Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Amuyasipjjapuniñäni

Amuyasipjjapuniñäni

Janiw yatipktati kunürutejj Tatitojj jutkan ukjja(MAT. 24:42).

136, 129 QʼOCHUNAKA

1. Kuna tiemponakansa jakasktan jan ukajj kunanakas jiwas jakʼan pasaski ukanakat amuyañajja, ¿kunatsa wali wakiskirejja? (Aka janankir foto uñjjattʼam).

JACHʼA tantachäwejj niya qalltañampïskiwa. Tantachäwi sarayiristi plataformar makatasajj ‘walik jutapjjtajja’ sasaw taqenir arunttʼaraki. Musicajj niya qalltañampëjjewa, qontʼasiñ horasäjjatapsa tantachasirinakajj yatipjjarakiwa. Jupanakajja, musicanaksa arstʼäwinaksa istʼañ wal munapjje. Ukampis jachʼa tantachäwi sarayirirusa, musicajj istʼaskäna ukarusa inas yaqhepajj jan istʼapkchïnti. Tantachäwi qalltatapjja janiw amuyapkänti. Ukhamasti yaqhepajj sarnaqasipkakïnwa mayninakampis parlasipkakïnwa. ¿Kunsa ukajj amuytʼayistu? Ukhamarakiw kuna tiemponakansa jakasktan, jan ukajj kunas niya pasañampïski ukanak jan amuyksna ukhajj pasaspa. Kunanakatï jutïr urunakan paskani ukanakat amuytʼasiñasatakiw ukajj yanaptʼistu. ¿Kuna toqetsa parlasktanjja?

2. ¿Kunatsa Jesusajj ‘amuyasipjjapunim’ jan ukajj ‘suyapjjapunim’ sasin arkirinakapar sispachäna?

2 ‘Akapachajj tukuskani uka urjja’ kunatsa wakichtʼata wali amuytʼasis suyapjjañapäna uka toqetwa Jesusajj arkirinakapar ewjjtʼäna. Jupajj akham sänwa: “Jumanakajj suyapjjam, amuyasipjjam, [Diosat mayisipjjarakim] janirakiw yatipktati kuna horasar puriniñapsa” sasa. Ukatsti walja kutiw akham säna: “Amuyasipjjapunim” sasa (Mat. 24:3; Marcos 13:32-37 liytʼañataki). Mateo  qellqatarjamajja, Jesusajj uka toqet arkirinakapar amtayarakïnwa. Jupanakar akham sänwa: “Jumanakajj suyapjjapunim, janiw yatipktati kunürutejj Tatitojj jutkan ukjja” sasa. Ukatsti mayampiw säna: “Jumanakajj wakichtʼata suyapjjañamajja, Jaqen Yoqapasti jan amtat horasaruw jutani” sasa. Ukjjarojj saskakïnwa: “Jumanakajj suyapjjapunim, janiw yatipktati kuna horasatejj, jan ukajj kunürutejj jutkani [...] ukjja” sasa (Mat. 24:42-44; 25:13).

3. ¿Kunatsa Jesusan arunakapar istʼtanjja?

3 ¿Kunatsa Jehová Diosan Testigonakapajj Jesusan arunakapar istʼtanjja? Qhepa urunakankatassa jachʼa tʼaqhesïwi niya qalltañampïtapsa yattanwa, ukatwa Jesusan arunakapar istʼtanjja (Dan. 12:4; Mat. 24:21). Jehová Diosan markapajja, Jesusan arunakaparjamaw Reino toqet suma yatiyäwinak oraqpachan yatiyasipki. Ukatsti guerranakasa, usunakasa, oraq khatatinakasa, manqʼat jiwañanakasa walja cheqanakanwa istʼasiraki. Dios toqet kʼari yatichirinakasa, jiwayasiñanakasa, nuwasiñanakasa jukʼampiw jiljjattaskaraki, janipuniw kunapachas ukham uñjasirïkiti (Mat. 24:7, 11, 12, 14; Luc. 21:11). Jiwasajj Jesusan jutañapwa wal suyasktanjja, jupaw Awkipan taqe amtanakap phoqayani (Mar. 13:26, 27).

UKA UROJJ JAKʼANKJJEWA

4. 1) Armagedón jachʼa chʼajjwäwejj kunapachas apasini ukjja Jesusajj yatjjpachawa sasin ¿kunatsa sissna? 2) Jachʼa tʼaqhesïwejj kunapachas qalltani uk janis yatkstanjja, ¿kuna toqetsa jan pächasiñasäki?

4 Mä jachʼa tantachäwir sartan ukhajja, kuna horas uka tantachäwejj qalltani uk yattanwa. Ukampis kunapachas jachʼa tʼaqhesïwejj qalltani uk janiw yatktanti. Jesusajj aka Oraqenkkäna ukhajja, akham sänwa: “Kuna horasäkanitejj jan ukajj kuna urükanitejj ukjja janiw khitis yatkiti, ni alajjpachankir angelanakasa ni Diosan Yoqapasa, jan ukasti Dios Awki sapakiw yati” sasa (Mat. 24:36). Niyakejjay Jesusajj Armagedón jachʼa chʼajjwäwin pʼeqtʼchinejja, kunapachas uka jachʼa nuwasïwejj apasini uk yatjjpachawa (Apo. 19:11-16). Ukampis jiwasajja, kunapachänisa kuna horasänisa ukjja janïraw yatktanti. Ukatwa wali amuytʼasis suyañasa. Kunapachas jachʼa tʼaqhesïwejj qalltani ukjja Jehová Diosajj yatjjewa, uka urojj sapürutjamaw jakʼachasisinki, ‘horasaparupuniw purinini’ (Habacuc 2:1-3 liytʼañataki). ¿Kunatsa ukhamäniw sistanjja?

5. Jehová Diosajj kunjamsa arsutanakap horasaparupun phoqe uk mä uñachtʼäwimp qhanañchtʼma.

5 Jehová Diosan arsutanakapajj horasaparupuniw phoqasi. Ukatakejj servirinakapar Egipto markat qhespiykäna uka toqet amuytʼañäni. Jehová Diosajj nisán 14, 1513 nayrïr pacha maranwa israelitanakar qhespiyäna. Qhepatjja, Moisés chachajj akham sasaw uka urut qellqäna: “Uka pusi pataka kimsa tunkani marajj phoqhaski uka uruwa Tatitun taqe ejercitopajj Egipto markat mistsuwayjjapjjäna” sasa (Éxo. 12:40-42). Uka ‘pusi pataka kimsa tunkani maranakajja’, nisán 14, 1943 nayrïr pacha maranwa kunapachatï Jehová Diosajj wawanakamaruw bendisï sasin siskäna ukhaw qalltäna (Gál. 3:17, 18). Mä qawqha tiempotsti, Jehová Diosajj akham sasaw Abraham chachar sarakïna: “Jichhajj yatiñamajj wakisiwa; wawanakamajj yaqha markanakanwa jakapjjani, ukansti esclavöpjjarakiniwa, pusi patak maranakaw ukanjja tʼaqhesiyatäpjjarakini” sasa (Gén. 15:13; Hech. 7:6). Uka pusi pataka maranakajja, 1913 nayrïr pacha maranwa, kunapachatï Ismaelajj Isaacar jan walinak luräna ukhaw phoqasiñ qalltäna. Ukatsti, Jehová Diosajj Egipto markat israelitanakar qhespiykäna ukhaw tukusirakïna (Gén. 21:8-10; Gál. 4:22-29). Jïsa, walja maranak nayraw Jehová Diosajj kunapachas markapar qhespiyani uk amtjjäna.

6. Jehová Diosajj markapar qhespiyapuniniwa sasin ¿kunatsa sissna?

 6 Israelitanakajj Egiptot qhespiyatäpkäna ukhajja, Josué chachajj jupanak taypinkarakïnwa. Walja maranak qhepatjja, akham sasaw Josué chachajj israelitanakar amtayäna: “Muntwa jumanakan amtasiñanakama taqe chuymanakamampi, ukhamaraki taqe jakañanakamampiraki. Diosasti taqe suma arunakapwa jumanakampi phoqhe, kunjämtï jupajj arsüna ukhama. Janiw kuna arunakapas jan phoqhasisajj pasawaykiti” sasa (Jos. 23:2, 14). Jehová Diosajja, ‘jachʼa tʼaqhesïwin qhespiyapjjämawa, Paraisonsa wiñayaw jakasipjjäta’ sasaw servirinakapatakejj arsuwayi. Diosan uka arsutapajj phoqasipuniniwa, janipuniw uka toqet pächasiñasäkiti. Ukhamasti jiwasatï Paraison jakasiñ munstan ukajja, wakichtʼataw uka uru suyañasa.

QHESPIYATÄÑATAKEJJ WAKICHTʼATAW SUYAÑASA

7, 8. 1) Nayra tiemponakanjja, ¿kunsa marka uñjirejj lurañapäna, kunsa jupanakat yateqsna? 2) Marka uñjirinakajj ikjapjjäna ukhajja, ¿kunas pasäna? Uk mä uñachtʼäwimp qhanañchtʼma.

7 Nayra tiemponakanjja, torre patjjat marka uñjirinakaw markanakan utjäna. Uka tiemponakanjja, niya taqe markanakaw perqanakamp muyuntatäna, Jerusalén markas ukham muyuntatarakïnwa. Marka uñjirinakajj uka perqa patjjanakanwa anqäjj uñjañatakejj sayapjjäna. Yaqhep uñjirinakasti, markan punkojj utjkäna ukanwa sayapjjarakïna. Jupanakajj urusa arumas janiw ikjapjjañapäkänti. Enemigonakajj markar jakʼachasinipjjäna ukhajja, markankirinakaruw yatiyapjjañapäna (Isa. 62:6). Wali amuyasis uñchʼukiñasa jan ikjañas qawqha wakiskirïnsa uk sum yatipjjäna. Jan ukham lurapjjaspäna ukhasti walja jaqenakaw jiwarapjjaspäna (Eze. 33:6).

8 Judionakan sarnaqäwipat qellqkasajja, 70 maran kunjamsa romanonakajj Jerusalén markar mantapjjäna uka toqetwa Josefo chachajj qellqäna. Marka uñjirinakajj ukapachan ikjapjjataynawa. Ukhamatwa romano soldadonakajj markar mantapjjäna. Templor purisasti, ninampiw phichantapjjäna, Jerusalén marksti qʼalwa tʼunjapjjarakïna. Ukhamaw jachʼa tʼaqhesïwejj Judea markan tukusïna, jupanakajj janipuniw kunapachas ukhaman uñjasipkänti.

9. ¿Kuna toqetsa walja jaqenakajj jan amuyasipki?

9 Jichhürunakanjja, walja gobiernonakaw markanakapan qorpanakap soldadonakampi ukhamarak jichhak uñstki uka aparatonakampi vigilapjje. Uka gobiernonakajja, jan waltʼayir jaqenakarusa jan ukajj yaqha ukhamanaksa janiw markapar mantayapkiti, ukatakejj wali amuyumpiw uñjapjje. Ukampis uka markanak apnaqer gobiernonakajja, alajjpachan wali chʼamani yaqha gobierno utjatap janiw amuyapkiti. Uka gobiernojj Jesucriston apnaqatawa, ukhamasti niyaw akapachankir gobienonakarojj tukjani (Isa. 9:6, 7; 56:10; Dan. 2:44). Uka uru puriniñap walpun suytanjja, ukatsti wakichtʼataw suyañ munaraktanjja. Ukhamasti Biblian qellqatäki uka profecianakar istʼañäni, Jehová Diosarus jan jitheqtasa serviskakiñäni (Sal. 130:6).

JANIPUN IKJAPJJAÑÄNITI

10, 11. 1) ¿Kuna toqetsa amuyasiñasa ukat kunatsa? 2) Biblian qellqatäki uka profecianakat jan sum amuyañatakejj Supayaw jaqenakan amuytʼanakap chʼamaktʼayi sasin ¿kunatsa sissna?

10 Arum paqar jan ikita mä marka uñjirit amuytʼaskakiñäni. Arum paqar jan ikitapatjja, qhantatiru jan ikjañajj jupatak jukʼamp chʼamawa. Jiwasampejj niya ukhamarakiwa, qhepa urunakanwa jakasktanjja. Ukhamasti qhep qhepa urunakanjja ajay toqet jan ikjañajj jukʼamp chʼamäniwa, ikjsna ukhajj wali llakkañapunïspawa. Ajay toqen kunanakas ikjayistaspa uk jichhajj kimsa toqet uñjañäni.

 11 Supayaw jaqenakar engañji. Jupaw “akapacha apnaqerejj[a]”. Jesusajj jiwayatäkäna uka qhepatjja, kimsa kutiw arkirinakaparojj uka toqet amtayäna (Juan 12:31; 14:30; 16:11). Supayaw akapach apnaqe, ukatwa jaqenakajj Biblian qellqatäki uka profecianakat jan sum amuyapkiti. Uka profecianakaw akapachan tukusiñapajj wali jakʼankatap qhanañchistu (Sof. 1:14). Supayaw jaqenakan “amuytʼanakapjja chʼamaktʼayi”, ukajj qhanaw amuyasi (2 Cor. 4:3-6). ‘Akapachajj niyaw tukusini, Jesusaw alajjpachan apnaqjje’ sasin jaqenakar yatiytan ukhajja, janiw istʼañ munapkistuti. ‘Janiw uka toqet yatiñ munkti’ sasaw waljanejj sapjje.

12. ¿Kunatsa Supayamp jan engañjayasiñasäki?

12 Biblian qellqatäki uka profecianakatjja janis waljanejj istʼañ munapkchejja, janiw uk uñjasajj aynachtʼañasäkiti. Kunatsa ajay toqen jan ikjañasäki uk jiwasajj sum yattanjja. Apóstol Pablojj akham sasaw cristianonakar ewjjtʼäna: “Jumanakajj askiw yatipjjta, Tatitojj purininiwa kunürutejj jan suykañäni uküru, kunjämatejj mä lunthatajj arum jutki ukhama” sasa (1 Tesalonicenses 5:1-6 liytʼañataki). Jesusajj akham sasaw jiwasar ewjjtʼawayarakistu: “Ukhamarakiy jumanakajj wakichatäpjjamjja; Jaqen Yoqapasti kuna horasatï jan amuyasipkäta, ukkhaw jutani” sasa (Luc. 12:39, 40). Supayajja, niyaw jaqenakarojj ‘taqe kunas sumakïskiwa, janiw kunas paskaniti’ sasin amuyayani. Ukatsti akatjamatwa Jehová Diosan urupajj purini, uk uñjasasti jaqenakajj wal muspharapjjani. ¿Kunsa jiwasajj lurañäni? Uka urutak wakichtʼatäñ munstan ukhamarak jan engañjatäñ munstan ukhajja, ajay toqet janiw ikjañasäkiti, jan walinakatsa amuyasiñasarakiwa. Ukatakejja sapüruw Diosan Arup liyiñasa, kuntï liyktan uka toqenakatsa lupʼiñasaraki.

13. ¿Akapachan amuyunakapajj kunjamtʼayis jaqenakarojja, ukat kunsa akapachankir jaqenakjam jan amuyañatakejj lurañasa?

13 Jaqenakajj akapachan amuyunakapampiw apayasipjje. Jichhürunakanjja, Diosar uñtʼañajj janis wakiskaspa ukhamwa jaqenakajj amuyapjje (Mat. 5:3). Diosar uñtʼañatak tiempo apstʼasiñat sipansa, jupanakajj kunanakatï akapachan utjki ukanak jikjjatañatakiw wal chʼamachasipjje, tiempsa aptʼasipjjaraki (1 Juan 2:16). Thoqhoñanakasa yaqha ukham kusistʼañanakasa añchapuniwa, janipuniw kunapachas ukham utjirïkiti. Ukanak utjatapatwa jaqenakajj kusistʼañanakar  chuym churapjje, kunanaktï lurañ munapki ukanaks lurapjjaraki (2 Tim. 3:4). Uka kusistʼäwinakaw kunatï jukʼamp wakiskirïki ukanakat tiempo aptʼasiyi, Jehová Diosamp sum apasiñajj kunja wakiskiris uksa janiw jaqenakajj amuyapkarakiti. Ukatwa Pablojj cristianonakar akham sasin ewjjtʼäna: ‘Ikit sartasiñ horasäjjewa. Jañchin munañanakap lurañjja jan lupʼipjjamti’ sasa (Rom. 13:11-14).

14. ¿Kuna ewjjtʼanakas Lucas 21:34, 35 qellqatan jikjjatasi?

14 Jiwasajj janiw akapachan amuyunakapampi apayasiñ munktanti, jan ukasti Diosan ajayupampiw yanaptʼayasiñ muntanjja. Jehová Diosajj qollan ajayupampiw kunas niy pasañampïski uk amuytʼañatak yanaptʼistu (1 Cor. 2:12). [1] Ukampis amuyasiñasawa. Kunanaktï sapür lurktan ukanakasa Diosar taqe chuym serviñatjja jarkʼistaspawa (Lucas 21:34, 35 liytʼañataki). Yaqhepajj inas akham sapjjchistaspa: ‘Akapachajj niyaw tukusjjani sasin amuyasajj jan amuytʼasirïpjjatamwa uñachtʼayapjjtajja’ sasa (2 Ped. 3:3-7). Ukampis uka arunak istʼasajj janiw aynachtʼañasäkiti, akapachajj niyaw tukusini uk sum yattanjja. Diosan ajayupamp yanaptʼayasiñ munstan ukajja, jan faltasisaw tantachäwinakar sarañasa.

¿Ajay toqet jan ikjañatakejj chʼamachasisktanti? (11-16 tʼaqanak uñjjattʼäta).

15. ¿Kunas Pedro, Santiago, Juan apostolonakarojj pasäna, ukat kunjamsa ukajj jiwasar pasarakistaspa?

15 Pantjasirïtasatwa ajay toqet ikjañar pursna. Jesusajja, jaqenakan pantjasirïpjjatap sum yatïna. Jiwayatañapäkäna uka arumajj kunas pasäna uka toqet amuytʼañäni. Jesusajj jan pantjasir jaqëkchïnsa, Diosat jan jitheqtañatakejj Juparuw yanaptʼap oracionan mayisïna. ‘Nayajj Awkijar mayiskä ukhajja, janiw ikipjjätati’ sasaw Jesusajj Pedro, Santiago, Juan apostolonakapar säna. Ukampis apostolonakajja, jan ikjapjjañapajj kunja wakiskirïnsa uk janiw amuyapkänti. Qarjatäsinjja ikjapjjänwa. Jesusajj qarjataskarakchïnsa Awkipar mayisiñatakejj janiw ikjkänti. Apostolonakajj ukhamarakiw Diosar mayisipjjañapäna, ukampis janiw ukham lurapkänti (Mar. 14:32-41).

16. Lucas 21:36 qellqatarjamajja, ¿kunas ‘jan ikjañatakejj’ yanaptʼistani?

16 ¿Kunas ajay toqet jan ikjañatakisa, Jehová Diosan urup wakichtʼat suyañatakis yanaptʼistaspa? Kunatï cheqäki uk lurañ wal munañaw chuymasan utjañapa, ukampis janiw ukakïñapäkiti. Jiwayatäñapäkäna ukhat mä qawqha urunak nayrajja, ‘jan ikjañatakejj orapjjañamaw wakisi’ sasaw Jesusajj arkirinakapar ewjjtʼäna (Lucas 21:36 liytʼañataki). Aka qhepa urunakan ajay toqen jan ikjañatakejja, ukhamarakiw jiwasajj Jehová Diosar jan inaktʼas mayisiñasa (1 Ped. 4:7).

AMUYASIPJJAPUNIÑÄNI

17. ¿Kunjamsa akapachan tukusiñap urojj purinkani ukatakejj wakichtʼassna?

17 Akapachan tukusiñapajj “jan amtat horasaruw jutani” sasaw Jesusajj säna (Mat. 24:44). Ukhamasti uka urjja wakichtʼataw suyañasa. Janiw Supayan apnaqat akapachankir jaqenakjam sarnaqañ horasäkiti. Akapachanjja janiw cheqpach kusisiñ jikjjatksnati. Jehová Diosasa Jesusasa, ajay toqen jan ikjañatakejj kunsa lurañasa uk Biblia toqew yatichistu. Ukhamasti, Biblian qellqatäki uka profecianakar istʼapjjañäni, uka profecianakajj kunjamsa phoqasiski uksa amuyapjjarakiñäni. Jehová Diosarus jakʼachasisipkakiñäni, Reinopsa jakäwisan nayrar uchasipkakiñäni. Ukhamtï lurañänejja, akapachan tukusiñap urojj purinkani ukhajj wakichtʼatäñäniwa (Apo. 22:20). Wakichtʼatäñäni ukhakiw Diosajj qhespiyistani.

^ [1] (14 tʼaqa) ¡Diosan Reinopajj apnaqjjewa! sat libron 21 yatichäw uñjjattʼäta.