Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ојанын!  |  № 6, 2016

 АИЛӘЛӘРӘ КӨМӘК | АИЛӘ

Араныздакы һөрмәти горујун

Араныздакы һөрмәти горујун

ПРОБЛЕМ

Әр: «Биз аилә гуранда арвадымла мәним һөрмәт анлајышымыз фәргләнирди. О демәк дејилди ки, биримиз сәһв идик, биримиз дүз. Садәҹә, фәргли дүшүнүрдүк. Мән һесаб едирдим ки, арвадым мәнимлә даһа һөрмәтҹил тәрздә данышмалыдыр».

Арвад: «Биз тәрәфләрдә уҹадан, емосија илә данышмаг, башгаларынын сөзүнү кәсмәк ади һал иди, буну һөрмәтсизлик сајмырдыг. Анҹаг јолдашымын бөјүдүјү мүһит тамам фәргли иди».

Аиләдә һөрмәти ајда-илдә бир дәфә јох, һәмишә ҝөстәрмәк лазымдыр. Һәјат јолдашыныза неҹә һөрмәт ҝөстәрә биләрсиниз?

НӘЈИ БИЛМӘЛИСИНИЗ?

Кишиләрин һөрмәтә даһа чох еһтијаҹы вар. Аллаһын Кәламында дејилир: «Һәр кәс арвадыны өзүнү севдији кими севсин, арвад да әринә дәрин һөрмәт бәсләсин» (Ефеслиләрә 5:33). Һәм әр, һәм дә арвад истәјәр ки, һөрмәт ҝөрсүн, амма бу истәк кишидә даһа чохдур. Камил * адлы бир киши дејир: «Киши һисс етмәлидир ки, проблеми һәлл едә, вәзијјәти јолуна гоја вә аиләсини доландыра билир». Арвад кишинин бу хүсусијјәтләринә дәјәр версә, бунун нәинки әринә, елә өзүнә дә хејри олаҹаг. Фамилә адлы бир гадын дејир: «Әримә һөрмәт ҝөстәрәндә онун мәнә севҝиси даһа да артыр».

Гадынларын да һөрмәтә еһтијаҹы вар. Бу мәнтиглидир, ахы әр арвадына һөрмәт ҝөстәрмирсә, ону неҹә севә биләр? Даниел дејир: «Мән арвадымын фикирләринә, тәклифләринә, о ҹүмләдән һиссләринә һөрмәт ҝөстәрмәлијәм. Бәзән онун кечирдији һиссләри баша дүшмәмәјим, о демәк дејил ки, она лагејд јанашмалыјам».

Һәрәнин өзүнә ҝөрә һөрмәт анлајышы вар. Ола билсин, фикирләширсиниз ки, һәјат јолдашыныза һөрмәт едирсиниз. Бәс о, белә һесаб едир? Мәгаләнин әввәлиндәки «Проблем» башлығы алтында фикрини бөлүшән гадын бу саһәдә бәзи дәјишикликләр етди. О дејир: «Һәтта әримә гаршы һөрмәтсизлик етмәдијими дүшүнсәм дә, о белә һесаб етмирдисә, баша дүшүрдүм ки, мән дәјишмәлијәм, о јох».

 НӘ ЕДӘ БИЛӘРСИНИЗ?

  • Јолдашынызда хошунуза ҝәлән үч хүсусијјәти јазын. Бу хүсусијјәтләр сизә һәјат јолдашыныза даһа чох һөрмәт етмәјә көмәк едә биләр.

  • Бир һәфтә әрзиндә јолдашынызын сизә мүнасибәтинә јох, сизин она мүнасибәтинизә диггәт јетирин. Мәсәлән, нөвбәти саһәләрдә.

Сөздә. Бир тәдгигата әсасән, «хошбәхт, мөһкәм аиләләрдә әр-арвад арасында фикирајрылығы оларкән бир тәнгидлә јанашы беш хош сөз ишләдирләр. Бошанмаг үзрә олан әр-арвадлар исә дедикләри тәнгиддән сонра бир дәнә дә олсун (0,8) хош сөз демирләр» * (Мүгәддәс Китаб принсипи: Мәсәлләр 12:18).

Өзүнүздән сорушун: «Јолдашымла һөрмәтҹил тәрздә данышырам? Даһа чох тәнгид едирәм, јохса тәрифләјирәм? Шикајәт вә тәклифләрими билдирәндә сәс тонум неҹә олур?» Бу суаллара вердијиниз ҹаваблары јолдашыныз тәсдигләјәрди? (Мүгәддәс Китаб принсипи: Колослулара 3:13).

Мәсләһәт. Һәјат јолдашынызы һәр ҝүн азы бир дәфә тәрифләмәји гаршыныза мәгсәд гојун. Тәклиф: Вәрәгә јаздығыныз хүсусијјәтләри јадыныза салын. Јолдашынызда бәјәндијиниз хүсусијјәтләри она һәмишә дејин (Мүгәддәс Китаб принсипи: 1 Коринфлиләрә 8:1).

Давранышда. Ајсел адлы бир гадын дејир: «Ев ишләринә вахтым чох ҝедир. Јолдашым һәр шеји јеринә гојанда вә јемәк једији габы јујанда һисс едирәм ки, о мәним зәһмәтими гијмәтләндирир вә мән өзүмү дәјәрли һисс едирәм».

Өзүнүздән сорушун: «Јолдашыма мүнасибәтим она һөрмәт етдијими ҝөстәрир? Она кифајәт гәдәр вахт вә диггәт ајырырам?» Бу суаллара вердијиниз ҹаваблары јолдашыныз тәсдигләјәрди?

Мәсләһәт. Һансы үч саһәдә јолдашынызын сизә һөрмәт етмәсини истәјәрдиниз? Һәр икиниз буну бир вәрәгә јазын, сонра исә вәрәгләри бир-биринизлә дәјишин. Икиниз дә чалышын јолдашынызын гејд етдији саһәләрә диггәт јетирәсиниз. Фикринизи өз өһдәнизә дүшән саһәләрә ҹәмләјин. Бириниз бу ҹүр давранса, икинҹи тәрәф дә ејни шеји едәҹәк

^ абз. 8 Бәзи адлар шәртидир.

^ абз. 14 «Ten Lessons to Transform Your Marriage» адлы китабдан.

Әлава мәлумат

ХОШБӘХТ АИЛӘМ

Аиләнизин хошбәхтлији үчүн Аллаһын Кәламына мүраҹиәт един

Ики садә суал никаһынызы јахшылашдырмаға көмәк едә биләр.