Контентә кеч

Икинҹи дәрәҹәли менју

Мүндәриҹаты ҝөстәр

Јеһованын Шаһидләри

Aзәрбајҹан (кирил әлифбасы)

Ҝөзәтчи гүлләси (тәлим нәшри)  |  ијун 2017

Мүһүм мәсәләни унутмајын

Мүһүм мәсәләни унутмајын

«Гој инсанлар билсин ки, ады Јеһова олан Сән, дүнјада тәк Сән уҹасан» (ЗӘБ. 83:18).

НӘҒМӘ: 9, 22

1, 2. а) Һансы мәсәлә һәр биримиз үчүн ваҹибдир? б) Нәјә ҝөрә бу мәсәләнин ваҹиблијини дәрк етмәлијик?

ЧОХЛАРЫ үчүн пул һәр шеј демәкдир. Онларын фикри-зикри анҹаг пул јығмаг ја да әлләриндәки пулу бәрк-бәрк сахламагдыр. Бәзиләри үчүн исә аилә, сағламлыг вә гојдуглары мәгсәдләр һәјатда һәр шејдән үстүндүр.

2 Амма һәр биримиз үчүн бунлардан даһа ваҹиб бир мәсәлә вар. Бу, Јеһованын дүнјаны идарә етмәјә һаггы чатдығынын сүбута јетирилмәси мәсәләсидир. Еһтијатлы олмалыјыг ки, бу мүһүм мәсәлә диггәтимиздән јајынмасын. Әкс һалда, һәјатын гајғыларына вә үзләшдијимиз сынаглара о гәдәр көкләнә биләрик ки, бу мәсәләнин ваҹиблијини унуда биләрик. Әҝәр даима Јеһованын һакимијјәтини дәстәкләмәји дүшүнсәк, гаршылашдығымыз истәнилән проблемләрин өһдәсиндән даһа јахшы ҝәләҹәјик. Бундан әлавә, Јеһоваја даһа јахын олаҹағыг.

МҮҺҮМ МӘСӘЛӘ

3. Шејтан Јеһованын һакимијјәти илә бағлы нәји иддиа едиб?

3 Шејтан Јеһованын һакимијјәт сүрмәјә лајиг олмадығыны иддиа едиб. О, Аллаһын јахшы Рәһбәр олмадығыны, инсанлардан дәјәрли бир шеји ҝизләтдијини сөјләди. Шејтанын сөзләринә ҝөрә, инсанлар  һеч кәсә табе олмадан јашасалар, даһа хошбәхт оларлар (Јар. 3:1—5). Шејтан һәмчинин инсанларын Аллаһа сәдагәтини шүбһә алтына алды. Онун фикринҹә, истәнилән инсаны чәтинлијә салсан, әввәл-ахыр Аллаһдан үз дөндәрәр (Әјј. 2:4, 5). Буна ҝөрә Аллаһ вахт верди ки, Онун рәһбәрлији олмадан јашамағын нә гәдәр аҹынаҹаглы олдуғуну һәр кәс ҝөрсүн.

4. Аллаһын һакимијјәт сүрмәјә лајиг олдуғунун сүбута јетирилмәси нә үчүн ваҹибдир?

4 Әлбәттә ки, Јеһова Шејтанын иттиһамларынын ағ јалан олдуғуну билир. Бәс онда нәјә ҝөрә Јеһова мәсәләни елә орадаҹа бағламады? Әксинә, Шејтана иттиһамларыны сүбут етмәси үчүн вахт верди? Чүнки бу мәсәләнин мәләкләрә вә инсанлара да аидијјәти вар. (Зәбур 83:18 ајәсини охујун.) Һәм Адәмлә Һәвва, һәм дә онлардан сонра бир чохлары Јеһоваја табе олмаг истәмәдиләр. Буна ҝөрә дә бәзиләри дүшүнә биләрди ки, Шејтан иттиһамларында һаглыдыр. Нә гәдәр ки бу мәсәлә инсанлар вә мәләкләр үчүн өз һәллини тапмајыб, нә милләтләр, нә иргләр, нә тајфалар, нә аиләләр, нәдә ки инсанлар арасында һеч вахт сүлһ вә бирлик олмајаҹаг. Анҹаг Аллаһын һакимијјәт сүрмәјә лајиг олдуғу сүбута јетириләндән сонра һамы әбәдијјән Онун һакимијјәти алтында јашајаҹаг. Ҹүмлә-ҹаһанда сүлһ һөкм сүрәҹәк (Ефес. 1:9, 10).

5. Јеһованын һакимијјәтинә садиг олдуғумузу неҹә ҝөстәрә биләрик?

5 Аллаһын һакимијјәт сүрмәјә лајиг олдуғу әввәл-ахыр өз тәсдигини тапаҹаг. Шејтанын вә инсанларын һакимијјәти тамамилә тәнәззүлә уғрајыб мәһв едиләҹәк. Иса Мәсиһин идарә етдији Аллаһын Падшаһлығы исә чичәкләнәҹәк. Садиг инсанлар сүбут едәҹәк ки, бәшәријјәт Јеһованын һакимијјәтинин тәрәфини тутмаға гадирдир (Әшј. 45:23, 24). Бәс сиз Јеһованын һакимијјәтинин тәрәфини тутан бу сәдагәтли инсанларын сырасында олмаг истәјәрдиниз? Јәгин дејәҹәксиниз: «Ким истәмәз ки?!» Бунун үчүн биз бу үмдә мәсәләни һәмишә јадымызда сахламалы вә онун ҹиддијјәтини дәрк етмәлијик.

ХИЛАСЫМЫЗДАН ДАҺА ВАҸИБ

6. Јеһованын дүнјаны идарә етмәјә һаггы чатдығынын сүбута јетирилмәси нә дәрәҹәдә ваҹибдир?

6 Гејд олундуғу кими, Јеһованын дүнјаны идарә етмәјә һаггы чатдығынын сүбута јетирилмәси бәшәријјәт үчүн мүһүм мәсәләдир. Бу һәтта истәнилән шәхсин хошбәхтлијиндән дә ваҹибдир. Бәс бу о демәкдирми ки, хиласымыз елә дә өнәмли дејил вә биз Јеһова үчүн о гәдәр дә мараглы дејилик? Гәтијјән! Нәјин әсасында белә демәк олар?

7, 8. Мүһүм мәсәлә өзүнә нәји дахил едир?

7 Јеһованын инсанлара мәһәббәти сонсуздур. Аллаһ үчүн дәјәрли олмасајдыг, О, бизим хиласымыздан өтрү илкин Оғлуну гурбан вермәзди (Јәһ. 3:16; 1 Јәһ. 4:9). Јеһова ҝәләҹәјимизлә бағлы вәдләрини јеринә јетирмәсә, Шејтан вә диҝәр әлејһдарлар һаглы чыхар. Чүнки Шејтан иддиа едир ки, Јеһова јаланчыдыр, О пис рәһбәрдир, инсанлардан дәјәрли бир шеј ҝизләдир. Әлејһдарлар да Јеһоваја истеһза едәрәк дејирләр: «Бәс һаны онун вәд едилмиш һүзуру? Ахы дәдә-бабаларымыз өлүм јухусуна ҝедәндән бәри һәр шеј јарадылышдан та индијәдәк олдуғу кими дурур» (2 Бут. 3:3, 4). Амма Јеһова елә тәдбир ҝөрүб ки, Онун рәһбәрлик етмәјә лајиг олмасынын сүбута јетирилмәси бизим хиласымызла бирбаша бағлыдыр. (Әшија 55:10, 11 ајәләрини охујун.) Бундан әлавә, Јеһованын һакимијјәтинин тәмәлиндә мәһәббәт дурур. Буна ҝөрә дә әмин ола биләрик ки, Јеһова садиг бәндәләрини һәмишә севәҹәк вә әзиз тутаҹаг (Чых. 34:6).

8 Јеһованын һакимијјәти илә бағлы мәсәләнин бу гәдәр ваҹиб олмасы о демәк  дејил ки, хиласымыз елә дә өнәмли дејил, биз Онун ҝөзүндә дәјәрли дејилик. Садәҹә олараг, биз Јеһованын рәһбәрлији вә хиласымызла бағлы мәсәләләрә дүзҝүн јанашмалыјыг. Дүзҝүн јанашмағымыз ондан ҝөрүнәҹәк ки, биз мүһүм мәсәләни һәр шејдән үстүн тутуб Јеһованын һакимијјәтини сәдагәтлә дәстәкләјәҹәјик.

ӘЈЈУБ ПЕЈҒӘМБӘР БАХЫШЫНЫ ДӘЈИШИР

9. Шејтан Әјјуб һаггында нәји иддиа еләди? (Мәгаләнин әввәлиндәки шәклә бахын.)

9 Јеһованын һакимијјәти илә бағлы мәсәләјә дүзҝүн јанашмағын ваҹиблији Мүгәддәс Китабын ән гәдим бөлмәләриндән олан Әјјуб китабында ајдын ҝөстәрилир. Шејтан иддиа етмишди ки, әҝәр Әјјуб шиддәтли әзаб-әзијјәтләрә мәруз галса, Аллаһа садиг галмајаҹаг. Һәтта Шејтан тәклиф еләмишди ки, Јеһова шәхсән Өзү ону сынаға чәксин. Јеһова буну етмәди. Амма Шејтана пејғәмбәри сынаға чәкмәјә иҹазә вериб деди: «Онун һәр шејини сәнин ихтијарына верирәм». (Әјјуб 1:7—12 ајәләрини охујун.) Гыса вахт әрзиндә Әјјуб нөкәрләрини, мал-гарасыны вә он өвладыны итирди. Шејтан елә еләди ки, о, башына ҝәлән бәлаларын сәбәбини Аллаһдан билди (Әјј. 1:13—19). Сонра Шејтан Әјјубу әзаблы вә ијрәнҹ хәстәлијә дүчар еләди (Әјј. 2:7). Даһа сонра арвадынын вә үч «достунун» үрәк дағлајан сөзләри пејғәмбәрин дәрдинә дәрд гатды (Әјј. 2:9; 3:11; 16:2).

10. а) Әјјуб пејғәмбәрин Јеһоваја садиг галдығы нәдән ҝөрүнүр? б) Әјјуб пејғәмбәрин һансы дүзәлишә еһтијаҹы вар иди?

10 Бу һадисәнин ахыры неҹә олду? Шејтанын иддиалары тамамилә јалан чыхды. Әјјуб пејғәмбәр дәһшәтли әзаблар чәксә дә, Јеһовадан үз дөндәрмәди (Әјј. 27:5). Бунунла белә, о, бир мүддәт мүһүм мәсәләни унудуб бүтүн фикрини өзүнә ҹәмләмишди. Пејғәмбәр елә һеј өзүнүн нә гәдәр салеһ инсан олдуғуну вурғулајырды, о һәтта Аллаһдан башына ҝәләнләрин сәбәбини ачыгламағы тәләб едирди (Әјј. 7:20; 13:24). Бәлкә дә, Әјјуб пејғәмбәрин үзләшдији сынаглары нәзәрә алараг бу ҹүр дүшүнмәсинә һагг газандырырыг. Амма Јеһованын фикринҹә, пејғәмбәр өз дүшүнҹә тәрзиндә дәјишиклик етмәли иди. Буна ҝөрә дә Јеһова она көмәк еләди. Бәс неҹә?

11, 12. Јеһова Әјјуба дүзҝүн дүшүнмәси үчүн неҹә көмәк еләди вә Әјјуб бу дүзәлишә неҹә һај верди?

11 Јеһованын Әјјуба дедији сөзләр «Әјјуб» китабынын 38-дән 41-ә кими олан фәсилләриндә јазылыб. Бу дөрд фәслин һеч бир јериндә пејғәмбәрин әзабларынын конкрет сәбәби јазылмајыб. Чүнки Аллаһын сөзүнүн ҹаны Әјјуба нә үчүн әзаб чәкдијини изаһ етмәк дејилди. Аллаһ өзүнә һагг газандырмаг нијјәтиндә дејилди. Јеһованын  мәгсәди фани инсанын Аллаһын әзәмәти илә мүгајисәдә нә гәдәр кичик олдуғуну ҝөстәрмәк иди. Јеһова Аллаһ Әјјуба һәјатда онун проблемләриндән даһа ваҹиб мәсәләләрин олдуғуну баша дүшмәјә көмәк етди. (Әјјуб 38:18—21 ајәләрини охујун.) Јеһованын сөзләри сајәсиндә Әјјуб дүшүнҹә тәрзини дәјишди.

12 Бәс Әјјуб бу гәдәр сынаглара таб ҝәтирәндән сонра Јеһова бирбаша мәсләһәт вермәклә она гаршы сәрт давранмамышды ки? Хејр. Һеч Әјјуб да белә дүшүнмүрдү. Пејғәмбәр Јеһованын мәсләһәтини гәбул етди. О һәтта белә демишди: «Сөзләрими ҝери ҝөтүрүрәм, торпаг ичиндә, күл ичиндә төвбә едирәм» (Әјј. 42:1—6). Бу сөзләр Јеһованын бирбаша, амма дүшүндүрүҹү мәсләһәтинин тәсири иди. Бундан бир мүддәт әввәл Әлиһу да Әјјуб пејғәмбәрә дүшүнҹә тәрзини дәјишмәси илә бағлы мәсләһәт вермишди (Әјј. 32:5—10). Әјјуб Јеһованын мәсләһәтинә гулаг асыб дүшүнҹә тәрзини дәјишди. Сынаглар гаршысында садиг галдығына ҝөрә Јеһова ону башгаларынын јанында тәрифләди (Әјј. 42:7, 8).

13. Јеһованын вердији мәсләһәт Әјјуба сынаглардан сонра неҹә көмәк еләди?

13 Јеһованын вердији мәсләһәт Әјјуба сынаглардан сонра да фајда ҝәтирди. Һансы мәнада? Дүздүр, «Јеһова Әјјуба өмрүнүн сонракы илләриндә әввәлкиндән чох хејир-бәрәкәт верди», амма јәгин ки, Әјјубун өзүнә ҝәлмәси вә хәстәлијиндән там сағалмасы үчүн мүәјјән вахт кечди. Бир мүддәт сонра онун «јенидән једди оғлу вә үч гызы олду» (Әјј. 42:12—14). Сөзсүз, Әјјуб вәфат едән өвладлары үчүн чох дарыхырды. Бәлкә дә, о, узун мүддәт чәкдији әзаблары унуда билмирди. Сонралар башына ҝәлән сынагларын сәбәбини даһа јахшы анласа да, чох ҝүман ки, онда бәзән суаллар јаранырды. Ола билсин о дүшүнүрдү: «Нијә мән бу дәрәҹәдә әзаб чәкмәлијдим?» Әјјубун ағлына белә фикирләр ҝәлирдисә дә, белә анларда о, Јеһованын дедикләрини јадына салырды. Бунунла Әјјуб дүзҝүн дүшүнҹә тәрзини горуја вә нәтиҹәдә тәсәлли тапа билирди (Зәб. 94:19).

Диггәтимизи проблемләримизә јох, мүһүм мәсәләјә ҹәмләјә биләрик? (14-ҹү абзаса бахын)

14. Әјјуб пејғәмбәрин һадисәсиндән нә өјрәнирик?

14 Әјјуб пејғәмбәрин һекајәси бизә дә дүзҝүн дүшүнҹә тәрзинә јијәләнмәјә вә тәсәлли тапмаға көмәк едә биләр. Мәһз буна ҝөрә Јеһова бу һекајәни бизә нәсиһәт олараг јаздырыб ки, «Мүгәддәс Јазылардан алдығымыз тәсәлли сајәсиндә үмидимиз олсун» (Ром. 15:4). Бәс биз бу һекајәдән нә өјрәнирик? Ҝәрәк чалышаг ки, башымыз өз проблемләримизә һәддиндән артыг гарышмасын, јохса Јеһованын рәһбәрлији илә бағлы мәсәләнин ваҹиблијини унуда биләрик. Чәтин сынаглар заманы Әјјуб пејғәмбәр кими садиг галмагла  Јеһованын һакимијјәтинин тәрәфини тутдуғумузу ҝөстәрә биләрик.

15. Сынаглар заманы садиг галмағымыз сајәсиндә нәләрә наил олуруг?

15 Садиг галмағымызын ваҹиблији һагда дүшүнмәк нә үчүн тәсәлливериҹидир? Чүнки баша дүшүрүк ки, сынагларымызын бир мәгсәди вар. Үзләшдијимиз сынаглар Јеһованын биздән наразы олдуғуну ҝөстәрмир, әксинә, онларын сајәсиндә биз Јеһованын һакимијјәтинин тәрәфиндә дурдуғумузу ҝөстәрә биләрик (Мәс. 27:11). Дөзүм ҝөстәрмәјимиз «Аллаһын разылығыны газандырыр» вә үмидимизи мөһкәмләндирир. (Ромалылара 5:3—5 ајәләрини охујун.) Әјјубун һекајәси ҝөстәрир ки, «Јеһова чох меһрибан вә мәрһәмәтлидир» (Јаг. 5:11). Буна ҝөрә дә Јеһованын бизә вә Онун һакимијјәтини дәстәкләјән һәр кәсә мүкафат верәҹәјинә әмин ола биләрик. Буну билмәк бизә «һәр шејә севинҹлә вә сәбирлә» таб ҝәтирмәјә ҝүҹ верир (Кол. 1:11).

МҮҺҮМ МӘСӘЛӘНИ УНУТМАЈЫН

16. Нәјә ҝөрә өзүмүзә Јеһованын һакимијјәтини дәстәкләмәјин ваҹиблијини хатырлатмалыјыг?

16 Дүздүр, һәрдән Јеһованын һакимијјәти барәсиндә дүшүнмәк елә дә асан олмур. Бәзән проблемләримиз башымыздан ашыр, бәзән дә өзүмүз ади шејләри бејнимиздә шиширдиб проблемә чевиририк. Буна ҝөрә дә чәтинликләримиз оланда јахшы оларды ки, өзүмүзә Јеһованын һакимијјәтини дәстәкләмәјин ваҹиблијини хатырладаг.

17. Тәблиғ иши илә мәшғул олмаг бизә диггәтимизи мүһүм мәсәләјә ҹәмләмәјә неҹә көмәк едир?

17 Јеһованын тапшырдығы ишлә мәшғул олмаға давам етмәк диггәтимизи Аллаһын һакимијјәти илә бағлы мәсәләјә ҹәмләмәјә көмәк едәҹәк. Мәсәлән, Рени адлы бир баҹымыз инсулт кечирмишди, о, даими ағрылардан вә хәрчәнҝдән әзијјәт чәкирди. Тибб мүәссисәләриндә мүалиҹә аларкән Рени баҹы орадакы ишчиләрә, хәстәләрә вә зијарәтә ҝәлән инсанлара тәблиғ едирди. Бир дәфә о, галдығы хәстәханаларын бириндә ики һәфтә јарыма дүз 80 саат тәблиғ еләмишди. Рени өлүм ајағында олса да, Аллаһын һакимијјәти илә бағлы мәсәләни һеч вахт унутмурду. Бу һагда дүшүнмәк она ағрыларына дөзмәјә ҝүҹ верирди.

18. Ҹениферин һадисәсиндән Јеһованын һакимијјәтини дәстәкләмәклә бағлы нә өјрәнирик?

18 Ҝүн әрзиндә үзләшдијимиз хырда проблемләр заманы да Јеһованын һакимијјәтини дәстәкләмәк һагда дүшүнмәлијик. Ҹенифер адлы бир баҹы евә дөнәркән үч ҝүн һава лиманында галмалы олмушду. Чүнки ард-арда бүтүн рејсләр тәхирә салынырды. Тәк вә јорғун олдуғундан о, асанлыгла өзүнү јазыглаја биләрди. Амма Ҹенифер Јеһоваја дуа едир ки, һава лиманында онунла бирликдә ҝөзләјән инсанлара тәсәлли верә билсин. Нәтиҹәдә, Ҹенифер чох сајда адама тәблиғ едир вә хејли әдәбијјат пајлајыр. О дејир: «Нә гәдәр јорғун, дилхор олсам да, Јеһованын мәнә неҹә дәстәк олдуғуну вә Онун адыны уҹалтмаг үчүн мәнә ҝүҹ вердијини һисс едирдим». Бәли, баҹымыз бүтүн диггәтини Јеһованын нијјәтинә ҹәмләмишди.

19. Јеһованын халгы Онун һакимијјәти илә бағлы мәсәләдә һансы мөвгедәдир?

19 Јеһованын һакимијјәтини дәстәкләмәјин ваҹиблијини дәрк етмәк һәгиги дини јалан диндән фәргләндирир. Аллаһын халгы узун илләрдир ки, Јеһованын һакимијјәтини дәстәкләјир. Бу халгын үзвү кими һәр биримиз буна шәхсән ҹан атмалыјыг.

20. Јеһова Онун һакимијјәтини дәстәкләмәјимизә неҹә јанашыр?

20 Әмин олун ки, хидмәтиниз вә сынаглара таб ҝәтирмәјинизлә Јеһованын һакимијјәтини дәстәкләмәјиниз Онун үчүн чох дәјәрлидир (Зәб. 18:25). Нөвбәти мәгаләдә Јеһованын дүнјаны идарә етмәјә һаггы чатдығына даир дәлилләр ҝәтириләҹәк вә Онун һакимијјәтини дәстәкләмәјин јоллары арашдырылаҹаг.