Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  феврал 2017

Фидјә. Аллаһдан назил олан «камил немәт»

Фидјә. Аллаһдан назил олан «камил немәт»

«Һәр бир ҝөзәл пај вә һәр бир камил немәт [Атадан] назил олур» (ЈАГ. 1:17).

НӘҒМӘ: 148, 109

1. Фидјә һансы немәтләрә јол ачыб?

ИСА МӘСИҺИН фидјә гурбанлығы чохлу немәтләрә јол ачыб. Фидјә сајәсиндә Адәмин салеһлик тәрәфдары олан өвладларынын бир ҝүн Аллаһын аиләсинин үзвү олмаг имканы вар. Фидјә һәмчинин гаршымызда әбәди вә хошбәхт һәјата гапы ачыб. Анҹаг Мәсиһин фидјә гурбанлығынын ҝәтирдији немәт садәҹә бәшәријјәтә ҝөзәл ҝәләҹәк вәди илә битмир. Мәсиһин өз һәјатыны көнүллү шәкилдә гурбан вермәси ҝөјдә вә јердә олан шүурлу варлыглар үчүн бөјүк әһәмијјәт кәсб едән ваҹиб бир мәсәлә илә сых бағлыдыр (Ибр. 1:8, 9).

2. а) Иса дуасында һансы ваҹиб мөвзулара тохунмушду? (Мәгаләнин әввәлиндәки шәклә бахын.) б) Бу мәгаләдә һансы мөвзу мүзакирә олунаҹаг?

2 Өлүмүндән вә һәјатыны фидјә олараг гурбан вермәздән тәхминән ики ил әввәл Иса Мәсиһ шаҝирдләринә нөвбәти сөзләрлә дуа етмәји өјрәтмишди: «Ҝөјләрдә олан Атамыз, гој адын мүгәддәс тутулсун. Гој Падшаһлығын ҝәлсин. Гој Сәнин ирадән ҝөјдә олдуғу кими, јердә дә јеринә јетсин» (Мәт. 6:9, 10). Ҝәлин  ҝөрәк фидјә Аллаһын адынын мүгәддәс тутулмасы, Онун Падшаһлығы вә нијјәтинин јеринә јетмәси илә неҹә бағлыдыр. Бу мүзакирә фидјәјә ҝөрә миннәтдарлығымызы даһа да артыраҹаг.

«ГОЈ АДЫН МҮГӘДДӘС ТУТУЛСУН»

3. Аллаһын ады өзүндә нәји әкс етдирир вә Шејтан Аллаһын адына неҹә бөһтан атды?

3 Иса Мәсиһ нүмунә үчүн дуасында илк нөвбәдә Аллаһын адынын мүгәддәс тутулмасы барәдә сөз ачмышды. Аллаһын ады Онун нә гәдәр уҹа, әзәмәтли вә мүгәддәс Аллаһ олдуғуну там шәкилдә әкс етдирир. Башга бир дуасында Иса Јеһова Аллаһа «мүгәддәс Атам» дејә мүраҹиәт етмишди (Јәһ. 17:11). Јеһова мүгәддәс олдуғу үчүн Онун тәсис етдији бүтүн ганун вә принсипләр дә мүгәддәсдир. Шејтан исә Әдән бағында Аллаһын инсанлар үчүн ганун гојмаг һүгугуну фитнәкарҹасына шүбһә алтына алды. Шејтан Јеһоваја гаршы јалан иттиһамлар ирәли сүрәрәк Онун мүгәддәс адына бөһтан атды (Јар. 3:1—5).

4. Иса Мәсиһ Аллаһын адыны мүгәддәс тутмаг үчүн нә етмишди?

4 Амма Иса үчүн Аллаһын ады чох әзиз иди (Јәһ. 17:25, 26). О, Аллаһын адыны мүгәддәс тутмаг үчүн вар ҝүҹү илә чалышырды. (Зәбур 40:8—10 ајәләрини охујун.) Јердә јашадығы һәјаты илә Иса сүбут етмишди ки, Аллаһ-Тааланын шүурлу варлыглар үчүн ганун вә гајдалар гојмаға там һаггы чатыр. Иса Мәсиһ Шејтанын фитнәси илә изтираблы өлүмә мәруз галса да, Атасына ахырадәк садиг галды. Өз сәдагәти илә Иса исбат етди ки, камил инсан Аллаһын адил ганунларына мүкәммәл шәкилдә табе ола биләр.

5. Аллаһын адыны мүгәддәс тутдуғумузу неҹә ҝөстәрә биләрик?

5 Бәс биз Аллаһын адыны әзиз тутдуғумузу неҹә ҝөстәрә биләрик? Өз давранышымызла. Јеһова Аллаһ биздән мүгәддәслик тәләб едир. (1 Бутрус 1:15, 16 ајәләрини охујун.) Мүгәддәс олмаг о демәкдир ки, инсан јалныз вә јалныз Јеһова Аллаһа ибадәт етмәли вә Она сидги-үрәкдән табе олмалыдыр, тәгибләрә мәруз галанда белә, вар ҝүҹү илә чалышыб Онун адил ганун вә принсипләринә садиг галмалыдыр. Биз салеһ ишләр ҝөрәндә нурумуз парлајыр вә Јеһова Аллаһын ады шәрәфләнир (Мәт. 5:14—16). Мүгәддәс олмагла, јәни өз һәјат тәрзимизлә Јеһова Аллаһын ганунларынын адил олдуғуну вә Шејтанын иттиһамларынын әсассыз олдуғуну сүбут едирик. Тәбии ки, биз камил дејилик, һамы кими, биз дә сәһвләр едирик. Амма сәһв едәндә биз үрәкдән төвбә едир вә Јеһованын адына ләкә ҝәтирән әмәлләри тәрҝитмәјә чалышырыг (Зәб. 79:9).

6. Гејри-камил олсаг да, Јеһова нәјин әсасында бизи салеһ сајыр?

6 Иса Мәсиһин фидјә гурбанлығы әсасында Јеһова Аллаһ бу гурбанлыға иман едәнләрин ҝүнаһларыны бағышлајыр. Аллаһ һәјатыны Она һәср едән инсанлара Өз хидмәтчиси олмаға изин верир. Јеһова мәсһ олунмуш мәсиһиләри оғлу, јердә јашамаға үмид едән мәсиһиләри исә салеһ досту адландырыр (Јәһ. 10:16; Ром. 5:1, 2; Јаг. 2:21—25). Беләҹә, фидјә артыг бу ҝүндән бизә Аллаһын ҝөзүндә салеһ олмаға вә онун адыны мүгәддәс тутмаға имкан верир.

«ГОЈ ПАДШАҺЛЫҒЫН ҜӘЛСИН»

7. Падшаһлыг фидјә сајәсиндә Аллаһын хидмәтчиләринә һансы немәтләри бәхш едәҹәк?

7 Иса Мәсиһ нүмунә үчүн дуасында Аллаһа нөвбәти хаһишлә мүраҹиәт етмишди: «Гој Падшаһлығын ҝәлсин». Бәс фидјә Аллаһын Падшаһлығы илә неҹә бағлыдыр? Фидјә 144 000 нәфәр мәсһ олунмушун  Мәсиһлә бирҝә сәмави Падшаһлыгда каһин вә падшаһ гисминдә хидмәт етмәси үчүн јол ачыб (Вәһј 5:9, 10; 14:1). Аллаһын Падшаһлығыны тәмсил едән Иса Мәсиһ вә онун һакимијјәт шәрикләри фидјәнин бәхш етдији немәтләри мин ил әрзиндә итаәткар бәшәријјәтә әрмәған едәҹәкләр. Дүнја ҹәннәтә дөнәҹәк, бүтүн салеһ инсанлар камиллијә јетишәҹәк вә бунун сајәсиндә Аллаһын јердә вә ҝөјдә јашајан хидмәтчиләри бирләшиб бир аилә олаҹаг (Вәһј 5:13; 20:6). Иса Шејтанын башыны әзәҹәк вә онун вурдуғу бүтүн зәрәри арадан галдыраҹаг (Јар. 3:15).

8. а) Иса шаҝирдләринә Аллаһын Падшаһлығынын әһәмијјәтини баша дүшмәјә неҹә көмәк етмишди? б) Биз Падшаһлығын тәрәфини тутдуғумузу неҹә ҝөстәрә биләрик?

8 Јердә јашадығы мүддәтдә Иса шаҝирдләринә Аллаһын Падшаһлығынын әһәмијјәтини баша дүшмәјә көмәк етмишди. Вәфтиз оландан дәрһал сонра Иса «Аллаһын Падшаһлығы һаггында мүждәни» һәр јанда ҹар чәкмәјә башлады (Лука 4:43). Ҝөјә галхмаздан өнҹә Иса Мәсиһин шаҝирдләринә сон тапшырығы бу олмушду: «Јерин уҹгарларынадәк мәним шаһидим олаҹагсыныз» (Һәв. 1:6—8). Бизим тәблиғ фәалијјәтимиз сајәсиндә бүтүн дүнјада инсанларын гаршысында фидјә барәдә мәлумат алмаг вә Аллаһын Падшаһлығынын тәбәәси олмаг имканы ачылыр. Мәсиһ гардашларына Падшаһлыг һаггындакы мүждәни бүтүн дүнјада тәблиғ етмәји бујуруб. Биз бу ишдә онлара көмәк етмәклә Падшаһлығын тәрәфини тутдуғумузу ҝөстәририк (Мәт. 24:14; 25:40).

«ГОЈ СӘНИН ИРАДӘН... ЈЕРИНӘ ЈЕТСИН»

9. Нәјә әсасән әмин ола биләрик ки, Јеһова бәшәријјәтә даир нијјәтини мүтләг јеринә јетирәҹәк?

9 Иса дуасында «гој Сәнин ирадән... јеринә јетсин» дејәндә нәји нәзәрдә тутурду? Јеһова Аллаһ һәр шејин јараданыдыр. О, нәјә «ол» дејирсә, олур (Әшј. 55:11). Аллаһ һеч вахт изин вермәз ки, Шејтан Онун бәшәријјәтлә бағлы нијјәтини јарыда гојсун. Јеһова Аллаһын әзәли нијјәти о иди ки, бүтүн Јер күрәсини Адәмлә Һәвванын камил өвладлары бүрүсүн (Јар. 1:28). Адәмлә Һәвва дүнјаја ушаг ҝәтирмәмиш өлсәјди, Аллаһын бу нијјәти јеринә јетмәјәҹәкди. Бу сәбәбдән онлар ҝүнаһ етсә дә, Аллаһ онлара дүнјаја өвлад ҝәтирмәјә изин верди. Јеһова фидјәјә иман едән һәр кәсә камиллијә јетишмәјә вә әбәди јашамаға имкан јарадыр. Јеһова Аллаһ инсанлары чох севир вә истәјир ки, Она итаәт едән һәр кәс Онун нијјәт етдији кими јашасын.

10. Өлән инсанлар үчүн фидјә сајәсиндә һансы имкан јаранаҹаг?

10 Бәс Јеһова һагда өјрәнмәк вә Она хидмәт етмәк имканы олмадан һәјатдан көчән милјардларла инсан барәдә нә демәк олар? Өлән инсанлар фидјә сајәсиндә јенидән һәјата гајыдаҹаглар. Сәмави Атамыз Јеһова онлары дирилдәрәк Онун нијјәти һаггында өјрәнмәк вә әбәди һәјаты газанмаг имканы верәҹәк (Һәв. 24:15). Аллаһымыз Јеһова инсанларын өлмәсини јох, јашамасыны истәјир. Һәјат мәнбәји олан Јеһова дирилтдији бүтүн инсанларын Атасы олур (Зәб. 36:9). Буна ҝөрә дә Иса Мәсиһин бујурдуғу кими Аллаһа «ҝөјләрдә олан Атамыз» дејә әл ачыб дуа етмәјимиз јериндәдир (Мәт. 6:9). Јеһова Исаја инсанлары дирилтмәк сәлаһијјәти вериб (Јәһ. 6:40, 44). Иса демишди: «Дирилмә вә һәјат мәнәм». Ҹәннәтдә о, буну сүбут едәҹәк (Јәһ. 11:25).

11. Аллаһын бөјүк издиһамла бағлы нијјәти нәдир?

11 Јеһова Аллаһ сәхавәтини јалныз бир нечә сај-сечмә инсана ҝөстәрмир. Мәсиһ  демишди: «Аллаһын ирадәсини јеринә јетирән мәним гардашым, баҹым вә анамдыр» (Марк 3:35). Јеһова истәјир ки, «һәр халга, һәр тајфаја, һәр үммәтә вә һәр дилә мәнсуб адамлардан ибарәт... бөјүк бир издиһам» Онун хидмәтчиси олсун. Мәсиһин фидјә гурбанлығына иман ҝәтирән вә Аллаһын ирадәсини јеринә јетирән һәр кәс «хиласымыза ҝөрә тахтда отуран Аллаһымыза вә Гузуја борҹлујуг» сөзләрини уҹадан дејән адамларын арасында олаҹаг (Вәһј 7:9, 10).

12. Аллаһын бәшәријјәт үчүн олан нијјәти Исанын дуасында өз әксини неҹә тапыр?

12 Иса Мәсиһин етдији дуада Аллаһын итаәткар бәшәријјәт үчүн олан нијјәти өз әксини тапыр. Бу дуаја ујғун олараг, биз Јеһова Аллаһын адыны мүгәддәс тутмаг үчүн вар ҝүҹүмүзлә чалышмалыјыг (Әшј. 8:13). Иса Мәсиһин адынын мәнасы «Јеһова хиласдыр» демәкдир. Буна ҝөрә дә бизим фидјә васитәсилә хилас олмағымыз Јеһованын адына иззәт вә шәрәф ҝәтирир. Аллаһ Өз Падшаһлығы васитәсилә итаәткар бәшәријјәтә фидјәнин ҝәтирдији фајдалары тәтбиг едәҹәк. Нүмунә үчүн дуа бизи әмин едир ки, һеч нә Аллаһа ирадәсини јеринә јетирмәјә мане ола билмәз (Зәб. 135:6; Әшј. 46:9, 10).

ФИДЈӘЈӘ ҜӨРӘ АЛЛАҺА МИННӘТДАРЫГ

13. Вәфтиз олунмагла биз нәји ҝөстәрмиш олуруг?

13 Фидјәјә ҝөрә Аллаһа миннәтдарлығымызы неҹә билдирмәк олар? Бунун ваҹиб үсулларындан бири фидјәјә имандан ирәли ҝәләрәк өзүмүзү Аллаһа һәср етмәк вә вәфтиз олунмагдыр. Вәфтиз олунмаг инсанын Јеһоваја мәхсус олдуғуну ҝөстәрир (Ром. 14:8). Бунунла биз, санки, Аллаһдан тәмиз виҹдан диләјирик (1 Бут. 3:21). Јеһова Мәсиһин фидјә гурбанлығы әсасында ҝүнаһларымызы бағышламагла бу диләјимизә  ҹаваб верир. Буна ҝөрә дә там әмин ки, Аллаһ вердији бүтүн вәдләри мүтләг ҝерчәкләшдирәҹәк (Ром. 8:32).

Фидјәјә ҝөрә миннәтдар олдуғумузу неҹә билдирә биләрик? (13 вә 14-ҹү абзаслара бахын)

14. Нәјә ҝөрә Јеһова Өз хидмәтчиләринә инсанлары севмәји бујурур?

14 Икинҹи үсул һамыја мәһәббәт ҝөстәрмәкдир. Јеһова Аллаһ һәр шеји мәһәббәтдән ирәли ҝәләрәк етдији үчүн истәјир ки, мәһәббәт Онун хидмәтчиләринин ән габарыг хүсусијјәти олсун (1 Јәһ. 4:8—11). Инсанлары севмәклә ҝөстәририк ки, ҝөјдәки Атамызын өвладлары олмаг истәјирик (Мәт. 5:43—48). Инсанлары севмәк әмри «Аллаһын Јеһованы... сев» әмриндән сонра ән ваҹиб әмрдир (Мәт. 22:37—40). Инсанлара мәһәббәт ҝөстәрмәјин јолларындан бири онлара Аллаһын Падшаһлығы һаггында хош хәбәри чатдырмагдыр. Мәһәббәт ҝөстәрмәклә биз Аллаһын ҹалалыны әкс етдирмиш олуруг. Инсанлары, хүсусилә дә иман баҹы-гардашларымызы севмәк әмринә риајәт едәндә «Онун мәһәббәти биздә камиллијә јетишир» (1 Јәһ. 4:12, 20).

ФИДЈӘ САЈӘСИНДӘ «ЈЕҺОВАДАН ТӘРАВӘТ МӨВСҮМҮ» ҜӘЛИР

15. а) Јеһова инди бизә һансы немәтләри верир? б) Ҝәләҹәкдә бизи һансы немәтләр ҝөзләјир?

15 Биз Мәсиһин фидјә гурбанлығына иман ҝәтирәндә Аллаһын әфв гапысы үзүмүзә тајбатај ачылыр. Аллаһын Кәламы бизи әмин едир ки, ҝүнаһларымызын бағышланмасы мүмкүндүр. (Һәвариләрин ишләри 3:19—21 ајәләрини охујун.) Јухарыда гејд етдијимиз кими, Јеһова фидјә сајәсиндә мәсһ олунмуш мәсиһиләри оғуллуға ҝөтүрүр (Ром. 8:15—17). Јерүзү ҹәннәтдә јашамаг үмиди олан бизләрә ҝәлдикдә исә, санки, Јеһованын әлиндә һәр биримизи ҝәләҹәкдә өвладлыға ҝөтүрәҹәјинә даир зәманәт сәнәди вар. Биз камиллијә јетишәндән вә сонунҹу сынагдан алныачыг чыхандан сонра Јеһова һәмин сәнәди бөјүк мәмнунијјәтлә имзалајаҹаг вә биз Онун севимли өвладлары олаҹағыг (Ром. 8:20, 21; Вәһј 20:7—9). Јеһованын өвладларына бәсләдији мәһәббәт һеч вахт түкәнмәдији үчүн, фидјәнин ҝәтирдији немәтләр дә түкәнмәјәҹәк (Ибр. 9:12). Јеһованын бу һәдијјәси өз дәјәрини әсла итирмәјәҹәк вә һеч кәс ону бизим әлимиздән ала билмәјәҹәк.

16. Фидјә бизи нәдән азад едир?

16 Сәмими гәлбдән төвбә едән кәсләр бир ҝүн Јеһова Аллаһын аиләсинин үзвү олаҹаг, Шејтан буна һеч ҹүр мане ола билмәз. Иса Мәсиһ һәјатыны бирдәфәлик гурбан верди, буна ҝөрә дә башга бир гурбана еһтијаҹ јохдур (Ибр. 9:24—26). Бу гурбанлығын сајәсиндә Адәмин уҹбатындан бүтүн бәшәријјәтә чыхарылан һөкм ләғв олунду. Биз артыг Шејтанын идарә етдији бу дүнјанын гулу дејилик вә өлүм горхусундан азадыг (Ибр. 2:14, 15).

17. Аллаһын мәһәббәти шәхсән сизи нәјә тәшвиг едир?

17 Јеһова һәмишә вердији вәдләри јеринә јетирир. Тәбиәт ганунлары һеч вахт дәјишмәдији кими, Јеһованын бизә вердији вәдләр дә дәјишмир, чүнки Јеһова дәјишмәјән Аллаһдыр (Мәл. 3:6). О, бизә тәкҹә һәјат јох, һәм дә Өз мәһәббәтини бәхш едир. Мүгәддәс Китабда дејилир: «Биз... Аллаһ севҝисини танымышыг вә бу мәһәббәтә инанмышыг. Аллаһ мәһәббәтдир» (1 Јәһ. 4:16). Јер күрәси ҹәннәт олаҹаг вә һәр кәс Аллаһын мәһәббәтини әкс етдирәҹәк. Ҝәлин биз дә нөвбәти сөзләри дејән садиг мәләкләрә гошулаг: «Алгыш, ҹалал, һикмәт, шүкран, шәрәф, гүдрәт вә ҝүҹ әбәдијјәт боју Аллаһымызын олсун! Амин!» (Вәһј 7:12).