Контентә кеч

Икинҹи дәрәҹәли менју

Јеһованын Шаһидләри

Aзәрбајҹан (кирил әлифбасы)

Бағышламаг нә демәкдир?

Бағышламаг нә демәкдир?

Мүгәддәс Јазыларын ҹавабы

Бағышламаг бизә гаршы сәһв һәрәкәт едәнин ҝүнаһындан кечмәк демәкдир. Аллаһын Кәламында «бағышламаг» кими тәрҹүмә олунан јунан сөзү һәрфи мәнада «бурахмаг» демәкдир. Буну инсанын кимәсә вердији борҹу ҝери истәмәмәсинә аид етмәк олар. Иса Мәсиһ давамчыларына дуа етмәји өјрәдәндә мәһз бу нүмунәни ҝәтирмишди. О демишди: «Ҝүнаһларымызы бағышла, чүнки өзүмүз дә бизә гаршы ҝүнаһ иш тутмуш һәр кәси бағышлајырыг» (Лука 11:4). Рәһмсиз нөкәр мәсәлиндә Иса пејғәмбәр бағышламағы борҹу силмәклә мүгајисә етмишди (Мәтта 18:23—35).

Инҹиклији арадан галдырмагла вә бизә дәјмиш зәрәрин әвәзини тәләб етмәмәклә биз инсаны бағышламыш олуруг. Мүгәддәс Китабда дејилир ки, бағышламағын әсасында мәһәббәт дурур, чүнки мәһәббәт «она едилән пислијин һесабыны тутмур» (1 Коринфлиләрә 13:4, 5).

Бағышламаг о демәк дејил ки,..

  • ...сәһвләрә ҝөз јуммалысан. Мүгәддәс Китабда писә јахшы дејән инсан мүһакимә олунур (Әшија 5:20).

  • ...һеч нә олмамыш кими өзүнү апармалысан. Аллаһ Давуд падшаһын ҝүнаһларыны бағышласа да, ону етдији һәрәкәтләрин нәтиҹәләриндән горумады. Бундан савајы, Аллаһ онун ҝүнаһларыны һәтта гәләмә дә алдырыб (2 Ишмуил 12:9—13).

  • ...башгалары сәндән истифадә етмәлидир. Тәсәввүр ет кимәсә борҹ пул вермисән, амма о, пулу саға-сола хәрҹләјир вә гајтара билмир. О, чох пешмандыр вә сәндән үзр истәјир. Сән она гаршы кин сахламамагла, һәр дәфә бу сөһбәтә гајытмамагла вә, ола билсин, борҹу тамамилә силмәклә о инсаны бағышламыш олурсан. Анҹаг ејни заманда бир даһа она борҹ пул вермәјәҹәјинә гәрар верә биләрсән (Зәбур 37:21; Мәсәлләр 14:15; 22:3; Галатијалылара 6:7).

  • ...пешман олмајан инсанын ҝүнаһындан кечмәлисән. Аллаһ биләрәкдән ҝүнаһ ишләјән, сәһвини бојнуна алмајан, төвбә етмәјән вә зәрәр вердији инсанлардан үзр истәмәјән адамы бағышламыр (Мәсәлләр 28:13; Һәвариләрин ишләри 26:20; Ибраниләрә 10:26). Бу ҹүр инсан Аллаһын дүшмәнинә чеврилир. Вә Јараданымыз биздән бағышламадығы инсаны бағышламағы тәләб етмир (Зәбур 139:21, 22).

    Бәс әҝәр сәнинлә чох пис рәфтар едән инсан нәинки үзр истәмәк, һеч сәһвини белә, бојнуна алмаг истәмирсә, онда неҹә? Аллаһын Кәламы мәсләһәт ҝөрүр: «Гәзәби бурах, һиддәтдән чәкин» (Зәбур 37:8). Сән һәмин һәрәкәти унутмагла гәзәбин үрәјиндә көк салмасына јол вермәјәҹәксән. Әмин ол ки, Аллаһ о инсаны мүтләг сорғу-суала чәкәҹәк (Ибраниләрә 10:30, 31). Үстәлик, елә бир вахт ҝәләҹәк ки, инди бизи боған һиссләр һәмишәлик бизи раһат бурахаҹаг (Әшија 65:17; Вәһј 21:4).

  • ...һәр шејә ҝөрә күсүб сонра да бағышламалысан. Елә олур ки, биз кимдәнсә инҹијирик, амма сән демә буна һеч әсас да јох имиш. Мүгәддәс Китабда дејилир: «Күсәјән олма, инҹиклик ахмагларын көксүндә јува салыр» (Ваиз 7:9, һашијә).

Бағышламаг үчүн:

  1. Бағышламаға нә дахил олдуғуну унутма. Бағышламагла сән сәһв һәрәкәтә ҝөз јуммурсан вә јахуд һеч нә олмамыш кими давранмырсан, садәҹә оланлары унудурсан.

  2. Бағышламағын фајдасы һаггында дүшүн. Бағышламаг гәлб раһатлығыны горумаға, сәһһәтини јахшылашдырмаға вә севинҹини артырмаға көмәк едәҹәк (Мәсәлләр 14:30; Мәтта 5:9). Ән әсасы исә, сән башгаларыны бағышласан, Аллаһ да сәнин ҝүнаһларыны бағышлајаҹаг (Мәтта 6:14, 15).

  3. Анлајыш ҝөстәр. Һамымыз ҝүнаһлыјыг (Јагуб 3:2). Кимсә бизим сәһвләримизи бағышлајанда буна чох севинирик. Буна ҝөрә биз дә башгаларынын сәһвләрини бағышламалыјыг (Мәтта 7:12).

  4. Дәрракәли ол. Шикајәт етмәјә сәбәбимиз олса да, Мүгәддәс Китабда јер алан мәсләһәти тәтбиг етмәк јахшы оларды. Орада дејилир: «Бир-биринизә гаршы һәмишә сәбирли олун» (Колослулара 3:13).

  5. Вахт итирмә. Кин сәни әлә алмамыш баҹардығын гәдәр тез бағышла (Ефеслиләрә 4:26, 27).

Әлава мәлумат

ИСА ПЕЈҒӘМБӘР. ЈОЛ, ҺӘГИГӘТ, ҺӘЈАТ

Мәрһәмәт дәрси

Еһтимал ки, фаһишә олан гадына ҝүнаһларынын бағышландығыны демәклә Иса пејғәмбәр Аллаһын ганунуну позмағын гәбаһәт олмадығынымы демәк истәјир.