Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  јанвар 2016

Руһ бизә тәлгин едир

Руһ бизә тәлгин едир

«Бу руһ бизә тәлгин едир ки, биз Аллаһын өвладларыјыг» (РОМ. 8:16).

НӘҒМӘ: 109, 108

1—3. Әллинҹи ҝүн бајрамында һансы ваҹиб һадисәләр баш верди вә һәмин һадисәләрлә Мүгәддәс Јазылардакы һансы пејғәмбәрлик јеринә јетди? (Мәгаләнин әввәлиндәки шәклә бахын.)

СӘҺӘР саат доггуз радәләри иди. Һәмин ҝүн Јерусәлимдәкиләр үчүн хүсуси иди, чүнки бајрам ҝүнү иди. Үстәлик, бајрам олдуғуна ҝөрә бу ҝүн һәм дә шәнбә ҝүнү сајылырды. Мәбәддә сәһәр гурбаны артыг тәгдим олунмушду. Инди исә баш каһин тәзә тахылдан һазырланмыш ики мајалы чөрәји јеллетмә тәгдимәси кими тәгдим етмәјә һазырлашырды. Һәр јердә хош аб-һава вар иди (Лав. 23:15—20). Бу тәгдимә буғда бичининин башладығыны ҝөстәрирди. Сөһбәт ерамызын 33-ҹү илинин Әллинҹи ҝүн бајрамындан ҝедир.

2 Мәбәддә бүтүн бунлар баш верән заман мәбәддән кәнарда, шәһәрдәки евләрин бириндә даһа ваҹиб бир һадисә ваге олаҹагды. Тәхминән 120 мәсиһи евин үст мәртәбәсиндәки отаға јығышыб «арамсыз дуа едирдиләр» (Һәв. 1:13—15). Һәмин ваҹиб һадисә мәһз бу шаҝирдләрлә баш верәҹәкди. Бу һадисә һәр Әллинҹи ҝүн бајрамында баш каһинин јеринә јетирдији ајинләрлә сых бағлы иди. Бу һадисә илә һәм дә 800 ил әввәл Јуил пејғәмбәрин дедији пејғәмбәрлик јеринә јетәҹәкди (Јуил 2:28—32; Һәв. 2:16—21). Ахы нә баш верәҹәкди? Нәјә ҝөрә бу һадисә белә ваҹиб иди?

 3 Һәвариләрин ишләри 2:2—4 ајәләрини охујун. Аллаһын мүгәддәс руһу үст мәртәбәдә јығышан һәмин мәсиһиләрин үзәринә төкүлдү (Һәв. 1:8). Онлар ешитдикләри вә ҝөрдүкләри әзәмәтли шејләр барәдә пејғәмбәрлик, јәни шаһидлик етмәјә башладылар. Гыса мүддәт әрзиндә ораја издиһам јығышды. Һәвари Бутрус баш вермиш һадисәнин маһијјәтини онлара изаһ етди. Сонра о, динләјиҹиләринә деди: «Төвбә един вә гој һәр кәс ҝүнаһларынын бағышланмасы үчүн Иса Мәсиһин ады илә вәфтиз олунсун, онда мүгәддәс руһ әнамыны алаҹагсыныз». Һәмин ҝүн үмумиликдә тәхминән 3000 нәфәр бу дәвәти гәбул едиб вәфтиз олунду вә мүгәддәс руһ алды (Һәв. 2:37, 38, 41).

4. а) Нәјә ҝөрә Әллинҹи ҝүн бајрамында баш верән һадисә бизим үчүн бөјүк әһәмијјәт кәсб едир? б) Ола билсин, чох илләр әввәл һәмин ҝүн һансы башга һадисә баш вермишди? (Һашијәјә бахын.)

4 Нәјә ҝөрә 33-ҹү илин Әллинҹи ҝүн бајрамы бизим үчүн белә ваҹибдир? Сөзсүз ки, бу, Јерусәлимдәки мәбәддә иҹра олунан ајинләрә ҝөрә дејил. Сәбәб бөјүк баш каһин Иса Мәсиһин һәмин ајинләрин тәмсил етдији һадисәләри һәјата кечирмәсидир. [1] Һәмин ҝүн баш каһин Јеһоваја ики символик чөрәк тәгдим етди. Мәбәддә тәгдим олунан маја гатылмыш чөрәкләр Аллаһын ҝүнаһлы бәшәријјәтдән сечиб өвладлыға ҝөтүрдүјү мәсһ олунмуш шаҝирдләри тәмсил едирди. Беләҹә, «нүбар» адланан мәсһ олунмушлара ҝөјләр һәјатына вә Аллаһын Падшаһлығында падшаһ олмаға јол ачылды. Бу Падшаһлыг јердә галан итаәткар бәшәријјәтә сонсуз хејир-дуалар ҝәтирәҹәк (Јаг. 1:18; 1 Бут. 2:9). Истәр Иса Мәсиһлә ҝөјдә јашамаг, истәрсә дә јер үзү ҹәннәтдә әбәди јашамаг үмидинә малик олаг, һәмин ҝүн баш вермиш һадисәләр бизим һәјатымыза бөјүк тәсир ҝөстәрир!

НЕҸӘ МӘСҺ ОЛУНУРЛАР?

5. Һарадан билирик ки, бүтүн мәсһ олунмушлар ејни ҹүр мәсһ олунмур?

5 Әҝәр сиз башына алов дилләри гонан шаҝирдләрдән бири олсајдыныз, һәмин ҝүнү һеч вахт унутмаздыныз. Сиздә мүгәддәс руһла мәсһ олундуғунуза зәррә гәдәр дә шүбһә олмазды, хүсусилә дә әҝәр башга дилдә данышмаг әнамыны алсајдыныз (Һәв. 2:6—12). Бәс мүгәддәс руһла мәсһ олунанларын һамысы һәмин о 120 шаҝирд кими, мөһтәшәм шәкилдә мәсһ олунур? Хејр. Һәмин ҝүн Јерусәлимдә олан диҝәр адамлар вәфтиз олунанда мәсһ олундулар (Һәв. 2:38). Онларын башынын үстүндә алов дили пејда олмады. Үстәлик, мәсһ олунмушларын һамысы вәфтиз олунан вахт мәсһ олунмурлар. Сәмәријјәлиләр вәфтиз олунандан бир гәдәр сонра мүгәддәс руһла мәсһ олунмушдулар (Һәв. 8:14—17). Диҝәр тәрәфдән, Корнили вә онун ев әһли вәфтиз олунмамышдан габаг мүгәддәс руһла мәсһ олунмушдулар. Бу, истисна һал иди (Һәв. 10:44—48).

6. Бүтүн мәсһ олунмушлар нәјә саһиб олур вә бу, онларда һансы һисси јарадыр?

6 Мәсһ олунмушларын һамысы мәсһ олундугларыны ејни ҹүр баша дүшмүр. Бәзиләри ҝөјләр дәвәтини алдығыны дәрһал дәрк едир, диҝәрләри исә буну анламаға, јәни гәбул етмәјә вахт лазым ҝәлир. Анҹаг мәсһ олунманын неҹә баш вердијиндән асылы олмајараг, мәсһ олунмушларын һәр бири һәвари Булусун дедији бир шејә саһибдир: «Сиз иман едәндән сонра Аллаһ Мәсиһ васитәсилә сизи вәд едилмиш мүгәддәс руһла мөһүрләди. Бу руһ мирасымыза зәманәтдир» (Ефес. 1:13, 14). Мүгәддәс руһун онларда бу ҹүр, хүсуси шәкилдә фәалијјәт ҝөстәрмәси ҝәләҹәк үчүн бир нөв беһ, ҝиров ролуну ојнајыр. Алдығы зәманәт мәсһ олунмуш мәсиһидә сечилдијинә даир дахили  әминлик, архајынлыг јарадыр. (2 Коринфлиләрә 1:21, 22; 5:5 ајәләрини охујун.)

7. Һәр бир мәсһ олунмуш ҝөјләр мүкафатыны алмаг үчүн нә етмәлидир?

7 Мәсиһинин бу зәманәти алмасы о демәкдирми ки, о мүтләг ҝөјләр мүкафатыны алаҹаг? Хејр. Һәмин мәсиһи ҝөјләр дәвәтини алдығына әмин олур. Анҹаг ҝөјләр мүкафатыны алыб-алмајаҹағы онун дәвәтинә ахырадәк садиг галмасындан асылыдыр. Һәвари Бутрус буну белә изаһ етмишди: «Гардашлар, буна ҝөрә дә алдығыныз дәвәти вә Аллаһ тәрәфиндән сечилдијинизи доғрултмаг үчүн вар гүввәнизлә чалышын. Буну етсәниз, һеч вахт јыхылмајаҹагсыныз. Онда Ағамыз вә Хиласкарымыз Иса Мәсиһин әбәди Падшаһлығынын гапысы үзүнүзә ҝениш ачылаҹаг» (2 Бут. 1:10, 11). Буна ҝөрә дә һәр бир мәсһ олунмуш мәсиһи садиг галмаг үчүн мүбаризә апармалыдыр. Әкс тәгдирдә, о, ҝөјләр дәвәтини итирәҹәк (Ибр. 3:1; Вәһј 2:10).

МӘСҺ ОЛУНДУГЛАРЫНЫ НЕҸӘ БИЛИРЛӘР?

8, 9. а) Нәјә ҝөрә әксәр инсанлар мәсһ олунмағын нә демәк олдуғуну баша дүшмәјә чәтинлик чәкирләр? б) Инсан ҝөјә ҝетмәјә дәвәт алдығыны неҹә билир?

8 Аллаһын хидмәтчиләринин бөјүк әксәријјәти мәсһ олунмағын нә демәк олдуғуну баша дүшмәјә чәтинлик чәкир. Бу, нормалдыр, чүнки өзләри мәсһ олунмајыблар. Аллаһын әзәли нијјәти о иди ки, инсанлар јер үзүндә әбәди јашасынлар (Јар. 1:28; Зәб. 37:29). Бәзи инсанларын ҝөјдә падшаһ вә каһин кими хидмәт етмәк үчүн сечилмәси гејри-ади бир шејдир. Бу, зәрурәтдән доған бир тәдбирдир. Инсан ҝөјләр дәвәти аланда онун дүшүнҹәси, бахышлары, үмиди көкүндән дәјишир. (Ефеслиләрә 1:18 ајәсини охујун.)

9 Бәс инсан ҝөјләр дәвәти алдығыны, јәни бу хүсуси зәманәтә саһиб олдуғуну неҹә билир? Бунун ҹавабыны һәвари Булусун Ромадакы мәсһ олунмуш гардашлара јаздығы сөзләрдән ҝөрмәк олар. О, «мүгәддәс олмаг үчүн чағырылмыш» бу гардашлара демишди: «Бу руһ бизи көлә едиб јенидән горхуја салмыр, бу руһун васитәсилә биз оғуллуға ҝөтүрүлүрүк вә бу руһун тәшвиги илә “Атаҹан, Ата!” — дејә чағырырыг. Бу руһ бизә тәлгин едир ки, биз Аллаһын өвладларыјыг» (Ром. 1:7; 8:15, 16). Садә диллә десәк, Аллаһ мүгәддәс руһу васитәсилә инсана ајдын едир ки, о, Падшаһлығын ҝәләҹәк вариси олмаға дәвәт олунуб (1 Салон. 2:12).

10. «Кимсәнин мәсһ олунмуш мәсиһини өјрәтмәсинә еһтијаҹ јохдур» сөзләрини неҹә баша дүшмәк олар?

10 Аллаһдан бу хүсуси дәвәти алан инсанлар киминсә буну тәсдигләмәсинә еһтијаҹ дујмурлар. Јеһова онларын ағлында вә үрәјиндә шүбһә јери гојмур. Һәвари Јәһја мәсһ олунмуш мәсиһиләрә демишди: «Сиз Мүгәддәс Аллаһ тәрәфиндән мәсһ олунмусунуз; һамыныз һәгигәти билирсиниз». Сонра әлавә етмишди: «Сизә ҝәлдикдә исә, Ондан алдығыныз мәсһ сиздәдир вә кимсәнин сизи өјрәтмәсинә еһтијаҹ јохдур. Ондан алдығыныз мәсһ һәгигәтдир, јалан дејил, о сизә һәр шеји өјрәдир. О, сизи өјрәтдији кими, сиз дә сизи мәсһ едәнлә вәһдәтдә галын» (1 Јәһ. 2:20, 27). Һамы кими бу инсанларын да руһани өјүд-нәсиһәтә еһтијаҹы вар. Анҹаг киминсә онларын мәсһ олундуғуну тәсдиг етмәсинә еһтијаҹ јохдур. Каинатдакы ән гүдрәтли гүввә онлары буна әмин едир!

ЈЕНИДӘН ДОҒУЛУРЛАР

11, 12. Мәсһ олунмуш мәсиһидә һансы шүбһәләр ола биләр, анҹаг о, нәјә гәтијјән шүбһә етмир?

11 Мүгәддәс руһ инсаны мәсһ олундуғуна әмин едәндә онда бөјүк  дәјишикликләр баш верир. Иса дахилдә ҝедән бу просеси «јенидән доғулмаг», јахуд «јухарыдан доғулмаг» адландырмышды [2] (Јәһ. 3:3, 5, һашијә). Сонра изаһ етмишди: «“Јенидән доғулмалысыныз” дедијимә тәәҹҹүбләнмә. Күләк истәдији сәмтә әсир. Сән онун сәсини ешидирсән, амма һарадан ҝәлиб һара әсдијини билмирсән. Руһдан доғулмуш һәр адам да беләдир» (Јәһ. 3:7, 8). Бәли, мәсһ олунмајан адама мәсһ олунмуш олмағын нә демәк олдуғуну там изаһ етмәк гејри-мүмкүндүр.

12 Ҝөјләр дәвәтини алан мәсиһиләрдә белә суаллар јарана биләр: «Нәјә ҝөрә мән сечилмишәм? Нәјә ҝөрә башгасы јох, мәһз мән?» Онлар өзләринин бу дәвәтә лајиг олдуғуна шүбһә едә биләрләр. Лакин бу дәвәти алдыгларына әсла шүбһә етмирләр. Бу дәвәти алдыгларына ҝөрә онларын үрәји севинҹдән ҹуша ҝәлир, миннәтдарлыгла долуб-дашыр. Онлар һәвари Бутрусун кечирдији һиссләри кечирирләр. О, Аллаһдан илһам алараг јазмышды: «Ағамыз Иса Мәсиһин Атасы вә Аллаһына шүкүрләр олсун! О, бөјүк мәрһәмәтинә ҝөрә Иса Мәсиһи дирилтмәклә бизә јени һәјат вериб ҹанлы үмидә говушдурду. О, бизә әбәди, ләкәсиз вә солмаз мирас верди. Бу мирас сизин үчүн ҝөјдә горунуб сахланылыр» (1 Бут. 1:3, 4). Мәсһ олунмушлар бу сөзләри охујанда сәмави Аталарынын шәхсән онларла данышдығына зәррә гәдәр дә шүбһә етмирләр.

13. Мүгәддәс руһла мәсһ олунан инсанын дүшүнҹәси неҹә дәјишир вә бу дәјишиклијә нә сәбәб олур?

13 Аллаһын руһу бу мәсиһиләрә мәсһ олундугларыны тәлгин етмәздән әввәл онлар јер үзүндә јашамаға үмид едирдиләр. Онлар Јеһованын јер күрәсини тәмизләјәҹәји вахты һәсрәтлә ҝөзләјибләр, һәмин вахтда јашамағы арзулајыблар. Дирилән доғмаларыны гаршылајаҹағы вахты хәјалларында ҹанландырыблар. Тикәҹәкләри евдә јашамағы, әкдикләри ағаҹларын бәһрәсиндән јемәји сәбирсизликлә ҝөзләјибләр (Әшј. 65:21—23). Бәс онларын дүшүнҹәләри нијә дәјишди? Она ҝөрә јох ки, онлар бу үмиддән бездиләр. Јахуд емосионал сарсынты, әзаб чәкдикләри үчүн фикирләриндән дашындылар. Нә дә јердә әбәди јашамаг бирдән-бирә онлара ҹансыхыҹы, дарыхдырыҹы ҝәлдији үчүн вә ја ҝөјүн јени һүдудларыны кәшф етмәк истәдикләри үчүн онлар јердән имтина етмәдиләр. Онлар үчүн бу гәрары верән Аллаһ олду. Аллаһын руһу онлары дәвәт едәндә, һәм дә онларын дүшүнҹәсини вә үмидини дәјишди.

14. Мәсһ олунмушлар јер үзүндәки һәјатларына неҹә јанашырлар?

14 Бәс бу, о демәкдирми ки, мәсһ олунмуш мәсиһиләр өлмәк истәјир? Һәвари Булус бу суала белә ҹаваб вермишди: «Бу чадырда олан бизләр ағыр јүк алтында инилдәјирик. Биз ону әјнимиздән чыхармаг јох, башгасына бүрүнмәк истәјирик ки, һәјат фанилији јох етсин» (2 Кор. 5:4). Онлар бу һәјата марагларыны итирмәјибләр, бу һәјатын тез баша чатмасыны истәмирләр. Әксинә, онлар јашадыглары һәр ҝүнү достлары вә гоһумлары илә бирҝә Јеһоваја хидмәтә һәср етмәк истәјирләр. Анҹаг нә ишлә мәшғул олурларса-олсунлар, ҝәләҹәклә бағлы мөһтәшәм үмидләри ағылларындан чыхмыр (1 Кор. 15:53; 2 Бут. 1:4; 1 Јәһ. 3:2, 3; Вәһј 20:6).

СИЗ ДӘВӘТ ОЛУНМУСУНУЗ?

15. Инсанын мүгәддәс руһла мәсһ олундуғуна нә дәлаләт етмир?

15 Ола билсин, сизи дүшүндүрүр ки, ҝөрәсән, бу дәвәти алмысыныз, јохса јох. Әҝәр бу дәвәти алдығынызы еһтимал едирсинизсә, бу суаллар барәдә дүшүнүн. Сиз хидмәтә һәддиндән артыг ҹан јандырырсыныз?  Аллаһын Кәламыны ҹидд-ҹәһдлә арашдырыр, «Аллаһын дәрин сирләрини» тәдгиг етмәји севирсиниз? (1 Кор. 2:10). Јеһованын хидмәтинизә хүсусилә хејир-дуа вердијини һисс едирсиниз? Јеһованын ирадәсини јеринә јетирмәк ешги илә алышыб-јанырсыныз? Башгаларына руһани ҹәһәтдән көмәк етмәји өзүнүзә борҹ билирсиниз? Һәјатынызда Јеһованын әлини ачыг-ашкар һисс едирсиниз? Әҝәр бу суаллара «бәли» дејә ҹаваб верирсинизсә, онда бу, о демәкдирми ки, сиз ҝөјләрә дәвәт алмысыныз? Хејр. Чүнки бу һиссләр тәкҹә ҝөјләрә дәвәт алан мәсиһиләрә хас дејил. Јеһованын руһу јердә јашамаға үмид едән инсанларда да ејни гүввә илә фәалијјәт ҝөстәрир. Әҝәр сизи дүшүндүрүрсә ки, ҝөрәсән, ҝөјдә јашамаға дәвәт олунмусунуз, ја јох, бу, артыг ҝөстәрир ки, сиз дәвәт олунмамысыныз. Јеһованын дәвәт етдији кәсләрдә дәвәт олундугларына һеч бир шүбһә олмур! Онлар буна әминдирләр!

16. Аллаһын руһуну алан һәр кәсин ҝөјләр дәвәтини алмадығыны һарадан билирик?

16 Мүгәддәс Китабда ҝөјдә јашамаға үмид етмәјән, анҹаг мүгәддәс руһ алан бир чох мөмин инсанлар һагда јазылыб. Онлардан бири Вәфтизчи Јәһја иди. Иса Мәсиһ ону тәрифләмишди, ејни заманда демишди ки, о, сәмави Падшаһлыгда олмајаҹаг (Мәт. 11:10, 11). Давудун да үзәринә мүгәддәс руһ енмишди (1 Ишм. 16:13). О, чох руһани дүшүнҹәли инсан иди, һәтта Аллаһдан илһам алараг Мүгәддәс Китабын бәзи һиссәләрини јазмышды (Марк 12:36). Бунунла белә, Әллинҹи ҝүн бајрамында һәвари Бутрус Давудун ҝөјә галхмадығыны демишди (Һәв. 2:34). Јеһова мүгәддәс руһу васитәсилә бу адамлара гүдрәтли ишләр ҝөрмәјә ҝүҹ вермишди, амма бу руһ онлара ҝөјләр һәјатына сечилдикләрини тәлгин етмәмишди. Бу, о демәк дејил ки, онлар кифајәт гәдәр садиг дејилдиләр, јахуд да ҝөјдә падшаһлыг етмәјә јарамырдылар. Садәҹә олараг, Јеһова онлары јер үзүндәки ҹәннәтдә јашамаг үчүн дирилдәҹәк (Јәһ. 5:28, 29; Һәв. 24:15).

17, 18. а) Бу ҝүн Аллаһын хидмәтчиләринин әксәријјәти нәјә үмид едир? б) Нөвбәти мәгаләдә һансы суаллар мүзакирә олунаҹаг?

17 Бу ҝүн Аллаһын хидмәтчиләринин әксәријјәти ҝөјләр дәвәти алмајыб. Онлар да Давуд, вәфтизчи Јәһја вә гәдимдә јашајан диҝәр садиг киши вә гадынлар кими ејни үмидә маликдирләр. Ибраһим пејғәмбәр кими, Аллаһын Падшаһлығынын рәһбәрлији алтында јер үзүндә јашамағы сәбирсизликлә ҝөзләјирләр (Ибр. 11:10). Ҝөјдә јашамаг үчүн сечилән 144 000 нәфәрдән һал-һазырда јер үзүндә аз адам галыб (Вәһј 12:17). Бу, о демәкдир ки, онларын әксәријјәти артыг сонадәк садиг галараг өлүб.

18 Бәс јердә јашамаға үмид едәнләр мәсһ олундуғуну дејән кәсләрә неҹә јанашмалыдыр? Әҝәр јығынҹағынызда кимсә Мәсиһин өлүмүнү анма мәрасиминдә символлардан гәбул етмәјә башлајарса, онунла неҹә давранмалысыныз? Ҝөјләр дәвәтини алдығыны дејәнләрин сајынын артмасы сизи нараһат етмәлидирми? Бу суаллар нөвбәти мәгаләдә мүзакирә олунаҹаг.

^ [1] (4-ҹү абзас) Әллинҹи ҝүн бајрамы, чох ҝүман ки, Сина сәһрасында Ганунун верилдији ҝүнлә үст-үстә дүшүр (Чых. 19:1). Әҝәр бу беләдирсә, онда Јеһова Мусанын васитәсилә һәмин ҝүн исраиллиләри Ганун әһдинә дахил етдији кими, Иса Мәсиһ дә һәмин ҝүн јени халгы, руһани Исраили јени әһдә дахил етмишди.

^ [2] (11-ҹи абзас) Јенидән доғулмағын нә демәк олдуғу барәдә әлавә мәлумат үчүн «Ҝөзәтчи гүлләси» журналынын 2009-ҹу ил 1 апрел сајынын 3—11 сәһифәләринә (рус.) бахын.