Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  апрел 2013

Мүгәддәс Китабы охујаркән там фајдалан

Мүгәддәс Китабы охујаркән там фајдалан

«Аллаһын Ганунундан һәзз алырам» (РОМ. 7:22).

1-3. Мүгәддәс Китабы охумаг вә өјрәндикләримизи тәтбиг етмәк һансы хејир-дуалары ҝәтирир?

«МӘНӘ Мүгәддәс Китабы баша дүшмәјә көмәк етдији үчүн һәр сәһәр Јеһоваја миннәтдарлығымы билдирирәм». Бу сөзләри Мүгәддәс Китабы артыг 40 дәфәдән чох охумуш вә һал-һазырда да охујан јашлы бир баҹы дејиб. Ҝәнҹ бир баҹы исә јазыр ки, Мүгәддәс Китабы охумағын сајәсиндә о, Јеһованын реал бир Варлыг олдуғуну анлајыб вә Сәмави Атасы илә јахын мүнасибәт гура билиб. О гејд едир: «Һәјатымда һеч вахт бу гәдәр хошбәхт олмамышам!»

2 Һәвари Павел һәр кәси «Аллаһын сөзүндәки саф сүдә гаршы иштаһа [ојатмаға]» тәшвиг едирди (1 Пет. 2:2). Руһани сусузлуғуну Мүгәддәс Китаб васитәсилә јатыранлар вә орадакы тәлимләри һәјатларында тәтбиг едәнләр тәмиз виҹдана саһиб олур вә һәјатын мәнасыны тапырлар. Бу, онлара һәгиги Аллаһы севән вә Она хидмәт едән инсанларла мөһкәм достлуг мүнасибәти гурмаг имканы јарадыр. Мәҝәр бүтүн бунлар «Аллаһын Ганунундан дахили һәзз» алмаг үчүн әсаслы сәбәб дејил? (Ром. 7:22). Бәс Аллаһын Кәламыны арашдырмағын бизә даһа һансы фајдалары ола биләр? Ҝәлин онлардан бәзиләринә нәзәр салаг.

3 Јеһова вә Онун Оғлу Иса Мәсиһ һагда нә гәдәр чох өјрәнсән, онлара вә инсанлара олан севҝин бир о гәдәр артаҹаг. Мүгәддәс Китабдан дәгиг билик әлдә етмәјин сајәсиндә Аллаһын тезликлә итаәткар инсанлары мәһвә доғру ҝедән бу системдән неҹә хилас едәҹәјини өјрәнәҹәксән. Сәнин бу хош хәбәри инсанлара чатдырмаг имканын вар. Аллаһын Кәламыны охујаркән әлдә етдијин биликләри башгаларына өјрәдәндә Јеһованын сәнә хејир-дуа верәҹәјинә әмин ола биләрсән.

ОХУ ВӘ ҮЗӘРИНДӘ ДҮШҮН

4. Мүгәддәс Китабы «пәсдән» охумаг нә демәкдир?

4 Јеһова хидмәтчиләринин Онун Кәламыны тәләм-тәләсик охумаларыны истәмир. О, гәдимдә јашајан садиг  хидмәтчиси Јешуаја демишди: «Бу Ганун китабынын сөзләри дилиндән дүшмәсин, орада јазылан һәр шејә дәгиг әмәл етмәк үчүн ҝеҹә-ҝүндүз онун үзәриндә дүшүн [«пәсдән оху», Јени Дүнја тәрҹүмәси]» (Јешуа 1:8; Мәз. 1:2). Бәс бу о демәкдирми ки, Мүгәддәс Китабы башдан-ајаға пәсдән вә ја пычылты илә охумалысан? Хејр. Әслиндә, бу о демәкдир ки, сән охудугларынын үзәриндә дүшүнмәк үчүн кифајәт гәдәр јаваш охумалысан. Мүгәддәс Китабы «пәсдән» охумаг диггәтини сәнин үчүн фајдалы вә руһландырыҹы олан ајәләрә ҹәмләмәјә көмәк едәҹәк. Өзүн үчүн руһландырыҹы фикирләр вә ја һадисәләр тапанда онлары јаваш-јаваш оху, һәтта сөзләри астадан тәләффүз ет. Бу заман охудугларын, һәгигәтән дә, үрәјинә тәсир едәҹәк. Бу нәјә ҝөрә ваҹибдир? Аллаһын өјүд-нәсиһәтләринин мәғзинә вармаг онлары һәјатында тәтбиг етмәјә тәшвиг едәҹәк.

5-7. Аллаһын Кәламыны пәсдән охумағын а) әхлаги ҹәһәтдән тәмиз галмаға; б) башгаларына гаршы сәбирли вә хејирхаһ олмаға; ҹ) чәтин анларда белә Јеһоваја ҝүвәнмәјә неҹә көмәк етдијини нүмунә әсасында ҝөстәр.

5 Мүгәддәс Китабын таныш олмајан һиссәләрини пәсдән охумаг олдугҹа фајдалыдыр. Ҝәлин үч вәзијјәти тәсәввүрүмүздә ҹанландыраг. Биринҹиси, бир ҝәнҹ мәсиһчи гардаш график үзрә Мүгәддәс Китабы охуја-охуја «Һушә» китабына ҝәлиб чатыб. 4-ҹү фәслин 11-дән 13-дәк ајәләри пәсдән охудугдан сонра дајаныр. (Һушә 4:11—13 ајәләрини оху.) Нә үчүн? О, мәктәбдә әхлагсыз тәзјигләрлә мүбаризә апармалы олдуғу үчүн бу ајәләр онун диггәтини ҹәлб едир. Гардаш ајәләрин үзәриндә дүшүнәрәк өз-өзүнә дејир: «Јеһова һәтта инсанын тәкликдә етдији пис ишләри белә ҝөрүр. Мән Ону кәдәрләндирмәк истәмирәм». Беләҹә, гардашын Аллаһ гаршысында әхлаги тәмизлијини горумаг гәтијјәти мөһкәмләнир.

6 Икинҹи вәзијјәтдә исә мәсиһчи баҹы «Јоел» китабынын 2-ҹи фәслинин 13-ҹү ајәсини охујур. (Јоел 2:13 ајәсини оху.) Ајәни пәсдән охујараг Јеһованын мәрһәмәт, лүтфкарлыг, һәдсиз сәбир вә бол мәһәббәт кими хүсусијјәтләрини неҹә әкс етдирә биләҹәји барәдә дүшүнүр. О, әри вә башгалары илә данышаркән бәзән истифадә етдији кинајәли вә аҹыглы сөзләри тәрҝитмәји гаршысына мәгсәд гојур.

7 Үчүнҹүсү, ишини итирдијинә ҝөрә аиләсинин рифаһы үчүн фикир чәкән атаны тәсәввүр едәк. О, Наһум 1:7 ајәсиндә пәсдән охујур ки, Јеһова «Она ҝүвәнәнләри таныјыр» вә онлары «дар ҝүндә» мүдафиә едир. Бу сөзләр атаны руһландырыр. О, Јеһованын мәһәббәт долу гајғысыны һисс едир вә һәддән артыг нараһат олмаға сон гојур. Сонра исә 15-ҹи ајәни пәсдән охујур. (Наһум 1:15 ајәсини оху.) Гардаш баша дүшүр ки, чәтин анларда хош хәбәри тәблиғ етмәклә Јеһованы, һәгигәтән дә, сығынаҹаг һесаб етдијини ҝөстәрир. Бу, ону јени иш ахтардығы мүддәтдә һәфтәарасы да саһә хидмәтиндә иштирак етмәјә тәшвиг едир.

8. Мүгәддәс Китабдан тапдығын гијмәтли даш-гашлар барәдә гысаҹа даныш.

8 Пәсдән охумаг бәзиләринин баша дүшмәкдә чәтинлик чәкдији фајдалы фикирләри анламаға көмәк едир. Әҝәр сән «Һушә», «Јоел» вә «Наһум» китабларыны нәсә өјрәнмәк мәгсәдилә арашдырсан, онда диҝәр ајәләри дә пәсдән охумаг истәјәҹәксән. Бу пејғәмбәрләрин јаздыгларындан нә гәдәр мүдриклик вә тәсәлли әлдә едә биләҹәјини тәсәввүр ет! Бәс әҝәр Мүгәддәс Китабы башдан-ајаға охусан, онда неҹә? Аллаһын Кәламыны зәнҝин алмаз мәдәнинә бәнзәтмәк олар. Бу мәдәни ишләмәк үчүн әлиндән ҝәләни ет! Бәли, Мүгәддәс Китабы охујаркән гаршына мәгсәд гој ки, Аллаһдан ҝәлән рәһбәрликдән вә тәсәллидән ибарәт гијмәтли даш-гашлар тапасан.

ГАВРАМАҒА ЧАЛЫШ

9. Аллаһын ирадәсини даһа јахшы гаврамаг үчүн нә едә биләрик?

9 Мүгәддәс Китабы һәр ҝүн охумаг олдугҹа ваҹибдир, бунунла јанашы, охудугларыны баша дүшмәјә вә гаврамаға да  чалышмалысан. Бунун үчүн Јеһованын тәшкилатынын тәгдим етдији нәшрләрдән истифадә едәрәк һаггында охудуғун инсанлар, јер вә һадисәләрлә бағлы арашдырмалар апар. Јахуд да әҝәр мүәјјән Мүгәддәс Китаб тәлимләрини һәјатында неҹә тәтбиг едәҹәјинә әмин дејилсәнсә, јығынҹағын ағсаггалларындан вә ја диҝәр јеткин мәсиһчиләрдән көмәк истәјә биләрсән. Гаврама габилијјәтимизи инкишаф етдирмәјин ваҹиблијини баша дүшмәк үчүн ҝәлин биринҹи әсрдә бу саһәдә көмәјә еһтијаҹ дујан Аполлос адлы мәсиһчинин нүмунәсинә нәзәр салаг.

10, 11. а) Хош хәбәрин тәблиғиндә тәкмилләшмәси үчүн Аполлоса неҹә көмәклик ҝөстәрилмишди? б) Аполлосун нүмунәсиндән нә өјрәнә биләрик? («Јени тәлимләрлә ајаглашырсанмы?» адлы чәрчивәјә бах.)

10 Аполлос Мүгәддәс Јазылары јахшы билән вә шөвглә данышан јәһуди мәншәли мәсиһчи иди. «Һәвариләрин ишләри» китабында онун барәсиндә јазылыб: «О, Иса һаггында... дәгигликлә данышыб өјрәдирди, һалбуки јалныз Јәһјанын вәфтизи илә таныш иди». Аполлос вәфтиз һаггында билдикләринин көһнә анлајыш олдуғундан бихәбәр иди. Ефесдә онун неҹә тәлим вердијини ешидән мәсиһчи әр-арвад Прискилла вә Акила «Аллаһын јолуну даһа дәгигликлә она изаһ етдиләр» (Һәв. иш. 18:24—26). Бу, Аполлоса һансы фајданы ҝәтирди?

11 Ефесдә тәблиғ етдикдән сонра Аполлос Ахајја шәһәринә јолланды. «Ораја ҝәлиб, Аллаһын лүтфү илә иман ҝәтирмиш адамлара чох көмәк етди. О, јәһудиләрин јанылдыгларыны һамынын ҝөзү гаршысында әзмлә вә дәлилләрә әсасланараг сүбут едир, Мүгәддәс Јазылара истинад едәрәк Исанын Мәсиһ олдуғуну ҝөстәрирди» (Һәв. иш. 18:27, 28). Инди о, мәсиһчи вәфтизинин мәғзини даһа јахшы баша дүшдүјүндән һәгигәтә јени ҝәләнләрин руһани ҹәһәтдән инкишаф етмәләринә чох көмәк едирди. Бу һадисәдән нә өјрәнә биләрик? Аполлос кими, биз дә Мүгәддәс Китабдан охудугларымызы баша дүшмәјә чалышмалыјыг. Бунунла белә, тәҹрүбәли  баҹы-гардашларымыз даһа еффектив шәкилдә өјрәдә билмәјимиз үчүн бизә мәсләһәт верәндә онларын мәсләһәтини һәлимликлә вә миннәтдарлыгла гәбул етмәлијик. Әҝәр белә даврансаг, онда мүгәддәс хидмәтимизин кејфијјәти даһа да артаҹаг.

ӨЈРӘНДИКЛӘРИНДӘН БАШГАЛАРЫНА КӨМӘК ЕТМӘК ҮЧҮН ИСТИФАДӘ ЕТ

12, 13. Мүгәддәс Јазылардан нәзакәтлә истифадә едәрәк өјрәнән адама руһани аддымлар атмаға неҹә көмәк едә биләрсән?

12 Прискилла, Акила вә Аполлос кими, биз дә башгалары үчүн хејир-дуа ола биләрик. Марагланан инсана руһани аддымлар атмасына мане олан шејләрин өһдәсиндән ҝәлмәјә көмәк едәндә өзүнү неҹә һисс едирсән? Јахуд әҝәр ағсаггалсанса, һәмиманлын Мүгәддәс Китабдан вердијин мәсләһәтин чәтин анда она көмәк етдији үчүн миннәтдарлығыны билдирәндә һансы һиссләри кечирирсән? Шүбһәсиз, Мүгәддәс Китабдан истифадә едәрәк башгаларына һәјатларыны јахшылашдырмаға көмәк етмәк инсана мәмнунлуг вә севинҹ ҝәтирир *. Бәс бу мәгсәдә неҹә наил олмаг олар?

13 Илјас пејғәмбәрин ҝүнләриндә бир чох исраиллиләр ики даш арасында галмышдылар, билмирдиләр һәгиги ибадәтин тәрәфини тутсунлар, јохса јалан ибадәтин. Илјасын һәмин инсанлара вердији мәсләһәтин бу ҝүн Мүгәддәс Китабы өјрәнән вә руһани аддымлар атмаға тәрәддүд едән инсанлара бөјүк көмәји дәјә биләр. (1 Падшаһлар 18:21 ајәсини оху.) Инди исә башга бир вәзијјәтә нәзәр салаг: әҝәр өјрәнән инсан достларынын вә ја аилә үзвләринин неҹә мүнасибәт ҝөстәрәҹәјиндән горхурса, онунла бирликдә Јешаја 51:12, 13 ајәләринин үзәриндә дүшүнәрәк өјрәнәнин Јеһоваја ибадәт етмәк гәрарыны мөһкәмләндирә биләрсән. (Ајәләри оху.)

14. Мүгәддәс Китабдан лазым олан ајәләри хатырламаға нә көмәк едәҹәк?

14 Сөзсүз, Мүгәддәс Китабда охуҹулары руһландыран, ислаһ едән вә мөһкәмләндирән чохлу сөзләр вар. Анҹаг сәндә суал јарана биләр: «Бәс мәнә лазым олан ајәләри неҹә тапа биләрәм?» Мүгәддәс Китабы һәр ҝүн оху вә Аллаһын дүшүнҹәләри үзәриндә фикирләш. Бунунла сәнин Аллаһын Кәламындан сөз еһтијатын јаранаҹаг вә лазым ҝәлдикдә Јеһованын руһу онлары јадына салмаға көмәк едәҹәк (Марк 13:11; 1 Јәһја 14:26 ајәсини оху) *.

15. Аллаһын Кәламыны даһа јахшы баша дүшмәјә нә көмәк едәҹәк?

15 Сүлејман падшаһ кими, сән дә һәр һансы теократик мәсулијјәтләри јеринә јетирмәк үчүн Јеһовадан мүдриклик дилә (2 Салн. 1:7—10). Гәдим пејғәмбәрләри тәглид едәрәк Јеһова вә Онун нијјәтләри барәдә дәгиг билијә јијәләнмәк үчүн Мүгәддәс Китабда «ҹидди ахтарыш вә әтрафлы тәдгигат» апар (1 Пет. 1:10—12). Һәвари Павел Тимотеји иман вә мүкәммәл тәлим сөзләри илә бәсләнмәјә тәшвиг едирди (1 Тим. 4:6). Бунун сајәсиндә сән башгаларына руһани ҹәһәтдән көмәк едәҹәк, ејни заманда да, өз иманыны мөһкәмләндирәҹәксән.

АЛЛАҺЫН КӘЛАМЫНЫ ОХУМАГ БИЗИ МҮДАФИӘ ЕДИР

16. а) Мүгәддәс Јазылары һәр ҝүн диггәтлә арашдырмаг веријалылара һансы фајданы ҝәтирди? б) Мүгәддәс Китабы һәр ҝүн охумаг нәјә ҝөрә бизим үчүн дә олдугҹа ваҹибдир?

16 Македонијанын Верија шәһәриндән олан јәһудиләр адәтләри үзрә «Мүгәддәс Јазылары һәр ҝүн диггәтлә арашдырырдылар». Павел хош хәбәри һәмин јәһудиләрә тәблиғ едәндә онлар онун сөзләрини Мүгәддәс Јазылардан билдикләри илә мүгајисә едирдиләр. Онлар Павелин сөзләринин һәгигәт олдуғуна  әмин олдулар вә «иман ҝәтирди»ләр (Һәв. иш. 17:10—12). Бундан ајдын ҝөрүнүр ки, Мүгәддәс Китабы һәр ҝүн охумаг Јеһоваја олан иманымызы мөһкәмләндирир. Сағ галыб Аллаһын јени дүнјасында јашамаг үчүн бу ҹүр иман, јәни «үмид едилән шејләрин мүтләг јеринә јетәҹәјинә олан әминлик», олдугҹа ваҹибдир (Ибр. 11:1).

17, 18. а) Мөһкәм иман вә мәһәббәт мәсиһчинин мәҹази үрәјини неҹә горуја биләр? б) Үмид бизи тәһлүкәләрдән неҹә һифз едә биләр?

17 Буна ҝөрә дә Павел јазмышды: «Биз исә ҝүндүзә мәхсус олдуғумуз үчүн ајыг галмалы, инам вә мәһәббәт зиреһини ҝејмәли, хилас үмидини дәбилгә кими башымыза гојмалыјыг» (1 Салон. 5:8). Әсҝәр үрәјини дүшмәнин һәмләләриндән горумалы олдуғу кими, мәсиһчи дә мәҹази үрәјини ҝүнаһын ҝүҹлү тәсириндән һифз етмәлидир. Мәсиһчи Аллаһын вәдләринә мөһкәм иман, еләҹә дә Она вә һәмиманлыларына мәһәббәт инкишаф етдирәндә ән јахшы руһани зиреһи ҝејинәрәк мәҹази үрәјини горумуш олур. О, әлиндән ҝәләни етмәјә чалышыр ки, Аллаһын рәғбәтини итирмәсин.

18 Павел һәмчинин дәбилгәни, «хилас үмидини» дә хатырлатмышды. Гәдим дөврдә әсҝәр дөјүш заманы башыны горумасајды, асанлыгла һәјатыны итирә биләрди. Амма јахшы дәбилгәнин сајәсиндә о, ҝүҹлү зәрбәләрдән башыны горуја билирди. Јеһованын Кәламыны арашдырсаг, Онун бизи хилас едәҹәјинә үмидимиз артаҹаг. Мөһкәм үмид бизи дөнүкләрдән вә онларын гангрена кими јајылан бош сөһбәтләриндән һифз етмәјә гадирдир (2 Тим. 2:16—19). Һәмчинин үмидимиз бизи Јеһованын мүһакимә етдији давраныш тәрзинә сөвг едән кәсләрә јох демәк гәтијјәтимизи мөһкәмләндирәҹәк.

ХИЛАСА АПАРАН ЈОЛ

19, 20. Нәјә ҝөрә биз Аллаһын Кәламыны јүксәк гијмәтләндиририк вә она дәјәр вердијимизи неҹә ҝөстәрә биләрик? («Јеһова мәнә еһтијаҹ дујдуғум шеји вериб» адлы чәрчивәјә бах.)

19 Бу системин сону јахынлашдыгҹа Аллаһын Кәламына етибар етмәк даһа чох ваҹибдир. Орадан әлдә етдијимиз мәсләһәтләр бизә пис вәрдишләри тәрҝитмәјә вә ҝүнаһлы мејилләримизлә мүбаризә апармаға көмәк едәҹәк. Мүгәддәс Китабын бизи руһландырмасы вә тәсәлли вермәси сајәсиндә Шејтанын вә бу дүнјанын сынагларынын өһдәсиндән ҝәлә биләҹәјик. Јеһованын Өз Кәламында тәгдим етдији рәһбәрлијин көмәјилә биз һәјата апаран јолда галаҹағыг.

20 Аллаһын ирадәси одур ки, «һәр ҹүр инсан» хилас олсун. «Һәр ҹүр инсан» дедикдә һәм Јеһованын хидмәтчиләри, һәм дә хош хәбәри тәблиғ етдијимиз вә өјрәтдијимиз инсанлар нәзәрдә тутулур. Хилас олмаг истәјән һәр бир кәс «һәгигәт барәсиндә дәгиг билијә» јијәләнмәлидир (1 Тим. 2:4). Беләликлә, хилас олмаг үчүн Мүгәддәс Китабы охумаг вә Аллаһдан илһам алмыш рәһбәрлијә риајәт етмәк олдугҹа ваҹибдир. Бәли, Мүгәддәс Китабы һәр ҝүн охумагла биз Јеһованын дәјәрли һәгигәт Кәламыны нә дәрәҹәдә јүксәк гијмәтләндирдијимизи ҝөстәририк (Јәһ. 17:17).

^ абз. 12 Әлбәттә, биз Мүгәддәс Китаб мәсләһәтләриндән башгаларына тәзјиг ҝөстәрмәк вә ја мүһакимә етмәк үчүн истифадә етмирик. Јеһова бизә сәбир вә хејирхаһлыг ҝөстәрдији кими, биз дә Мүгәддәс Китабы өјрәнән инсанларла елә давранмалыјыг (Мәз. 103:8).

^ абз. 14 Бәс әҝәр сән һансыса сөзү хатырлајырсан, анҹаг онун һансы ајәдә јазылдығыны билмирсәнсә, онда неҹә? Һәмин сөзләрә Мүгәддәс Китабын архасындакы индексдә бахмагла, чох еһтимал ки, ајәни тапа биләрсән.