Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Yänak thaqhañat sipansa Diosan Reinop thaqhapjjañäni

Yänak thaqhañat sipansa Diosan Reinop thaqhapjjañäni

‘Diosan Reinopa thaqhapjjam, ukatsti taqe akanakajj churatakïpjjätawa’ (LUC. 12:31, NM).

40, 98 QʼOCHUNAKA

1. Kunatï wakiski uk munañampi, kuntï munktan ukampejja, ¿kunansa jan pachpäki?

JAKAÑATAKEJJA, janiw taqe kunanïñajj wakiskapuniti, manqʼa, isi, uta ukakiw munasi. Ukampis alañatakejj taqe kunaw utji, jiwasatï munsna ukhajja, taqe kunwa alassna. Jaqenakajj taqe kunanïñwa munapjje, ukampis kuntï munapki ukajj cheqapunit wakisi janicha uk janiw sum amuytʼapkiti.

2. ¿Kunanakanïñsa jaqenakajj munapjje?

2 Pisin jakasirinakajja, janiw taqe kunpun munapkiti, ukampis qamirinakajj wali jila alani yänaka, jan ukajj cosasanak alañatwa lupʼipjje. Amuytʼañataki, yaqhep markanakanjja, jaqenakajj mä celuläranïña, motonïña, oraqenïña ukakwa munapjje. Ukampis yaqhep markanakanjja, jila alani walja isinakanïña, jachʼa utanïña, wali suma autonïñwa munapjjaraki. Inas kun alasiñatakis qollqejj utjchistaspa, jan ukajj inas janiraki, ukhamäkchispasa, cosasanak sinti munañaruw purtʼassna. Kunanakatï jan wakiski,  jan ukajj wali jila alanïki ukanakwa jukʼat jukʼat munjjsna.

TAQE KUN MUNAÑAJJ DIOSAR SERVIÑANWA AYNACHTʼAYISTASPA

3. ¿Kunjam chuymanïñatsa cristianonakajj amuyasiñasa?

3 Jichhürunakanjja, jila parte jaqenakajj Jehová Diosar serviñat sipansa, walja qollqenïñata, walja cosasanakanïñatwa llakisipjje. Kunatï jakañatak wakiski ukampik jakañat sipansa, jukʼampinakwa munapjje. Pisin jakasipki ukanakasa, jila valorani cosasanak jan alapki ukanakasa, qollqe chuymani, cosasanak muniri ukhamäjjapjjaspawa. Diosan Reinopsa janiw nayrar uchjjapjjaspati (Heb. 13:5).

4. ‘Kuntejj nayrajj uñjki’ ukampejja, ¿kunatakis Supayajj chʼamañchistu?

4 Walja cosasanakanïsas kusisit jakasiñajj utjkaspa ukham amuyañaswa Supayajj muni. Ukatwa jupajj akapachampisa, ‘kuntejj nayrajj uñjki’ ukampis jukʼamp cosasanak munañatak chʼamañchistu (1 Juan 2:15-17; Gén. 3:6; Pro. 27:20). Akapachanjja, jichhak mistur cosasanak alañataki chʼamañchir yatiyäwinakajj waljaw utji, uksti niya sapa kutiw istʼtansa jan ukajj uñjtansa. Wali sumätap laykuki jan ukajj mä yatiyäwi istʼasakejj inas kuns alasirïstan. Ukham alasasti, qhepatakwa jan wakisitap amuyirïpachätanjja. Jan wakiski ukanak alaskaksna ukhajja, janiw kusisit jakasjjsnati. Jehová Diosarus janiw taqe chuyma sirvjjsnati. Amuytʼañataki: Biblia liyiñatakisa, tantachäwir sarañatakisa, ukan arstʼañatak wakichtʼasiñatakisa, yatiyir sarañatakisa janiw tiempojj utj-jjestaspati. Apóstol Juanajj akham sänwa: “Akapachajj tukusirikiwa jan wali luräwinakapamppacha” sasa. Uka arunak janipun armapjjañäniti.

5. Jukʼamp cosasanak jikjjatañ munirinakampejja, ¿kunas pasaspa?

5 Supayajj janiw Jehová Diosar serviñan chʼamachasiñas munkiti, jan ukasti jukʼamp qollqe jikjjatañataki, jukʼamp cosasanak jikjjatañatak chʼamachasiñaswa muni (Mat. 6:24). Ukampis jiwasatï jukʼamp cosasanak jikjjatañar uchasjjsna ukhajja, janiw kusisit jakasjjsnati, llakita, qollqets aynachtʼata ukhamakiw jakasjjsna. Ukatsti Jehová Diosarusa, Reinoparus janiw taqe chuyma confiyjjsnati (1 Tim. 6:9, 10; Apo. 3:17). ‘Qamiriptañ munañajja’, mä chʼaphir uñtatawa sasaw Jesusajj säna. Ukaw Diosar serviñan aynachtʼayistaspa (Mar. 4:14, 18, 19).

6. ¿Kunsa Baruc chachat yateqtanjja?

6 Baruc chachat amuytʼañäni, jupajj Jeremías profetan secretariopänwa. Baruc chachajj jupatakik ‘jachʼa cosasanaka’ thaqhañ qalltäna ukhajja, Jerusalén markajj qʼala tukjatäniwa sasaw Jehová Diosajj jupar säna. Ukatsti “jumarojj jakayaskarakïmawa” sasaw sarakïna (Jer. 45:1-5). Jerusalén markajj qʼala tʼunjatäñapänwa, janiw kunas jiltʼañapäkänti (Jer. 20:5). Jichhürunakanjja, qhep qhepa urunakanwa jakjjtanjja, niyaw akapachajj tukusjjani. Ukhamasti janiw walja cosasanak jikjjatañajj wakisjjeti. ‘Jachʼa tʼaqhesïwi tiempojj pasjjani ukhajja, jila alani cosasanakajajj utjaskakitaniwa’ sasin janiw amuyañasäkiti (Pro. 11:4; Mat. 24:21, 22; Luc. 12:15).

7. ¿Kunsa jichhajj yatjjataskañäni, ukat kunatsa?

7 Qollqe toqet yanaptʼaskasajja, ¿kunjamsa kunatï jukʼamp wakiskirïki uk lursna? ¿Kunas taqe kuna jan munañatakejj yanaptʼistaspa? Kunatï jakañatak wakiski ukjjat jan sinti llakisiñatakejja, ¿kunas yanaptʼistaspa? Jesusan Wali Uñtʼat Arstʼäwipaw yanaptʼistaspa (Mat. 6:19-21). Jesusan ewjjtʼanakapajj Mateo 6:25-34 qellqatanwa jikjjatasi, uka arunakat jichhajj amuytʼañäni. Ukaw cosasanak thaqhañat sipansa, Diosan Reinop thaqhañatak yanaptʼistani (Luc. 12:31).

 KUNATÏ WAKISKI UK JEHOVÁ DIOSAW CHURISTU

8, 9. 1) Kunatï wakiski ukanakatjja, ¿kunatsa jan sinti llakisiñasäki? 2) Jaqenakajj kunjamsa jakasipjje, kunas jakasiñatakejj wakisi uk Jesusajj yatïnwa sasajja, ¿kunatsa sissna?

8 (Mateo 6:25 liytʼañataki). Jesusan arkirinakapajja, kunsa manqʼapjjani, umapjjani, isisipjjani ukanakatwa llakisipjjäna, ukatwa Jesusajj jupanakar Wali Uñtʼat Arstʼäwipan akham säna: “Jan llakisipjjamti” sasa. Ukanakat jan sinti llakisipjjañapwa Jesusajj munäna. Arkirinakapatï ukanakata jan ukajj kunanakatï jakañatak wakiski ukanakat sinti llakisipjjaspäna ukhajja, kunatï wali wakiskirïki ukatwa armasipjjaspäna. Arkirinakapat Jesusajj wal llakisïna, ukatwa kunatï jakañatak wakiski uka toqet jan sinti llakisipjjañapatakejj pusi kutimp ewjjtʼäna (Mat. 6:27, 28, 31, 34).

9 ¿Kunatsa Jesusajj kuntï manqʼapkäta, umapkäta, isisipkarakïta ukanakat jan sinti llakisipjjamti sasin sispachäna? ¿Janit manqʼasa, isisa wali wakiskirïkejja? ¡Ukanakajj wali wakiskiriwa! Manqʼa, isi jikjjatañatakejj qollqe toqet llakisiñajj walikïskiwa. Jesusajja, jakasiñatakejj kunanakas wakisi uk sum yatïna. Ukatsti, arkirinakapajj ‘qhepa urunakan’ jan wali tiemponakan jakapjjañapätapsa yatirakïnwa (2 Tim. 3:1). Jichhürunakanjja, walja jaqenakajj janiw trabajo jikjjatirjamäpkiti, alasiñatakejj taqe kunas jukʼampiw urut urutjam jiljjattaski. Yaqhep cheqanakanjja, jaqenakajj pisin jakasipjje, manqʼañapas jukʼakiw utji, awisajj jan manqʼataw uñjasipjje. Ukampis Jesusatakejj jakañaw manqʼat sipansa jukʼampi wakiskirejja, jañchisti isit sipansa jukʼampiraki.

10. Kunatï wakiski ukanak Diosar mayiñat sipansa, ¿kuna toqet mayiñas jukʼamp wakiskirejja?

10 Wali Uñtʼat Arstʼäwi arskäna uka nayrajja, Jesusajj kunatï jakañatak wakiski ukanak mayiñwa arkirinakapar yatichäna. Akham sasaw arkirinakapajj mayisipjjañapäna: “Sapürutak manqʼañ churanipjjeta” sasa (Mat. 6:11). Yaqha horasasti akhamwa mayisipjjañama sasaw Jesusajj sarakïna: ‘Wakiski ukarjam sapürutak manqʼañ churanipjjeta’ sasa (Luc. 11:3, NM ). Uka arunakampejja, ‘kunatï jakañatak wakiski ukanakat llakisiñasawa’ sasin janiw Jesusajj sañ munkänti. Jan ukasti, ‘cosasanak Diosar mayiñat sipansa, Reinopa mayiñaw jukʼamp wakiskirejja’ sañwa munäna (Mat. 6:10; Luc. 11:2). Kunatï jakañatak munaski ukanakat jan llakisipjjañapatakejja, Jehová Diosajj qawqsa luratanakapat llakisi uka toqetwa arkirinakapar parltʼäna.

11, 12. Jehová Diosajj jamachʼinakar sum uñji, ¿kunsa ukajj yatichistu? (7 janankir foto uñjjattʼam).

11 (Mateo 6:26 liytʼañataki). Jesusajj akham sänwa: “Uñtapjjam jamachʼinakajj jalaski uka” sasa. Jamachʼinakajj jiskʼäpkchisa, waljwa manqʼasipjje. Mä jamachʼitï jaqe ukchʼäspa ukhajja, jaqet sipansa walja manqʼwa manqʼaspa. Jamachʼinakajja, frutanaka, jathanaka, laqʼonakwa manqʼasipjje. Ukampis jupanakajj janiw satapkisa ni apthapipkisa. Jehová Diosaw kunatï wakiski uk jupanakar churi (Sal. 147:9). Ukampis ¿Jehová Diosat lakanakapar manqʼa churpacha? Janiwa, jan ukasti jupanakaw manqʼa thaqhasipjjañapa.

12 Alajjpachankir Awkiw jamachʼinakarojj sum uñji, ukhamarakiw jaqenakarojj sum uñjaspa, uka toqet janiw Jesusajj pächaskänti  [1](1 Ped. 5:6, 7). Kunjamatï jamachʼinakajj manqʼa thaqhasipkejja, ukhamarakiw jiwasajj manqʼa jikjjatañatakejj yapuchasiñasa, jan ukajj trabajiñasa. Jehová Diosasti chʼamachasitasarojj bendiciniwa. Maysa toqetjja, janitï qollqesa manqʼasa utjkistani ukhajja, Jehová Diosajj kunatï wakiski uk churistaniwa. Inas  khitinakatï utjirinïpki ukanak toqejj yanaptʼchistaspa. Jehová Diosajja, jamachʼinakarojj tapanaka lurasipjjañapatak amuytʼirwa lurtʼawayi, tapanak lurasipjjañapatakejj kunatï wakiski ukanaksa churawayarakiwa. Familiasamp chika jakasiñatakejja, ukhamarakiw mä cheqa jikjjatañatak Diosajj yanaptʼistaspa.

13. Diosajj jamachʼinakat sipansa jukʼamp sumwa uñjistu sasajja, ¿kunatsa sissna?

13 Jehová Diosaw jamachʼinakar uñjaski sasin siskäna uka qhepatjja, Jesusajj akhamwa arkirinakapar säna: “Jamachʼinakat sipansa jumanakajj jukʼamp munatäpjjtawa” sasa (Lucas 12:6, 7 uñjjattʼarakïta). Uka arunak siskäna ukhajja, kunjamsa jaqenakar juchat qhespiyañatakejj jakäwip aptʼasini uka toqetwa Jesusajj lupʼiskpachäna. Cheqas Jesusajj janiw jamachʼinak laykusa, ni yaqha animalanak laykus jiwawaykiti, jan ukasti jaqenakan wiñay jakaña jikjjatapjjañapatakiw jiwawayi (Mat. 20:28).

14. Mateo 6:27 qellqatan jikjjataski uka arunakarjamajja, ¿kunsa Jesusajj sañ munaskäna?

14 (Mateo 6:27 liytʼañataki). Janiw khitis jakañapjja mä horamp yaptʼaskaspati sasinjja, ¿kunsa Jesusajj sañ munäna? Kunatï wakiski uk jikjjatañataki sinti llakisisajja, janiw jukʼamp maranak yaptʼasksnati sañwa munaskäna. Jiwasatï sint llakissna ukhajja, usumpiw apantassna, jiwañarus purtʼasiraksnawa.

15, 16. 1) Jehová Diosajj pampankir panqaranakar sum uñji, ¿kunsa ukat yateqsna? (7 janankir foto uñjjattʼam). 2) ¿Kunsa jisktʼasiñasa, ukat kunatsa?

15 (Mateo 6:28-30 liytʼañataki). Yatiyir sarañataki, tantachäwisar sarañataki jan ukajj jachʼa tantachäwir sarañatak suma  isinïktan ukhajj wal kusistanjja. Ukampisa, ¿kunsa uchasiñäni sasin llakisiñasäspati? Jehová Diosajj kunjamsa luratanakapar uñji uk amuytʼayañatakejja, ‘pampankir panqaranakata’, jan ukajj lirionakatwa Jesusajj parläna. Uka panqaranakajja, janiw kunsa uchasipjjani ukat llakisipkiti. Ukhamäpkchisa ¡wali sumäpjjewa! Ukatwa Jesusajj akham säna: “Janiw rey Salomonas uka panqaranakjamajj sum isthapiskänti taqe utjirinïtap laykusa” sasa.

16 Uka qhepatjja, Jesusajj akham sänwa: “Niyakitejj Diosajj ukkha suma uka panqaranakarojj isthapiychejja [...] ¡kunja jukʼampinaksa Diosajj jumanakatakejj luranejja, pisi iyawsañan jaqenaka!” sasa. Jehová Diosajj ukhamarakwa isthapiyistaspa. Ukampis Jesusan arkirinakapajja, uka arunakajj janis cheqäkaspa ukhamwa amuyapjjäna, cheqas iyawsäwin yanaptʼatäpjjañapaw wakisïna (Mat. 8:26; 14:31; 16:8; 17:20). Jupanakajja, Jehová Diosaw yanaptʼitani sasin confiyapjjañapaw wakisïna. ¿Jiwasat kamsasirakispasa? ¿Jehová Diosaw yanaptʼitani sasat confiytanjja?

17. ¿Kunanakas Jehová Diosampejj jan sum apasiykistaspa?

17 (Mateo 6:31, 32 liytʼañataki). Jichhürunakan waljaniw Jehová Diosar jan uñtʼapkiti, ukatwa jukʼamp qollqe jikjjatañaru, cosasanak jikjjatañaru chuym uchapjje. Jiwasatï jupanakjam sarnaqsna ukhajja, Jehová Diosampejj janiw sum apasjjsnati. Jupajj Awkisawa, munasirakistuwa. Ukhamajja, jiwasatï munañap lurañäni, Reinopsa nayrar uchañäni ukhajja, kunatï jakañatak wakiski ukanak jilarkirwa churistani. Cheqas Diosamp sum apasisakiw kusisit jakassna, kunatï utjkistu  ukampis kusisitaw jakasiraksna (1 Tim. 6:6-8).

DIOSAN REINOP NAYRAR UCHAPJJAÑÄNI

18. ¿Kunsa Jehová Diosajj jiwasat yati, ukat kunsa jiwas laykojj luraspa?

18 (Mateo 6:33 liytʼañataki). Diosan Reinop jakäwisan nayrar uchañäni ukhajja, kunatï jakañatakejj wakiski ukanak Jehová Diosajj churistaniwa. Uka toqet jan pächasiñatakejj Jesusan arunakapaw yanaptʼistaspa. Jupajj sänwa: “Jumanakan alajjpachankir Awkimajj yatiwa kuntejj jumanakaru wakisipktam ukjja” sasa. Kuntï munktan uk janiw jiwasajj amuyksnati, ukampis Jehová Diosajj janïräkipanwa yatjje (Fili. 4:19). Kuna issa munañäni, manqʼañatakejj kunas jan utjkistani ukanak janïräkipanwa Diosajj yatjje. Ukatsti familiasamp jakasiñatak mä cheqa munatassa yatirakiwa. Ukhamajja, kunatï wakiski ukanakjja Jehová Diosaw churistani.

19. ¿Kunatsa jutïrit jan sinti llakisiñasäki?

19 (Mateo 6:34 liytʼañataki). Jesusajj arkirinakapar akham sänwa: “Jan llakisipjjamti kunatï qharürojj paskani ukatjja” sasa. Jehová Diosajja, kunatï sapürutak wakiski ukanakwa churistaspa. Ukatwa kunsa jutïrin munañäni ukanakat jan sinti llakisiñasäkiti. Jiwasatï jutïrit llakissna ukhajja, munañasarjamaw kuns lurañ munjjsna, Diosarus janiw confiyjjsnati. Ukaw Diosamp sum apasiñat jarkʼistaspa (Pro. 3:5, 6; Fili. 4:6, 7).

DIOSAN REINOP NAYRAR UCHAPJJAÑÄNI, JUPASTI YANAPTʼISTANIWA

Diosan Reinop nayrar uchañatakejja, kunatï wakiski ukampik jakapjjañäni. (20 tʼaqa uñjjattʼäta).

20. 1) Jehová Diosar jukʼamp serviñatakejja, ¿kun lurañsa amtsna? 2) Kunatï wakiski ukampik jakañatakejja, ¿kunas yanaptʼistaspa?

20 Cosasanak jikjjatañaruk chuym uchjjsna ukhajja, Jehová Diosar taqe chuyma serviñatakejj janiw chʼamajj utj-jjestaspati, ukajj wali llakkañäspawa. Cosasanak jikjjatañatak chʼamachasiñat sipansa, kunanakatï Jehová Diosar kusisiyki uk lurañatakiw chʼamachasiñasa. Amuytʼañataki, kawkïr tamantï yatiyirinakajj munaski ukaruw yanaptʼir sarsna. Precursorjam irnaqtʼañwa amtsna. Precursoräjjstan ukhajja, Diosan Reinopat Yatiyirinakataki Escuelar sarañatakiw solicitud phoqantsna. Betel Utarusa, Bibliat apstʼat qellqatanakasajj jaqokipaski uka oficinanakarusa semanan mä qawqha urunakaw yanaptʼir sarsna. Tantachasiñ Utajj kunjamänisa uk sum amuytʼapki, ukatsti ukarjam lurapki, askichapkaraki ukanwa yanaptʼaraksna. Diosan Reinopar jukʼamp yanaptʼañatakejja, kunatï jakañatak munaski ukamp jakañwa amtsna. Ukatakejja, “ Wakiski ukampik jakasiñatakejja, ¿kunanaksa lurasma?” siski uka recuadrow yanaptʼistaspa. Kunsa lurañäni uk amuytʼasiñatakejja, Jehová Diosaruw yanaptʼa mayisiñasa. Ukatsti wakiskani ukarjamaw lurañasa.

21. ¿Kunas Jehová Diosamp sum apasiñatak yanaptʼistani?

21 Jesusajja, ‘Diosan Reinop nayraqat thaqhapjjam’ sasaw sawayistu. Ukhamtï lurañänejja, kunatï jakañatak wakiski ukanakat janiw sinti llakiskañäniti. Diosar jukʼamp jakʼachasisajja, ‘Jehová Diosaw yanaptʼaskitani’ sasaw confiyañäni. Ukatsti, jiwaspachpa amuytʼasiñsa yateqarakiñäniwa, qollqenïkchiñäni ukhasa janiw munatas laykukisa, ni kunanakatï akapachan utjki ukanak uñjasakis alkañäniti. Wakiski ukampik jakasiñäni ukhajja, Jehová Diosampejj sumwa apasiñäni, wiñay jakañsa katoqarakiñäniwa (1 Tim. 6:19).

^ [1] (12 tʼaqa): Jehová Diosan yaqhep servirinakapajja, awisajj jan manqʼañaniw uñjasipjje. Kunatsa Jehová Diosajj ukhamak uñjpacha uk yatiñatakejja, “Aka revista liytʼirinakan jisktʼäwinakapa” sat yatichäwi uñjjattʼäta, ukajj Yatiyañataki septiembre 15, 2014 revistanwa 22 janapan jikjjatasi.