Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  Ијул 2017

Гој Јеһова бүтүн нијјәтләрини ҝерчәкләшдирсин!

Гој Јеһова бүтүн нијјәтләрини ҝерчәкләшдирсин!

«Гој сәадәтин Јеһова олсун, О, гәлбинин мурадыны чин едәр» (ЗӘБ. 37:4).

НӘҒМӘ: 135, 81

1. Ҝәнҹләр һансы гәрары вермәлидирләр вә нәјә ҝөрә һәддән артыг нараһат олмаға дәјмәз? (Мәгаләнин әввәлиндәки шәклә бахын.)

ҜӘНҸЛӘР, јәгин разылашарсыныз ки, сәјаһәтә чыханда һара ҝетмәк истәдијимизи әввәлҹәдән планлашдырмалыјыг. Һәјат да, санки, бир сәјаһәтдир, мәнзилбашыны габагҹадан фикирләшмәк лазымдыр. Дүздүр, план гурмаг адама чәтин ҝәлә биләр. Һеда адлы бир баҹы дејир: «Фикирләшәндә ки, ҝәләҹәјинлә бағлы гәрар вермәлисән адамы һәјәҹан бүрүјүр». Амма, әзиз ҝәнҹләр, нараһат олмајын. Ҝөрүн Јеһова Аллаһ хидмәтчиләринә неҹә әминлик верир: «Тәлаша дүшмә, сәнин Аллаһын Мәнәм. Сәнә гүввәт верәҹәјәм, сәнә көмәк едәҹәјәм» (Әшј. 41:10).

2. Нәјә ҝөрә әминсиниз ки, Јеһова Аллаһ сизин хошбәхт олмағынызы истәјир?

2 Әзиз ҝәнҹләр, Јеһова Аллаһ сизә ҝәләҹәјинизи ағылла гурмағы мәсләһәт ҝөрүр (Ваиз 12:1; Мәт. 6:20). Чүнки О, сизин хошбәхт олмағынызы истәјир. Онун јаратдыглары, мәсәлән, ҝөз охшајан ҝөзәлликләр, көнүл ачан сәсләр, дадлы-дадлы немәтләр буна данылмаз сүбутдур. Онун Өз хидмәтчиләрини ән ҝөзәл һәјат јолу илә апармасы да бәндәләринин рифаһыны дүшүндүјүнү ҝөстәрир. Јеһова Аллаһ Онун мәсләһәтини рәдд едәнләрдән наразы галыр, онлар барәдә белә дејир: «Хошума ҝәлмәјән шејләри үстүн тутдунуз... Гулларым севинәҹәк, сиз исә хәҹаләт чәкәҹәксиниз. Гулларым үрәк ҹошгунлуғундан һајгыраҹаг» (Әшј.  65:12—14). Амма биз һәјатда дүзҝүн сечим едәндә Јеһова уҹалыр (Мәс. 27:11).

ХОШБӘХТЛИЈӘ АПАРАН ГӘРАРЛАР

3. Јеһова Аллаһ бизә ҝәләҹәк планларла бағлы нә мәсләһәт ҝөрүр?

3 Бәс Јеһова ҝәнҹләрә ҝәләҹәк планларла бағлы нә мәсләһәт ҝөрүр? Аллаһ инсаны елә јарадыб ки, о, јалныз Јараданы танымагла вә Она ибадәт етмәклә хошбәхт ола биләр (Зәб. 128:1; Мәт. 5:3). Һејванлар исә јалныз јемәк, ичмәк вә төрәмәк үчүн јараныб. Аллаһ инсанлара да бу баҹарығы бәхш едиб, амма О истәмир ки, биз јалныз бу шејләрлә кифајәтләнәк. Аллаһ бизим һәјатда али мәгсәдләрә ҹан атараг хошбәхт олмағымызы истәјир. Мүгәддәс Китабда дејилир ки, Халигимиз мәһәббәт Аллаһыдыр, хошбәхт Аллаһдыр вә «инсаны Өз бәнзәриндә» јарадыб (2 Кор. 13:11; 1 Тим. 1:11; Јар. 1:27). Одур ки, нә гәдәр чох Јараданымыза бәнзәмәјә чалышсаг, бир о гәдәр хошбәхт олаҹағыг. Һәвариләрин ишләри 20:35 ајәси һәјатла бағлы ваҹиб бир һәгигәти ачыр: «Вермәк алмагдан даһа чох хошбәхтлик ҝәтирир». Јәгин бу ајәнин гүдрәтини сиз дә һисс етмисиниз. Буна ҝөрә дә Јеһова истәјир ки, ҝәләҹәк планларымыз инсанлара вә Она бәсләдијимиз мәһәббәтә әсаслансын. (Мәтта 22:36—39 ајәләрини охујун.)

4, 5. Иса Мәсиһи хошбәхт едән нә иди?

4 Иса Мәсиһ ҝәнҹләр үчүн ҝөзәл өрнәкдир. Тәбии ки, о да ушаг оланда бүтүн ушаглар кими ҝүлүб ојнајырды. Мүгәддәс Китабда дејилдији кими «ҝүлмәјин өз вахты,.. рәгс етмәјин өз вахты» вар (Ваиз 3:4). Амма Иса ибадәтә дә вахт ајырырды, о, Мүгәддәс Јазылары арашдырараг Јеһова илә достлуғуну мөһкәмләндирирди. Онун 12 јашы оланда дини мөвзуларда елә сөһбәт апармышды ки, мәбәддәки мүәллимләр онун «зәкасына вә ҹавабларына» һејран галмышдылар (Лука 2:42, 46, 47).

5 Мәсиһ јеткин бир инсан кими дә хошбәхт һәјат сүрүрдү. Ону хошбәхт едән нә иди? О билирди ки, Јеһова ондан «јохсуллара мүждә» вермәји вә «корлара ишығы» тәблиғ етмәји ҝөзләјир (Лука 4:18). Аллаһын ирадәсини јеринә јетирмәк ону хошбәхт едирди. Зәбур 40:8 ајәсиндә Исанын һиссләри бу ҹүр ҝөзәл сөзләрлә тәсвир олунуб: «Еј Аллаһым, истәјини јеринә јетирмәкдән һәзз алырам». Инсанлара сәмави Атасы барәдә елм вермәк она зөвг верирди. (Лука 10:21 ајәсини охујун.) Бир дәфә Иса бир гадынла ибадәтлә бағлы сөһбәт едәндән сонра шаҝирдләринә демишди: «Мәним јемәјим мәни ҝөндәрәнин ирадәсини јеринә јетирмәк вә Онун бујурдуғу иши тамамламагдыр» (Јәһ. 4:31—34). Аллаһа вә инсанлара мәһәббәт ҝөстәрмәк Исаны хошбәхт едирди. Бу саһәдә Исадан өрнәк ҝөтүрсәниз, сиз дә хошбәхт олаҹагсыныз.

6. Ҝәләҹәк планларынызла бағлы јеткин мәсиһиләрлә мәсләһәтләшмәк нәјә ҝөрә фајдалы олар?

6 Бир чох баҹы-гардашымыз ҝәнҹ јашларында өнҹүл кими хидмәт етмәклә хошбәхтлији дадыб. Бу мәсиһиләрлә ҝәләҹәк планларынызла бағлы мәсләһәтләшә биләрсиниз. Чүнки Мәсәлләр 15:22 ајәсиндә дејилир: «Мәсләһәтсиз нијјәт боша чыхар, мәсләһәт верән чох оларса, уғур олар». Чох еһтимал ки, бу баҹы-гардашлар таммүддәтли хидмәтин һәјат мәктәби олдуғуну, инсана өмүрлүк фајда ҝәтирдијини дејәҹәк. Иса ҝөјдә јашајанда Јеһовадан ҝөзәл тәлим алмышды, амма о, јер үзүнә ҝәләндә дә чох шеј өјрәнмишди. Мәсәлән, инсанлара хош хәбәри чатдырмағын вә сынаглар гаршысында нөгсансыз галмағын севинҹини дадмышды. (Әшија 50:4 ајәсини охујун; Ибр. 5:8; 12:2.) Ҝәлин ҝөрәк таммүддәтли хидмәтин һансы нөвләри ҝәнҹләри, сөзүн әсл мәнасында, хошбәхт едә биләр.

ШАҜИРД ҺАЗЫРЛАМАГ ИШИНӘ ҸАН ГОЈМАҒА ДӘЈӘР

7. Нәјә ҝөрә ҝәнҹләрин чоху шаҝирд һазырламаг ишини севир?

7 Иса Мәсиһ давамчыларына демишди: «Ҝедин... шаҝирд һазырлајын,.. сизә әмр етдијим һәр шејә риајәт етмәји онлара өјрәдин» (Мәт. 28:19, 20). Әҝәр гәрарыныз шаҝирд һазырламаг ишиндә фәал иштирак етмәкдирсә, әмин ола биләрсиниз ки, ән ҝөзәл јолу сечмисиниз, чүнки бу иш Аллаһа шәрәф ҝәтирир. Һәр бир ишдә олдуғу кими  бу ишдә дә тәҹрүбәли олмаг үчүн вахт лазымдыр. Ҝәнҹ оланда өнҹүл хидмәтинә башлајан Тимоти адлы бир гардаш дејир: «Таммүддәтли хидмәти чох севирәм, чүнки бу јолла Јеһоваја севҝими изһар едирәм. Тәзә-тәзә бир нәфәрлә дә олсун Мүгәддәс Китаб дәрси башлаја билмәмишдим, амма сонралар башга әразијә көчдүм вә орада бир ајын ичиндә бир нечә нәфәрлә дәрс кечмәјә башладым. Өјрәнәнләрдән бири ибадәт ҝөрүшләринә ҝәлирди. Субај Гардашлар үчүн Мүгәддәс Китаб Мәктәбини * битирәндән сонра јени тәјинат алдым. Орада исә дөрд нәфәрә дәрс кечирдим. Инсанлара Мүгәддәс Китабы өјрәтмәји севирәм, чүнки мүгәддәс руһун онлары неҹә дәјишдијини өз ҝөзләримлә ҝөрүрәм» (1 Салон. 2:19).

8. Бәзи ҝәнҹ мәсиһиләр шаҝирд һазырламаг ишиндә фәал иштирак етмәк үчүн нә едирләр?

8 Бәзи ҝәнҹләр исә шаҝирд һазырламаг ишиндә фәал иштирак етмәк үчүн јени дил өјрәнир. Мәсәлән, Шимали Америкадан олан Ҹејкоб адлы гардаш јазыр: «Синифимиздә ушагларын чоху вјетнамдилли иди. Онлара Јеһова Аллаһ һагда данышмаг истәјирдим, буна ҝөрә дә гаршыма мәгсәд гојдум ки, онларын дилини өјрәним. Онда мәним једди јашым вар иди. Вјетнам дилини әсасән “Ҝөзәтчи гүлләси” журналыны инҝилис вә вјетнам дилләриндә тутушдурараг өјрәнирдим. Һәмчинин вјетнамдилли јығынҹагдакы баҹы-гардашларла достлашдым. 18 јашым оланда өнҹүл хидмәтинә башладым. Сонра Субај Гардашлар үчүн Мүгәддәс Китаб Мәктәбиндә тәлим алдым. Бунун һазыркы тәјинатымда, вјетнамдилли групдакы хидмәтимдә мәнә бөјүк көмәји дәјир, чүнки бу групда мәндән башга ағсаггал јохдур. Вјетнамлылара тәблиғ едәндә мәним вјетнам дилини билмәјим онларын чохуну тәәҹҹүбләндирир. Онлар мәни евләринә дәвәт едирләр вә әксәр һалларда Мүгәддәс Китабы өјрәнмәјә башлајырлар. Онлардан бәзиләри вәфтиз олмаға һазырлашыр». (Һәвариләрин ишләри 2:7, 8 ајәләри илә мүгајисә един.)

9. Нәјә ҝөрә демәк олар ки, шаҝирд һазырламаг иши бир мәктәбдир?

9 Шаҝирд һазырламаг ишинин өзү дә бир мәктәбдир. Бу тапшырығы јеринә јетирәндә инсан үнсијјәт гурмағы, нәзакәтли олмағы өјрәнир, еләҹә дә онда өзүнәинам јараныр (Мәс. 21:5; 2 Тим. 2:24, һаш.). Бу ишин севинҹ ҝәтирән ән өнәмли ҹәһәти одур ки, онун сајәсиндә иманымызын тәмәли олан тәлимләри даһа јахшы гаврајырыг. Һәмчинин шаҝирд һазырламаг ишиндә иштирак етмәклә Јеһова Аллаһла әмәкдашлыг едирик (1 Кор. 3:9).

10. Инсанларын һәгигәтә һај вермәдији әразидә хидмәт едән тәблиғчиләр шаҝирд һазырламаг ишиндә неҹә севинҹ дуја биләр?

10 Бәзи әразиләрдә чох аз адам тәблиғ етдијимиз мүждәни гәбул едир. Әҝәр сизин дә әразидә вәзијјәт охшардырса, јаддан чыхармајын ки, шаҝирд һазырламаг иши бүтүн тәблиғчиләрин сәфәрбәр олдуғу ишдир. Һәгигәти ахтаран инсанлары тапмаг үчүн бүтүн јығынҹаг чалышыр. Мүгәддәс Китабы өјрәниб нәһајәтдә мәсиһи олан инсаны бир тәблиғчи тапса да, нәзәрә алмалыјыг ки, бу ахтарышда һамымыз иштирак етмишик вә бу севинҹә һамымыз шәрикик. Мәсәлән, Брандон адлы бир гардаш инсанларын һәгигәтә мараг ҝөстәрмәдији әразидә 9 ил өнҹүл кими хидмәт едиб. О дејир: «Тәблиғ етмәји чох хошлајырам, чүнки буну Јеһова биздән ҝөзләјир. Өнҹүл хидмәтинә мәктәби битирәндә башламышам. Јығынҹағымыздакы ҝәнҹ гардашлары руһландырмағы севирәм вә онларын хидмәтдә уғурлар әлдә етдијини ҝөрәндә севинҹ дујурам. Субај Гардашлар үчүн Мүгәддәс Китаб Мәктәбини битирәндән сонра јени тәјинат алдым. Бу әразидә баҹы-гардашларын дәрс кечдији инсанлар аддым атса да, мәним дәрс кечдијим инсанлардан бири белә вәфтиз олмајыб. Амма јенә дә хошбәхтәм, шаҝирд һазырламаг ишиндә там шәкилдә иштирак етмәк гәрарыма ҝөрә пешман дејиләм» (Ваиз 11:6).

НИЈЈӘТИН ҺАРА МӘНЗИЛИН ОРА

11. Бир чох ҝәнҹ хидмәтин һансы нөвүндә иштирак едир?

11 Јеһова бизим гаршымызда хидмәтлә бағлы  чохлу гапылар ачыб. Мәсәлән, бир чох ҝәнҹ тикинти ишиндә көнүллү кими хидмәт едир. Бу ҝүн јүзләрлә ибадәт евинә еһтијаҹ вар. Ибадәт евләринин иншасы Јеһова Аллаһа шәрәф ҝәтирән мүгәддәс хидмәтдир вә бу ишдә иштирак етмәк сизи хошбәхт едәҹәк. Мүгәддәс хидмәтин диҝәр нөвләриндә олдуғу кими бу ишдә дә әмәкдашлыг етдијиниз инсанларла хош вахт кечирәҹәксиниз. Тикинти иши һәмчинин сизә ҝөзәл хүсусијјәтләрә јијәләнмәјә көмәк едәҹәк, мәсәлән, иши кејфијјәтли ҝөрмәји, чалышган олмағы вә нәзарәтчиләрлә әмәкдашлыг етмәји өјрәнәҹәксиниз.

Таммүддәтли хидмәтдә иштирак едәнләрин немәти болдур (11—13 абзаслара бахын)

12. Өнҹүл хидмәти инсаны хидмәтин башга нөвләринә неҹә һазырлајыр?

12 Кевин адлы гардаш дејир: «Ушаглыгдан арзум иди ки, бөјүјәндә таммүддәтли хидмәтдә иштирак едим. 19 јашымда арзума чатдым, өнҹүл хидмәтинә башладым. Доланмаг үчүн јарымҝүнлүк ишдә ишләјирдим, бәнналыг едән бир гардашын јанында чалышырдым. Бу ишдә дам вурмағы, гапы-пәнҹәрә дүзәлтмәји өјрәндим. Сонралар тәбии фәлакәтдән зәрәрчәкмишләрә көмәк ишиндә иштирак етдим, ики ил ибадәт евләринин вә баҹы-гардашларын шәхси евләринин бәрпасында чалышдым. Ешидәндә ки, Ҹәнуби Африкада тикинти ишчиләринә еһтијаҹ вар әризә долдурдум вә мәни орадакы тикинти бригадасына дәвәт етдиләр. Һал-һазырда Африкада хидмәт едирәм. Бурада биз бир нечә һәфтәдән бир јени ибадәт еви тикирик. Бригада үзвләри илә аилә кимијик. Биз бирҝә јашајыр, бирҝә Мүгәддәс Китабы арашдырыр, бирҝә ишләјирик. Мән һәмчинин һәр һәфтә јерли баҹы-гардашларла тәблиғә чыхырам. Һеч билмәздим ки, ушаг вахты вердијим гәрар бир ҝүн мәни бу гәдәр хошбәхт едәҹәк».

13. Бејтелдә хидмәт едән ҝәнҹләрә нә севинҹ ҝәтирир?

13 Бир вахтлар өнҹүл кими хидмәт едән ҝәнҹләрин бәзиләри һазырда Бејтелдә хидмәт едир. Бејтел хидмәти ән ҝөзәл һәјат јолудур, чүнки орада ҝөрүлән бүтүн ишләр Јеһова Аллаһа ибадәтин бир һиссәсидир. Бејтеллиләр  инсанлара һәгигәти чатдыран нәшрләрин һазырланмасында иштирак едирләр. Дастин адлы бир бејтелли дејир: «Таммүддәтли хидмәтдә иштирак етмәк арзусу мәндә доггуз јашында јараныб. Мәктәби битирән кими өнҹүл хидмәтинә башладым. Ил јарымдан сонра мәни Бејтелә дәвәт етдиләр. Бурада әввәлҹә чап машыныны ишләтмәји, сонра исә компүтер програмлашдырмасыны өјрәндим. Бејтелдә шаҝирд һазырламаг ишинин бүтүн дүнјада неҹә ирәлиләдијини билаваситә ҝөрмәк имканым вар. Бурада хидмәт етмәји севирәм, чүнки ҝөрдүјүмүз иш инсанлара Јеһова Аллаһа јахынлашмаға көмәк едир».

ҜӘЛӘҸӘКЛӘ БАҒЛЫ ҺАНСЫ ПЛАНЛАРЫНЫЗ ВАР?

14. Таммүддәтли хидмәтә һазыр олмаг үчүн ҝәнҹләр нә етмәлидир?

14 Таммүддәтли хидмәтә һазыр олмаг үчүн ҝәнҹләр нә етмәлидир? Бу хидмәтдә уғурлу олмаг истәјән ҝәнҹ ән әсасы мәсиһи хүсусијјәтләринә јијәләнмәлидир. Бунун үчүн ҝәнҹ мәсиһи Мүгәддәс Китабы дәриндән арашдырмалы, охудугларындан нәтиҹә чыхармалы вә јығынҹаг ҝөрүшләриндә шәрһ вермәлидир. Мәктәбдә охудуғу мүддәтдә бир тәблиғчи кими тәҹрүбә топламалыдыр. Тәблиғ едәндә нәзакәтлә суаллар вермәклә вә ҹавабы сәбирлә динләмәклә инсанлара диггәт ҝөстәрмәји өјрәнмәлидир. Ибадәт евинин тәмизлијиндә вә тәмириндә иштирак етмәк дә онлара бу ишдә көмәк едә биләр. Јеһова һәлим вә үзүјола инсанларла әмәкдашлыг етмәји севир. (Зәбур 110:3 ајәсини охујун; Һәв. 6:1—3.) Һәвари Булус Тимутини өзү илә тәблиғ сәјаһәтинә ҝөтүрмүшдү, чүнки гардашлар Тимути һаггында ағыздолусу данышырдылар (Һәв. 16:1—5).

15. Таммүддәтли хидмәтчи олмаг истәјән ҝәнҹ өзүнү доландырмаг үчүн нәји планлашдырмалыдыр?

15 Һамы кими таммүддәтли хидмәтчиләрә дә өзләрини доландырмаг үчүн ишләмәк лазымдыр (Һәв. 18:2, 3). Јарымҝүнлүк иш таммүддәтли хидмәтдә иштирак етмәк үчүн чох әлверишлидир. Бу хидмәт нөвүндә иштирак етмәк истәјән ҝәнҹләр мүәјјән пешәјә јијәләнә биләр. Онлара төвсијә едәрдик ки, планлары илә бағлы ағсаггалларла, рајон нәзарәтчиси илә вә өнҹүлләрлә мәсләһәтләшсинләр, һансы ишин өнҹүлләр үчүн практики олдуғуну сорушсунлар. Һәмчинин, әзиз ҝәнҹләр, Мүгәддәс Китабда дејилдији кими, һәр ишинизи Јеһоваја тапшырын, онда нијјәтиниз баш тутар (Мәс. 16:3; 20:18).

16. Ҝәнҹ јашларындан таммүддәтли хидмәтдә иштирак етмәк ҝәнҹләри ҝәләҹәјә неҹә һазырлајыр?

16 Јеһова истәјир ки, ҝәнҹләр хошбәхт һәјат үчүн «мөһкәм тәмәл гојсунлар». (1 Тимутијә 6:18, 19 ајәләрини охујун.) Таммүддәтли хидмәт ҝәнҹләрә бу хидмәт нөвүндә иштирак едән диҝәр баҹы-гардашларла сых үнсијјәт етмәјә шәраит јарадыр вә мәсиһи кими инкишаф етмәјә көмәк едир. Таммүддәтли хидмәтдә олан диндашларымызын чоху дејир ки, ҝәнҹ јашларындан бу хидмәтдә иштирак етмәјин онлара аилә гуранда бөјүк көмәји дәјиб. Субај вахты өнҹүл кими хидмәт едән мәсиһиләрин чоху аилә гурандан сонра да һәјат јолдашлары илә бирҝә бу хидмәти давам етдирибләр (Ром. 16:3, 4).

17, 18. Нәјә ҝөрә таммүддәтли хидмәтчи олмаг үчүн план гурмаг кифајәт дејил?

17 Таммүддәтли хидмәтә һазыр олмаг үчүн тәкҹә план гурмаг кифајәт дејил, ҝәнҹләр бу хидмәтдә иштирак етмәји үрәкдән арзуламалыдыр. Зәбур 20:4 ајәсиндә мәзмурчу дејир ки, гој Јеһова «сәнә үрәјинә ҝөрә версин, бүтүн нијјәтләрин ҝерчәкләшсин». Буна ҝөрә дә, ҝәнҹләр һәјатларыны нәјә сәрф етмәк истәдикләрини индидән дүшүнмәлидирләр. Јеһованын бу ҝүн һансы иши һәјата кечирдијини нәзәрә алмалыдырлар вә ҝөтүр-гој етмәлидирләр ки, бу ишә неҹә төһфә верә биләрләр. Сонра исә Јеһованы разы салан планлар гурмалыдырлар.

18 Таммүддәтли хидмәт инсана дәрин мәмнунлуг ҝәтирир, чүнки бу, Јараданымызы уҹалдан шәрәфли јолдур. Одур ки, Зәбур 37:4 ајәсиндә дејилдији кими «гој сәадәтин Јеһова олсун, О, гәлбинин мурадыны чин едәр».

^ абз. 7 Падшаһлыг Мүждәчиләри Мәктәби илә әвәз олунуб.