Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

Jehová Diosajj Jupar thaqerinakar bendisiwa

Jehová Diosajj Jupar thaqerinakar bendisiwa

“Jupar jakʼachasiñatakejja maynejj iyawsañapawa Diosajj utjatapa, ukhamaraki jupar thaqerinakarojj bendecirïtapa” (HEB. 11:6).

136, 139 QʼOCHUNAKA

1, 2. 1) Diosar munasiñajj utjistu ukhajja, ¿iyawsäwisajj kunjamasa? 2) ¿Kuna jisktʼanakarus aka yatichäwin qhanañchaskañäni?

JEHOVÁ DIOSAJJA, servirinakajarojj bendisïwa sasaw arsuwayi. Ukhamatwa Diosajj munasiñap uñachtʼayistu, cheqas Jupaw “nayraqat jiwasanakar munistu, ukatwa jiwasajj juparojj munaraktanjja” (1 Juan 4:19). Jehová Diosar jukʼamp munastan ukhajja, iyawsäwisajj jiljjattiwa. Ukatjja Jupatakjam sarnaqerinakarojj bendisipuniniwa sasinsa janiw pächasktanti (Hebreos 11:6 liytʼañataki).

2 Jehová Diosajj bendición churiri Diosawa. Ukhamatwa Jupajj kunjamasa, kunsa luri uk yattanjja. Ukampis janiw uk yatiñakejj Diosar taqe chuyma confiyañatak yanaptʼkistaspati, jan ukasti Jupar thaqerinakarojj Diosajj bendisiwa sasin taqe chuymaw confiyañasaraki. ¿Kunatsa ukajj wakisi? “Iyawsañajja: ‘Katoqäwa’ sas taqe chuymampi suytʼktans ukawa” (Heb. 11:1). Iyawsäwinïñajja, Jupat jan jitheqtirinakar Diosajj bendisipuniniwa sasin taqe chuyma confiyañawa. Ukampis Diosajj bendisitaniwa sasin confiyañajja, ¿kunjamsa yanaptʼistu? ¿Kunjamsa Diosajj taqe chuyma servirinakapar nayra tiempon bendisïna, ukat kunjamsa jichhürunakan bendisiraki? Uk jichhajj yatjjatañäni.

 JEHOVÁ DIOSAJJ SERVIRINAKAPAR BENDISIWA

3. Malaquías 3:10 qellqatanjja, ¿kamsasas Jehová Diosajj arsüna?

3 Jehová Diosajja, ‘servirinakajar bendisïwa’ sasinwa arsuwayi. Jupajj kuntï lurirjamäktan uk lurañaswa muni, ukatjja bendición katoqäwa sasin confiysna ukwa munaraki. Jehová Diosajj akham sistuwa: “Yantʼapjjarakita, nayaw jumanakaru alajjpach ventananak jistʼaranisina walja bendicionanak apayanipjjäma jilarkiriraki” sasa (Mal. 3:10). Uka arunakapar istʼasaw Jupar yuspäratas uñachtʼaysna.

4. Mateo 6:33 qellqatan jikjjataski uka arunakarojja, ¿kunatsa confiysna?

4 Diosan Reinop nayraqat thaqapjjäta ukhajja, Diosajj yanaptʼapjjätamwa sasaw Jesusajj arkirinakapar säna (Mateo 6:33 liytʼañataki). Diosajj arsusin phoqapuniwa, uk yatisaw Jesusajj ukham säna (Isa. 55:11). Jehová Diosar taqe chuyma confiyañäni ukhajja, aka arunakapar phoqeri uñjarakiñäniwa, Jupajj siwa: “Janiw kunapachas jaytkämati ni armtʼaskämasa” sasa (Heb. 13:5). Ukajj Mateo 6:33 qellqatankki uka arunakar confiyañatakiw yanaptʼistu.

Diosar serviñataki chʼamachasirinakajja, bendicionanakwa katoqapjjani sasaw Jesusajj säna. (5 tʼaqa uñjjattʼäta).

5. Kuntï Jesusajj Pedror siskäna ukajja, ¿kunatsa chʼamañchtʼistu?

5 Mä kutejj apóstol Pedrojj akham Jesusar jisktʼäna: “Nanakajj taqe kunanakatejj utjapkitän ukanakjja apanukunipjjtwa, ukatsti jumaruw arkapjjsma. ¿Kunarak nanakatakisti utjani?” sasa (Mat. 19:27). Ukham jisktʼatapatjja Jesusajj janiw Pedror toqjkänti, jan ukasti Diosar serviñatak kunanaktï jaytapkta ukanakat walja bendicionanakwa katoqapjjäta sasaw säna. Apostolonakasa, Diosan mayni servirinakapasa Jesusamp chikaw alajjpachat aka Oraqer apnaqanipjjani. Jichhürunakanjja, Jesusan arkirinakapajj Diosan bendicionap katoqapjjarakiwa, Jesusajj  sänwa: “Taqe khitinakatejj jaytanukuni utanakapa, jilanakapa, kullakanakapa, taykapa, awkipa, wawapa ukhamarak oraqepsa naya layku ukanakajja, patak kuti ukkhampwa katoqapjjani, ukhamaraki wiñay jakañampi” sasa (Mat. 19:29). Cheqas Jesusan arkirinakapajj tamanwa awksa, tayksa, jilanaksa, kullakanaksa, wawanaksa jikjjatapjjaspa. Ukaw Diosan Reinop thaqatasat taqe kuntï jaytawayktan ukat sipansa jukʼamp wakiskirejja.

SUYTʼÄWISAJJ MÄ ANCLAR UÑTATAW KATJJASISTU

6. Jehová Diosajj servirinakapar bendisiniwa uk yatiñajja, ¿kunjamsa yanaptʼistu?

6 Jehová Diosajj jichhürunakan wal bendisistu, jutïrinsa jukʼampiw bendisistani (1 Tim. 4:8). Jupat jan jitheqtir servirinakaparojj Diosajj bendisiniwa, uk yatiñaw jan waltʼäwinakan aguantañataki yanaptʼistu. Jiwasatï ‘Diosajj Jupar thaqerinakarojj bendisiniwa’ sasin taqe chuyma confiyañäni ukhajja, Diosat janiw jitheqtkañäniti (Heb. 11:6).

7. Suytʼäwisajj mä anclar uñtataw yanaptʼistaspa sasinjja, ¿kunatsa sissna?

7 Wali Uñtʼat Arstʼäwipanjja, Jesusajj akham sänwa: “Kusisitaki jakasipjjam, jumanakasti alajjpach markanjja churäwinak katoqapjjäta. Ukhamarakwa nayra profetanakarojj uñisipjjerïna, khitinakatejj jumanakat nayraqata jakawayapjjäna ukanakarojja” sasa (Mat. 5:12). Jehová Diosan yaqhep servirinakapajja, alajjpachan jakañataki suytʼäwinïpjjewa, yaqhepasti aka Oraqen wiñay jakañataki suytʼäwinïpjjarakiwa. Uk yatisaw kusisit jakastanjja (Sal. 37:11; Luc. 18:30). Diosan servirinakaparojja, “uka suytʼäwiw sum katjjäsistu ukhamarak almasa uñjaraki, kunjämatejj anclajj mä barcorojj katjjäsejja ukhama” (Heb. 6:17-20). Kunjamtï mä anclajj thayampi jallumpi sartanipan barcor jan onjjtaykejja, ukhamarakiw suytʼäwisajj Jehová Diosat jan jitheqtañataki yanaptʼistaspa. Ukatsti jan walinakan jikjjatasisajj jan aynachtʼañatakiw yanaptʼarakistaspa.

8. Jutïritaki suytʼäwinïñajja, ¿kunjamsa jan sinti llakisiñataki yanaptʼistu?

8 Jutïritaki suytʼäwinïñajja, jan añcha llakisiñatakiw yanaptʼistaspa. Kunjamtï qaritäktan ukhajj uma umtʼañajj wal yanaptʼkistojja, ukhamarakiw jutïritaki suytʼäwisajj llakitäktan ukhajj yanaptʼistaspa. Ukhamajj Jehová Diosar llakinakas yatiyañäni, Jupasti yanaptʼistaniwa ukajj wal chuymachistu (Sal. 55:22). Jehová Diosaw “kuntejj mayktan, lupʼkaraktan ukanakata jukʼampi” yanaptʼistani sasajja taqe chuymaw confiysna (Efe. 3:20). Uka arunakarjamajja, Diosajj janiw walja toqenakatak yanaptʼkistaniti, jan ukasti jukʼamp walja toqenakatwa yanaptʼistani.

9. ¿Kunsa Jehová Diosan bendicionap katoqañatakejj lurañasa?

9 Jehová Diosan bendicionap katoqañatakejja, taqe chuymaw Jupar confiyañasa, arunakaparus istʼañasaraki. Moisesajj israelitanakar akham sänwa: “Diosamasti bendecirakïtamwa kawkïri oraqtejj churktam ukanjja, kunapachatejj jupan arunakapa istʼäta, ukhamaraki mandamiento arunakap phoqharakïta, kunjämatejj jichha uruna ewjjawayksma ukhama. Tatitu Diosamasti jumarojj bendecïtamwa kunjämtejj arupampi arsuwayktam ukhama” sasa (Deu. 15:4-6). Jumatï Jehová Diosar taqe chuyma serviskakïta ukhajja, Jupajj bendisïtamwa, janiw ukat pächasiñamäkiti. ¿Kunatsa ukham sistan?

JEHOVÁ DIOSAN BENDICIONAP KATOQAPJJÄNA

10, 11. ¿Kunjamsa Jehová Diosajj Joseyar bendisïna?

10 Bibliajj jiwasan askisatakiw qellqasiwayi. Ukanwa kunjamsa Jehová Diosajj taqe chuyma servirinakapar bendisïna uk liytʼsna (Rom. 15:4). Amtañäni, José waynarojj esclavotwa jilanakapajj aljantapjjäna. Ukatsti Potifaran  warmipaw kʼarintäna, ukhamatwa Egipto markan carcelar llawintapjjäna. Ukhaman uñjasisajja, ¿Joseyajj Jehová Diosat jitheqtpachänti? Janiwa, Bibliajj akham siwa: “Tatitojj Joseampïskakïnwa, munasiñapsa uñachtʼayarakïnwa”, “taqe kunas Joseatakejj walikïskarakïnwa” sasa (Gén. 39:21, 23). Ukham jan walinakan uñjasisajja, Jehová Diosaw yanaptʼitani sasaw Joseyajj confiyäna.

11 Mä qawqha tiempotjja, faraonan arsutaparjamajj Joseyajj janiw carcelankjjänti. Esclavot sipansa Egipto markan jilïrit uttʼayatänwa, faraonakiw jupjjar jilïrïnjja (Gén. 41:1, 37-43). Joseyajj casarasisajj pä wawanïnwa, “jilïrirusti Manasés sasaw sutichäna, sarakïnwa: Diosaw taqe tʼaqhesitanakajj armasiyjjetu, ukhamarak parientenakajjsa sasa. Ukjjaru wawaparusti Efraín sasarakiw sutichäna, sarakïnwa: Diosaw nayarojj wawanak apayitu, tʼaqheskta uka markana sasa” (Gén. 41:51, 52). Jehová Diosajja, Jupat jan jitheqtatapat Joseyar bendisïnwa, ukhamatwa Joseyajj israelitanakarusa, egipcionakarus manqʼat jan jiwapjjañapatak yanaptʼäna. Diosajj jupar yanaptʼaskatapa, bendisiskatap Joseyajj sumwa amuyäna (Gén. 45:5-9).

12. Kunayman jan walinakan uñjaskasajja, ¿kunas Jesusarojj Diosat jan jitheqtañataki yanaptʼäna?

12 Jesucristojj kunayman jan walinakan uñjaskasajja, Jehová Diosat janiw jitheqtkänti, ukatwa Diosajj jupar bendisïna. ¿Kunas Diosat jan jitheqtañatakejj Jesusar yanaptʼäna? Bibliajj akham siwa: “Jesusasti [lawanwa] tʼaqhesi, jan uka casta jiwañaru pʼenqasisa. Jupajj yatisïnwa uka tʼaqhesitapatjja qhepürunjja kusisiñ jikjjatañapata” sasa (Heb. 12:2). Jesusajj Diosan sutip jachʼañchasajj wal kusisïna. Diosasti, Jesusarojj sum uñjasina ukhamarak yaqha luräwinak churasinwa bendisïna. Bibliajj akham siwa: “Diosan tronopan kupëjjaparuw qontʼasi” sasa. Ukatjja saskakiwa: “Diosajj juparojj wali jachʼaru[w] apti, mä suti churaraki, uka sutisti taqe sutit sipans wali jachʼarakiwa” sasa (Fili. 2:9).

LURATANAKASAT DIOSAJJ JANIW ARMASKITI

13, 14. Taqe kuntï Jupar serviñataki lurktan ukjja, ¿kunjamsa Jehová Diosajj uñji?

13 Taqe kuntï Jupar serviñataki lurktan ukjja, Jehová Diosajj wali askitwa uñji. Jiwas pachpata ukhamarak luräwinakasat pächastan ukjja Diosajj sum yati. Trabajot llakistan ukhasa, jan ukajj familiasar qollqemp yanaptʼañat llakistan ukhasa kunjamsa jikjjatastan uksa amuyiwa. Maysa toqetjja, llakita usuta jikjjatasisajja, janiw nayrjam lurirjamäktanti uksa Diosajj amuyarakiwa. Jan walinakansa uñjaskstanjja, Jupat jan jitheqtañataki chʼamachasitasjja, wali askitwa uñji (Hebreos 6:10, 11 liytʼañataki).

14 Jehová Diosajj ‘mayisitanakasar istʼiriwa’ uk janipun armañäniti, mayisiñäni ukhajj istʼistaniwa (Sal. 65:2). “Jupaw jiwasar khuyapayasir Awkisajja, ukhamarak chuymachirisasa”, ukatwa Jupat jan jitheqtañatakejj kunatï wakiski ukampi yanaptʼistani. Awisajj jilat kullakanak toqew yanaptʼistaspa (2 Cor. 1:3). Maysa toqetjja, Jehová Diosajj mayninakat khuyaptʼayassna ukwa munaraki. Amtañäni, “mä pobre jaqer maytʼirejj Tatituruw maytʼaski, ukatsti Tatit pachpawa uka manjja phoqjjani” (Pro. 19:17; Mat. 6:3, 4). Ukhamasti jilat kullakanakasar khuyaptʼayasis yanaptʼtan ukhajja, Jehová Diosarus yanaptʼksna ukhamawa. Jupajj ukham yanaptʼatasat bendisistaniwa.

JICHHASA JUTÏRINSA DIOSAJJ BENDISISTANIWA

15. ¿Kuna bendicionanak katoqañsa suyaskta? (24 janankir foto uñjjattʼam).

15 Ajllit cristianonakajja, ‘suma corona’ katoqañwa suyasipki, uka bendicionsti Jesusatwa  katoqapjjani (2 Tim. 4:7, 8). ‘Yaqha uwijanakjam’ uñtʼatäpki ukanakajja, janis alajjpachar sarañataki suytʼäwinïpkchejja, Jehová Diosatakejj wakiskirïpjjewa. Jupanakajja, paraisoptayat aka Oraqen wiñay jakañ katoqañwa suyasipki, ukanwa ‘jilarkir sumankañampi kusisipjjani’ (Juan 10:16; Sal. 37:11).

16. ¿Kunjamsa 1 Juan 3:19, 20 qellqatajj chuymachtʼistu?

16 Awisajja, janis Jehová Diosatak kuns lurksna ukhamwa amuyassna, inas akham jisktʼasiraksna: ‘¿Kuntï lurkta ukampejj Diosajj kusisitäpachati?’ sasa. Jan ukajja, Jehová Diosan bendicionap katoqañatakejj janis askïksna ukhamwa amuyasiraksna. Ukampis “Diosajj jukʼamp jachʼawa chuymasat sipansa, jupasti taqe kunwa yatiraki” uk janipun armañäniti (1 Juan 3:19, 20 liytʼañataki). Munasiñata ukhamarak confiyatasat Jehová Diosar serviñäni ukhajja, kuntï lurktan ukajj amuyusarjamajj janis Jupatakjamäkchinejja, Jupajj bendisistaniwa (Mar. 12:41-44).

17. ¿Kuna bendicionanaksa jichhürunakan katoqtanjja?

17 Supayan apnaqata aka qhepa urunakanjja, Jehová Diosajj markapar kunayman toqetwa bendisi. Sañäni, Jupat walja yatichäwinakwa katoqtanjja, markapankasin sumankañatakis Diosajj yanaptʼarakistuwa (Isa. 54:13). Kunjamtï Jesusajj siskänjja, Jehová Diosajj munasiri jilat kullakanakwa markapan churistu (Mar. 10:29, 30). Ukhamarusa Jehová Diosar taqe chuyma servipki ukanakajja, kusisitaw jakasipjje (Fili. 4:4-7).

18, 19. Jehová Diosan servirinakapajja, ¿kunjamsa bendicionanak katoqasajj jikjjatasipjje?

18 Oraqpachankir Jehová Diosan servirinakapajja, kunayman toqetwa Diosan bendicionap katoqapjje. Amuytʼañataki, Alemania markankir Bianca kullakajj akham siwa: “Jehová Diosajja, jan añcha llakisiñatakiw yanaptʼitu, janirakiw jaytanukkituti ukanakat Jupar wal yuspärta. Akapachankir jaqenakajja janiw sum jakasipkiti, janirakiw suytʼäwinïpkisa. Jehová Diosar servisajja Jupasa amparat katjjarkitaspa ukhamwa amuyasta. Diosar serviñataki kun lurasasa, walja bendicionanak katoqta” sasa.

19 Canadá markankir Paula kullakat parltʼarakiñäni, jupajj 70 maranakaniwa. Kullakajja espina bífida usuniwa, ukajj jikhan chʼakhat usuwa. Paula kullakajj akham siwa: “Ukham usunïtajat janis sarnaqerjamäkstjja, janiw ukajj Diosar serviñat jarkʼkituti. Kunayman toqetwa yatiyta, teléfono toqesa, ukhamarak kawkhankkasasa yatiyapuntwa. Jan aynachtʼañatakejja, Bibliat apstʼat jiskʼa tʼaqanaka ukhamarak Bibliat apstʼat qellqatanakat kawkïr arunakatï chʼamañchtʼkitu ukanakwa mä cuadernor qellqtʼasta, uka cuadernojarojj ‘Jan aynachtʼañataki chʼamañchtʼiri’ sasaw sutichta. Jiwasatï Diosan arsutanakapar confiyañänejja, llakinakampejj janiw aynachtʼkañäniti. Ukhamajj kunayman jan walinakansa jikjjataskchiñänejja, Jehová Diosajj yanaptʼapunistaniwa” sasa. Janis Bianca, Paula kullakanakjam jikjjataskstanjja, kunjamsa Jehová Diosajj jiwasarusa, mayni jilat kullakanakarus bendisi ukwa amuytʼañasa. Kuna bendicionanaktï Diosat katoqktan ukat lupʼiñasa, jutïrin katoqkañäni uka bendicionanakat lupʼiñasa wal chʼamañchtʼistu.

20. Jehová Diosar taqe chuyma serviñataki chʼamachasiskakiñäni ukhajja, ¿kunsa katoqañäni?

20 Jehová Diosar taqe chuyma mayisiñäni ukhajja, Jupajj bendisistaniwa. Ukhamasti ‘Diosan munañapa lurañäni’, ukhamatwa ‘kuntejj Diosajj arsuwaykäna’ uk katoqañäni (Heb. 10:35, 36). Ukatjja Jehová Diosar taqe chuyma confiyañatakisa, Jupar serviskakiñatakis chʼamachasiskakiñäni. Ukham lurasakiw Jehová Diosan bendicionap katoqañäni (Colosenses 3:23, 24 liytʼañataki).