Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

George Rollston, Arthur Willis precursor jilatanakajj carropan radiadoraparuw uma phoqantasipki, Australiat alay toqena, 1933 marana.

 ¿KUNANAKAS IMATÄSKI?

“Testigonakatakejj janiw jaya thakis ni chʼama thakis utjkiti”

“Testigonakatakejj janiw jaya thakis ni chʼama thakis utjkiti”

MARZO 26, 1937 maranjja, Sidney (Australia) markaruw pä chachanakajj autopampi jan ukajj carropampi wali qarita puripjjäna. Jupanakajj uka markat sarjjasin mä maraw 19.300 kilometronak viajipjjäna, jan wali thakinaknäma jaya cheqanakar sarapjjäna. Arthur Willis, Bill Newlands precursor jilatanakajja, janiw pasiyir viajapkänti, jan ukasti Diosan Reinopatwa Australian yatiyañ munapjjäna.

Khä 1920 mara tukuykamajja, Bibliat Yatjjatir * mä qawqha jilat kullakanakaw qota laka jakʼankir markanakan yatiyapjjäna. Australianjja, mä cheqajj wali wañawa, ukanjja janiw walja jaqenakajj jakapkiti, ukasti Estados Unidos markajj qawkchʼäkitï ukan chikatapat jilpachawa. Jilat kullakanakajja, “taqe aka oraqpachana” Diosan Reinopat yatiyasiñapjja sum yatipjjäna, ukatwa jan yatiyaskäna uka jaya markanakar sarapjjäna (Hech. 1:8). ¿Kunjamsa taqe cheqan yatiyapjjaspäna? Jilat kullakanakajja, Jehová Diosaw yanaptʼaskistani sasaw confiyapjjäna, ukatwa kuntï lurirjamäpkäna uk lurañatak chʼamachasipjjäna.

PRECURSORANAKAW YATIYAÑ QALLTAPJJÄNA

Khä 1929 maranjja, Queensland ukhamarak Australia Occidental cheqankir jilat kullakanakajj mayni markanakar viajiñatakejja, jakañatakjam wakichtʼat autonakwa lurapjjäna. Uksti precursoranakaw apnaqapjjerïna, jupanakajj chʼama thakinakanjam sarañsa, auto askichañsa yatipjjänwa. Kawkhantï jan yatiyatäkäna uka cheqanakanwa yatiyapjjarakïna.

Kawkïr precursoranakatï auto alañ jan puedipkäna ukanakajja, bicicletatwa yatiyir sarapjjäna. Amuytʼañataki, 1932 maranjja 23 marani Bennett Brickell jilatajja, Rockhampton (Queensland) markat sarasaw phesqa phajjsinak Australiat alay toqeru saräna, ukhamatwa jaya cheqanakan yatiyäna. Bicicletaparojj ikiña, isi, manqʼa, ukhamarak walja libronak apäna. Bicicletapan llantanakapajj thantstjjäna ukhajja, Jehová Diosaw yanaptʼaskitani sasaw confiyäna. Puriñatakejj 320 kilometronakaw faltaskäna, ukhaw bicicletapajj jan waltʼäna, ukatwa  umat pharjayasis jaqenakajj jiwapkäna uka cheqanakanjam biciclet nuktʼat saräna. Brickell jilatajja, 30 maranakaw Australiankir taqe markanakar yatiyir saräna, walja kilometronakaw bicicletata, motota, autota viajïna. Ukatjja, jayan jakir jaqenakaruw Diosan Reinopat yatiyäna, tamanaksa uttʼayarakïnwa, ukatwa Australian wali uñtʼatäna respetatarakïna.

JAN WALINAKAN UÑJASIPJJÄNA

Taqe markanakat sipansa, Australiajj jukʼa jaqenikiwa. Markanakan jukʼanikiw qamapjjaraki. Ukatwa jilat kullakanakajj Australiankir jaya markanakar yatiyir sarapjje.

Stuart Keltie, William Torrington precursor jilatanakajja, ukhamarakiw yatiyir sarapjjäna. 1933 maranjja, Alice Springs markan yatiyañatakejj Simpson sat wasar cheqnama, chʼalla qollunak cheqnamwa sarapjjäna, uka markasti Australia taypinkiwa. Keltie jilatajj maderat lurat kayunïnwa, autopajj jan waltʼäna ukhajja, camellotwa yatiyir sarirïna. Uka precursoranakan chʼamachasitapajj janiw inamayäkänti, jupanakajj William Creek cheqan trenanakajj saytʼapki uka cheqan Charles Bernhardt chacharuw uñtʼapjjäna, jupajj mä hotelanïnwa. Tiempompejj Bibliatwa yateqjjäna, ukatsti hotelap aljasajj precursoratwa 15 maranak servïna, jupasti Australia cheqan utjki uka jaya markanakat mä markanwa precursorat sapaki servïna.

Arthur Willis jilatajj Australian yatiyir sarañatakiw wakichtʼasiski, Perth (Australia Occidental) markana, 1936 marana.

Taqe cheqaru yatiyir sarañatakejja, jan ajjsariri, jan walinakar saykatañatakis wakichtʼata ukhamäpjjañapänwa. Arthur Willis, Bill Newlands jilatanakajj jallu wal purintipan 32 kilometronakakwa pä semanan sarapjjerïna. Awisajj lupin lupjata chʼalla ukhamarak qalarar qollunaknama, jawir lakanakan ñeqʼe thaknama autop nukhupjjerïna. Autojj jan waltʼkäna ukhajja, walja urunakaw kayuta jan ukajj bicicletat uka jakʼankir markar sarapjjerïna, ukanwa auto askichañataki repuestonak puriniñapkam walja semananak suyapjjerïna. Ukham jan walinakan uñjaskasas kusisitaw Diosar servisipkakïna. Mä qawqha tiempotjja, Arthur Willis jilatajj La Edad de Oro revistan qellqatäkäna uka arunak amtasajj akham sänwa: “Testigonakatakejj janiw jaya thakis ni chʼama thakis utjkiti” sasa.

Walja maranak precursorat serviri Charles Harris jilatajj akham sänwa: “Australia cheqan jayankañasa, jan walinakan uñjasiñasa, Jehová Diosar jukʼamp jakʼachasiñatakiw yanaptʼawayitu” sasa. Ukatjja saskakïnwa: “Jan walja cosasanakanïsajj janiw sinti llakisktanti, awisajja Jesusajj janiw mä utanpun ikkänti, jiwasajj Diosar serviñan jupatwa yateqasiñasa” sasa. Ukwa walja precursoranakajj lurawayapjje. Wal chʼamachasipjjatapatwa Australiankir taqe markanakan yatiyapjjäna, ukhamatwa Diosan Reinop toqe saytʼasipjjañapatak walja jaqenakar yanaptʼawayapjje.

^ tʼaqa 4 Bibliat Yatjjatirinakajja, 1931 maratwa Jehová Diosan Testigonakapa sasin uñtʼatäjjapjje (Isa. 43:10, NM).