Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

‘Aka mundpachana jachʼa Juezajj’ cheqaparuw taqe kunsa luri

‘Aka mundpachana jachʼa Juezajj’ cheqaparuw taqe kunsa luri

Jupaw jiwasan arjjatirisajja; luräwipasa cheqaparakiwa, luratapasa cheqarakiwa(DEU. 32:4).

CANCIÓN: 112, 89

1. Jehová Diosajj cheqaparuw taqe kunsa lurani sasaw Abraham chachajj confiyäna, ¿kunatsa ukham sistanjja? (Aka janankir dibujo uñjjattʼäta).

“JUMAJJ aka mundpachana jachʼa Juezätawa, ¿janiti cheqaparu uñjkäta?” (Gén. 18:25). Diosar taqe chuyma serviri Abraham chachajja, Diosajj Sodoma, Gomorra markanakarojj cheqaparuw juchañchani sasaw confiyäna. “Jehová Diosajj janipuniw suma jaqenakarojj jan wali jaqenakampi chikajj jiwaraykaniti” sasaw confiyarakïna. 400 maranak qhepatjja, Jehová Diosajj jupa pachpat parlkasajj akham sänwa: “Jupaw jiwasan arjjatirisajja; luräwipasa cheqaparakiwa, luratapasa cheqarakiwa. Jupasti cheqapa Diosawa, janiw jupanjja kunatejj jan cheqapäki ukajj utjkiti, ¡jupasti cheqapawa, askirakiwa!” sasa (Deu. 31:19; 32:4).

2. ¿Kunatsa Jehová Diosajj cheqaparupuniw taqe kunsa luri sistanjja?

2 ¿Jehová Diosajj kunatï cheqapäki ukakpun lurani sasajj kunatsa Abrahamajj confiyäna? Jehová Diosajj cheqapa Diosawa.  Kunatï cheqapäki ukpunwa Jupajj luri, cheqañchaña wakiski ukhas cheqaparjamapuniw juchañcharaki. Bibliajj akham siwa: “Tatitojj askimpir cheqapampiruw munasi” sasa (Sal. 33:5).

3. Kuna jan walinakas jichhürunakan uñjasi, uk qhanañchtʼma.

3 Jehová Diosajj cheqaparupuniw taqe kunsa luri uk yatiñajj wal chuymachistu. Ukampis akapachanjja janiw ukham cheqapar lurasjjeti. Sañäni, awisajj ina chʼusat juchañchataw yaqhepajj carcelankapjje, ukhamarak carcelan jiwañapataki juchañchatas uñjasipjje. Awisajj walja maranak carcelan llawintatäjjapjje ukhakiw ADN ukat pruebanaka lurasajj jan juchanïtap yatisjje, carcelatsa mistjjapjjaraki. Ukham jan walinakajj wal chuym usuyistu, awisajj colerasiraksnawa. Cristianonakarojj yaqha jan walinakaw jukʼamp chuym ustʼayarakistaspa, ¿ukajj kunäpachasa?

DIOSAN TAMAP TAYPINA

4. ¿Mä cristianon Jehová Diosar confiyatapajj kunjamsa yantʼat uñjasispa?

4 Cristianonakajj akapachan ina chʼusat tʼaqesiñanaka utjatap yattanwa. Ukampis awisajja, tama taypin jan walinakas utjkaspa, jan ukajj jiwas kikpas ina chʼusat taman tʼaqesksna ukhamwa amuysna. Ukham pasaspa ukhajja, qhawqsa Jehová Diosar confiytan ukaw yantʼat uñjasispa. Ukhaman uñjasisajja, ¿kunsa lurañäni? ¿Jehová Diosat jitheqtjjañäniti?

5. ¿Tama taypin jan walinak uñjasajj kunatsa jan aynachtʼañasäki?

5 Juchararätas laykojja, taqeniw pantjasirïtanjja. Ukatwa awisajj taman jan wal lurapjjestaspa, jan ukajj jiwas kikpas maynir jan wal luraraksna (1 Juan 1:8). Ukham jan walinakas awisajj taman paskchejja, Diosar taqe chuyma servirinakajj janiw aynachtʼapkiti ni jitheqtapkisa. Jehová Diosajj Biblia taypiw sum ewjjtʼistu, ukaw jilat kullakanakan jan wal luratpachas tamat janipun jitheqtañatak yanaptʼistu (Sal. 55:12-14).

6, 7. ¿Kuna jan walinsa mä jilatajj taman uñjasïna, ukat kunjam chuymanïñas jupar yanaptʼäna?

6 Willi Diehl jilatan experienciapat parltʼañäni. Khä 1931 maranjja, Berna (Suiza) markankir Betelanwa servïna. 1946 maranjja, Nueva York (Estados Unidos) markankir Galaad Escuelaruw sararakïna. Qhepatsti, tamanak tumptʼirjamaw Suiza markan Diosar servirakïna. Willi Diehl jilatajj experienciapan akham siwa: “Mayo 1949 maranjja, Suiza markankir sucursalaruw casarasiñ amtaskta sasin yatiyayäta” sasa. Sucursal sarayiri jilatanakajj akham sapjjataynawa: “Kuna lurañanaktï Diosan markapan katoqkta ukanak taqpach apaqapjjäma, precursor regularatakwa Diosar servïta” sasa. Jilatajj akham saskakiwa: “Janiw taman discursonak arstʼayapkitänti. Waljaniw tamat jaqsutäpkiristsa ukham uñjapjjetäna, janirakiw aruntapkitänsa” sasa.

7 Ukham jan walin uñjasisajja, ¿kunsa Willi Diehl jilatajj luräna? Jupajj akham siwa: “Bibliarjamajja casarasiñajj janiw juchäkänti, uk yatisipkayätwa. Ukatwa oración taypejj Jehová Diosar jukʼampi jakʼachasipjjayäta, ukatsti Juparuw confiyapjjayäta” sasa. Casarasiñarojj kunjamsa Jehová Diosajj uñji uk tiempompiw jilatanakajj sumpach amuyapjjäna. Ukatsti, Diehl jilatarojj taqpach privilegionakapwa kuttʼayjjapjjäna. Ukham jan walin uñjaskasas janipuniw jitheqtkänti, ukatwa Jehová Diosajj ukham  bendicïna. * ¿Jiwasatï ukham jan walin uñjasisänjja kunsa lurasäna? ¿Pacienciampi aguantasat Jehová Diosan askichañap suyarakisänti? Jan ukajj ¿jiwaspachpar atinisisati askichañ munasäna? (Pro. 11:2; Miqueas 7:7 liytʼañataki).

8. ¿Kunatsa jiwasasa jan ukajj yaqhas ina chʼusat tʼaqeskaspa ukham amuyasajj pantjassna?

8 Tama taypin jan walis utjkaspa ukham amuyasajja, awisajj pantjasnawa. ¿Kunatsa ukham sistanjja? Juchararätas laykojj jiwasakiw janis walïkaspa ukham amuysna. Jan ukajj kunas pasaski uk janiw sumpach yatksnati. Amuyatasajj cheqäpasa janisa kunatejj pasaski uka toqetjja Jehová Diosaruw yanaptʼa mayiñasa, confiyañasaraki, janipuniw Jupat jitheqtañasäkiti. Ukaw Jehová Diosar jan juchañchañatak yanaptʼistani (Proverbios 19:3 liytʼañataki).

9. ¿Aka yatichäwinsa jutïr yatichäwinsa khitinakatsa yatjjataskañäni?

9 Nayra tiempon Diosan servirinakapat khitinakas jan walin uñjasipjjäna uk kimsa toqet yatjjataskañäni. Aka yatichäwinjja Abraham chachan allchhipan wawapat José waynat yatjjataskañäni, ukhamarak kuna jan walsa jilanakapajj jupar lurapjjäna uk yatjjatañäni. Jutïr yatichäwinjja, kunjamsa Jehová Diosajj Acab reyir uñjäna, apóstol Pedrojj Antioquía de Siria markan kunansa pantjasïna ukanakwa yatjjataskañäni. Uka kimsanit yatjjatkasajja, kunjamsa Jehová Diosat jan jitheqtañatakisa Jupampi sum apasiskakiñatakis yanaptʼistu ukwa amuytʼañasa, yamas ina chʼusatsa jan wal lurapkistaspa ukham amuyasktan ukhajj jukʼampwa kunjamsa yanaptʼistu uk amuytʼañasa.

JOSÉ WAYNAJJ INA CHʼUSAT TʼAQESÏNA

10, 11. 1) ¿Joseajj kuna jan walinakansa uñjasïna? 2) ¿Joseajj carcelan llawintatäkäna ukhajj kunsa luräna?

10 Jehová Diosar taqe chuyma servir Josearojj jaqenakaw ina chʼusat tʼaqesiyapjjäna. Ukampis pachpa jilanakap jan wal lurapkäna ukaw jukʼamp chuym usuyäna. Joseajj 17 maranïkäna ukhaw jilanakapajj katuntasin esclavot aljapjjäna. Ukhamatwa Egiptor apatäjjäna (Gén. 37:23-28; 42:21). Uka jaya markanjja, uywiripan warmipar violañsa munkaspa ukham kʼarintapjjäna, ukatsti cheqapunit juchani janicha uk jan sum yatjjatasaw carcelar jistʼantayapjjäna (Gén. 39:17-20). Joseajj 13 maranakaw esclavjamasa, carcelansa tʼaqesïna. ¿Josean ukham aguantatapat kunsa yateqassna? ¿Jilat kullakanakajj jan wal lurapjjestaspa ukhajj kunjamsa Josean experienciapajj yanaptʼistaspa?

11 Joseajj carcelankaskäna ukhajja, Faraonan coperonakapan jefepajj carcelankarakïnwa. Mä arumajja uka coperojj samkasïnwa, uka samkapajj kamsañsa muni uk Jehová Diosan yanaptʼapampiw Joseajj qhanañchäna. Uka samkaparjamajja, coperorojj carcelat mistjjasajj mayampwa Faraonar sirvïta sasaw qhanañchäna. Ukatsti, Joseajj kuna jan walinsa uñjasïna ukwa uka jaqer yatiyäna. Kuntï Joseajj siskäna ukhamarak kuntï jan siskäna ukanakat wal yateqassna (Gén. 40:5-13).

12, 13. 1) ¿Joseajj amukiti carcelan tʼaqesïna? 2) ¿Kunsa Joseajj coperoru jan awiskäna?

12 (Génesis 40:14, 15 liytʼañataki). Joseajj  “hebreonakan oraqepatwa lunthatanipjjetu” sänwa. Ukhamasti janiw juchapat ukham tʼaqeskänti. Jupa kikparakiw ina chʼusatwa juchañchapjjetu sasin qhanañchäna. Ukatwa nayat Faraonar parläta sasin copero jaqer mayïna. ¿Kuna amtampis uk mayïna? Jupajj akham sänwa: “Aka cheqat nayar apsuñapataki” sasa.

13 ¿Joseajj uka tʼaqesiñat mistuñatakejj janit kunsa lurkpachäna? Josearojj jilanakapaw jan wal lurapjjäna, Egipto markansa ina chʼusatwa tʼaqesïna, ukatwa yanaptʼa mayiñatakejj Faraonan coperopar kunanakas pasäna ukanak sum yatiyäna. Bibliarjamajja, Joseajj uka jaqerusa Faraonarusa, khitinakas esclavot aljantanipjjäna uk janiw siskänti. Kunapachatï jilanakapajj Egiptor jutasin Joseampi sumankthapipkäna ukhajja, Faraonajj sumwa uka jilanakapar katoqäna, Egipton jakapjjañapatakis oraqe churäna, ukatsti “kawkïritejj sumäki ukwa manqʼapjjarakini” sasaw säna (Gén. 45:16-20).

Maynimp jan waltʼayasisin yaqhanakar awisañajj ninjamaw wal aqtaspa. (14 tʼaqa uñjjattʼäta).

14. Taman jan wal lurapjjestaspa ukhajja, ¿kunas jan walinak jan parlañatakejj yanaptʼistaspa?

14 Mä cristianotï taman jan walsa lurapkaspa ukham amuyaschejja, janiw mayninakar awisañapajj wakiskaspati. Cheqas jilïr irpirinakaru yanaptʼa mayiñapawa, ukhamarak maynir jan wal lurir uñjasas yatiyañapawa (Lev. 5:1). Awisajja, jan jachʼa juchäki ukhajja, jupanakakiw sum parltʼas askichapjjañapa, janiw mayninakar awisañajj wakiskiti ni jilïr irpirinakarusa (Mateo 5:23, 24; 18:15 liytʼañataki). Ukhamanakan uñjasisajj Biblian ewjjtʼanakaparjam lurañäni, Jehová Diosatsa janipun jitheqtañäniti. Awisajj jan walsa lurapkistaspa ukhamwa amuyassna, ukampis qhepatakwa ukham amuyatasajj jan cheqätap amuyasiraksna. Ukham pasaspa ukhajja, uka toqet mayninakar awissna ukhajj jukʼampi jan walïspawa. Amtapuniñäni, jan walsa lurapkistaspa ukham amuyatasajj cheqäpasa janisa, jan wal parlatasajj janiw kuns askichkaniti.  Jehová Diosar taqe chuyma serviñäni, jilat kullakanakatsa janipun jan walinak parlañäniti, ukhamatwa jan pantjaskañäniti. “Juch jan luras jakki uka” jaqet parlkasajj Salmo qellqerejj akham sänwa: ‘Jaqe masipar janiw kʼarintkiti, jilaparus ñanqha janiw lurkiti, uta jakʼa masiparus janiw jiskʼachkiti’ sasa (Sal. 15:2, 3; Sant. 3:5).

KUNAS JUKʼAMP WAKISKIREJJA UK AMTAPUNIÑÄNI

15. ¿Jehová Diosampi sum apasitapajj kunjamsa Josear yanaptʼäna?

15 ¿Kunsa José waynat yateqasiraksna? 13 maranak jan walin uñjasisajja, kunjamtï Jehová Diosajj jan walinak uñjkänjja ukham uñjarakïna (Gén. 45:5-8). Joseajj janipuniw ukham jan walinakan uñjasitapat Jehová Diosar juchañchkänti. Kuna jan walinaktï lurapkäna ukanak Joseajj janis armkchïnjja, janiw colerataki sarnaqerïkänti. Mayninakan pantjasipjjatapatsa, jan wal lurapjjatapatsa janipuniw Jehová Diosat jitheqtkänti, ukaw jukʼamp wakiskirejja. Ukhamatwa kunjamsa Diosajj jan walinak askichi uk uñjawayi, jupasa familiapasa Diosan bendicionapwa katoqawäpjjaraki.

16. Tama taypin ina chʼusat tʼaqesiñanak utjaspa ukajja, ¿kunatsa Jehová Diosar jukʼampi jakʼachasiñasa?

16 Jiwasajj ukhamarakiw Jehová Diosampi sum apasitasjja wali askit uñjañasa. Jilat kullakanakasan pantjasitanakapajj janipuniw Jehová Diosat jitheqtayañapäkistuti (Rom. 8:38, 39). Tama taypintejj ina chʼusat tʼaqesiñanakajj utjani ukhajja, Joseat yateqasis janipun Jehová Diosat jitheqtapjjañäniti. Jan waltʼäwinakarojj kunjamtï Jehová Diosajj uñjki ukham uñjapjjañäni. Biblian qellqatäki ukarjam jan waltʼäwinak askichañatak chʼamachasktan ukhajja, Jehová Diosaw yanaptʼitani sas confiyañaw wakisi. Jupaw jan walinak tiempoparu ukhamarak amtaparjam askichani.

‘AKA MUNDPACHAN JACHʼA JUEZAR’ CONFIYAPJJAÑÄNI

17. ¿Kunjamsa ‘mundpachana jachʼa Juezar’ confiyatas uñachtʼaysna?

17 Akapachan jakkasajja, jan walinakan uñjasikipuniñäniwa. Awisajj jumasa jan ukajj khitirutï uñtʼkta ukajj taman ina chʼusatwa tʼaqesispa. Uk uñjasajj janiw Jehová Diosat jitheqtañasäkiti (Sal. 119:165). Jan ukasti Jehová Diosatakjam sarnaqañatakiw chʼamachasiñasa, juparuw confiyañasa, yanaptʼapsa mayisiñasaraki. Amtapuniñäni pantjasirïtas laykojj jiwasakiw janis walïkaspa ukham amuysna. Ukhamanakanjja, Joseatwa yateqasiñasa, jan walinaksa janiw maynit parlañasäkiti. Ukaw jukʼamp jan walinak jan utjañapatakejj yanaptʼistani. Ukatsti, jiwas pachpar confiyasiñat sipansa Jehová Diosaruw confiyañasa, Jupaw uka jan wali askichani sasaw pacienciampi suyañasa. Ukham lurañäni ukhajja, Josearjamaw Jehová Diosajj sum uñjistani, Jupan bendicionapsa katoqarakiñäni. ‘Mundpachan jachʼa Juezaw askichaskani’, Jupajj taqe kunsa cheqaparjamapuniw uñji, ‘luratanakapajj cheqapawa’ (Gén. 18:25; Deu. 32:4).

18. ¿Kunsa jutïr yatichäwin yatjjataskañäni?

18 Nayra tiempon Jehová Diosan servirinakapajj kuna jan walinakampis ina chʼusat tʼaqesiyata uñjasipjjäna uka toqetwa jutïr yatichäwin yatjjataskañäni. Uka yatichäwinjja altʼat chuymanïñasa, perdonirïñasa kunjamsa Jehová Diosat yateqasisin taqe kunsa cheqapar uñjañatak yanaptʼistu ukwa yatjjataskañäni.

^ tʼaqa 7 Willi Diehl jilatan experienciapajja, La Atalaya noviembre 1, 1991 maran mistkäna uka revistan “Jehová es mi Dios, en quien de veras confiaré” siski uk uñjjattʼäta.