Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  Август 2017

Сәбирлә ҝөзләмәјә әзмлисиниз?

Сәбирлә ҝөзләмәјә әзмлисиниз?

«Сиз дә сәбирли олун» (ЈАГ. 5:8).

НӘҒМӘ: 114, 79

1, 2. а) Биздә «Нә вахтадәк?» суалынын јаранмасына сәбәб нә ола биләр? б) Нәјә ҝөрә Јеһованын кечмишдә јашамыш садиг хидмәтчиләринин дә бу суалы вермәси бизә тәсәлли верир?

«НӘ ВАХТАДӘК?» Бу суалы Јеһованын садиг пејғәмбәрләри олан Әшија вә Һәбгуг вермишди (Әшј. 6:11; Һәб. 1:2). Давуд пејғәмбәр 13-ҹү мәзмуру јазанда дүз дөрд дәфә бу ифадәни ишләтмишди (Зәб. 13:1, 2). Иса Мәсиһ дә әтрафындакы инсанларын имансызлығыны ҝөрүб онлара бу суалы вермишди (Мәт. 17:17). Тәәҹҹүблү дејил ки, биз дә вахташыры олараг «Нә вахтадәк?» дејә аһ-налә едирик.

2 Бәс инсаны «Нә вахтадәк?» демәјә нә вадар едә биләр? Ола билсин, һагсызлыгла үзләширик, јахуд гоҹалыг, хәстәлик бизи үзүр, бәлкә дә, ахырзаманын чәтинликләриндән јорулмушуг (2 Тим. 3:1). Ја да киминсә хасијјәти бизи тәнҝә ҝәтириб. Јеһованын фәрјадымызы дилә ҝәтирмәјимизи гәбаһәт сајмадығыны билмәк үрәјимизи раһатлашдырыр.

3. Чәтин вәзијјәтлә үзләшәндә бизә нә көмәк едә биләр?

3 Јухарыдакы вәзијјәтләрлә үзләшәндә бизә нә көмәк едә биләр? Исанын шаҝирди Јагуб демишди: «Беләликлә, гардашлар,  Ағамызын һүзуру вахтына гәдәр сәбирли олун» (Јаг. 5:7). Бәли, һәр биримиздә бу илаһи хүсусијјәт олмалыдыр.

СӘБИР НӘДИР?

4, 5. а) Сәбир һансы хүсусијјәтләрлә бағлыдыр? б) Шаҝирд Јагуб сәбирин ваҹиблијини һансы нүмунә әсасында изаһ едир? (Мәгаләнин әввәлиндәки шәклә бахын.)

4 Мүгәддәс Китабда гејд олунур ки, сәбир мүгәддәс руһун бәһрәсидир. Аллаһын көмәји олмадан гејри-камил инсанлар јетәринҹә сәбирли ола билмәзләр. Сәбир Аллаһын әнамыдыр вә сәбирли олмаг Она олан севҝимизи сүбут едир. Һәмчинин сәбир башгаларына мәһәббәтимизин тәзаһүрүдүр. Сәбирсизлик мәһәббәт телләрини зәифләтдији һалда, сәбир ҝөстәрмәк онлары мөһкәмләндирир (1 Кор. 13:4; Гал. 5:22). Сәбир бир чох мәсиһи хүсусијјәтләриндә өзүнү бүрузә верир. Мәсәлән, чәтинликләрә мәрдликлә таб ҝәтирмәјә көмәк едән дөзүм хүсусијјәтиндә (Кол. 1:11; Јаг. 1:3, 4). Һагсызлыгла үзләшәндә һејиф чыхмамаг, истәнилән вәзијјәтдә мәтин галмаг да сәбирин тәзаһүрләриндәндир. Бундан әлавә, Мүгәддәс Китаб бизи чағырыр ки, биз ҝөзләмәјин лазым олдуғуну баша дүшәк. Сәбирин бу јөнү Јагуб 5:7, 8 ајәләриндә вурғуланыр. (Ајәләри охујун.)

5 Јеһованын һәрәкәтә кечәҹәји вахты ҝөзләмәјин ваҹиб олдуғуну нә үчүн гәбул етмәлијик? Һәвари Јагуб бизим вәзијјәтимизи әкинчинин ишинә бәнзәдир. Әкинчи тохуму әкмәк үчүн нә гәдәр зәһмәт чәксә дә, һаванын неҹә кечәҹәји вә мәһсулун нә вахт јетишәҹәји ондан асылы дејил. О, вахты сүрәтләндирә билмәз. Әкинчи баша дүшүр ки, торпагдан «гијмәтли мәһсул» ҝөтүрмәк үчүн сәбирлә ҝөзләмәлидир. Биз дә баша дүшмәлијик ки, Јеһованын вәдләринин ҝерчәкләшәҹәји вахты тезләшдирмәк бизим әлимиздә дејил (Марк 13:32, 33; Һәв. 1:7). Одур ки, әкинчи кими, сәбирлә ҝөзләмәлијик.

6. Микә пејғәмбәрин нүмунәсиндән нә өјрәнирик?

6 Јашадығымыз зәманәдәки шәраит Микә пејғәмбәрин дөврү илә охшардыр. О, Әһәз падшаһын һакимијјәти заманы, рүшвәтхорлуғун баш алыб ҝетдији дөврдә јашамышды. Вәзијјәт о гәдәр бәрбад иди ки, Микә пејғәмбәр о дөврүн инсанлары һагда «әлләри пис ишләрдә маһирдир» дејә бәһс едир. (Микә 7:1—3 ајәләрини охујун.) Пејғәмбәр вәзијјәти дәјишмәјә гадир олмадығыны дәрк едирди. Бәс о, нә едә биләрди? О, демишди: «Мән исә ҝөзүмү Јеһоваја дикәҹәјәм, мәнә гуртулуш верән Аллаһы сәбирлә ҝөзләјәҹәјәм. Аллаһым мәни ешидәҹәк» (Мик. 7:7). Биз дә онун кими сәбирлә ҝөзләмәлијик.

7. Јеһованын вәдләрини неҹә ҝөзләмәлијик?

7 Әҝәр Микә пејғәмбәр кими иман саһибијиксә, Јеһованы һәвәслә ҝөзләјәҹәјик. Ахы биз едамыны ҝөзләјән мәһбусун вәзијјәтиндә дејилик. Мәһбусун ҝөзләмәкдән башга чыхыш јолу јохдур вә бу ҝөзләнтинин сону һеч дә үрәк ачан дејил. Бизим вәзијјәтимиз исә тамамилә фәрглидир! Биз Јеһованы ҝөзләјирик, чүнки билирик ки, О, әбәди һәјат вәдини дүз вахтында һәјата кечирәҹәк! Буна ҝөрә дә биз «һәр шејә севинҹлә вә сәбирлә» таб ҝәтиририк (Кол. 1:11, 12). Дејинә-дејинә ҝөзләмәк, Јеһованын нә үчүн тез һәрәкәтә кечмәдијинә ҝөрә ҝилејләнмәк исә Она ағыр ҝедәр (Кол. 3:12).

СӘБИР НҮМУНӘЛӘРИ

8. Кечмишдә јашамыш мөмин инсанларын нүмунәсини арашдыраркән нәјә диггәт јетирмәлијик?

8 Јеһованын ҝүнүнү сәбирлә ҝөзләмәјә  бизә нә көмәк едә биләр? Кечмишдә јашамыш мөмин инсанларын нүмунәси. Онлар да Јеһованын вәдләринин јеринә јетмәсини сәбирлә ҝөзләмишдиләр (Ром. 15:4). Бу инсанларын нүмунәсини арашдыраркән нөвбәти амилләрә диггәт јетирин: 1) онлар нә гәдәр ҝөзләмәли олмушдулар, 2) нәјә ҝөрә ҝөзләмәјә һазыр идиләр вә 3) сәбирләри неҹә мүкафатландырылмышды.

Ибраһим пејғәмбәр нәвәләри Ејслә Јагубун дүнјаја ҝәлмәсини узун илләр ҝөзләмәли олмушду (9 вә 10-ҹу абзаслара бахын)

9, 10. Ибраһим пејғәмбәрлә ханымы Сара Јеһованын вәдинин јеринә јетмәсини нә гәдәр ҝөзләмишдиләр?

9 Ибраһим пејғәмбәрлә ханымы Саранын нүмунәси үзәриндә дүшүнәк. Онлар «вәдләри иман вә сәбирлә мирас аланлардан» идиләр. Јеһова Аллаһ пејғәмбәрә вәд вермишди ки, ону мүбарәк гылаҹаг вә өвладларыны чохалдаҹаг. Аллаһын Кәламында охујуруг ки, Ибраһим пејғәмбәр «сәбир ҝөстәрәндән сонра бу вәди алды» (Ибр. 6:12, 15). Вәдин ҝерчәкләшмәсини ҝөрмәк үчүн дә о сәбир ҝөстәрмәли иди, чүнки бу вәд дәрһал һәјата кечмәди. Јеһованын Ибраһимлә бағладығы әһд е. ә. 1943-ҹү илин 14 нисанында гүввәјә минди. Бу, Ибраһим пејғәмбәр, ханымы Сара вә ев әһлинин Фәрат чајыны кечиб Вәд едилмиш дијара ҝирдији вахта тәсадүф етмишди. Ибраһим пејғәмбәр 25 ил ҝөзләдикдән сонра, е. ә. 1918-ҹи илдә онун оғлу Исһаг доғулду. 60 илдән сонра исә, е. ә. 1858-ҹи илдә нәвәләри Ејс вә Јагуб дүнјаја ҝәлди (Ибр. 11:9).

10 Бәс Ибраһим пејғәмбәр Вәд едилмиш дијарда торпаг мирас алды? Мүгәддәс Китаб бу суала белә ҹаваб верир: «[Јеһова] бурада [Ибраһимә] һеч бир мүлк, һәтта бир гарыш торпаг да мирас вермәди. Ибраһим пејғәмбәрин һәлә  ушағы јох иди, амма Аллаһ вәд етди ки, бу торпағы она вә ондан сонра ҝәләҹәк өвладларына мирас верәҹәк» (Һәв. 7:5). Ибраһим пејғәмбәр Фәрат чајыны кечәндән јалныз 430 ил сонра онун нәсли бир халг олуб һәмин торпағы мирас алды (Чых. 12:40—42; Гал. 3:17).

11. Ибраһим пејғәмбәр нә үчүн Јеһованы ҝөзләмәјә һазыр иди вә о, сәбринә ҝөрә һансы мүкафатлары алаҹаг?

11 Ибраһим пејғәмбәр Јеһованын вәдинин јеринә јетирәҹәјинә әмин олдуғу үчүн Ону ҝөзләмәјә һазыр иди. Пејғәмбәрин Аллаһа иманы сонсуз иди. (Ибраниләрә 11:8—12 ајәләрини охујун.) Бахмајараг ки, бу вәдин там шәкилдә неҹә јеринә јетдијини өз ҝөзү илә ҝөрмәк она нәсиб олмады, о, өмрүнүн ахырынадәк сәбирлә ҝөзләди. Бир тәсәввүр един, Ибраһим пејғәмбәр јер үзү Ҹәннәтдә дириләндә неҹә севинәҹәк! Јәгин Мүгәддәс Китабда онун һаггында вә нәсли барәсиндә нә гәдәр мәлумат олдуғуну биләндә һејрәтләнәҹәк *. Бундан әлавә, Јеһованын вәд олунмуш өвладла бағлы вәдинин јеринә јетмәсиндә онун әвәзсиз ролу олдуғуну өјрәнәндә исә севинҹи јерә-ҝөјә сығмајаҹаг. Шүбһәсиз, о, бу гәдәр ҝөзләдијинә ҝөрә пешман олмајаҹаг.

12, 13. Һәзрәти Јусиф нә үчүн сәбир етмәли иди вә о, һансы мүсбәт әһвал-руһијјәдә иди?

12 Ибраһим пејғәмбәрин нәтиҹәси һәзрәти Јусиф дә сәбирлә ҝөзләмәјә һазыр иди. О, бөјүк һагсызлығын гурбаны олмушду. 17 јашы оланда гардашлары ону гул кими сатыр. Сонра Јусиф ағасынын арвадыны зорламаға ҹәһд ҝөстәрмәк бөһтаны илә һәбсә атырлар (Јар. 39:11—20; Зәб. 105:17, 18). Санки, о, салеһ әмәлләринә ҝөрә мүкафат алмаг әвәзинә, ҹәза алырды. Амма 13 ил сонра һәр шеј бирдән бирә дәјишилди. Һз. Јусиф зиндандан чыхды вә Мисирдә фирондан сонра икинҹи адам олду (Јар. 41:14, 37—43; Һәв. 7:9, 10).

13 Ҝөрдүјү әдаләтсизликләр Јусифи гәддарлашдырды? Јеһоваја иманыны сарсытды? Гәтијјән! Бәс она сәбирлә ҝөзләмәјә нә көмәк еләди? Јеһоваја олан иманы! О баша дүшүрдү ки, һәр шеј Јеһованын нәзарәти алтындадыр. Буну гардашларына дедији сөзләрдән дә ҝөрмәк олар: «Горхмајын. Мәҝәр мән Аллаһам? Сиз мәнә пислик етмәк истәсәниз дә, Аллаһ һәр шеји хејрә дөндәрди. Ҝөрдүјүнүз кими нә гәдәр адамын һәјатыны хилас етди» (Јар. 50:19, 20). Бәли, Јусифин бу гәдәр ҝөзләмәјинә дәјирди.

14, 15. а) Давуд пејғәмбәрин сәбри нә үчүн диггәтә лајигдир? б) Пејғәмбәрә сәбирлә ҝөзләмәјә нә көмәк еләди?

14 Давуд пејғәмбәр дә бир чох һагсызлыгларын гурбаны олуб. Ҝәнҹ јашларында Исраилин нөвбәти падшаһы кими мәсһ олунмасына бахмајараг, о, јалныз 15 илдән сонра Јәһуда әһли үзәриндә падшаһ олмушду (2 Ишм. 2:3, 4). Һәмин илләр әрзиндә Талут падшаһ бир мүддәт ону тәгиб етмиш вә өлдүрмәјә ҹәһд ҝөстәрмишди *. Буна ҝөрә дә Давуд пејғәмбәр ҹаныны гуртармаг үчүн өз јурдундан дидәрҝин дүшмүш, ҝаһ гајаларда, ҝаһ да сәһралыгда јашамаг мәҹбуријјәтиндә галмышды. Талут падшаһ дөјүшдә һәлак оландан сонра да Давуд пејғәмбәр бүтүн Исраил халгы үзәриндә падшаһ олмаг  үчүн 7 ил ҝөзләмәли олмушду (2 Ишм. 5:4, 5).

15 Давуд пејғәмбәр нә үчүн сәбирлә ҝөзләмәјә һазыр иди? О, дөрд дәфә «нә вахтадәк» ифадәсини ишләтдији мәзмурда бу суала ҹаваб верир: «Сәнин мәһәббәтинә ҝүвәнирәм, үрәјим вердијин гуртулушдан шадланаҹаг. Јеһованын шәнинә нәғмә дејәрәм, јахшылығыны мәндән әсирҝәмәјиб» (Зәб. 13:5, 6). Давуд пејғәмбәр Јеһованын мәһәббәтинә ҝүвәнирди. О, гуртулушуну шадјаналыгла ҝөзләјирди вә Јеһованын она вердији ҝөзәл немәтләр үзәриндә дүшүнүрдү. Бәли, Давуд пејғәмбәр әбәс јерә ҝөзләмәдијинә әмин иди.

Јеһова Аллаһ биздән сәбирли олмағы ҝөзләдији кими, Өзү дә сәбир ҝөстәрир

16, 17. Јеһова вә Иса Мәсиһ сәбирлә ҝөзләмәјә даир бизә һансы ҝөзәл нүмунәни гојуб?

16 Јеһова биздән сәбирли олмағы ҝөзләдији кими, Өзү дә сәбир ҝөстәрир. Бу саһәдә О, бизә нүмунәдир. (2 Бутрус 3:9 ајәсини охујун.) Јеһова мин илләрдир ки, Әдән бағында јаранан мәсәләнин там шәкилдә һәлл олунаҹағы, һәмчинин бүтүн дүнјада адынын уҹалаҹағы вахты «сәбирлә ҝөзләјир». Нәтиҹәдә, «үмидини Она бағлајанлар», јәни сәбирлә Ону ҝөзләјәнләр тәсәввүр едилмәјәҹәк дәрәҹәдә немәтләр алаҹаглар (Әшј. 30:18, һашијә).

17 Иса Мәсиһ дә ҝөзләмәјә әзмли иди. Јер үзүндә сынаглар гаршысында сәдагәтини там горујандан вә ерамызын 33-ҹү илиндә фидјә гурбанлығынын дәјәрини Аллаһа тәгдим едәндән сонра падшаһ олмаг үчүн 1914-ҹү илә кими ҝөзләмишди (Һәв. 2:33—35; Ибр. 10:12, 13). Иса Мәсиһин дүшмәнләринин тамамилә мәһв олмасы исә јалныз онун Миниллик һакимијјәтинин сонунда баш верәҹәк (1 Кор. 15:25). Бу, аз мүддәт дејил. Амма ҝөзләмәјә дәјәр!

БИЗӘ НӘ КӨМӘК ЕДӘҸӘК?

18, 19. Сәбирлә ҝөзләмәјә һазыр олмаға бизә нә көмәк едә биләр?

18 Шүбһәсиз, һәр биримиз сәбирли олмалы вә әзмлә ҝөзләмәлијик. Бәс бизә бу саһәдә нә көмәк едә биләр? Јеһовадан мүгәддәс руһ диләмәк. Унутмајын ки, сәбир мүгәддәс руһун бәһрәсидир (Ефес. 3:16; 6:18; 1 Салон. 5:17—19). Јеһоваја јалварын ки, сизә сәбирлә дөзмәјә көмәк еләсин.

19 Һәмчинин Ибраһим, Јусиф вә Давуд пејғәмбәрә Јеһованын вәдләринин ҝерчәкләшмәсини сәбирлә ҝөзләмәјә нә көмәк етдијини унутмајын. Онлара Јеһоваја олан иманлары вә етибарлары көмәк етмишди. Бу инсанлар диггәтләрини өзләринә вә шәхси раһатлыгларына ҹәмләмәмишдиләр. Онларын алдығы бол немәтләр үзәриндә дүшүнмәк бизә сәбир ҝөстәрмәјә көмәк едәҹәк.

20. Биздән нә тәләб олунур?

20 Буна ҝөрә дә сынагларла мүбаризә апарсаныз да, сәбирли олмағы гаршыныза мәгсәд гојун. Ола билсин, бәзән биз дә «Еј Јеһова, нә вахтадәк?» дејә фәрјад едәҹәјик (Әшј. 6:11). Амма Јеһованын мүгәддәс руһунун вердији ҝүҹ сајәсиндә Әрәмја пејғәмбәр кими нөвбәти сөзләри дејәҹәјик: «Јеһова нәсибимдир... Одур ки, сәбир едиб Сәни ҝөзләјәҹәјәм» (Мәрс. 3:21, 24).

^ абз. 11 Јарадылыш китабынын тәхминән 15 фәсли Ибраһим пејғәмбәрә һәср олунуб. Бундан әлавә, Инҹилдә Ибраһим пејғәмбәр һаггында 70 дәфәдән чох бәһс едилир.

^ абз. 14 Талут падшаһ тахта чыхандан тәхминән ики ил сонра давранышы уҹбатындан Јеһованын ҝөзүндән дүшдү. Буна бахмајараг, Јеһова Талута өләнә кими, јәни 38 ил һакимијјәт сүрмәсинә иҹазә вермишди (1 Ишм. 13:1; Һәв. 13:21).