Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

 ¿KUNANAKAS IMATÄSKI?

¿Khitinakas yatiyapjjañapa?

¿Khitinakas yatiyapjjañapa?

WALJA urunak thaytʼanisina jallus purintasinjja, septiembre 1, 1919 maran lunes urojj wal luptʼjjäna. Jaypʼurojja, Cedar Point (Ohio, Estados Unidos) markarojj niya waranqaniw jachʼa tantachäwitak puripjjäna. Tantachasipkäna uka cheqajj 2.500 jaqenakatakïnwa. Arumarusti, 2.000 jaqenakaw barcota, autota, trenata puripjjarakïna. Martesajj waljanëjjapjjänwa, ukatwa tantachäwejj anqanak jachʼa qoqanak taypin apasjjäna.

Intejj qoqanak taypit qhantʼanisajja, chachanakan ternonakaparojj dibujonakjamwa uñstayäna. Erie qotat thayajj thaytʼankäna ukajj warminakan sombreronakapan phuyunakapwa onjjtayäna. Mä jilatajj siwa: “Chʼojjña cheqankañajj mä paraisökaspas ukhamänwa” sasa.

Anqajj wali sumäkchïnsa, jilat kullakanakar kusisit uñjañaw jukʼamp sumänjja. Mä periodicojj sänwa: “Taqeniw Dios chuymäpjjäna, wali kusisitäpjjarakïnwa” sasa. Bibliat Yatjjatirinakatakejja, jilat kullakanakampïñajj wali kusiskañänwa. Uka nayrajja, guerra tiempon arknaqatäpjjänwa, tamansti jan waltʼayasiñanakaw utjäna, Brooklynankir Betelasa jistʼantatänwa, Reino toqet saytʼasipjjatapatsa walja jilatanakaw carcelan jistʼantatäpjjäna. Diosan markap sarayir kimsaqallqo jilatanakas 20 maratakiw carcelan jistʼantatäpjjäna. *

Ukhaman uñjasisin aynachtʼata, jan kun lurañ yatisajja, yaqhepajj janiw yatiyjjapjjänti. Ukampis waljanejj autoridadanakan jarkʼatpachas yatiyasipkakïnwa. Mä yatjjatirejj akham sänwa: “Wali jarkʼatäpkchïnsa, jisktʼatajj akham sapjjänwa: ‘Akapachan tukusiñapkamajj yatiyasipkakïwa’” sasa.

Arknaqatäpkäna ukhajja, Diosat jan jitheqtirinakajj “Jesusan yanaptʼap amuyapjjänwa, [...] Diosarus mayisipjjarakïnwa”. Jichhasti, mä jachʼa tantachäwinkapjjänwa. Mä kullakajja, mayninakjamarakiw ‘¿kunjamsa wasitamp yatiyasispa?’ sasin jisktʼasïna. Jupanakajj wasitampiw yatiyañ munapjjäna.

MÄ MACHAQ YANAPTʼA

Jachʼa tantachäwinjja, “GA” letranakajj kamsañsa muni uk taqeniw yatiñ munapjjäna. Uka  letranakasti, wakichäwina, tarjetanakana, tantachäwin utjkäna uka letreronakanwa uñstäna. Viernes urunwa J. Rutherford jilatajj “Yanapirinakatak arstʼäwi” sat arstʼäwipan uk qhanañchäna. Uksti sojjta waranqaniw istʼapjjäna. “GA” letranakajja, La Edad de Oro (The Golden Age) sañ munäna, ukasti yatiyañatak machaq yanaptʼänwa. *

Ajllitanakat parlkasajja, Rutherford jilatajj sänwa: “Jan wali tiemponkkasasa, iyawsäwinïpjjatapatwa Mesiasajj mä suma tiemponsa apnaqjjaspa ukham uñjapjje. Jupanakatakisti, uka toqet yatiyañajj wali wakiskiriwa, Diosan aruparjamarakiw lurapjje” sasa.

La Edad de Oro revistanjja, nayrïr janapan sänwa: “Aka revistajj mä suytʼäwita, kunatï cheqäki uk qhanañchi, ukatsti qhan parlaraki” sasa. Uka revista katoqañ munirinakarojj utat utwa thaqher sarapjjerïna. Khitinakas ukham yatiyañ munapjjasma sasin jisktʼasïna ukhajja, taqeniw saytʼapjjäna. Ukatsti, “cheqa yatichäwi yatichapjjeta” sat qʼochwa, wali kusisita qʼochupjjäna. Milton Norris jilatajj sänwa: “Wali jachʼat qʼochupkäna uk janipuniw armkäti” sasa.

Tantachäwi tukuyarojja, tantachasirinakajj revista katoqañatakiw filasipjjäna. Mayampi yatiyir sarapjjañap yatisajja, Mabel Philbrick kullakjamaw waljanejj kusisit jikjjatasipjjäna.

¿KHITINAKAS YATIYAPJJAÑAPA?

Niya 7.000 Bibliat Yatjjatirinakaw yatiyir sarañataki wakichtʼasipjjäna. Método de organización qellqatampi ¿Khitinakarus yatiyapjjañapatak confiyasi? sat folletompiw kunjamsa yatiyasini uk qhanañchäna. Brooklyn Betelansti, Departamento de Servicio ukaw yatiyañan pʼeqtʼañapatak uttʼayasiñapäna. Sapa tamansti, comité de servicio ukaw uttʼayasiñaparakïna. Ukatjja, kunjamsa yatiyasini uk tamar yatiyañatakejja, mä pʼeqtʼiriw sapa taman uttʼayasïna. Yatiyañataki sapa territorionjja, 150 ukhamarak 200 utanakaw utjañapäna. Jueves jaypʼunakasti, yatiyir sarañatak tantachäwiw apasiñapäna, ukanwa yatiykasajj kuna experiencianïpjjänsa uk arstʼapjjañapäna.

Herman Philbrick jilatajj sänwa: “Utar purisajja, revistanak katoqañ munirinakarojj jankʼakiw thaqher sarapjjayäta” sasa. Jaqejj taqe cheqanwa istʼañ munäna. Beulah Covey kullakasti sarakïnwa: “Guerra tiempon tʼaqhesiña pasatatjja, taqeniw suma tiemponakat istʼañ munäna” sasa. Arthur Claus jilatajj sarakïnwa: “Revista katoqañataki waljani qellqtʼayasipjjatap uñjasajja, tamankirinakajj wal kusisipjjäna” sasa. Revistajj mistkäna uka nayrïr pä phajjsinjja niya 500.000 revistanakaw lakirasïna. Revista katoqañ munirinakasti niya 50.000 ukhanëjjarakïnwa.

Julio 1, 1920 maran mistkäna uka revistanjja, “Reinot yatiyaña” sat yatichäwiw mistüna. Uka yatichäwitjja, Alexander Macmillan jilatajj akham sänwa: “Oraqpachan yatiyasiñapatakejj ukanwa nayrïr kuti chʼamañchtʼasïna” sasa. Ukasti, ‘Diosan Reinopaw jakʼankjje’ sasin yatiyapjjañapatakiw ajllit cristianonakar chʼamañchtʼäna. Jichhürunakanjja, waljaniw ajllit cristianonakarojj yatiyañ yanaptʼasipki. Jupanakasti, Mesiasajj apnaqkani uka uru puriniñapkamajj mä wawakiw taqe chuyma yatiyasipki.

^ tʼaqa 5 Los testigos de Jehová, proclamadores del Reino de Dios libronjja, “Un tiempo de prueba (1914-1918)” sat yatichäwi 6 jaljapan uñjjattʼäta.

^ tʼaqa 9 The Golden Age revistajj Luz y Verdad sutimpiw 1932 maran español arun mistüna, 1938 maranjja Consolación satäjjänwa. 1947 maransti ¡Despertad! satäjjarakïnwa.