Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosan khuyapayasiñapatwa qhespiyatätanjja

Jehová Diosan khuyapayasiñapatwa qhespiyatätanjja

“Juchasti janiw jumanakjjarojj chʼamanïkjjaniti, [...] jan ukasti Diosan khuyapayasiñapankjjapjjtawa” (ROM. 6:14).

46, 127 QʼOCHUNAKA

1, 2. ¿Kunjamsa Romanos 5:12 qellqatajj yanaptʼistaspa?

ROMANOS 5:12 qellqatajj akham siwa: “Kunjämatejj mä sapa jaqe toqe juchajj aka oraqer mantankejja, ukat jiwajj uka jucha laykurak utjejja, ukhamarakiw jiwajj taqe jaqerojj katuntawayi juchachasitap layku” sasa. Uka textojj wali uñtʼatawa, jaqenakaru yatichkasajj uka texto liytʼapuntanwa.

2 ¿Kunsa Bibliax chiqpachapuni yatichi? sat libronjja, walja kutiw uka textojj 3, 5, 6 jaljanakan uñsti. Wawanakasampi, yaqha jaqenakampi Bibliat yatjjattan ukhajja, Romanos 5:12 qellqat liytʼapuntanwa. Uka qellqatajja, kunatsa paraison jan jakasktan, kunatsa mä qhespiyäwejj wakisïna, kunatsa jiwtanjja ukanak sum amuytʼayañatakiw yanaptʼistaspa. Jehová Diosampi sum apasitasat Jupar yuspärañatakisa, Jupatakjam sarnaqañatakisa, kuntï jutïritak arsuwayki uk taqe chuyma suytʼañatakis yanaptʼarakistaspawa.

3. ¿Kunsa taqenis amtañasa?

3 Pantjasir jaqenakjamajja, sapüruw pantjastanjja. Ukampis  Jehová Diosajj wali khuyapayasiriwa. Pantjasirïtas sum yati, ukatwa perdonistu (Sal. 103:13, 14). Jesusajja, pantjasitanakasat Diosat perdón mayisiñwa yatichawayistu (Luc. 11:2-4). Nayra pantjasitanakasat Jehová Diosajj perdonistuwa, ukhamajj janiw amtañasäjjeti. ¿Kunjamsa Diosajj pantjasitanakasat perdonistu? Uk jichhajj uñjañäni.

JEHOVÁ DIOSAJJ PERDONISTUWA

4, 5. 1) ¿Kun amuyañatakis Romanos 5:12 qellqatajj yanaptʼistu? 2) “Ina chʼusat khuyapayasiña” siski ukajja, ¿kamsañsa muni?

4 Romanos 6 jaljajja, kunjamsa Diosajj pantjasitanakas perdonistu uk amuyañatakiw yanaptʼistu. Romanos 3 jalja liytʼasajja, ‘taqeni pantjasirïtaswa’ amuytanjja. Apóstol Pablojj akham sänwa: “Diosajj jupan jachʼa munasiñapanjja ina chʼusatakwa katoqestu, Jesucristo toqwa jiwasanakarojj qhespiyarakistu” sasa (Rom. 3:23, 24). ‘Jachʼa munasiñapana’, jan ukajj ‘ina chʼusat khuyapayasiñapana’ sasin jaqokipaski uka griego arojja, jan kun katoqañ suyasa khuyapayasiña sañwa munaspa.

5 Griego arurjamajja, kuntï Diosasa, Jesusasa juchampita, jiwañampit qhespiyañataki lurawayapki uka toqetwa parlaski sasaw mä yatjjattʼat chachajj säna. Ukatwa inglés arut Traducción del Nuevo Mundo Biblianjj “ina chʼusat khuyapayasiña” sasin jaqokipasi. Jichhajja, kunsa Jehová Diosajj jiwas layku lurawayi, kunjamsa khuyapayasiñapajj jichhasa, jutïritakisa yanaptʼistu uk uñjarakiñäni.

6. ¿Khitinakas Diosan khuyapayasiñapat askinak katoqapjjaspa, ukat kunjamsa?

6 Adán chachan juchachasitapatjja, taqeniw juchanïtanjja, ukatwa jiwaraktanjja. Uka toqet Bibliajj siwa: ‘Mä sapa jaqe toqew juchajj aka oraqer mantani’ sasa. Ukatwa khuyapayasiñapat Jehová Diosajj “Jesucristo toqe” taqenir qhespiyistu (Rom. 5:12, 15, 17). Cheqas ‘mayni sapa jaqen istʼasirïtap laykuw waljanejj Dios nayraqatan askita katoqatätanjja’. Jupa toqerakiw ‘wiñay jakañ katoqaraksna’ (Rom. 5:19, 21).

7. ¿Kunatsa Diosaw khuyapayasiñapat qhespiyistu sasin sistanjja?

7 Jehová Diosajj janiw Wawap toqejj qhespiykistaspänti, ukampis wali khuyapayasirïtap laykuw juchatsa, jiwañatsa qhespiyistu. Kuntï Jehová Diosasa, Jesusasa jiwas layku lurawayapki uk katoqañatakejja, janiw khitis askïktanti. Ukampis uka toqekiw juchanakasat perdonatätanjja. Uka toqekirakiw wiñay jakañ suytʼäwis utjistu, ¡ukat walpun yuspärtanjja! ¿Kunjamsa yuspäratas uñachtʼaysna? Sarnaqatasampiw uñachtʼaysna.

JEHOVÁ DIOSAN KHUYAPAYASIÑAPAT WALPUN YUSPÄRTANJJA

8. ¿Kuna toqetsa amuyasiñasa?

8 Jehová Diosajja, juchanakasa, pantjasitanakasa perdonañatakejj jankʼakiwa. Ukampis khuyapayasir Diosätap yatisajja, janiw jan walinak lurasin akham amuyañasäkiti: “Jehová Diosajj perdonaskitaniwa” sasa. Jesusan yaqhep apostolonakapajj jakapkäna ukhajja, yaqhep cristianonakajj ukham amuyunïpjjänwa (Judas 4 liytʼañataki). Jichhürunakan ukat wal amuyasiñasawa, inas mayninakar ukham amuyir uñjasajj jupanakjam amuyjjaraksna.

9, 10. ¿Kunjamsa Jehová Diosajj Pablorusa mayni cristianonakarus juchanakapat perdonäna?

9 Juch luraskakiñäni ukhajja, Diosajj perdonaskistaniwa sasin amuyañajja, janiw  walïki sasaw Pablojj cristianonakar säna. Ukatsti sarakïnwa: “Janiw kunäkipansa [ukham amuyapjjañamäkiti]. Jiwasanakajj juchatakejj jiwatäjjtanwa” sasa (Romanos 6:1, 2 liytʼañataki). ¿Kunsa uka arunakampejj sañ munaskäna?

10 Nayrïr patak maranakanjja, Jehová Diosajj Pablorusa, mayni cristianonakarusa, Jesusan jiwatap toqew juchanakapat perdonäna. Ukatjja wawapjam katoqañatakejja, qollan ajayumpiw Diosajj jupanakar ajllïna. Ukhamajj jan jitheqtasaw Diosar servipjjañapäna, ukhamat alajjpachar sarasin Jesusamp chika apnaqaniñataki. Ukampis Pablosa, mayni cristianonakas aka Oraqenkasipkänwa, ¿kunatsa Pablojj “juchatakejj jiwatäjjtanwa” sasin sispachäna? Pablojj ajllitäjjänwa, ukhamajj jakäwipajj janiw nayrjamäjjänti ukatwa ukham säna. Kunapachatï Jesusajj jiwjjäna ukhajja, jan jiwir ajay cuerponiw jaktjjäna sasaw Pablojj sarakïna. Jupampejj niya ukhamarakiw pasañapäna, ukatwa ‘jiwañajj jupjjar jan chʼamanëjjänti’. Mayni ajllit cristianonakasti juchatakejj jiwatäpkaspas ukhamarakïnwa, ¿kunatsa? Jakäwinakapajj janiw nayrjamäjjänti, jupanakajj janiw jan wali amuyunakampejj apayasjjapjjänti. Antisas Diosan munañaparjam sarnaqañatakiw chʼamachasipjjäna. Jupanakajja, ‘juchatakejj jiwatäjjapjjänwa, ukampis Diosatakejj jakasipkänwa, Cristo Tatitun mayakëjjapjjatap layku’ (Rom. 6:9, 11).

11. ¿Cristianonakajj ‘juchan jiwatarakïtanti’?

11 ¿Jiwasat kamsasirakispasa? ¿‘Juchatakejj jiwatarakïtanti’? Diosar jan uñtʼasajja, inas nayrajj jan walinak lurchiyätan. ‘Qʼañu lurañanakana ukhamarak ñanqha lurañanakanwa sarnaqayätanjja’, mä arunjja, “juchan” munañaparjamaw sarnaqayätanjja (Rom. 6:19, 20). Ukampis Diosajj jiwasan jakañas wal munatapwa Bibliat yateqawaytanjja, ukatwa nayra jakäwis apanukusin bautisasiwaytanjja. Ukatjja Jehová Diosar istʼas serviña, ukhamarak Jupatakjam jakañwa amtawaytanjja. “Juchat jitheqtjjasinjja jichhajj [mantjjtanwa] cheqa sarnaqäwin serviñataki” (Rom. 6:17, 18).

12. ¿Kunsa sapa maynejj amtjjañasa?

12 Ukampis Pablon aka arunakapat amuytʼañasawa. Jupajj sänwa: “Jumanakajja jucharojj atipjapjjañama[wa] janirakiw juchampis apnaqayasipjjañamäkiti uka jiwir janchi cuerponjja. Kuntejj uka janchi cuerpomajj munki ukajj atipjañaw wakisi” sasa (Rom. 6:12). Jan wali amuyunakampiti, jan ukajj jan wali luräwinakampicha apayasiñäni ukjja sapa mayniw amtjjañasa. Akham jisktʼasiñäni: ‘¿Jan wali amuyunakampi apayasisajj jan walinakti lurtjja? Jan ukajj ¿jankʼakich apanuktjja?’ sasa. Jiwasatï Diosan khuyapayasiñap askit uñjstan ukhajja, kunatï Jupatak walïki ukpunwa lurañäni.

JUCHAROJJ ATIPJSNAWA

13. Kunatejj askïki uk lursnawa sasajja, ¿kunatsa sistanjja?

13 Nayrïr patak maranakanjja, Corintonkir yaqhep jaqenakajja, wachoqa juchan sarnaqerinaka, idolonakar yupaychirinaka, chacha pura, warmi pura jan wali sarnaqerinaka, lunthatanaka, machirinaka ukhamäpjjänwa. Ukampis Jehová Diosar uñtʼasajja, Jupar wal munasjjapjjäna. Ukatsti nayra jan wali luräwinakapat wal pisayasipjjarakïna (Rom. 6:21; 1 Cor. 6:9-11). Romankir cristianonakajja, ukhamarakiw nayra jakäwinakap apanukupjjañapäna. Pablojj jupanakar  sänwa: “Janchinakamjja jan jucharojj katuyasipjjamti mä kunäkaspas ukhama juch lurañataki, jan ukasti Diosar katuyasipjjam, kunjämtejj jucharu jiwjjasina jakjjapjjtajja ukhama. Jichhasti Diosar katuyasipjjam taqe cuerppacha, kunatejj askïki uk lurañataki” sasa (Rom. 6:13). Apóstol Pablojja, uka cristianonakajj nayra jakäwinakap apanukupjjaniwa, ukatsti Diosan khuyapayasiñapat askinak katoqasipkakiniwa sasaw amuyäna.

14, 15. ¿Kunsa jisktʼasiñasa?

14 Yaqhep jilat kullakanakajja, inas Corintonkir cristianonakjam nayrajj jan walin sarnaqapchïna. Ukampis Jehová Diosar uñtʼjjasajja, nayra jakäwinakap apanukusajj ‘qʼomachatäpkaspas’ ukhamawa. Cheqas Jehová Diosampi askit uñjatäñatakejja, niya taqeniw jakäwisan cambionak lurawaytanjja. Niyakejjay Jehová Diosajj ina chʼusat jiwasat khuyapayaschistojja, ukat yuspärataswa uñachtʼayañ munaraktanjja. Ukatwa jan wali amuyunak apanukuñatakejj chʼamachastanjja. Ukhamat Jehová Diosar taqe chuyma serviñataki.

15 Corintonkirinakat yaqhepajja, sinti jan wali lurañanakanwa sarnaqapjjäna, jiwasajj janiw jupanakjamäñ munktanti. ‘Nayatï jan walinak luraskakëjja, Diosajj khuyapayasiñapat perdonaskitaniwa’ sasajj janiw amuyañasäkiti. ‘Yaqhep jan wali luräwinakajj walikïskiwa’ sasaw yaqhepajj amuyapjje, ¿ukajj walikïskpachati? ¿Jehová Diosarojj taqe kunanti istʼasktanjja? (Rom. 6:14, 17).

16. ¿Kuntï 1 Corintios 6:9-11 qellqatan siski ukanakakti jan lurañasäki?

16 Pablot amuytʼañäni, jupajj sänwa: “Nayan janchi cuerpojjajja juchan munañapar sarnaqañatak aljantatawa. Janiw nayajj amuykti kunatejj nayar paskitu ukjja. Nayasti janiw kuntejj munkta uk lurkti jan ukasti kuntejj uñisktjja ukwa lurtjja” sasa (Rom. 7:14, 15). Kuntï 1 Corintios 6:9-11 qellqatan siski uk janis lurkchïnjja, jan walinak luraskaktwa sasaw Pablojj säna. Jehová Diosamp askit uñjatäñwa munäna, ukatwa jan wali lurañanakamp jan apayasiñatakejj chʼamachasïna (Romanos 7:21-23 liytʼañataki). Ukhamajj Pablot yateqasisin Jehová Diosatakjam sarnaqañatak chʼamachasipjjañäni.

17. ¿Kunatsa kʼarisiñajj jan walïki?

17 Kunjamtï yatktanjja, Jehová Diosar serviñatakejj taqe kunsa cheq parlañasa (Proverbios 14:5; Efesios 4:25 liytʼañataki). Janiw Supayjam kʼarïñ munktanti, jupajj ‘kʼarin awkipawa’. Amtañäni, Ananías chachampi esposapampejja, kʼarisipjjatap laykuw jiwapjjäna. Ukatwa jiwasajj jan kʼarisktanti (Juan 8:44; Hech. 5:1-11). Khititï jan kʼarisirïki ukajja, taqe kuns cheq parli. Ukhamajj jiwasatï Jehová Diosar khuyapayasitapat yuspäratas uñachtʼayañ munstanjja, janipuniw kunans kʼariskañäniti.

18, 19. Jan kʼarisiña siski ukajja, ¿kun sañsa muni?

18 Kʼarisiña siski uka arojja, jan cheq parlaña sañ muni. Ukampis Diosajja, servirinakapajj cheq parlapjjaspa ukwa muni. Ukatwa israelitanakar akham säna: “Jan lunthatasipjjamti, janiraki kʼarisipjjamti, janiraki jumanakkamasa maynit maynikama engañasipjjamti” sasa. ¿Kunatsa uka arunakar istʼapjjañapäna? Jehová Diosajj saskakïnwa: “Jumanakasti qollanäpjjam, naya Tatitu Diosamasti qollanätwa” sasa (Lev. 19:2, 11). Mayninakarutï cheqäkaspas ukham kuns parlsna ukhajja, kʼarisksnas ukhamäjjewa.

Janiw kʼarisktanti ni engañktansa. (19 tʼaqa uñjjattʼäta).

19 Mä chachas jefeparu jan ukajj trabajir  masinakapar akham siskaspa ukham amuytʼañäni, jupajj akham siwa: ‘Doctoran ukar sarañätwa, ukatwa janïr horäkipan trabajot mistuñ munta’ sasa. Ukampis uka chachan amtapajja, janiw ukäkiti. Doctoran ukaru mä rat factur paguiri jan ukajj farmaciar mä ratuk sarañwa amti. Janïr horäkipan trabajot mistusin vacacionat mistuñjja, janïräkipanwa amtjje. Ukham amtasajja, ¿uka chachajj janit kʼariskpacha? Jan ukajj ¿mayninakar engañaskicha? Kunatï jan cheqäki uk mayninakar sasinjja, uka chachajj kʼarisiskiwa. Awisajj yaqhepanakajja, jan castigayasiñ munasa, jan ukajj kun jikjjatañ munasaw mayninakar engañapjje. Ukampis jiwasajj Jehová Diosaruw istʼtanjja, jupajj ‘jan engañjasipjjamti’ sasaw sistu. Ukatwa kunatejj askïki, qʼomäkaraki uk lurañasa (Rom. 6:19).

20, 21. Jehová Diosan khuyapayasiñapat yuspäratas uñachtʼayañatakejja, ¿kunanaksa jan lurañasäki?

20 Wachoq jucha lurañanakatsa, machañanakatsa, yaqha ukham jan wali luräwinakatsa jitheqtjjtanwa. Ukampis janiw ukanakatak jitheqtañasäkiti, jan ukasti kunanakatï Jehová Diosatak jan walïki ukanakat jitheqtañasarakiwa. Sañäni, janiw wachoq jucha lurañ mayatak jitheqtktanti, jan ukasti kunanakantï qʼañu lurañanakajj utjki taqe ukanakatwa jitheqttanjja. Cheqas janiw machjasktanti, ni machjasiñkamas umkaraktanti. Taqe ukanakar saykatañajj chʼamakïspawa, ukampis apanuksnawa.

21 Pablon arunakapar istʼañatak chʼamachasipjjañäni, jupajj sänwa: “Janirakiw juchampis apnaqayasipjjañamäkiti uka jiwir janchi cuerponjja. Kuntejj uka janchi cuerpomajj munki ukajj atipjañaw wakisi” sasa (Rom. 6:12; 7:18-20). Pantjasirïtanwa, ukhamajj pantjasikipuniñäniwa. Ukampis jan wali lurañanakar saykatasajja, kuntï Jehová Diosasa, Jesusasa khuyaptʼayasiñat lurawayapki ukar yuspärataswa uñachtʼayañäni.

22. Jehová Diosan khuyapayasiñapatjja, ¿kunsa jutïrin katoqañäni?

22 Jehová Diosajja, juchanakasat perdonistuwa, pantjasiñäni ukhas perdonarakistaspawa. Jiwasat ukham khuyapayasitapat ¡walpun Jupar yuspärtanjja! Ukhamasti, kunanakatï Diosatakejj askïki uk lurañataki chʼamachasipjjañäni. Yaqhep jan wali luräwinakajja, yaqhepatakejj walikiwa, ukampis jiwasajj ukanakat jitheqtañasawa. Ukhamtï lurañänejja, ¿kunsa katoqañäni? Romanos 6:22 qellqatanjja, Pablojj akham siwa: “Jichhajj juchata qhespiyatäjjasinjja Diosan servirinakapaw tukuwayjjapjjtajja. Ukasti wali sumawa jumanakatakejja, Dios chuymarakwa tukuyapjjtam, wiñay jakañrakwa jikjjatapjjäta” sasa.