Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

“Jachapki ukanakampejj jachapjjarakim”

“Jachapki ukanakampejj jachapjjarakim”

Jumanakajj maynit maynikam chʼamañchtʼasisipkakim, maynit maynikamas yanaptʼasisipkakim(1 TES. 5:11).

CANCIÓN: 90, 111

1, 2. ¿Kunjamsa llakitanakar chuymachtʼsna uka toqet parlañajj kunatsa wakisi? (Aka paginankir foto uñjjattʼäta).

SUSI sat mä kullakajj akham siwa: “Yoqajajj jiwjje uka qhepatjja, niya mä marapuniw jupat wal jachapjjta, janipuniw armirjamapkayätti” sasa. Mä jilatajj akham sarakiwa: “Esposajajj mä akatjamatwa jiwäna, ukajj wali llakitwa jaytawayitu” sasa. Cheqas waljaniw ukhaman uñjasipjje, ukajj wali llakkañawa. Diosan walja servirinakapajja, Armagedón janïr purinkipan familiaranakap jiwañapjja janiw suyapkänti. Inas juman mä munat familiaramajj jiwchi, jan ukajj familiaraman amigopa, jan ukajj familiarap jiwchi. Inas akham jisktʼassta: ¿Kunjamsa ukhaman uñjasipki ukanakar yanaptʼsna? sasa.

2 Tiempompikiw uk armjjäta sasaw yaqhepajj sapjje, ukajj ¿ukhamapunïspati? Mä viuda kullakajj uka toqet akham siwa: “Kuntï armañatak lurkäta ukaw antisas yanaptʼasi sañaw cheqäspajja” sasa. Wali llakita, chuymas ustʼata ukham uñjastan ukhajj cuerpos usuchjasktan ukamp sasiwa: jiwasatï cuerposar munasiñamp uñjañäni ukhajja, jukʼat jukʼatwa waliptjjañäni. Ukhamajja,  munat familiarap jiwki ukanakarojj ¿kunjamsa jan sint llakisipjjañapatak yanaptʼsna?

JEHOVÁ DIOSAJJ ‘TAQE KUNAN CHUYMACHTʼASIRIWA’

3, 4. Mä familiaras jiwi ukhajj kunja llakitätansa uk Jehová Diosajj sum yati sasajj ¿kunatsa sissna?

3 Jehová Diosaw taqenit sipansa wali khuyaptʼayasiri chuymachtʼasiri Diosajja (2 Corintios 1:3, 4 liytʼañataki). Kunjamäsktansa uk Jupajj sum yati. Servirinakaparojj akham siwa: “Naya, naya kipkaw jumarojj [chuymachsma]” sasa (Isa. 51:12; Sal. 119:50, 52, 76).

4 “Wali munasiñampi khuyaptʼayasiri” Diosan munat servirinakapajj ukhamarakiw jiwapjje, jupanakat yaqhepajj Abrahán, Isaac, Jacob, Moisés, David jupanakawa (Núm. 12:6-8; Mat. 22:31, 32; Hech. 13:22). Jehová Diosajj jupanakar jaktayañ uru puriniñap wal suyaski sasaw Bibliajj qhanañchi (Job 14:14, 15). Uka uru purinini ukhajja, jaktanirinakajj wali kusisitaw jakasipjjani, janirakiw mayamps usuntjjapjjaniti. Amtañäni, Jehová Diosajj Yoqapar kunjamsa jiwayapjjäna uksa uñjarakïnwa, juparojj walpun munasïna (Pro. 8:22, 30, NM). Kunja llakitäpachänsa uk janiw amuyksnati (Juan 5:20; 10:17).

5, 6. ¿Kunjamsa Jehová Diosajj chuymachtʼistu?

5 Jehová Diosaw yanaptʼitani sasaw taqe chuyma confiyañasa. Ukhamajj llakinakas Juparuw yatiyañasa. Kunja llakitätansa uk Jupajj sum yati ukat chuymachtʼarakistuwa, uk yatiñajj walpun chʼamañchistu. Ukampis ¿kunjamsa chuymachtʼistu?

6 Mayajja, ‘espíritu santo’ churasaw Diosajj chuymachtʼistu (Hech. 9:31). “Alajjpachankir Awkejj mayipki ukanakarojj” espíritu santo churani sasaw Jesusajj säna (Luc. 11:13). Qallta parrafon parlaniwayktan uka Susi kullakajj akham siwa: “Walja kutiw Jehová Diosarojj chuymachtʼapjjeta sasajj qonqortʼasisa mayisipjjta. Ukham sapa kuti mayisipkta ukhajja, Diosan sumankañapajj chuymanakajsa amuyunakajsa jarkʼaqaskatapwa amuyapjjta” sasa (Filipenses 4:6, 7 liytʼañataki).

JESUSAJJ KHUYAPTʼAYASIR JILÏR SACERDOTEWA

7, 8. ¿Kunatsa Jesusaw chuymachtʼitani sasajj taqe chuyma confiysna?

7 Jesusajj aka oraqenkkäna ukhajj kuntï lurkäna, yatichkäna ukanakajj Jehová Dios awkipjam wali munasirïtapa, kunjamäsktansa uk amuytʼirïtapwa uñachtʼayäna (Juan 5:19). Jehová Diosajja, Jesusarojj ‘llaktʼatanakaru chuymachtʼañapataki’, familiap jiwipan wali ‘llaktʼatäsipki ukanakar chuymachtʼañapatakiw’ aka oraqer khitanïna (Isa. 61:1, 2; Luc. 4:17-21). Jesusajj wali khuyaptʼayasiri, mayninakajj kunjamäsipkisa uk sum amuytʼiri, taqe chuym yanaptʼañ muniri ukhamänwa, jaqenakajj uk sum yatipjjäna (Heb. 2:17).

8 Jesusajj waynituskäna ukhajja, familiaranakapa, amigonakap jiwirsa uñjpachänwa. Jupar uywasir José awkipajj jiwjjäna ukhajja, inas Jesusajj 20 maranïchïna. * Niyakejjay Jesusajj wali munasirïchïnjja, uk uñjañajj jupatak wali chʼamäpachänwa, taykaparu jilat kullakanakapar wali llaktʼata uñjasajj wal llakispachäna.

9. Lazarojj jiwjjäna ukhajja, ¿kunjamsa Jesusajj mayninakat sinttʼasirïtap uñachtʼayäna?

9 Jesusajj aka oraqenkaskäna ukhajja, mayninakajj kunjamäsipkisa uk sum amuyirïna, jupanakat wal sinttʼasirakïna. Amuytʼañataki,  Lázaro sat munat amigopajj jiwjjäna ukhajja, jupar jaktayañampïskchïnsa, Mariampir Martampir jachir uñjasajj chuymap chʼalljjtayasïnwa, jachaqtʼasirakïnwa (Juan 11:33-36).

10. Jesusajj tʼaqesir uñjistu ukhajj walpun jiwasat sinttʼasi sasajj ¿kunatsa sissna?

10 Jesusajj kunanaktï nayrajj lurkän ukanakat yatiñajj ¿kunjamsa jichhürunakan yanaptʼistu? Bibliajj akham siwa: “Jesucristojj masürusa jichhürusa wiñayatakisa pachpakïskiwa” sasa (Heb. 13:8). Jupajj ‘jakañ churañataki Jachʼa Irpiriwa’, tʼaqesiñsa yatirakiwa, ukhamajj “yantʼan uñjasirinakarojj” jupaw sum yanaptʼaspa (Hech. 3:15; Heb. 2:10, 18). Tʼaqesir uñjistu ukhajj wal sinttʼasistu. Kunja llakitätansa uks sum yati, ukat ‘horasaparuwʼ chuymachtʼarakistu (Hebreos 4:15, 16 liytʼañataki).

BIBLIAW “AGUANTAÑATAK YANAPTʼISTU”

11. ¿Kawkïr textonakas jumar walpun chuymachtʼtamjja?

11 Janiw Lazaron jiwatapat parlki uka qellqatanakak chuymachkistaspati, Bibliankir yaqha textonakas chuymacharakistaspawa. “Taqe kunanakatï nayra tiempon qellqaskäna ukanakajja, jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Rom. 15:4). ¿Juman mä munat familiaramajj jiwiti? Ukhamächi ukhajja, akjjar qhanañchaski uka textonakaw wal chuymachtʼiristamjja:

  • “Tatitojj llakimp aynachtʼatanakan jakʼapankaskiwa, jupanakar qhespiyañataki, aynachtʼat chuymanakap waytañataki” (Sal. 34:18, 19).

  • “Llakinakajjajj walipun yapjjataskän ukapachaw chuymachäwimampejj kusisiyista” (Sal. 94:19).

  • “Dios Awkisajj wal munasistu, wali khuyapayasirïtapatwa wiñayatak chuymachistu, mä suma suytʼaña churarakistu. Nanakajj oración lurapjjtwa, ukhamat Dios Awkisasa Jesucristo Tatitusasa jumanakar chuymachañapataki, chʼamañchañapatakiraki” (2 Tes. 2:16, 17). *

JILAT KULLAKANAKAW WAL CHUYMACHTʼAPJJARAKISTU

12. ¿Kunjamsa mayninakar chuymachtʼsna?

12 Khitinakantï mä munat familiarap jiwki ukanakajj congregacionanwa chuymachtʼatäpjjaspa (1 Tesalonicenses 5:11 liytʼañataki). ¿Kunjamsa wali llaktʼatäpki ukanakarojj chumachtʼsna, chʼamañchtʼaraksna? (Pro. 17:22). Ak amtañasapuniwa, “amuktʼañ horasa, parlañ horasa[w]” utji (Ecl. 3:7). Jichhajj pä cristiana kullakanakat parltʼañäni. Dalene sat viuda kullakajj akham siwa: “Khitinakantï munat familiarapajj jiwki ukanakajja, kunja llakitäpjjesa, kuns amuyapjje uka toqet maynimp parltʼañwa munapjje. Ukhamajj jupanakajj cuenttʼapjjestani ukhajj sum istʼañasawa, ukhamatwa jupanakar yanaptʼsna” sasa. Junia kullakan jilapajja, jupapachpaw jiwayasïna, kullakajj akham siwa: “Familiarap jiwipan kunja llakitäpjjesa uk janis sum amuykchiñänejja, kunjamäsipkisa uk amuyañatak chʼamachasitasaw jukʼamp wakiskirejja” sasa.

13. ¿Kunsa amtañasapuni?

13 Maysa toqetjja, ak amtañasawa: jaqejj mayj mayjätanwa, kunja llakitätansa ukjja janiw taqenejj mä kikpak uñachtʼayktanti. Khitinakantï munat familiarapajj jiwki ukanakakiw uk sum amuyapjjaspa, kunja llakitäpjjesa uk janiw qhanañchañ puedipkaspati. Jupanakat  parlkasajj Bibliajj akham siwa: “Chuymawa jupan pachpa llakisitapjja yatisi; kusisiñapsa janirakiw jan uñtʼatanakarojj yatiykiti” sasa (Pro. 14:10). Jupanakajj kunjamäsipkisa uk sistaspa ukhasa, janiw sumpun amuyksnati.

14. ¿Kunjamatsa wali llakitäsipki ukanakarojj chuymachtʼaraksna?

14 Inas ukanak yatisajj jupanakar jan kunjam chuymachtʼañsa puedkstanti. Ukampis Bibliajj akham siwa: “Yatiñan jaqenakan arunakapasti mä qolljamawa” sasa (Pro. 12:18). Llakitanakar chuymachtʼañatakejja, Maynix jiwxi ukhax kamachsnasa * sat folletow walja jilat kullakanakar yanaptʼi. Ukampis Bibliajj “jachapki ukanakampejj jachapjjarakim” sasaw ewjjtʼistu, ukhamajj uka arunakar istʼañasaw wakisirakispa (Rom. 12:15). Gaby sat viuda kullakajj akham siwa: “Wali llakitäkta ukhajj jachaqtʼasipuntwa. Amigonakajajj nayamp chika jachapjje ukajj wal chuymachtʼapjjetu. Janiw sapakjam amuyasjjtti” sasa.

15. Jiwasatakitï arunakampi chuymachtʼañajj chʼamächi ukhajja, ¿kunsa lursna? (“ Mayninakarojj kunjamsa chuymachtʼsna” siski uka recuadro uñjjattʼäta).

15 Jupanakar arumpi chuymachtʼañajj inas jiwasatak chʼamächi. Ukhamächi ukhajja, mä tarjeta jan ukajj correo qellqtʼasaw chuymachtʼsna, mä cartsa apayaraksnawa. Ukarojj Bibliat apstʼat chuymachtʼkir mä textwa qellqtʼsna, kuna sumanaksa jiwirejj lurirïna uksa qellqtʼaraksnawa, jan ukajj kunjjay jupat amtasstan ukwa qellqtʼaraksna. Junia kullakajj akham siwa: “Wali chuymachtʼkir arunakampi qellqtʼata tarjetanak churapkitu, jan ukajj utapar invittʼapkitu ukajj wal chuymachtʼitu. Ukanakajja, nayat jan armasipjjatapa, wal munasipjjatapwa amtayitu” sasa.

16. ¿Kunjamsa llakitanakar chuymachtʼaraksna?

 16 Wali llakitäpki ukanakatakejj Diosat mayirapiñasawa, jan ukajj jupanakamp chikaw mayissna. Ukham llakinakan orañajj chʼamakïspawa. Inas maykasajj chuym chʼalljjtayaschiñäni, arusas mayjtʼarakchini. Ukampis taqe chuyma mayirapiñäni ukajj llakitarojj wal chuymachtʼani. 12 parrafon parltʼaniwayktan uka Dalene kullakajja, akham siwa: “Kullakanakajj nayar chuymachtʼir jutapjjeri ukhajja, ¿janit orasksna? sasaw awisajj jisktʼirïta. Mayiñ qalltapjjeri ukhajj janiw arsuñ puedipjjerïkiti. Ukampis jukʼat jukʼatjja, sum arsjjapjjeri, chuymar purtʼkirwa tuktʼayjjapjjeri. Jehová Diosar taqe chuyma confiyapjjatapasa, Jupar wal munasipjjatapas walpun chʼamañchtʼitu” sasa.

JILAT KULLAKANAKAR CHUYMACHTʼASKAKIÑÄNI

17-19. ¿Kunatsa llakita jilat kullakanakarojj chuymachtʼaskakiñasa?

17 Niyakejjay taqenis mayj mayjästanjja, yaqhepatakejj jiwat familiapar armañajj wali chʼamäspawa. Ukhamajj janiw familiaranakapas amigonakapas jupampïski ukhakejj chuymachtʼir sarañasäkiti, jan ukasti qhepa phajjsinakkamas saraskakiñasawa. Kunattejj janiw yaqhanakajj visitirejj sarjjapjjaniti. Proverbios 17:17 qellqatajj akham siwa: “Mä amigojj taqe horasan munasiripuniwa; llakisiñansti mä jiljamaw chuymachasi” sasa. Jupanakar chuymachtʼañajj qhawqhakamay wakischini ukhakam chuymachtʼaskakiñasawa (1 Tesalonicenses 3:7 liytʼañataki).

18 Mä akatjamatwa wasitampi llakisjjaspa uk amtañasapuniwa. Inas casarasipki uka urusa, jan ukajj mä fotosa, kun muktʼañasa, kun istʼañasa jan ukajj yaqha ukhamanakas amtaychispa. Qalltanjja, mä viudotakisa jan ukajj mä viudatakis sapaki kun lurañas wali chʼamäspawa. Sañäni, jachʼa tantachäwinakar sarañasa, Jesusan jiwatap amtir sarañas wali chʼamäspawa. Mä viudo jilatajj akham siwa: “Casarasipkta uka aniversario uru purinini ukajj wali llakkañäniwa sasaw jayäkipan suyjjayäta, uka urojj cheqapuniw ukhamäna. Ukampis walja jilat kullakanakaw uka urojj munat amigonakajampi tantachtʼasiñajataki waktʼayapjjäna, ukhamat sapakïsin jan llakisiñajataki” sasa.

19 Ukampis janiw uka urunakakejj jupanakar chuymachtʼir sarañasäkiti, uk amtañasapuniwa. Junia kullakajj akham siwa: “Akatjamat visittʼir jutapjje ukajj wali wakiskiriwa. Ukham visittʼatäñajj wal chuymachtʼasi” sasa. Cheqas llakitäpki ukanakajj munat familiapat amtasipjjapuniniwa, janiw llakipjja apaqkapunsnati. Ukampis kunayman toqetwa jupanakar chuymachtʼsna (1 Juan 3:18). Gaby kullakajj akham siwa: “Walpun Jehová Diosar yuspärta, jilïr irpir jilatanakajj wali munasiñampiw yanaptʼapjjetu, llakin uñjaskayäta ukhajj janipuniw sapak jaytapkitänti. Jehová Diosas wali munasiñampi amparapar qhomjjarkitaspa ukhamänwa” sasa.

20. Jehová Diosajj kunanaktï arsuwayki ukajj ¿kunatsa wal chuymachtʼistu?

20 Taqe kunan chuymachtʼasiri Jehová Diosajja, niyaw llakisiñanak wiñayataki chhaqtayjjani. “Ukapachaw taqe khitinakatï sepulturankapki” ukanakajj Criston arup istʼapjjani, ukatjja jaktanipjjaniwa, uk yatiñajj walpun chʼamañchtʼistu (Juan 5:28, 29). Jehová Diosajj “wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa”, Jupa kikpaw uk arsüna (Isa. 25:8). Uka uru purinini ukhajja, ‘jachapki ukanakamp jachañat’ sipansa, aka oraqen jakapkani ukanakajj ‘kusisipki ukanakamp chikaw kusisipjjani’ (Rom. 12:15).

^ Párrafo 8 Jesusajj 12 maranïskäna ukhajja, José chachajj jakaskänwa sasaw Bibliajj qhanañchi. Ukampis Jesusajj nayrïr milagropan umjja vinor tukuykäna ukhasa uka qhepatsa, Joseyat janiw parlasjjeti. Jesusajj lawan chʼakkatatäskäna ukhajja, apóstol Juanaruw María mamapar uñjañapatak jaytäna. Awkipatï jakaskaspäna ukhajj janiw Jesusajj uk lurkaspänti (Juan 19:26, 27).

^ Párrafo 11 Aka textonakaw walja jilat kullakanakarojj wal chuymachtʼaraki: Salmo 20:1, 2; 31:7; 38:8, 9, 15; 55:22; 121:1, 2; Isaías 57:15; 66:13; Filipenses 4:13, ukat 1 Pedro 5:7.

^ Párrafo 14 “Jesús supo consolar a sus amigos” siski ukjja, La Atalaya 1 de noviembre, 2010 revistanwa uñjjattʼäta.