Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ојанын!  |  № 2, 2017

Әјләнҹә сәнајесиндә ҹиндарлыг вә супергәһрәманлар ҹәлбедиҹи шәкилдә тәгдим олунса да, јаддан чыхармамалыјыг ки, бу кими шејләрлә истәнилән тәмас чох тәһлүкәлидир

 ҮЗ ГАБЫҒЫНДАКЫ МӨВЗУ | ФӨВГӘЛТӘБИИ ҺАДЫСӘЛӘР. ОНЛАРЫН АРХАСЫНДА НӘ ДУРУР?

Аллаһ ҹиндарлыға неҹә бахыр?

Аллаһ ҹиндарлыға неҹә бахыр?

ЕЛӘ инсанлар вар ки, ҹиндарлыгла, фөвгәлтәбии гүввәләрлә бағлы олан шејләрә инанмыр. Онлар һесаб едир ки, бу кими шејләр ссенаристләрин ујдурмасыдыр. Лакин Мүгәддәс Китабда бу барәдә тамамилә фәргли бир шеј јазылыб. Орада ҹиндарлыгла бағлы ајдын хәбәрдарлыг вар: «Аранызда... рәммал, сеһрбаз, фала бахан, ҹадуҝәр, овсунчу, ҹиндар јанына ҝедән, ҝәләҹәји дејән, өлүләри чағыран олмамалыдыр». Нә үчүн? «Чүнки бу ишләри ҝөрән һәр кәс Јеһованын * ҝөзүндә мәнфурдур... Сиз Аллаһыныз Јеһованын гаршысында ләкәсиз олмалысыныз» (Ганунун тәкрары 18:10—13).

Нәјә ҝөрә Аллаһ ҹиндарлығын бүтүн нөвләрини бу дәрәҹәдә ҹидди мүһакимә едир?

МӘНШӘЈИ МӘНФУРДУР

Мүгәддәс Китабда дејилир ки, Аллаһ јер күрәсини јаратмаздан өнҹә ҝөјдә милјонларла руһани варлыг — мәләк јаратмышды (Әјјуб 38:4, 7; Вәһј 5:11). Аллаһ онлара ирадә азадлығы вермишди, јәни онлар Аллаһа итаәт едиб-етмәмәји өзләри сечә биләрдиләр. Әфсуслар олсун ки, онларын бәзиләри Аллаһа үсјан етди вә ҝөјдәки мөвгеләрини тәрк едиб јер үзүндә гатма-гарышыглыг јаратмаға башладылар. Нәтиҹәдә, бүтүн дүнја зоракылыгла долду (Јарадылыш 6:2—5, 11; Јәһуда 6).

Мүгәддәс Китабда јазылыб ки, һәмин шәр гүввәләр милјонларла инсанлары алдадараг өз тәсирләри алтында сахлајырлар (Вәһј 12:9). Онлар һәтта  инсанын ҝәләҹәји билмәк арзусундан истифадә едирләр (1 Ишмуил 28:5, 7; 1 Тимутијә 4:1).

Бәзән инсана елә ҝәлә биләр ки, фөвгәлтәбии гүввәләр инсанлара көмәк едир (2 Коринфлиләрә 11:14). Әслиндә исә онлар инсанларын зеһнини кор едир ки, Аллаһа јахынлаша билмәсинләр (2 Коринфлиләрә 4:4).

Аллаһын Кәламында дејилир ки, шәр гүввәләрлә әлагә јаратмаг һеч дә зәрәрсиз әјләнҹә дејил. Буна ҝөрә дә Иса Мәсиһин шаҝирдләри инсанлара шәр гүввәләр һагда һәгигәти ачанда «сеһрбазлыгла мәшғул оланлардан хејли адам китабларыны јығыб һамынын ҝөзү гаршысында јандырды», һалбуки бу китаблар чох баһалы иди (Һәвариләрин ишләри 19:19).

«Јенијетмә гызларын ҹадуҝәрлијә ҝетдикҹә даһа чох мејил салмасына сәбәб телевизорда, филмләрдә вә китабларда ҹадуҝәр гадынларын ҹазибәли вә ҝөзәл тәсвир олунмасыдыр» («Gallup Youth Survey», 2014).

Ејнилә, бизим дөврүмүздә дә бир чох инсан сеһрбазлыгла, ҹиндарлыгла бағлы ишләрлә, әјләнҹәләрлә әлагәсини кәсиб. Мисал үчүн, Хәјаләнин * 12 јашы оланда ҝәләҹәкдә баш верәҹәк бәзи һадисәләри вә тәһлүкәләри габагҹадан дејә билирди. О, карт васитәсилә синиф јолдашларынын фалына бахырды. Дедикләри дүз чыхдығы үчүн ҝетдикҹә оккултизмлә даһа чох марагланмаға башлады.

Хәјалә елә дүшүнүрдү ки, инсанлара көмәк етмәк үчүн Аллаһ она верҝи вериб. О дејир: «Амма мәни бир шеј нараһат едирди. Башгалары үчүн картлары охуја билсәм дә, онлары өзүм үчүн охуја билмирдим. Һалбуки чох истәјирдим өз ҝәләҹәјими дә билим».

Хәјаләнин бунунла бағлы ҹавабсыз галан чохлу суаллары вар иди. Буна ҝөрә о, Аллаһа дуа едир. Бир мүддәт сонра Јеһованын  Шаһидләри илә таныш олур вә Мүгәддәс Китабы өјрәнмәјә башлајыр. Хәјалә Мүгәддәс Китабдан өјрәнир ки, ҝәләҹәји демәк баҹарығы һеч дә Аллаһдан дејилмиш. О һәмчинин ону да өјрәнир ки, Аллаһы разы салмаг үчүн инсан ҹиндарлыгла бағлы бүтүн әшјалардан азад олмалыдыр (1 Коринфлиләрә 10:21). Хәјалә белә дә едир. О, оккултизмлә бағлы бүтүн әшјаларыны вә китабларыны атыр. Һал-һазырда Хәјалә Аллаһын Кәламындан өјрәндикләрини башгалары илә бөлүшүр.

Намигин јенијетмә јашларындан фөвгәлтәбии гәһрәманларла бағлы фантастик әсәрләр охумаға бөјүк марағы вар иди. О дејир: «Өзүмү мән јашда олан фантастик супергәһрәманларын јериндә тәсәввүр едирдим». О, ҝетдикҹә маҝија вә шејтани ајинләрлә бағлы китаблар охумаға башлады. Намиг дејир: «Бу кими шејләр мәнә о гәдәр мараглы иди ки, онлара аид китаблар охумаг вә филмләрә бахмаг истәјирдим».

Лакин Намиг Мүгәддәс Китабы мүталиә едәндән сонра баша дүшдү ки, нә охудуғуна фикир вермәлидир. О дејир: «Мән ҹиндарлыгла әлагәси олан һәр шејин сијаһысыны тутдум вә һамысыны мәһв еләдим. Өзүм үчүн ваҹиб бир шеј өјрәндим. 1 Коринфлиләрә 10:31 ајәсиндә јазылыб: “Һәр шеји елә един ки, Аллаһ шәрәфләнсин”. Инди нәсә охујанда өзүмдән сорушурам: “Бурада Аллаһы наразы салан һәр һансы бир шеј јохдур ки?” Варса, демәли, бу шеј Аллаһы шәрәфләндирмир вә мән о китабы охумурам».

Тәсадүфи дејил ки, Аллаһын Кәламы чыраға бәнзәдилир. Мүгәддәс Китаб чыраг кими ишыг сачараг ҹиндарлығын әсл үзүнү ашкара чыхарыр (Зәбур 119:105). Бундан әлавә, орада дејилир ки, ҝүн ҝәләҹәк, инсанлар шәр гүввәләрин тәсириндән тамамилә азад олаҹаглар. Бунун бәшәријјәтә бөјүк тәсири олаҹаг. Зәбур 37:10, 11 ајәләриндә дејилир: «Аз галыб! Артыг пис адам олмајаҹаг, јеринә бахаҹагсан, о, јохдур. Һәлимләр јер үзүнә саһиб олаҹаг, әмин-аманлығын боллуғундан һәзз алаҹаглар».

^ абз. 3 Мүгәддәс Китаба әсасән, Аллаһын ады.

^ абз. 10 Бу мәгаләдәки адлар шәртидир.