан үстүн бир ад бәхш етди ки, ҝөјдә, јердә вә јерин алтында оланларын һамысы Исанын ады гаршысында диз чөксүн, һәр ағыз Иса Мәсиһи Аға кими танысын вә Атамыз Аллаһа тәриф уҹалтсын» (Филип. 2:8—11). Јеһова Исаны өлмәз һәјата говушмаг үчүн дирилдәрәк «әбәдилик хејир-дуалы едиб» (Ром. 6:9).

ПАДШАҺ «ЈОЛДАШЛАРЫНДАН» ДАҺА ҮСТҮН ТУТУЛДУ

7. Һансы мәнада Аллаһ Исаны јолдашларындан даһа чох мәсһ етмишди?

7 Мәзмур 45:7 ајәсини оху. Иса салеһлијә дәрин мәһәббәт бәсләдији вә Атасынын адына ләкә ҝәтирәҹәк һәр шејә нифрәт етдији үчүн Јеһова ону Өз Падшаһлығынын Падшаһы олараг мәсһ етди. Иса «севинҹ јағы илә јолдашларындан», јәни Давудун нәслиндән олан Јәһуда падшаһларындан даһа чох мәсһ едилди. Нәјә ҝөрә белә нәтиҹәјә ҝәлмәк олар?  Әввәла, Исаны Јеһованын Өзү мәсһ етди. Бундан әлавә, Јеһова ону һәм Падшаһ, һәм дә Баш каһин олараг мәсһ етди (Мәз. 2:2; Ибр. 5:5, 6). Үстәлик, Иса јағла јох, мүгәддәс руһла мәсһ едилмишди вә о, јердә јох, ҝөјдә падшаһлыг едәҹәкди.

8. Нәјә ҝөрә демәк олар ки, Аллаһ Исанын тахтынын тәмәлидир вә онун падшаһлығынын әдаләтли олдуғуна нә үчүн әмин ола биләрик?

8 Мәзмур 45:6 (Јени Дүнја тәрҹүмәси) ајәсини оху *. Јеһова Өз Оғлуну Падшаһлыг тахтына рәсми олараг 1914-ҹү илдә әјләшдирди. Онун падшаһ әсасы «әдаләт әсасыдыр», буна ҝөрә дә онун падшаһлығынын әдаләтли вә гәрәзсиз олаҹағына јүз фаиз зәманәт вар. Онун һакимијјәти ганунидир, чүнки «тахтынын тәмәли Аллаһдыр». Бундан әлавә, Исанын тахты даими вә әбәдидир. Сиз Аллаһ тәрәфиндән тәјин едилмиш белә бир гүдрәтли Падшаһын рәһбәрлији алтында Јеһоваја хидмәт етмәкдән гүрур дујмурсунуз?

ПАДШАҺ «ГЫЛЫНҸЫНЫ БЕЛИНӘ БАҒЛА»ЈЫР

9, 10. а) Мәсиһ гылынҹыны белинә нә заман бағлады вә ондан дәрһал неҹә истифадә етди? б) Мәсиһ өз гылынҹындан ҝәләҹәкдә неҹә истифадә едәҹәк?

9 Мәзмур 45:3 ајәсини оху. Јеһова Падшаһа ҝөстәриш верир ки, «гылынҹыны белинә бағла»сын, бунунла Исаја Аллаһын һөкмранлығынын дүшмәнләринә гаршы дөјүшмәк вә онлара һөкм кәсмәк ихтијары верилир (Мәз. 110:2). Мәсиһ ҝөзәҝөрүнмәз Иҝид-Падшаһ олдуғу үчүн она: «Еј ҹәнҝавәр», — дејә мүраҹиәт олунур. О, 1914-ҹү илдә әввәлҹә гылынҹыны белинә бағлајыб Шејтаны вә ҹинләрини ҝөјдән јерин һүдудларына атараг онлара галиб ҝәлди (Вәһј 12:7—9).

10 Бу, Падшаһын зәфәрлә ат чапмасынын јалныз башланғыҹы иди. О, һәлә «јекун гәләбәсинә доғру [ирәлиләмәли]» иди (Вәһј 6:2). Шејтанын јер үзүндәки бүтүн системини һәлә гаршыда Јеһованын һөкмү ҝөзләјир, Шејтанын вә онун ҹинләринин фәалијјәтинә сон гојулмалыдыр. Илк нөвбәдә, Бөјүк Бабилин, јалан динин дүнја империјасынын мөвҹудлуғуна сон гојулаҹаг. Јеһова сијаси лидерләр васитәсилә бу фаһишәни мәһв етмәк нијјәтиндәдир (Вәһј 17:16, 17). Сонра Ҹәнҝавәр-Падшаһ Шејтанын сијаси системинә гаршы өлчү ҝөтүрәрәк, онун күлүнү ҝөјә совураҹаг. Һәмчинин «дибсиз үмманын мәләји» адланан Мәсиһ Шејтаны вә ҹинләрини дибсиз үммана атмагла јекун гәләбәсини чалаҹаг (Вәһј 9:1, 11; 20:1—3). Ҝәлин ҝөрәк бу мөһтәшәм һадисәләр барәдә 45-ҹи мәзмурда неҹә пејғәмбәрлик едилмишди.

ПАДШАҺ «ҺӘГИГӘТ... НАМИНӘ» ЧАПЫР

11. Мәсиһ «һәгигәт... наминә» неҹә чапыр?

11 Мәзмур 45:4 ајәсини оху. Ҹәнҝавәр-Падшаһ торпаглары зәбт етмәк вә инсанлары өзүнә табе етдирмәк мәгсәдилә мүһарибә апармыр. О, алиҹәнаб мәгсәдлә әдаләтли мүһарибә апарыр. О, «һәгигәт, итаәткарлыг вә салеһлик наминә» чапыр. Онун мүдафиә етмәли олдуғу ән бөјүк һәгигәт Јеһованын али һөкмранлығыдыр. Шејтан Јеһоваја гаршы үсјан галдыранда Онун һөкмранлығынын ганунилијинә мејдан охуду. О вахтдан бәри, бу ваҹиб һәгигәт һәм ҹинләрин, һәм дә инсанларын мүбаһисә һәдәфинә чеврилиб. Инди мәсһ едилмиш Падшаһын һәрәкәтә кечиб һөкмранлыг етмәк ихтијарынын јалныз Јеһова мәхсус олдуғуну сүбут етмәсинин вахтыдыр.

12. Падшаһ «итаәткарлыг... наминә» неҹә чапыр?

12 Падшаһ һәмчинин «итаәткарлыг»,  јәни тәвазөкарлыг наминә чапыр. Аллаһын јеҝанә Оғлу кими, о, өзү әсил тәвазөкарлыг вә Атасынын һакимијјәтинә итаәткарлыг нүмунәси гојуб (Јешаја 50:4, 5; Јәһ. 5:19). Падшаһын бүтүн садиг тәбәәләри онун нүмунәсини тәглид етмәли вә һәр саһәдә Јеһованын али һөкмранлығына һәлимликлә табе олмалыдырлар. Јалныз бу ҹүр даврананлара Аллаһын вәд етдији јени дүнјада јашамаға иҹазә вериләҹәк (Зәк. 14:16, 17).

13. Мәсиһ «салеһлик наминә» неҹә дөјүшә чыхыр?

13 Мәсиһ һәмчинин «салеһлик наминә» дөјүшә чыхыр. Падшаһын мүдафиәсиндә дурдуғу салеһлик «Аллаһын салеһлији»дир, јәни нәјин дүзҝүн, нәјин јанлыш олдуғуна даир Јеһованын нормаларыдыр (Ром. 3:21; Ганун. т. 32:4). Падшаһ Иса Мәсиһ һаггында Јешаја пејғәмбәрлик етмишди: «Падшаһ салеһликлә һөкм сүрәҹәк» (Јешаја 32:1). Исанын падшаһлығы вәд едилмиш «јени бир ҝөј» вә «јени јер» јарадаҹаг вә орада «салеһлик һөкм сүрәҹәк» (2 Пет. 3:13). Јени дүнјанын һәр бир сакининдән Јеһованын нормаларына ујғун јашамаг тәләб олунаҹаг (Јешаја 11:1—5).

ПАДШАҺ «МӨҺТӘШӘМ ИШЛӘР» ҜӨРҮР

14. Мәсиһин сағ әли «мөһтәшәм ишләри» неҹә ҝөрәҹәк? (Мәгаләнин әввәлиндәки шәклә бах.)

14 Атыны чапан Падшаһ гылынҹы белинә бағлајыб (Мәз. 45:3). Анҹаг онун гылынҹыны чәкиб сағ әлиндә ојнатмаг вахты чатыр. Мәзмурчу пејғәмбәрлик едир: «Сағ әлиндән мөһтәшәм ишләр [ҝәләҹәк]» (Мәз. 45:4). Иса Мәсиһ Һар-Маҝедонда Јеһованын һөкмләрини иҹра етмәк үчүн чапанда дүшмәнләринә гаршы «мөһтәшәм ишләр» ҝөрәҹәк. Амма биз онун Шејтан системини неҹә мәһв едәҹәјини дәгиг билмирик. Баш верәҹәк һадисәләр Аллаһын Падшаһа табе олмаг хәбәрдарлығына диггәт јетирмәјән инсанлары дәһшәтә салаҹаг. (Мәзмур 2:11, 12 ајәләрини оху.) Ахыр ҝүнләр барәдә пејғәмбәрлијиндә Иса демишди ки, «инсанлар горхудан вә јерин үзәринә ҝәләҹәк һадисәләри ҝөзләмәкдән һушуну итирәҹәкләр, чүнки ҝөјләрин гүдрәти сарсылаҹаг». О әлавә етмишди: «О заман инсан Оғлунун гүдрәт вә ҹаһ-ҹалалла булудда ҝәлдијини ҝөрәҹәкләр» (Лука 21:26, 27).

15, 16. Мәсиһин архасынҹа дөјүшә ҝәлән «гошунлар»а кимләр дахил олаҹаг?

15 «Вәһј» китабында Падшаһын һөкмү иҹра етмәк үчүн «гүдрәт вә ҹаһ-ҹалалла» ҝәлиши белә бәјан едилир: «Мән ачылмыш ҝөјү вә бир ағ ат ҝөрдүм. Атын белиндә отуран Садиг вә Һәгиги адланыр. О, әдаләтлә һөкм едир вә дөјүшүр. Сәмави гошунлар ағ атларын белиндә онун архасынҹа ҝәлирләр. Онларын әјниндә ағ, зәриф кәтандан тәмиз либас вар. Онун ағзындан милләтләри вурмаг үчүн узун, ити бир гылынҹ чыхыр вә о, милләтләри дәмир чомагла отараҹаг. О, Гадир Аллаһын гәзәбинин вә һиддәтинин үзүмсыханында үзүм тапдалајыр» (Вәһј 19:11, 14, 15).

16 Мәсиһин архасынҹа дөјүшә ҝәлән «сәмави гошунлар»ы кимләр тәшкил едәҹәк? Илк дәфә гылынҹындан Шејтаны вә ҹинләрини ҝөјдән говмаг үчүн истифадә едәндә ону «өз мәләкләри» мүшајиәт етмишди (Вәһј 12:7—9). Мәнтиглидир ки, Һар-Маҝедон мүһарибәсиндә дә Мәсиһин гошунлары мүгәддәс мәләкләрдән ибарәт олаҹаг. Бәс онун гошунларында башгалары да олаҹаг? Иса мәсһ олунмуш гардашларына белә бир вәд вермишди: «Атам мәнә һакимијјәт вердији кими, мән дә зәфәр чалана вә јолуму ахыра гәдәр давам етдирәнә милләтләр үзәриндә һакимијјәт верәҹәјәм. О, милләтләри дәмир чомагла отараҹаг вә онлар сахсы  габ кими сыныб чилик-чилик олаҹаглар» (Вәһј 2:26, 27). Беләҹә, Мәсиһин сәмави гошунларына ҝөјләр мүкафатларыны алаҹаг мәсһ олунмуш гардашлары да дахил олаҹаг. Иса милләтләри дәмир чомагла отаран заман «мөһтәшәм ишләр» ҝөрәндә онун мәсһ олунмуш һакимијјәт шәрикләри јанында олаҹаглар.

ПАДШАҺ ЈЕКУН ГӘЛӘБӘСИНИ ЧАЛЫР

17. а) Мәсиһин чапдығы ағ ат нәји тәмсил едир? б) Гылынҹ вә јај нәји билдирир?

17 Мәзмур 45:5 ајәсини оху. Падшаһын чапдығы ағ ат онун Јеһованын ҝөзүндә тәмиз вә әдаләтли дөјүш апардығыны тәмсил едир (Вәһј 6:2; 19:11). О, гылынҹла јанашы, јајла да јарагланыб. Орада охујуруг: «Бир ағ ат ҝөрдүм. Атын белиндә отуранын әлиндә бир јај варды. Она таҹ верилди вә о, бир галиб кими јекун гәләбәсинә доғру ирәлиләди». Һәм гылынҹ, һәм јај ҝөстәрир ки, Мәсиһ дүшмәнләри үзәриндә һөкм иҹра едәҹәк.

Ҝушлар јери тәмизләмәк үчүн чағырылаҹаглар (18-ҹи абзаса бах)

18. Мәсиһин «охлары»нын ити олдуғу неҹә сүбута јетәҹәк?

18 Мәзмурчу поетик диллә пејғәмбәрлик етмишди ки, Падшаһын охлары итидир, дүшмәнләринин көксүнә сапланыр вә «халглар ајағынын алтына јыхылыр». Ганлы дөјүш бүтүн дүнјаны әһатә едәҹәк. Јеремјанын пејғәмбәрлијиндә дејилир: «О ҝүн Рәбб дүнјаны бир уҹундан о бири уҹуна гәдәр өлдүрүләнләрлә долдураҹаг» (Јер. 25:33). Паралел пејғәмбәрликдә исә дејилир: «Мән ҝүнәшин ортасында дурмуш бир мәләк ҝөрдүм. О, ҝөј үзү илә учан бүтүн гушлара ҝур сәслә деди: “Бураја учун, Аллаһын бөјүк зијафәтинә топлашын! Падшаһларын, сәркәрдәләрин, голузорлуларын, атларын вә атлыларын әтини — истәр азад, истәр гул, истәр кичик, истәр бөјүк олсун — һамысынын әтини јејин”» (Вәһј 19:17, 18).

19 Шејтанын пис системинин мәһвиндән сонра Мәсиһ «[әзәмәти илә] уғур газан»аҹаг (Мәз. 45:4). О, Шејтаны вә онун ҹинләрини дибсиз үммана атмагла јекун гәләбәсини чалаҹаг вә онлар Мәсиһ мин ил һөкмранлыг етдији мүддәтдә орада галаҹаглар (Вәһј 20:2, 3). Иблис вә ҹинләри өлүмҹүл, там фәалијјәтсиз һала салынанда јерин сакинләри Шејтанын тәсириндән азад олаҹаглар. Артыг онлар зәфәр чалмыш әзәмәтли Падшаһа там мәнада табе олаҹаглар. Анҹаг јер үзү тәдриҹән ҹәннәтә чеврилмәздән өнҹә, онларын Падшаһла вә онун сәмави һәмкарлары илә бирҝә шадланмаг үчүн башга бир сәбәбләри олаҹаг. Бу севиндириҹи һадисәни нөвбәти мәгаләдә арашдыраҹағыг.

[Һашијәләр]

^ абз. 8 Мәзмур 45:6 (ЈД): «Тахтынын тәмәли Аллаһдыр, даим, әбәдијјән, падшаһлыг әсан әдаләт әсасыдыр».