Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  ијун 2013

Јеһованын кејфијјәтләрини там шәкилдә гијмәтләндирин

Јеһованын кејфијјәтләрини там шәкилдә гијмәтләндирин

«Аллаһын севимли өвладлары олдуғунуз үчүн Она бәнзәмәјә чалышын» (ЕФЕС. 5:1).

1. а) Јеһова барәдә дүшүнәркән дәрһал ағлыныза Онун һансы кејфијјәтләри ҝәлир? б) Јеһованын кејфијјәтләрини арашдырмагла һансы фајданы әлдә едәҹәјик?

ЈЕҺОВА барәдә дүшүнәркән дәрһал ағлыныза Онун һансы кејфијјәтләри ҝәлир? Чохларынын илк јадына дүшән хүсусијјәтләр мәһәббәт, әдаләт, мүдриклик вә гүввә олур. Амма билирик ки, Јеһова бир чох диҝәр ҹәлбедиҹи кејфијјәтләрә дә маликдир. Әслиндә исә, Јеһованын 40-дан чох кејфијјәтини садалаја биләрик вә бу кејфијјәтләрдән һәр бири нәшрләримиздә ајры-ајрылыгда мүзакирә олунуб. Тәсәввүр едирсиниз, шәхси вә ја аиләви өјрәнмә заманы Јеһова барәдә нә гәдәр дәјәрли биликләрә јијәләнә биләрик? Бәс бу ҹүр арашдырмадан неҹә фајдалана биләрик? Белә арашдырма бизә сәмави Атамызын кејфијјәтләрини даһа чох гијмәтләндирмәјә көмәк едәҹәк. Бу да, өз нөвбәсиндә, Онунла јахын дост олмаг вә Ону тәглид етмәк истәјимизи ҝүҹләндирәҹәк (Јешуа 23:8; Мәз. 73:28).

2. а) Јеһованын кејфијјәтләрини даһа чох гијмәтләндирмәк үчүн нә едә биләрик? Нүмунә чәкин. б) Биз нәји нәзәрдән кечирәҹәјик?

2 Бәс нәјисә «гијмәтләндирмәк» нә демәкдир? Бурада истифадә олунан «гијмәтләндирмәк» сөзү нәјинсә дәјәрини дүзҝүн баша дүшүб она гијмәт вермәк демәкдир. Адәтән, инсан һәр һансы бир шеји вахт кечдикҹә даһа чох гијмәтләндирир. Мәсәлән: һеч вахт дадмадығымыз бир јемәк онун әтрини дујандан, һәр лохмасыны иштаһа илә јејәндән вә өзүмүз ону биширәндән сонра ҝет-ҝедә даһа чох хошумуза ҝәлмәјә башлајыр. Буна бәнзәр тәрздә Аллаһын кејфијјәтләрини гијмәтләндирмәк үчүн дә онлар һаггында өјрәнмәјә, онларын үзәриндә дүшүнмәјә вә сонра һәјатымызда әкс етдирмәјә чалышмалыјыг (Ефес. 5:1). Бу вә нөвбәти ики мәгаләнин мәгсәди Јеһованын әсас хүсусијјәтләриндән даһа аз әһәмијјәтли һесаб етдијимиз хүсусијјәтләри гијмәтләндирмәјә көмәк етмәкдир. Бу кејфијјәтләрин  һәр бирини арашдырдыгҹа нөвбәти суаллары мүзакирә едәҹәјик: Бу кејфијјәтин мәғзи нәдән ибарәтдир? Јеһова бу кејфијјәти неҹә тәзаһүр етдирир? Биз Јеһованын бу кејфијјәтини неҹә тәглид едә биләрик?

ЈЕҺОВА ӘЛЧАТАН АЛЛАҺДЫР

3, 4. а) Әлчатан инсаны неҹә тәсвир едәрдиниз? б) Јеһованын әлчатан олдуғу нәдән ҝөрүнүр?

3 Ҝәлин илк әввәл Јеһованын неҹә әлчатан олдуғуну арашдыраг. Сиз әлчатан инсаны неҹә тәсвир едәрдиниз? Бәлкә дә, сиз хејирхаһ, јахынлашмаг вә үнсијјәт етмәк асан олан бир инсанын әлчатан олдуғуну дејәҹәксиниз. Чох вахт инсана гулаг асмагла, еләҹә дә бәдән һәрәкәтләрини — жестләрини, үз ифадәләрини вә бу кими диҝәр әламәтләри мүшаһидә етмәклә онун әлчатан олуб-олмадығыны мүәјјән етмәк мүмкүндүр.

4 Бәс Јеһованын әлчатан олдуғу нәдән ҝөрүнүр? Уҹсуз-буҹагсыз Каинаты јарадан Күлл-Ихтијар Аллаһ олмасына бахмајараг, Јеһова бизи әмин едир ки, О, һәр заман дуаларымызы ешитмәјә вә онлара ҹаваб вермәјә һазырдыр. (Мәзмур 145:18; Јешаја 30:18, 19 ајәләрини оху.) Биз Аллаһа истәдијимиз јердә, истәдијимиз гәдәр дуа едә биләрик. Әмин ола биләрик ки, О, бизи буна ҝөрә мәзәммәт етмәјәҹәк (Мәз. 65:2; Јаг. 1:5). Аллаһын Кәламында Јеһова бәшәри диллә инсанларын Она мүраҹиәт етмәсини истәдијини ҝөстәрир. Мисал үчүн, мәзмурчу Давуд јазыр ки, Јеһованын «ҝөзү салеһләрин үзәриндәдир» вә Онун сағ әли бизи мөһкәм тутур (Мәз. 34:15; 63:8). Јешаја пејғәмбәр Јеһованы чобанла мүгајисә едәрәк дејир: «Гузулары гуҹағына алаҹаг, синәсиндә ҝәздирәҹәк» (Јешаја 40:11). Бир тәсәввүр един! Јеһова Аллаһ истәјир ки, биз Она гајғыкеш чобанын синәсиндәки гузу кими јахын олаг. Бәли, Јеһова, һәгигәтән дә, әлчатан бир Атадыр! Бәс бу саһәдә биз Јеһованы неҹә тәглид едә биләрик?

ОЛДУГҸА ВАҸИБ КЕЈФИЈЈӘТ

5. Ағсаггалларын әлчатан олмалары нәјә ҝөрә ваҹибдир?

5 Бу јахын вахтларда мүхтәлиф өлкәләрдә јашајан Јеһованын Шаһидләринә белә бир суалла мүраҹиәт едилмишди: «Ағсаггалда  даһа чох һансы хүсусијјәти гијмәтләндирирсән?» Әксәријјәт: «Онун әлчатан олмасыны», — дејә ҹаваб вермишди. Буну нәзәрә алараг, һәр бир мәсиһчи, хүсусилә дә ағсаггаллар бу кејфијјәти өзләриндә там мәнада инкишаф етдирмәлидирләр (Јешаја 32:1, 2). Бу хүсусијјәтин онун үчүн нәјә ҝөрә ваҹиб олдуғуну бир баҹы белә сөзләрлә ифадә едир: «Јалныз ағсаггал әлчатан олдуғу тәгдирдә, биз онун малик олдуғу диҝәр јахшы кејфијјәтләрдән јарарлана биләрик». Сиз бу сөзләри мәнтигли һесаб едирсинизми? Сизҹә инсаны әлчатан едән нәдир?

6. Әлчатан олмаг үчүн, илк нөвбәдә, нә тәләб олунур?

6 Әлчатан олмаг үчүн, илк нөвбәдә, башгаларына сәмими мараг ҝөстәрмәк тәләб олунур. Ағсаггаллар башгаларынын гајғысына галанда вә көмәк етмәк үчүн мәмнунијјәтлә онлара вахт ајыранда, ҝәнҹләр дә дахил олмагла, бүтүн баҹы-гардашлара онларла сөһбәт етмәк асан олур (Марк 10:13—16). 12 јашлы Карлос дејир: «Падшаһлыг залында ағсаггалларын неҹә ҝүләрүз олдугларыны вә хејирхаһлыг ҝөстәрдикләрини мүшаһидә едирәм вә бу, мәним хошума ҝәлир». Әлбәттә, ағсаггалларын һәр заман динләмәјә вә көмәк етмәјә һазыр олдугларыны демәләри кифајәт дејил. Онлар буну әмәлдә ҝөстәрмәлидирләр (1 Јәһ. 3:18). Ахы неҹә?

7. Нәјә ҝөрә конгрес плакетләримиз инсанларла үнсијјәт гурмаға фүрсәт јарадыр вә биз бундан нә өјрәнә биләрик?

7 Ҝәлин бир нүмунәјә нәзәр салаг. Бу јахынларда бир гардаш хариҹи өлкәдә кечирилән конгресдән сонра тәјјарә илә евә гајыдаркән конгрес плакетини јахасындан чыхартмамышды. Тәјјарәдәки екипаж һејәтинин үзвү плакетдәки «Гој Аллаһын Падшаһлығы ҝәлсин!» сөзләрини ҝөрәндә гардаша демишди: «Бәли, гој ҝәлсин! Биз бу барәдә бир аз сөһбәт едә биләрик?» Онлар сөһбәт етдикдән сонра һәмин киши мәмнунијјәтлә журналларымызы гәбул етди. Чохларымызда бу ҹүр мараглы һадисәләр олур. Бәс нәјә ҝөрә конгрес плакетләримиз инсанларла үнсијјәт гурмаға фүрсәт јарадыр? Чүнки плакетләримиз, санки, инсанлара: «Чәкинмә, мәнә јахынлаш вә һара ҝетдијими соруш», — дејир. Јахамыза тахдығымыз плакетләр инсанлара иманымыз барәдә бөлүшмәјә һәр заман һазыр олдуғумузу ҝөстәрир. Ејнилә, мәсиһчи ағсаггаллар да елә тәәссүрат ојатмалыдырлар ки, һәмиманлылары чәкинмәдән онлара јахынлаша билсинләр. Онлар буну неҹә едә биләрләр?

8. Башгаларына сәмими мараг ҝөстәрмәк үчүн ағсаггаллар нә едә биләрләр вә бу, јығынҹағын үзвләринә неҹә тәсир едир?

8 Бир чох өлкәләрдә адәт-әнәнәләр бир-бириндән фәргләнсә дә, адәтән, биз баҹы-гардашларымызы ҝүләрүзлә гаршыламагла, әл вериб достјана ҝөрүшмәклә онларла сәмими-гәлбдән марагландығымызы ҝөстәрә биләрик. Бәс тәшәббүсү ким өз үзәринә ҝөтүрмәлидир? Исанын нүмунәсинә диггәт јетирәк. Матта гејд едир ки, Иса шаҝирдләрлә ҝөрүш заманы јахынлашыб онларла сөһбәт етди (Мат. 28:18). Ағсаггаллар да тәшәббүсү өз үзәрләринә ҝөтүрәрәк һәмиманлыларына јахынлашыр вә онларла сөһбәт едирләр. Бу, јығынҹағын үзвләринә неҹә тәсир едир? 88 јашлы пионер бир баҹы бөлүшүр: «Падшаһлыг залына ҝирәндә ағсаггалларын сәмими тәбәссүмү вә руһландырыҹы сөзләри мәндә онлара гаршы рәғбәт һисси ојадыр». Диҝәр бир баҹы исә гејд едир: «Ҹузи бир шеј кими ҝөрүнсә дә, јығынҹаға ҝәләндә ағсаггалын ҝүләрүзлә саламламасы мәним үчүн бөјүк шејдир».

ҺӘМИМАНЛЫЛАРЫНЛА ҮНСИЈЈӘТӘ ВАХТ АЈЫР

9, 10. а) Јеһова бизә һансы ҝөзәл нүмунәни гојуб? б) Ағсаггаллар башгаларына неҹә вахт ајыра биләрләр?

9 Әлбәттә, һәмиманлыларымызын бизимлә сәрбәст шәкилдә үнсијјәт етмәләрини истәјириксә, онлара вахт ајырмалыјыг. Јеһова бу саһәдә бизә ҝөзәл нүмунә гојуб. «О, һеч биримиздән узаг дејил» (Һәв. иш. 17:27). Ағсаггаллар јығынҹагдан әввәл вә сонра  баҹы-гардашлара — ҝәнҹләрә вә јашлылара вахт ајырмагла Јеһованын нүмунәсини тәглид едә биләрләр. Бир пионер гардаш гејд едир: «Ағсаггал мәндән һал-әһвал тутанда вә ҹавабымы динләјәндә өзүмү дәјәрли һисс едирәм». Јеһоваја 50 илә јахындыр ки, хидмәт едән бир баҹы дејир: «Ағсаггаллар јығынҹагдан сонра мәнимлә сөһбәт етмәк үчүн бир аз вахт ајыранда дәјәрли олдуғуму анлајырам».

10 Ајдын мәсәләдир ки, ағсаггалларын диҝәр өһдәчиликләри дә вар. Лакин јығынҹагда әсас мәгсәд, илк нөвбәдә, баҹы-гардашлара вахт ајырмаг олмалыдыр.

ЈЕҺОВА АЈРЫ-СЕЧКИЛИК ЕТМӘЈӘН АЛЛАҺДЫР

11, 12. а) Ајры-сечкилик етмәмәк нә демәкдир? б) Ајры-сечкилик етмәмәкдә Јеһова бизә һансы нүмунәни гојуб?

11 Јеһованын ҹәлбедиҹи хүсусијјәтләриндән бири дә Онун ајры-сечкилик етмәмәсидир. Ајры-сечкилик етмәмәк нә демәкдир? Ајры-сечкилик етмәмәк «гәрәзсиз мүнасибәт бәсләмәк, үзҝөрәнлик етмәмәк, бир тәрәфи диҝәриндән үстүн тутмамаг» демәкдир. Бу, өзүнә ики амили дахил едир: инсанлара гаршы мүнасибәти вә онларла рәфтары. Ҝөрәсән, нә үчүн бу амилләрин һәр икиси дә ваҹибдир? Чүнки, адәтән, инсан гәрәзсиз олдуғу тәгдирдә, һамы илә гәрәзсиз рәфтар едир. Јунанҹа Мүгәддәс Јазыларда «ајры-сечкилик етмәјән» кими тәрҹүмә едилән сөз һәрфи мәнада «үзү гәбул етмәмәк», јәни бир үзү диҝәриндән үстүн тутмамаг демәкдир (Һәв. иш. 10:34). Бу сәбәбдән, ајры-сечкилик етмәјән инсан башгасынын хариҹи ҝөрүнүшүнә вә шәраитинә јох, онун хасијјәтинә фикир верир.

12 Јеһова ајры-сечкилик етмәмәјин ән бариз нүмунәсидир. Онун Кәламында дејилир ки, О, «ајры-сечкилик» вә «тәрәфкешлик етмәјән» Аллаһдыр. (Һәвариләрин ишләри 10:34, 35; Ганунун тәкрары 10:17 ајәләрини оху.) Мусанын ҝүнләриндә баш вермиш һадисә буна бир сүбутдур.

Селофхадын гызлары Аллаһын ајры-сечкилик етмәмәсини гијмәтләндирирдиләр (13 вә 14-ҹү абзаслара бах)

13, 14. а) Селофхадын беш гызы һансы вәзијјәтлә үзләшди? б) Јеһова ајры-сечкилик етмәдијини неҹә ҝөстәрди?

13 Исраиллиләр Вәд едилмиш дијара дахил олмаздан әввәл, Селофхад адлы бир нәфәрин беш субај гызы чыхылмаз вәзијјәтлә үзләшир. Онлар билирләр ки, диҝәр исраилли аиләләр кими, онларын аиләси дә аталарына ирс олараг дүшән торпаг пајыны алмалыдырлар (Сај. 26:52—55). Лакин онларын Менашше нәслиндән олан аталары Селофхад артыг һәјатда јох иди. Гануна ҝөрә, торпаг пајыны алмаг һүгугу оғлан өвладларына мәхсус иди, Селофхадын исә тәкҹә гызлары варды (Сај. 26:33). Белә чыхыр ки, аиләнин оғлан өвлады олмадығына ҝөрә торпаг пајы гоһумлара верилмәли, гызлар исә аилә мирасындан мәһрум олмалы идиләр?

14 Бу беш баҹы Мусанын јанына ҝәлиб ондан сорушдулар: «Оғлу олмадығына ҝөрә онун [атамызын] ады өз нәсли арасындан нә үчүн силинмәлидир?» Онлар хаһиш едиб дедиләр: «Атамызын гардашлары арасында бизә бир мүлк верин». Бәс Муса буна неҹә реаксија  ҝөстәрди, Ганундан кәнара чыха билмәјәҹәјини деди? Әксинә, о, «онларын ишини Рәббин өнүнә гојду» (Сај. 27:2—5). Јеһова буна ҹаваб олараг Мусаја деди: «Селофхадын гызлары доғру дејирләр: мүтләг онлара аталарынын гардашлары арасында мүлк вер вә аталарынын мирасыны онлара кечир». Јеһова бунунла кифајәтләнмәди, Мусаја бу ҝөстәриши Гануна дахил етмәји тапшырды: «Исраил өвладларына де ки, әҝәр бир адам өләрсә вә онун оғлу јохдурса, о заман мирасы онун гызына кечир» (Сај. 27:6—8; Јешуа 17:1—6). Һәмин андан етибарән, бу ганун белә вәзијјәтлә үзләшән бүтүн исраилли гадынлары мүдафиә едәҹәкди.

15. а) Јеһова Өз халгы илә, хүсусилә дә мүдафиәсиз оланларла неҹә рәфтар едир? б) Мүгәддәс Китабдакы даһа һансы нүмунәләр Јеһованын гәрәзсиз даврандығыны ҝөстәрир?

15 Һәгигәтән дә, хејирхаһ вә гәрәзсиз бир гәрар иди! Јеһова, бүтүн исраиллиләрлә олдуғу кими, бу мүдафиәсиз гадынларла да һөрмәтҹил тәрздә рәфтар етди (Мәз. 68:5). Бу һадисә Мүгәддәс Китабда гәләмә алынан вә Јеһованын бүтүн хидмәтчиләри илә гәрәзсиз даврандығыны ҝөстәрән чохсајлы нүмунәләрдән јалныз биридир (1 Шам. 16:1—13; Һәв. иш. 10:30—35, 44—48).

БИЗ ЈЕҺОВАНЫ ТӘГЛИД ЕДӘ БИЛӘРИК

16. Јеһова кими неҹә гәрәзсиз ола биләрик?

16 Ајры-сечкилик етмәмәкдә Јеһованын нүмунәсини неҹә тәглид едә биләрик? Јухарыда дејилдији кими, ајры-сечкилик етмәмәк өзүнә ики амили дахил едир. Биз јалныз гәрәзсиз олдуғумуз тәгдирдә, башгалары илә гәрәзсиз рәфтар едәҹәјик. Сөзсүз, һәр биримиз өзүмүзүн објектив вә гәрәзсиз олдуғумузу дүшүнмәји хошлајырыг. Анҹаг јәгин, разылашаҹагсыныз ки, инсанын өз һиссләринә објектив шәкилдә гијмәт вермәси һеч дә һәмишә асан олмур. Бәс ајры-сечкилик етмәјән инсан олдуғумузу неҹә мүәјјән едә биләрик? Иса инсанларын онун барәсиндә нә фикирләшдијини өјрәнмәк үчүн јахын достларындан сорушмушду: «Ҹамаатын дедијинә ҝөрә инсан Оғлу кимдир?» (Мат. 16:13, 14). Нәјә ҝөрә Исанын бу нүмунәсини изләмәјәсиниз? Сәмимијјәтинә инандығыныз достларыныздан инсанлар арасында ајры-сечкилик етмәјән бири кими таныныб-танынмадығынызы соруша биләрсиниз. Әҝәр о, сизин һәрдән инсанлар арасында ирги, сосиал вә ја економик ҹәһәтдән ајры-сечкилик етдијинизи сөјләјәрсә, бу заман нә едәҹәксиниз? Јеһоваја үрәкдән дуа едәрәк өз һиссләринизи Онунла бөлүшүн. Хаһиш един ки, дүшүнҹә тәрзинизи дәјишмәјинизә вә һәр кәсә Онун кими гәрәзсиз јанашмағыныза көмәк етсин (Мат. 7:7; Колос. 3:10, 11).

17.Һансы саһәләрдә биз инсанлар арасында ајры-сечкилик етмәмәлијик?

17 Мәсиһчи јығынҹағында бүтүн баҹы-гардашларымыза һөрмәт вә хејирхаһлыг ҝөстәрмәклә биз Јеһованы тәглид етмәк истәдијимизи ҝөстәририк. Мисал үчүн, гонагпәрвәрлик ҝөстәрәркән мүхтәлиф мәдәнијјәтдән олан бүтүн баҹы-гардашлары, о ҹүмләдән касыблары, јетимләри, дуллары да унутмамалыјыг. (Галатијалылара 2:10; Јагуб 1:27 ајәләрини оху.) Үстәлик, биз Падшаһлыг һаггында тәблиғ едәркән дә фәргли мәдәнијјәтләрдән, еләҹә дә башга өлкәләрдән олан инсанларла хош хәбәри бөлүшмәлијик. Неҹә дә хошбәхтик ки, тәхминән 600 дилдә Мүгәддәс Китаба әсасланан нәшрләримиз вар! Мәҝәр бу, һеч кәсә гаршы ајры-сечкилик едилмәдијинин ајдын сүбуту дејил?!

18. Јеһованын әлчатан вә ајры-сечкилик етмәјән олмасыны гијмәтләндирдијимизи неҹә ҝөстәрә биләрик?

18 Беләликлә, биз Јеһованын әлчатан вә ајры-сечкилик етмәјән олмасы үзәриндә дүшүнмәјә вахт ајырсаг, Она олан миннәтдарлығымыз даһа да артаҹаг. Бу миннәтдарлыг да, өз нөвбәсиндә, бизи һәмиманлыларымыза вә тәблиғ етдијимиз инсанлара гаршы Јеһованын хүсусијјәтләрини тәзаһүр етдирмәклә Ону там шәкилдә тәглид етмәјә тәшвиг етмәлидир.

«Рәбб Ону чағыран бүтүн инсанлара... јахындыр» (Мәз. 145:18) (9-ҹу абзаса бах)

«Аллаһыныз Рәбб... тәрәфкешлик етмәјән... Аллаһдыр» (Ганун. т. 10:17) (17-ҹи абзаса бах)