Kunanakas utji uk yatiñataki

Skip to table of contents

Jehová Diosan Testigonakapa

Select language Aymara

¿Kunsa pantjasktan ukhajj lursna?

¿Kunsa pantjasktan ukhajj lursna?

Don ukat Margaret * sutini mä chacha warmin phuchapajja, familiapamp visittʼir jutapjjäna ukhajj uka chacha warmejj wal kusisipjjäna. Margaret warmejj manqʼa phaytʼañwa sum yatïna, jichhajj jubilatäjjewa, jupajj kuna maqʼatï allchhinakapar gustki uk phaytʼarapiñ munäna, fideompi quesompi, janïr sarapkipan familiapampi manqtʼasiñataki.

Manqʼañatakejj taqeniw mesan qonorjjapjjäna, ukaruw Margaret warmejj phayat manqʼa apanïna. Phuku qhaparäna ukhajja, quesokiw utjäna, Margaret warmejj janiw manqʼarojj fideo uchkataynati, armtʼasitaynawa.

Jilirïñänisa waynäskañänisa, wali experiencianiñänisa, pantjasikipuniñäniwa. Awisajj jan amuyasisaw kuns parltanjja, jan wakiski ukhas kuns lurtanjja, jan ukajj kuntï lurañasäkäna uk armtʼastanjja. ¿Kunatsa pantjastanjja? ¿Kunsa pantjastan ukhajj lurañasa? ¿Kunsa jan pantjasiñatakejj lursna? Kunjamtï Diosajj pantjasïwinakas uñji ukham uñjañaw uka jisktʼanakar qhanañchañatakejj yanaptʼistani.

¿PANTJASITANAKAS KUNJAMSA UÑJTAN KUNJAMSA DIOSAJJ UÑJARAKI?

Kunsa sum lurtan ukhajja, mayninakajj ‘walik ukham lurtajja’ sasin sapjjestu ukhajj sum katoqastanjja. Ukampis jan pantjasiñ munasa pantjastan ukhasa, jan ukajj mayninakajj pantjasïwinakas jan amuyapki ukhasa, pantjastwa sistanti. Ukham sañatakejj humilde chuymanïñaw wakisi.

Jachʼa jachʼa tukuri ukhamästan ukhajja, janiw pantjasitas uñtʼasiñ munksnati, antisas mayninakaruw juchañchjjsna. Ukham lurasajj jan waltʼäwinak janiw askichksnati, ukatjja jan juchaninakaw juchañchatäpjjaspa. Maysa toqetjja, janis juchanïksna ukham uñjayaskchiñänejja, Biblian aka qellqatat amtañasawa: “Sapa mayniw Diosarojj cuenta churañäni” (Romanos 14:12).

Diosajj janiw pantjasitanakas jaqenakjam uñjkiti. Salmos qellqatanjja, Diosajj “munasiriwa, khuyapayasiriwa” sasaw qhanañchi. Jupajj ‘janiw wiñay tim imjjäskiti’, jan ukajj chuyma usuyaskaniti, sasaw qhanañcharaki. Diosajja pantjasirïtas yatiwa, ukatjja “laqʼätas yati, ñeqʼet luratäpjjatas yatiraki[wa]” (Salmo 103:8, 9, 14).

Diosajj wali khuyaptʼayasir Awkjamajja, wawanakapjamajj kunjamsa jupajj pantjasïwinakas uñji uka pachpa uñjsna ukwa muni (Salmo 130:3). Arup toqejja, kunsa pantjastan ukhajj lurañasa, kunjamsa mayninakan pantjasïwinakap uñjañasa taqe ukanakatwa ewjjtʼistu.

¿KUNSA PANTJASISAJJ LURSNA?

Pantjasipjje ukhajja, yaqhepanakajj mayninakar juchañchañatakiw tiempsa chʼamsa aptʼasipjje. Jan ukajj luratanakapat janis juchanïkaspa ukham tukuñatak chʼamachasipjje. Ukham lurañat sipansa, mayninakampi sum apasiskakiñatakejj  ¿janit pantjasitasat perdón mayiñajj wakiskaspa? Pantjasitasajj jiwas pachparusa mayninakarus jan waltʼayani ukhajja, colerasiñat sipansa, mayninakar juchañchañat sipansa uka jan waltʼäwi askichañatakiw chʼamachasiñasa. Maysa toqetjja, janis juchanïksna ukham tukuñajj jukʼamp jan walinakaruw purtʼasiyistaspa. Ukham lurañat sipansa pantjasitasat yateqañasawa, askichasajj armtʼañasarakiwa.

Maynejj pantjasi ukhajja, jankʼakiw colerasna. Ukham lurañat sipansa Jesusan aka ewjjapatwa amtañasa, jupajj sänwa: “Taqe kunans kunjamtï jaqenakampi uñjatäñ munapktajja, ukhamaraki jumanakajj jupanakar uñjapjjam” sasa (Mateo 7:12). Pantjasitasat mayninakajj perdonapjjestu ukhajj wal yuspärtanjja. Ukhamajj mayninakajj pantjasipjjani ukhajja, ¿janit munasiñamp uñjaskakiñatak chʼamachasiñasäspa? (Efesios 4:32).

¿KUNAS JAN PANTJASIÑATAKEJJ YANAPTʼISTASPA?

Mä diccionariorjamajja, jan sum amuytʼasiritasata, jan sum yatitasata jan ukajj jan sum istʼatasatwa pantjastanjja sasaw qhanañchi. Cheqansa taqeniruw ukajj pasistu. Ukampisa jan añcha pantjasiñatakejja, Biblian yatichäwinakapar istʼañaw yanaptʼistaspa.

Mä yatichäwejja Proverbios 18:13 qellqatankiwa, ukanjja siwa: “Maynin arunakapa jan sum istʼkasina arsuñajja, jan amuytʼanïña, mä pʼenqarakiwa” sasa. Cheqansa maynin arunakap sum istʼañäni ukhasa, kamsañänisa uk amuytʼasiñäni ukhasa janiw chuyma ustʼayir arunak arskañäniti ni jankʼakis coleraskañäniti. Ukatjja sum istʼañaw ina chʼusat jan juchañchañatakejj yanaptʼarakistani.

Biblian yaqha yatichäwipan akham sarakiwa: “Kawkjakamay wakischini ukhakamajj taqe jaqenakampi sumankapjjam” sasa (Romanos 12:18). Ukhamajj taqenimpi sumankañataki mayachtʼatäñatak chʼamachasiñasawa. Trabajonkir masinakasar munasiñampi respetompiw uñjañasaraki. Ukatjja walik ukham lurtajja sasin chʼamañchtʼañajj wakisirakiwa. Ukham lurasajja, maynit maynikam perdonasiñajj janiw chʼamäkaniti. Jachʼa pantjasiwinaksa suma arunakampiw askichasispa.

Pantjasitanakasat yateqañasawa. Kuna jan walsa parlañäni ukhasa jan ukajj lurañäni ukhasa janis juchanïksna ukham janiw tukuñasäkiti. Antisas kunjam chuymanïñasas wakisi uk amuytʼañasawa. Inas paciencianïña, khuyapayasirïña jan ukajj munañasampi jan apnaqayasiña faltaskchistu, jan ukajj suma chuymanïña mayninakampi sumankaña munasiña faltaskchistu (Gálatas 5:22, 23). Ukatjja kunsa jan lurañamäki ukwa yateqäta. Pantjasiñäni ukhajja, janiw aynachtʼañasäkiti, janirakiw ukhamak jaytañasäkiti. Antisas pantjasitasat larusiñasawa ukaw yantʼistani.

¿KUNJAMSA PANTJASITANAKAS DIOSJAM UÑJAÑAJJ YANAPTʼISTASPA?

Jiwasanakajj kunjamtï Diosajj pantjasitanakas uñjki ukham uñjañäni ukhajja, kun lurañsa yatiñaniwa. Ukaw jiwasarusa mayninakarus sum jikjjatasiñatak yanaptʼistani. Pantjasitanakasat yateqañäni ukhajja, mayan sum amuytʼasiñataki ukhamarak suma chuymanïñatakiw yanaptʼistani. Ukatjja janiw aynachtʼkañäniti ni jan wali jaqëksnasa ukham amuyaskañäniti. Mayninakajj kunjamsa jan aynañchtʼañatak chʼamachasipki uk amtasajj jupanakaruw jakʼachasirakiñäni. Taqe ukanakat sipansa, Diosjam munasir chuymanïñataki, mayninakar jankʼak perdonañatakiw pantjasitanakasajj yanaptʼistani (Colosenses 3:13).

Qalltan parlaniwayktan uka Margaret warmin pantjasitapat ¿kunsa lurapjjäna? ¿Familiapajj coleraspachänti? Janiwa. Margaret warmejj ukham armasitapat larusïnwa, familiapas ukhamarakiw larusipjjäna, ukat juntukiw kuntï utjkän uk manqʼasipjjäna. Walja maranak qhepatjja, allchhinakapajj uk amtasajj wawanakapar cuentʼapjjäna, kunjamsa kusistʼapjjerïna uksa cuentʼapjjänwa, cheqansa Margaret warmejj janiw jachʼa jucha lurkänti.

^ Párrafo 2 Yaqha sutinakamp uchatawa.